للكــوامر العمروها فقط.. (فيديـــو)

03:30 PM March, 12 2020

سودانيز اون لاين
Abureesh-أمريكا
مكتبتى
رابط مختصر

زمان أنا كنت قايل (ترنتي) هو السمين ،،،، لكن بعد كده فهمت العكس ،،، الضعيفوني ده هو ترنتي ،،،،
بس الكلمة شكلها زول سمين سمين كده

يا حسام في سينما الرابعة كان اسمهم ترنتي السمين وترنتي الضعيف 😂

Quote: يا حسام في سينما الرابعة كان اسمهم ترنتي السمين وترنتي الضعيف 😂

الإتنين ترنتي !!!! هههه دي بالغتو فيها ،،،

الفيديو ما شغال..
وبقول this video is not available

بد سبنسر و تيرينس هيل

الفلم ده اعتقد انا خشيتو في سينما حلفايا ...
السينما اتملت قعدنا في الزنكي القدام البلكون ...

كان الفلم يخلص ... تمرق الشارع تلقى في ناس بمثلوا فيو في الشارع ...

و تلقى ناس مرقت وقفت في صف الدور التاني متوقعين الخاين ما يموت ...

ابو الريش ... ديك ايام لا تنسى ...

Quote: الفيديو ما شغال.. وبقول this video is not available

الفيديو شغال ،،، ممكن ما بيشتغل في أمريكا بسبب حقوق النشر والطبع .

Quote: الفيديو ما شغال.. وبقول this video is not available

يا امتثال قلنا الفيديو دا للكوامر.. انتى كومر؟

قلنا نتفرج على افلام زمان...ونشوف ذوق الكوامر كيف ...
طبعا ما كنت عارفة معنى كوادر..لكن المسنوحة بسمات قالت
قاصدين بالكوامر الناس العجائز....

More to come

شوف يا ابو الريش...
هبشتني في الحديدة البتجيب لي الزار
و Django لا يرحم.

ياسلام ابو الريش
ايام جميلة جدا في الزاكرة
سينما كوستي نجي لوحة الاعلانات
قبل يومين عشان نجهز حق التزكرة
تحياتى لجميع الكوامر
بيرو

وكذلك سارتانا الذي لا يرحم الضبانة

هلا كوستاوى..
شكرا على الحضور الدسم

رغم شغفنا الكبير بأفلام الكاوبوي وديجانقو أبو تابوت ،، ورنقو ،،، والممثلين فرانكو نيرو في ديجانقو وبرذو كلين إستوود وشارلس برونسون ،،،
ولكن أكثر فيلم تأثرت به ومازلت أتذكره حتى اليوم ،،، فيلم Hair 1979 ،،، فتشت عنه ولم أجده كاملاً في اليوتيوب ،،،
وهنا لقطات نهاية الفيلم ،،، فيلم روعة وكان له تأثير كبير في إثارة الناس ضد حرب فيتنام
ممكن تشوفوه كامل في موقع egybest

شكرا لكل الاحباب المروا من هنا.. و شايف القراش اتملأ كوامر..

عارفا يا استاذة امتثال
كنت أتمنى ان يشرح لك ابو الريش معنى كومر وجمعها كوامر
خاصة صاحبتك قال ليك:

Quote: قلنا نتفرج على افلام زمان...ونشوف ذوق الكوامر كيف ... طبعا ما كنت عارفة معنى كوادر..لكن المسنوحة بسمات قالت قاصدين بالكوامر الناس العجائز....

عارفا بسمات ادتك المعنى باغتضاب
والقصة حصلت في نادي الفنانين
وهي من اروع طرف الفنان ابو داؤود
زمان ناس الحفلات كان بجو نادي الفنانين للتعاقد مع احدهم لاحياء سهرة عرس طهور خطوبة ألخ
بعدين كان النادي لا يغيب عنه عمالقة الفن وردي والكابلي وصلاح بن البادية ابراهيم عوض والجابري
انتظارا للعداد يشتغل
وقتها لم يكن هناك تواصل عبر الهاتف او مدير اعمال الفنان بس تجي نادي الفنانين
كان ذلك في السبعينات من العقد السابق
وكانت الظروف تماثل الظروف التي تعيشها العاصمة هذه الايام
قلة في المواصلات والخبز
لهذا ظهرت موضة البكاسي التايوتا كويسلة للترحيل وكانت رخيصة وسريعة ويرغب الناس في استخدامها
لهذا عندما يحضر عريس او خطيب للاتفاق مع الفنان وكان عمالقة الفن الذي اشرت اليهم غير مرقوبين في حفلات الاعراس
لانو طلع في الكفر في تلك الايام مغنين شباب منهم
زيدان ابراهيم عبدالعزيز المبارك ومجذوب اونسة إلخ
فكان الاختيار يقع على احد هؤلاء الشباب
وفجأة تعلقت اذن المستمع باغاني عثمان حسين
وقوم يا عثمان حسين اعمل نيو لوك
يعني حلق شعرو وصبغو وحلق الدقن والشنب وبدأ يظهر بالفل سوت الكاملة
وقام عثمان حسين ضرب الشباب وبقى فنان الحفلات الاول
ففي يوم وداخل النادي كان زميل لعبدالعزيز محمد داؤود يشكو له مر الشكوى عن سوء حظهم وانعدام عدادهم
وقال ليهو
بالله يا ابو داؤود البكاسي قبضت مننا الجو
يا كافي البلا يوم واحد ما يطلبونا ؟
وهو يرمي بكلمة البكاسي للفنانين الشباب
فاجابه ابو داؤود
انت في البكاسي ولا الكومر العمرو ( ويرمي لعثمان حسين)
ومن يومها تم تعريف العجائز بالكوامر
مع مودتي لصاحب الطرح والمتداخلين

هههههههه.. طلعت كومر عمرة كاملة يا الكنزى. .. والمرحوم ابو داؤود قفشاته ما بتخلص.. بالمناسبة وفى نفس خط الشرح لجيل Tesla دبل.. الكومر كان شاحنة متوسطة فبها كابينة القيادة تشيل نفرين و ف. الحلف كنبتين طوال على الجانبين و ما فى سقف. دا كان الكومر.. و كان يستعمل بواسطة بوليس السودان فقط التنقلات و الترحيل

علي الكنزي
شكرا والله على الشرح المفصل....الان أصبح معنى كومر واضح...خصوصا كلمة الكومر العمرو..يا دوب فهمت يعنى المعنى
عملوا عمرة الماكينة ...بعد الماكينة عجزت وتهلهلت ...زي ما الفنان عثمان حسين عمل ترميمات كي يصبح شاب ويضرب الفنانين الشباب ...
...
تخريمة خارج الموضوع، ،
أعلن ترامب إنه سوف يعلن حالة الطوارئ في كل أمريكا للحد من انتشار الكرونا...
يعني احتمال يحبس الناس في بيوتهم ...ومافي زول يطلع بره البيت الا بتصريح...
والجامعات والمدارس بدأت تقفل أبوابها..والدراسة من منازلهم..ونحن حيعملوا لينا دوائر
تلفزيونية مغلقة .....

كولمبيا لسة فاتحة يا امتثال؟ بنتى قبل قليل قالت لى NJIT قفلوه و كل الكلاسات أونلاين

▲ ▲ ▲كومر
عذراً صاحب البوست ،،، لكن دي نكات كوامر برضه ،،،، وكومر من أقدم عربات الشحن ،،، معتتة عديييل كده
أعتقد لقب بكاسي لم يكن لزيدان وعبد العزيز المبارك وجيلهم فقد كانوا فنانيين لهم وزنهم ولديهم أغانيهم وجمهورهم ،،،
لكن البكاسي ديل فنانين ظهروا في الثمانينات ، يجيك الواحد مثلا يقلد وردي ،، ولو سمعته من بعيد بتفتكر إنو وردي هو البيغني ،،
مثلا محمد عبد الله ولقبه (محمد عبد الله وردي) ،، عبد اللطيف عبد الغني (وردي الصغير) ،، الجيلي الشيخ ،،، والجيلي لما منعهم
وردي يقلدوه قلبها مديح ،، وكلهم برعوا في صوت وردي الى حد كبيييييير يقترب من الكمال ،، وكل واحد تخصص في فنان ،،
ما خلوا فنان ما قلدوه ووقفوا حالهم ،، وظهرت نكات كتيرة ،،،
◄ مثلا واحد كان بيقلد صلاح بن البادية ويقال إنه وردي قال (ياخ ده بيقلد صلاح بن البادية حتى في غلطاته ههههههه وطبعاً يقصد
كلمة (مالي شايفك يا شمش ،، أصلو يومك ما بمش) ،،، لأن إبن البادية كان بيغنيها يا شمش عشان القافية تمشي ،،،
◄ وظهر واحد إسمه تلودي بيقلد عثمان حسين ،، وصوته طبق الأصل ما تفرق بينهم ،،، يفرق بس السعر للحفلة ،،، طبعاً داك
عثمان حسين وده تلودي النكته إنو يوم واحد من وليدات الجيل الجديد ما سمع بي عثمان حسين قبل كده وحضر حفلة لقى عثمان حسين
زاااااته بي زااااته بيغني قعد يضحك وقال (ده منو ده العجوز البيقلد في تلودي ده) هههههههه
◄ من النكات أيضاً ،،، وهي نكتة ما أظنها حقيقة طبعاً الوقت داك كمال ترباس كان فنان شعبي يعني عمة وجلابية ورق و3 شيالين
وصفقة ،، كان قلب لي أوركسترا وموسيقى ،، وبدأ يغني أغاني غيره ما خلى فنان ما غنى ليه ،،، قالوا عبد العزيز محمد داؤود جاء
ماري جمب بيت زيدان إبراهيم ومن الشارع تاوق لي اوضة زيدان بالشباك كده لقى زيدان بيشرب ومزاجه عالي وبس قاعد بطل حفلات
وبروفات ،، قام قال ليه ،، إنت يا ...... ،، أقعد أشرب لي كده لما تلاقي ترباس بيغنى (في الليلة ديك) هههههه
نرجع لي ديجانقو والبرين ،،،

ابو الريش
يمكن نيوجيرسي موبوءة أكثر من نيويورك....مع انه نيويورك الآن فبها ١٤٠ حالة كورونا ..
نحن يا دوب بدينا قبل أيام قليلة اون لاين ...لكن في قرار يعملوا دوائر تلفزيونية مغلقة لبعض المواد فقط ..
..والطلبة كل مجموعة ٤ او ٥ فقط ....ولازم نشوف المحاضر كأنه معانا في القاعة ....
...عشان كده انت ليك خبرة في التكنلوجيا...

حسام الدين
انا كمان سمعت نكتة عن زيدان إنه في حفل زواج بدأ يعني في الليلة ديك ..
قالوا العريس انترفز وقام على زيدان اداه علقة ما ينساها..
ومن ديك زيدان بطل يغني في الليلة ديك في حفلات العرس ...
طبعا أفظع حاجة فنان يعني في الليلة ديك في حفل زواج ...مش كده !!!

من أجمل الأفلام التي رأيتها ولا أمل من رؤيته مرة وإثنين وعشرة ،،، فيلم Erin Brockovich وهو فيلم حديث إنتاج عام 2000 (حديث يعني ما زي ديجانقو) ،،، ويعتبر أيقونة في السينما الأمريكية ،، وصلت فيه جوليا روبرتس للقمة ،،، وهو أفضل من قمتها الأخرى فيلم Pretty Woman مع ريتشارد جير
برضو لم أجده كاملا في يوتيوب ،،، ويمكن مشاهدته أو تنزله كاملا ومترجم من موقع Egybest

أفلام ترينتي فيها نبره لا دينيه .. تظهر من خلال إستهانة السمين برجال الدين. في واحد من الأفلام دا القس بيقول ليهو: العمل دا لازم يكون عملوا لوسيفر بنفسه بتعرفو؟ فيرد لا .. ربما كان محترفاً من الشرق. والغريب أن ترينتي تعني الثالوث ..

الاخ حسام الدين
الف صباح عليك
والله اديت المنبر بعدا اخر
لانك موثق وعجبني اساهماتك عن بخت الرضا
بس عارف البكاسي ظهرت في عهد نميري في السبعينات ايام ازمة الوقود
والبكاسي هم الفنانين الذين اشرت اليهم (انا)
ربما استمر الوصف في الثمانيات للمقلدين للفنانين الكبار
وقد عايشت ذلك قبل هجرتي في يوليو ١٩٧٩ ثم عودتي النهائية بعد ٣٦ عاما من الغربة
ومن طرائف ابوداؤود
انو في المسرح اصرو عليهو يقول نكتة قبل ما يغني
قام قاليهم (اي للجمهور) انا بسألكم سؤال إذا جاوبتو عليهو بقول النكتة وكان ما جاوبتو مافي نكتة
قالو ليهو اسأل
فكان سؤاله :
الماسورة بت منو؟
وتفاعل الجمهور في الاجابة
وكل اجابة ابوداؤود يقول :
كضبن كاضب
وعندما عجز الجمهور عن الاجابة قالو لابو داؤود طيب جواب انت
فكانت اجابته:
الماسورة بت نقط
فانتابت المسرح هستيريا من الضحك
ولنسمع لاحد اغنياته التي احبها

فاتني ان اقول اخ حسام الدين
صورة الكومر لقطة
اوسكار
اوسكار
والحقوق محفوظة لصاحبة الاوسكار

البكاسى.. تقصدوا البرينسات.. اسمهم البرينسات.. و المرحوم وردى هو الذى اطلق عليهم هذا الاسم. و بالمناسبة عكس ما ذكر البعض فان زيدان ابراهيم رحمه الله كان من ضمن هذه الفئة.. البرينسات. لانه كان مبتدئ لسة يخطو خطواته الاولى.

Quote: والله اديت المنبر بعدا اخر

الأخ علي الكنزي ،،،
تسلم يا حبيب ،،،
والمنبر منور ويعج برواده وكلهم لا يشق لهم غبار ،،،،، والواحد بيحاول بلحق بغبارهم ويكون له بصمة ويعبر
عن رأيه بحرية ومنطق ،،،
لكن والله المنبر يختلف جداً من برة ،،، من جوة تشعر بأنك محاسب على كل كلمة تكتبها ،،، أي رأي مهما حاولت يكون
صائب فله معارضين ،، يلموا فيك بنظرة أيديولوجية ولا حزبية ولا دينية ولا عنصرية يقلوك قلي البن في قدح ويعملوا
منك بكري وتني ... هههه 20 موضوع ساحن كل مرة أأجلهم أقول خليهم شوية هههه لما يوم بس نغمض ونتلب في نص البحر ،،،
شكراً عزيزي للإطراء ويا رب نكون قدره ونساهم في بناء وطن شامخ ،،،

أبو داؤود مبدع بإسراف ،،، وبالذات عندما إجتمع مع الموسيقار برعي محمد دفع الله ،،، الموسيقي الذي يعزف على العود
في الفيديو الجبتو إنت فوق ،،،
أسافر بالسيارة كثيراً ويرافقني دائما أبو داؤود ،،، إبداع بلا حدود ،،، وأعتقد كلو كوم وأبو داؤود كوم براه لا يمكن مقارنته
بالباقي لأنه يختلف عنهم كما ونوعا وأداء ولطافة وإبداع ،،،
أسمع أغنية عروس الروض يا ذات الجناح ،،، تقرب تنزل دستور هههه

الاخ الحبيب حسام الدين
لا اريد ان اثقل ظهرك بكثير ثناء انت به جدير
بس قولك ادناه يحتاج لترجمة بمفردة اليوم
لانك بتستخدم مفردات كوامر
فامتثال وصاحبتا بسمات ما اظنو ح يفهمو قولك:

Quote: مهما حاولت يكون صائب فله معارضين ،، يلموا فيك بنظرة أيديولوجية ولا حزبية ولا دينية ولا عنصرية يقلوك قلي البن في قدح ويعملوا منك بكري وتني ...

وبيت القصيد في قولك:

يقلوك قلي البن
في قدح
ويعملوا
منك بكري وتني .

مقلاية بن وزمان كانت خشب من جذع شجر وشكلها زي القدح ده
▼ ▼ ▼

شرغرغ ،، وجبنة فخار
▼ ▼

فندك ومدق ،، والمدق هو الحديدة دي ويستخدم لطحن البن أو سحنه
▼ ▼

الوقاية وهي القطعة المدورة تحت الجبنة وبتقعد عليها عشان ما تقع وبتكون حمراء غالباً ومزخرفة بالسكسك
▼ ▼ ▼


زمان ونحن صغار كان جلسة القهوة لها طقوس ،، وبيقعدوا ليها أعمامنا وعماتنا العصرية كده ،،، ويتم تجهيز
كل شيئ في نفس الوقت
الصورة الفوق دي لمقلاة البن وزمان كانت مصنوعة من خشب وجذع شجر ، ولأنو خشب ما بيختوه في النار زي
الطوة الفي الصورة دي لكن بيختوا البن ويختوا معاه 4 أو 5 جمرات جوة المقلاية،،، ويبدأوا يقلبوه ويحركوه لما يتقلي
وعادة بيبقى أسود اللون ، وبعد كده يتم سحن البن في الفندك ، بواسطة يد الفندك أو المدق ،، وطبعاً زمان ما كان في
مسحنة ولا عدة قهوة تنكة ولا كده ،، عدة القهوة مصنوعة عند السمكري ، زي الشرغرغ الفي النار ده ،،،
أول دور قهوة يغلوه في الشرغرغ ويكبوه في الجبنة بيسموه البكري ،، بكسر الباء ،،،، لأن البن بيكون
جدبد وبنكهة قوية أول مرة يتغلي
بعد شوية بيقوموا يزيدوا الشرغرغ موية ويغلوه من جديد ويكبوه تاني في الجبنة ،، وبتكون القهوة أخف وبيسموها التني ،،
بكسر التاء والنون ،، يعني الصبة الثانية
أحلى ما في الشغلانة كلها القعدة والونسة والحكاوي ،،، يا حليلهم دوام بطراهم ...

و في قول اخر يا حسام
في ثقافتنا السودانية ...
كلمة بِكْرِي تستخدم لي وش العرقي ...
اول الغيث ... العرقي الصافي ...

و في سماحة اهلنا السودانيين
اتذكر نكتة الزول الاشترى قزازة عرقي (بكري)
و لأمن قعد مع شلته اتفقو انه ده ما بكري و انه ست العرقي غشتهم
و قام صاحبنا طبق القزازة و رجع ليها
ست العرقي حلفت و قالنله و حاة الله (بِكرِي)
و انا ما بغش و لا بدخل قرش حرام على وليداتي !!!!

هههههههه باشمهندس قباني
طبعاً بِكرِي هي لأي شيئ أول مرة ،،، يعني الولد الكبير بكر ،،، المرأة الفي الولادة أول مرة بكرية ،،
والبكر إن بقت قهوة صاموتية ،،، وإن بقت عرقي قوي ،،، وإن بقت ولد عوير ههههههه
تحياتي

علي الكنزي
شكرا لتشجيعك أي حسام عشان يشرح البكري والتني في القهوة ...
والله لو قعدنا لباكر ما كنا حنفهم معنى بكري وتني.. ونحن قريناها في البداية بكري..بفتح الباء ..وشكرا لي حسام الدين
الذي شرح لنا المعنى وموضح بالصور ....
ومع وافر تقديرنا وشكرنا واحترامنا

فى الشرق البجا.. اهل الساس والرأس فى الجبنة..
البكر (بكسر الباء و الكاف).. كل واحد يشرب منه فنجانين.. بعدين يدوها موية و يغاوها تانى.. دا التنى و يشربوا منه فنجان واحد.. تانى يدوها موية ويغلوها.. و التالت دا اسمه الخضر.. يشربوا منه فنجان واحد و ينتهى الفلم. الفنجان بلا سكر.. و اليخت شوية سكر ما يسوطو.. لو ساطو يضحكوا عليه يعتبروه شافع.
لو جابوا التنى و حضر ضيف جديد لازم يقلوا ليه بن جديدة.. لو ما سمع صوت المدق معناها اهانوه و ما عبروه..

Abureesh
حرفنا ليك موضوعك ،،، لكن كله من باب الجلكنة ولزومياتها ،،،،
طبعاً نحن ناس بحر أبيض حدنا التني ،،،، الخضر ده ما سمعت بيه ،،، وفعلا لو جاء ضيف تاني بيغلوا ليه جديد ،،، والجنزبيل بنعمله حبيبة كده ريحة بس ،،،
وزمان كنا صغاااار يعني بداية المتوسط كده ،،، قدر ما أقول لأعمامي يكبوا لي فنجان ،،، بقولوا يا ود القهوة ما كويسة معاك ،،، أقوم أتلايق وأقول ليهم ليه ،،، يقعدوا يضحكوا ويقولوا لي لما تكبر ح تعرف هههههههههههه
أها دحين كبرنا وعرفنا إنهم ما عندهم سالفة بس ههههههه