Post: #1
Title: يا الخرتوم
Author: أبوذر بابكر
Date: 03-14-2020, 12:18 PM
12:18 PM March, 14 2020 سودانيز اون لاين
أبوذر بابكر-
مكتبتى
رابط مختصر
مرقت من فرقات زمانى
وأنا جاي ليك
وقفت فوق تلة اساي
وما شفت غير
حُترُب العمر الدراش
مكتف بى جنازير حزنى الحمانى
اجيك براى
وحداك
رقدت على جنبة شقاي
وما لقيت
غير عفوة الحلم النسانى
عاينت ليك والشوف طشاش
وما وصل
جيهات مقيل شمس العمر
تحت ضل الأمانى
وناديتك
جفل طعم الدعاش
وحس الغنيه فى خشمى
مكتف بى حبال صوتى
وقفت بعيد
اتاوق لى زحيح موتى
و جوه العتمة
ولعّت الصبر فانوس
تايه فى بطن حوتى
وقعدت اكوس
لقيت اسمك بضوى هناك
لقيت اسمى
فى لوح الودار منقوش
لقيت خوفى اللبد جواى
حداى مفروش
فيا جهرة مباهج الكون
منو الختاكى فى بالى ؟
منو الأهداكى لون ؟
وجواى القليب معروش
ملان احزان
وجيب الفرح خالى
اقيفى معاى
خلينى النشِد
صهوة غنايا واجيك
نهوّن قاسية الأيام
نلوّن لوحة الأحلام
نشد حيلا الفتر
ونناغم النجمات يجن
نقعد حداك أنا والقمر
نبارك اللون المقسّم طعمه
بينك والشدر
ونمسك رعشة الطرب الأكيد
البوزع نغمه
بينك و الوتر
وتهجس حرقة الشوق المديد
المدفق دمعه
بينك والأتر
وا ضيعة الولد الكتم
ريدو الشديد
شايفك صباح
حد البصر
راقد يعامت فى وحيح الليل
الفرزع نجيماتو السفر
الضلمة والخوف و السهاد
رفاقة العاشق الفضحو البعاد
صلاكى جهرا
وما انستر
دساكى في دمو المباح
ختاكى فى خاطر النشيد الإنكسر
جوه فى خاطر النشيد الإنكسر
|
Post: #2
Title: Re: يا الخرتوم
Author: Osman Musa
Date: 03-15-2020, 07:14 AM
Parent: #1
ربطة شوق .
وباكو امنيات بالصحة و بالتوفيق في غربتك التالتة .
|
Post: #4
Title: Re: يا الخرتوم
Author: أبوذر بابكر
Date: 03-15-2020, 07:56 PM
Parent: #2
ابو عفان
الله لا قعدنا فى البلد الغريبة وعجيبة دى
لكين قربت خلاص
منتظر بس نتيجة امتحان غريب وعجيب
لو نجحت بجى السودان
ولو ما نجحت برضو بجى السودان
بس كيف نتيجة الجن دى تظهر
|
Post: #3
Title: Re: يا الخرتوم
Author: Fatima Alhaj
Date: 03-15-2020, 09:16 AM
Parent: #1
Quote:
قعدت اكوس
لقيت اسمك بضوى هناك
لقيت اسمى
فى لوح الودار منقوش
لقيت خوفى اللبد جواى
حداى مفروش |
و لا أروع أبوذر،،
هذه خرتومنا نناجيها وتجفينا..
صح لسانك ،،،
|
Post: #5
Title: Re: يا الخرتوم
Author: أبوذر بابكر
Date: 03-15-2020, 07:58 PM
Parent: #3
الروعة تستكمل
ويبقى المكان أجمل
اكيد بحضورك يا فاطنه
تحياتى وكل التقدير
|
|