سراويل الصبر

01:38 PM March, 16 2020

سودانيز اون لاين
عبدالماجد موسى-بريطانيا / لندن
مكتبتى
رابط مختصر

*سراويل الصبر*

أقيف يا زول
اقيف دا الخمسه وتلاتين حول
وقالع حقك المزروع في أم الغول
وخت لائين
بلد نهواها من زمن الخريف عرضين
وفيهم طول   
ننز عافية وحمدلله
ترانا سمان
قفانا ملان
نكرّع في الغنا وداشين
ونتسرح
ونسرح في الخلا الدوباي
صح ولدونا فْ زمن هَدَّاي
يدفّر في عناقرنا
ونقيفلو قناي
أقول ليكم دي قُولَةْ خير
للجايَّات كبرنا عديل
أرحلوا إنتو والجايين
وشِدوا جنا العفاريت جاي
عَقَابكم حدو حد النيل
نحن أملنا ما مرحوم
يلاقيكم
دُوَاسْ فجرية سلال الرويح والنوم
حُرْقة دمَّنا المسروق وصمه فْ جبين حراي
نَمَشْ كواي
ملح أخضر عصارة ناي
تفج الكوم
وتنتح زي دم اب شرا الدفاي
ساس في الخلوه وقَّاد حي
يصارع فيكو ما جكاي
يهش القول
يدردر في الهوا النقاي
بذور للثورة
نبضاً حر
علم رفاي
حبوبة عُمُرنا حباب جيتك
وادْخُلِي ساي
إِذْنِكْ زي صلاتك
بير
تمر وقاي
سياسة بتبلع التيرانْ
وتور ساستنا خَرْيانْ في القمار
شَرَّاي
نضالهم ربطه وابريق شاي
سلاحهم كَلَّمُوا الجايين
دلالِيكْ الحناجر راي
بلد ودرانه زي فاس اللمين
اب راس
تَصْحى صباح
تجرجر في خطوط الطول
وعِرْضكْ في البدافِر جاي
حريف والله
دَسَّاسْ النهار في الطين
خلى الجمعه لون غَشَّاي  
أصل الدنيا مفتاح صرخة
في وش التخين
عراي
تجونا دغيشه متعشين
وتزعلوا كان وِلِدْنا كتير
حمير والله
في فهم ام بُنَاياً قَشْ
دي حياتو تطير
البِمْسِكْ صلاة الليل
ويكتُل في طفولة الراي

وما بعد الصبر إلا الفرج

عشمنا كبير في بـــــــــــــــــــــــــــــــــــــــــــــــــــــاكر

تَصْحى صباح
تجرجر في خطوط الطول
وعِرْضكْ في البدافِر جاي
حريف والله
دَسَّاسْ النهار في الطين
خلى الجمعه لون غَشَّاي
أصل الدنيا مفتاح صرخة
في وش التخين
عراي

****

سلمت يمناك وسلم يراعك أخي عبدالماجد
واصل هذا الأبداع

رائع كالعادة حبيبنا عبد الماجد
اتمناك و الاسرة بألف خير
تحياتي ليهم كلهم

وليد طه
هشام الدردري
أبو جهينة
خضر الطيب
شكري وتقديري لكم جميعا
وألف شكر لكلماتكم الطيبة الرقيقة
والتحية ليك أخي خضر والأسرة بخير وأرجو أن تكون كذلك