|
|
|
 Re: كوفيدات.. (Re: محمد المرتضى حامد)
|
سلام مولانا
دى لوحة ادبية ولّ هلوسة خوفة من كورونا
هسى لو قلنا كتابة طاعمة يجى صاحبك قباني بجهجه باكاتنا
على العموم حتة الدكتور بتاع نومة العصر جابت قى بالى زول علبة البحاري
يشتريها يوم تكون فى لعبة ... حفلة ... فى الحلّة او الحلال المجاورة عشان القشرة وكده
يوم بعد ما جهّز بحاريهو و مشى على الحفلة لقاها اتلغت
عاين ليهم كده و بى حسرة قال ليهم: هسى علبة البحاري دى اشربا وين
___
فى درب عشق البنات ياما فى بلاوى لكن مع الكرونة و التباعد الاجتماعى
حتى الشوف ح بكون طشاش وغصب نرجع لى زمن
يخلق من الشبة اربعين
| |
 
|
|
|
|
|
|
|
|
Re: كوفيدات.. (Re: muntasir)
|
| Quote: لكن بعد إصابة الأمير تشارلس وجونسون أب شعرا منكوش وزوجة ترودو اللطيفة وبعض علية القوم if any ، ستتغير مفاهيم خاطئة حتى يأتي يوم يتقدم فيه أحدهم طالبا يد إحداهن فتسمع في ونسة هوانم قاردن سيتي والرياض أو الكلاكله اللفه : قالوا الخطيب العايز بت شيراز حلاة الدنيا عليهو، وجاهة وعز وقالوا درس في لومبارديا وشغال في إزبانيا وعنده شقه في برشلونه وشِدة ما مرتاح كان عندو كرونا. نعم، ستتغير مفاهيم مجتمعية عدة فالإنسان أسير إعلامه إلا من رحم ربي. |
صباح الخير بتوقيت اديس التي تحب
هههههههههههههه
| |
|
|
|
|
|
|
|
|
|
Re: كوفيدات.. (Re: Yousuf Taha)
|
المثقف الكبير و الاديب الأنيق أستاذ محمد
سلامات
والله العكة الشاملة الحصلت في الدنيا دي جننتك و جملتك فوق جمالك .
هسع عليك الشيخ حاج حمد دي كتابة نصاح ؟
انت بتفرفر الحروف دي كيف ؟
قاعد تشرب بركيب بقر شبعان عيش ريف ؟
ولا مقرطع ليك جك منقة زيدابية قبال النوم ؟
...
رحم الله عزيزنا النشمي د. الطيار ورفاق الطيار .
وعاجل الشفاء لعموم الاحباب .
| |
|
|
|
|
|
|
|
|
Re: كوفيدات.. (Re: Osman Musa)
|
سلام مولانا المرتضى
شكراً على الخضرة اليانعة في الكلمات و المعاني.
رحم الله الأموات و الأحياء و البين بين.
كما تفضلت على سطح الكورونا ظهر من ينشر الجهل و من يبحث
عن ثروة بالإحتكار أو الإحتيال و الخزعبلات صحيت على مكالمة من شخص
مجهول الساعة الثالثة و نصف فجراً، قال المتحدث :
( الشيخ عبد الباقي نام بالخيرة و قال ليكم اشربو كل شئ بدون سكر
و رسلو ليهو البياض)!!
| |
|
|
|
|
|
|
|
|
|
Re: كوفيدات.. (Re: نعمات عماد)
|
قال المتحدث :
( الشيخ عبد الباقي نام بالخيرة و قال ليكم اشربو كل شئ بدون سكر
و رسلو ليهو البياض)!!
إبداع والله..
يا سلام ياخ..
بالغ شيخ عبدالباقي .. عايز البياض؟
المره الجايه حا يطلب البلطي..ههه.
والله يا دكتوره ٩٠./. من الفيديوهات وال (نصائح) التي مرت بي كانت من ناس لا علاقة لهم بالطب أو مجرد حصص العلوم..
في واحده عندها رساله صوتيه وادعت انها تعمل بال NHS في بريطانيا ونصحت كل من يعاني من مشاكل في التنفس (كمرضى الأزمه)
أن يبتعد عن استعمال الكورتيزون هذه الايام..
يعني يموت قبل الكرونا تهبشو، وأضافت ، قدس الله سرها، أن الموضوع لا علاقة له بفيروسات بل غاز (في الجو)..
ذكرتني قصيدة لمظفر النواب:
يحيا الغاز..
| |
|
|
|
|
|
|
|
|
|
Re: كوفيدات.. (Re: Osman Musa)
|
عثمان موسى،
عاين،
سمعت لي مثل بنغالي أو بنجوريون متداول في حي العرب بيقول: لو قالوا ليك سمين قول آمين، غض النظر عن مصير الركب والديسك.
عليه أشكرك على كلامك، لكن وحاة الخوه الماها خوة مؤتمر وطني ، فقد أنكروا بعضهم بعضا، الكتابه دي ، أو بالأحرى هذياني المقروء،
سببها إبداعات خلايق الله الاتسببت فيها الكورونا. لامن اسمع الفيديوهات التي اصبحت هواية كل من هب وتب ودب أقول أحسن الكورونا
الكرونا دي نعمه مقارنة بالجلد اليومي نعمه والله.
بعدين انت حارم وصلي مالك؟
| |
|
|
|
|
|
|
|
|
|
Re: كوفيدات.. (Re: muntasir)
|
يا منتصر،
إنت لسه قاعد بي جاي لا سمعت نصيحة تلك السيده القالت الرجال لازم يدخنوا درءا للكورونا؟
يعني انت لسه ما حفرت الحفره لا اشتريت الشاف لا الطلح؟
بالطريقه دي بزعل منك ولن أخلع عليك لقب (الطابق) البوخه..
هسه عندي شله أقل واحد فيهم قام ندا يهتتتف ونام من الدوخه وإيدو عاقباهو..
قم يا منتصر، ألحق الجدله المملوخه.
يا حليلك يا ود الرضي.
| |
|
|
|
|
|
|
|
|
|
Re: كوفيدات.. (Re: جلالدونا)
|
الدون جلال..
عوافي يا بركه..
وحاة الخوه مافي خوف..
صدقني إحتمال اموت بسكته أضعاف احتمال الموت بغيرها..
كنت في سفر طويل التيلة نوع ١٧ ساعه طيران ورجعت منذ شهر ونصف أقحقح
والجسم مرجرج (بس ما خايض الوحل) وناقصني الصداع والحمى لكن الحمدلله هسه
كويس، ولولا النقه لقلت لك أنها ربما أناخت ركابها وارتحت بعدما لم تجد فشفاش تعيش
عليهو، هردوهو بتاعين اللنغاز فتحاشته الكورونا. هسه اللوكسجين بيضخوهو لينا السمحين..
بس في ناس بنريدم أخافتهم وحجبتم عن عيني إلا من قلبي لا لا،
بقيت راقد ادندن ( يا الحرموني منك)..
| |
|
|
|
|
|
|
|
|
|
Re: كوفيدات.. (Re: محمد المرتضى حامد)
|
امتعتني يا مولانا بهذه السياحة ..
تعجبني في مهارات كتابتك ..
فضاء التامل الوجداني الذي تحبسنا في إطارة..
فتسرح أنفسنا متأملة عبارة أو كلمة وضعتها بعناية ..
على إثرها تفرج الشفاه عن ابتسامة أنيقة..
ما تلبث أن تتحول إلى قطبة تعلو الجبين..
ثم ترتخي القطبة أمام جزالة لغة محسوبة بمقياس ريختر..
تدفعك دفعا لتنتفض من مقعدك لاعنا سنسفيل كرونا..
التي حرمتك من أحاسيس لغة الجسد و الحضن الدافيء..
براحه علينا يا مولانا مشاعرنا في ظل هذا الحبس الاجباري أضحت أوهن من حبل العنكبوت..
حفظك الله وإيانا من هذه الجائحة التي أيقظت حتى في مجال سياسات السوق ومنحدرات علوم الاقتصاد..
روح نظريات الاقتصاد الاشتراكي.
| |
|
|
|
|
|
|
|
|
|
Re: كوفيدات.. (Re: حسام الدين حمودة)
|
| Quote: ولعل العالم عرف أن أوجه الصرف على العلم والمعرفة والبنى التحتية هو المجد وهو الملجأ حين تدلهم الخطوب، وأن العسكرة وصفا انتباه لم تعد تعصم من الماء فبلغت القلوب اللوزتين، وأن النياشين والأوسمة أيضا تستحقها صدور ظلت تقف في الخلف كجيوش ملائكية، |
عليك دينك قول ليهم يا ابو اكرم و كرر ليهم لغاية ما يقع ليهم الكلام دا في امخاخم المعطلة دي ....
بعدين ازيك ياخ .... 🌷🌷🌷🌷🌷
| |
|
|
|
|
|
|
|
|
|
Re: كوفيدات.. (Re: محمد على طه الملك)
|
مولانا العالم الملك..
الله يجبر بخاطرك فأنت تمنحني أكثر مما أستحق وهذا كرم منك وهكذا عهدناك تهدينا جميل الكلم والهدية على قدر مهديها،
لست من محترفي الكتابة (الودية) فقد هَلَكت كتابة ما ندفع به إلى المحاكم والعقود وأنت أستاذنا فيها ، الكثير من الجماليات
نسبة لصرامتها التي تعرف، حيث لم تعد المرافعات بالمستوى الذي قدمه العماليق في الزمن الأخضر حين كانت المرافعات
لوحات تحسب ضمن عصر النهضة ومطالعة ال SLJR تكفيني مؤونة الشرح ..
لست من المتشائمين بالفيروس وما تمر به الأرض وهي كلها لاتساوي ذرة في غبار الكون ، والكون لايسوى (كوارك) في
ملكوت الله ، سبحان الله خالق السموات والأرض والكورونا . إن الله أراد بخليفته في الأرض خيرا ، حتى إن كان ما يحدث
(بروفة) صغيرة ليوم تذهل كل مرضعة عما أرضعت. الشر يتدفق من كل اتجاه وطغى البعض واستكبروا وظنوا أنهم مانعتهم
حصونهم وترساناتهم وترليونات صرفت للقتل في كل اتجاه، لذا كان لابد من هدنة وإجراء عملية جرد ، مش يمكن نطلع لينا
بشوية مدارس ومراكز صحية ومياه صالحة للشرب في زمن اليخوت والبرايفت جيتس ، مش ممكن يدونا نظره، بسمه، وزي ما غنى
صلاح محمد عيسى نناجي العالم الأول (نظره تغير حالي ، لا عايز انت تتحن ولا ترحم حالي ، ليه انت ما تعطف علي يا غزالي)..
يا مولاي، لامن الواحد يقرا كتاب جون بيركنز ( Economic Hitman ) و كتاب بول فيندلي (من يجرؤ على الكلام) وما مر بك
عن كتابات الحروب وتقتيل الأبرياء والظلم المجاني لإشباع شهوات البشر الطغاة ، بيعرف إنه في درس كبير جاي ،
نحن نسأل المولى أن تعود الحياة طيبة وأن يرفع المولى البلاء عن بني البشر أيا كانت إحداثياتهم ومعتقداتهم وألوانهم ويرحم الموتى
ويشفي المرضى جميعهم وسنكون سعداء لكنا سنكون أسعد إذا جاء من الحرفا حكاما يوزنوا لينا تربيزة الهارت المايله دي.
| |
|
|
|
|
|
|
| |
محمد المرتضى حامد
جلالدونا
Yousuf Taha
Osman Musa
نعمات عماد
محمد على طه الملك
حسام الدين حمودة
ABUHUSSEIN
فيس بوك
تويتر
انستقرام
يوتيوب
بنتيريست