Post: #1
Title: حل عاجل لمشكلة الدولار وتجار العملة، البنك حيتملي دولارات
Author: احمد محمد بشير
Date: 03-01-2020, 02:25 PM
Parent: #0
01:25 PM March, 01 2020 سودانيز اون لاين
احمد محمد بشير-كُل اجزاءهِ لنا وطنٌ إذ نُباهي بهِ و نفتَـتِنُ
مكتبتى
رابط مختصر
الحل بسيط جدا وما عايز اكتر الكلام
البنك يشتري من تجار العملة مباشرة
بسعر ١٠٧
وتاجر العملة يشتري من المواطن
بسعر ١٠٥
وتخصص بطاقات لتجار العملة لحصرهم ويبقى شغلهم رسمي
كده تاجر العملة حيكسب ٢ جنيه في كل دولار، بطريقة رسمية وأي زول عنده رأس مال من الدولارات وعايز يشتغل مع البنك يجي يشتغل طوالي ويسجل اسمه وياخد بطاقتو وهو وشطارتو في السوق.
وطبعا تاجر العملة همة الربح ، واذا لقى ربح بالطريقة دي حيستقر سعر الصرف.
بإختصار شديد
تاني المواطن ما يتعامل مع البنك اذا عايز (يفك) قروش ،،، المواطن يتعامل مع تاجر العملة وبس.
وتاجر العملة اذا عايز كاش وورق اصلي ومضمون يتعامل مع البنك (بإيصالاته) وكده كل شيء حيكون في السليم.
سعر التحويلات البنكية العالمية لبنوك السودان لازم من 55 يرتفع الى 105 ، بنفس السعر البيتعامل بيهو تاجر العملة مع المواطن.
في ظرف ايام بسيطة مافي بنك حيحتاج دولارات او عملات اجنبية
ده اسلم حل.
والسلام عليكم ورحمة الله 🤗
|
Post: #2
Title: Re: حل عاجل لمشكلة الدولار وتجار العملة، البن
Author: احمد محمد بشير
Date: 03-01-2020, 02:35 PM
رد لناس المغالطات
اصلا البنوك قاعدة تتحصل على الدولار من تجار العملة بالطريقة الفوق دي،،، بس ما بصورة رسمية.
المفهوم بتاع البوست ده انه تعامل البنك مع تاجر العملة يكون بصورة رسمية. وتضمن لتاجر العملة انه يربح ٢ جنيه او جنيه في كل دولار، بصورة رسمية وبإيصالات.
حتى الصرافات الصغير ممكن تشتغل الشغل ده وتتعامل مع البنك وتوفر له الدولار.
سعر الصرف الجمركي يكون ثابت في مكانه اظنه ب ٤٩ جنيه ، يكون ثابت في مكانه علشان ما ترتفع اسعار البضائع الجاية من برة
باختصار:
المواطن ما يتعامل مع البنك نهائي في حالة فك الدولارات ، المواطن يتعامل مع تاجر العملة.
وفي حالة طلب الدولار ممكن يتعامل مع البنك ويشتري من البنك بسعر ١٠٧.
وتاجر العملة مهمته الاساسبة يجيب الدولار للبنك، ويربح أكيد.
طبعا حكومة حمدوك لازم تشتغل في مجال الانتاج الزراعي والحيواني وزيادة التحويلات البنكية من ٥٥ جنيه الى ١٠٥ علشان تضمن انه المغترب يحول بهذا المبلغ.
انا لي كم يوم بفكر في الموضوع ده
ولقيت انه ده اسلم حل للمغترب و للزول العنده دولارات داخل البلد
ما اظن في حل عاجل اسرع من الطريقة دي.
دايررزول يوصل الفكرة لحمدوك ولوزير المالية.
انا ممكن اوصل الفكر لبعض الاصدقاء في تجمع المهنيين.
وياريت الناس تساعد بنشر الفكرة بالشير
ولاتنسونا من حقوقنا الادبية وكتابة اسمي مع الخبر 😊
|
Post: #4
Title: Re: حل عاجل لمشكلة الدولار وتجار العملة، البن
Author: حسام الدين حمودة
Date: 03-01-2020, 02:49 PM
Parent: #2
تحياتي أخ أحمد محمد بشير
نسبة لأنو الواحد ما إقتصادي وكده فما بنتشالق ،،، لكن كمواطن عادي ممكن نسأل يعني ،،،
الكلام ده بالعربي كده ،،، يعني تعويم الجنيه بأنه يساوي سعر السوق الأسود ،،،
طيب شنو البيمنع تاجر العملة ما يبيع لي المستوردين والمهربين وشركات الإتصالات العايزة تحول قروشها الوهمية الباعوا الهواء بيها قبل ما يتكلموه الناس الى دولارات بمبلع 150 مثلا ،،،
من التجارب ،، كلما ساوت الحكومة سعر الصرف بسعر السوق ،،، رفع تجار العملة السعر وكسبوا الجولة ،،، واللي بيطلع ما بينزل .
رفع سعر الصرف بدون ذاع أمني توقف نشاط تجار العملة حل غير مجدي ويفاقم المشكلة
|
Post: #6
Title: Re: حل عاجل لمشكلة الدولار وتجار العملة، البن
Author: احمد محمد بشير
Date: 03-01-2020, 03:00 PM
Parent: #4
الحبيب حسام أشكرك على ردك
ومرحب بيك في البورد
بإختصار.
تاجر العملة لمن جاب الدولار للبنك كسب فيهو ٢ جنيه او جنيه ونص، تاني الطمع فوق كم؟
التجار و الموردين وشركات الأدوية والاتصالات لازم تعاملهم مع البنك في حال الطلب، مثلا بسعر ١١٠ او ١٠٩،٥، أي تاجر مستورد اذا ما اتحصل على العملة الاحنبية من البنك ما ياخد اذا استيراد وتصدير،،، ده حل برضو لضعاف النفوس الحيشتروا دولار من تاجر العملة مباشرةً. 🤗👍
اعيد واكرر تاجر العملة حيستفيد ويكسب ٢ جنيه وفي شغل مضمون.
اذا باع (تاجر العملة) الدولار (للمورد) او (تاجر الاستيراد) ،،، كده بتكون جريمة وما يدخل بضاعته البلد.
|
Post: #3
Title: Re: حل عاجل لمشكلة الدولار وتجار العملة، البن
Author: Hafiz Bashir
Date: 03-01-2020, 02:42 PM
سلام يا احمد محمد بشير
ولو أنا شركة بتستورد ادوية، البنك حيديني الدولار في سعر كم؟ وأنا حأبيع الدوا بكم؟
ولو أنا مغترب والبنك قادر إنو يشتري ب107 و تاجر العملة بيشتري مني بسعر 105 عشان يبيع للبنك ب107، تاجر العملة لزومو شنو؟ من مصلحتي أنا ومن مصلحة البنك إني بكليك واحدة على الكيبورد وأنا قاعد في مكتبي أبيع للبنك بسعر 106 ونتخلص من فكرة تاجر العملة.
|
Post: #5
Title: Re: حل عاجل لمشكلة الدولار وتجار العملة، البن
Author: احمد محمد بشير
Date: 03-01-2020, 02:49 PM
Parent: #3
سلامات يا حافظ
وينك ووين أيام.
الحل الفوق ده في حالة الشراء من المواطن... علشان ننتهي من قصة انه المواطن يفك في السوق السوداء
في حالة انه المواطن طلب دولارات برضو يتعامل مع البنك ما يتعامل مع تاجر العملة في حالة الطلب.
لازم يكون في ميثاق بين البنك والتاجر الحيشتغل معاهم بصورة رسمية.
انا سامع انه وزير المالية عايز يعوم الجنيه ،، التعويم حل ممتاز بس لازم يعومو ومعاهو الحل الفوق الفي المنشور ده.
ول رأيك شنو؟
|
Post: #7
Title: Re: حل عاجل لمشكلة الدولار وتجار العملة، البن
Author: احمد محمد بشير
Date: 03-01-2020, 03:07 PM
Parent: #5
يا حافظ تجار العملة ديل قاعدين
وحتى اذا تم تعويم العملة. ديل حيكون سعرهم مغري اكتر من البنك ، لذلك لازم نكسبهم ونشغلهم مع البنك،،، يكسب جنيهين في كل دولار ، كده تاجر العملة حيعمل ارباح خرافية ، وما اظن يطمع ويبيع الدولار تاني للمواطن يديهو للبنك و البنك يتصرف مع تجار الاستيراد.
الاقتصاد ما بتصلح الا اذا تم تعويم سعر الجنيه وحل الطلب والعرض هو اليحدد ومع ضمان ارباح تجار العملة الحيجيبو للبنك دولارات بصورة رسمية
|
Post: #8
Title: Re: حل عاجل لمشكلة الدولار وتجار العملة، البن
Author: محمد البشرى الخضر
Date: 03-01-2020, 03:26 PM
Parent: #7
| Quote: دايررزول يوصل الفكرة لحمدوك ولوزير المالية. |
أوعى واحد يتهوّر, خلوها قبلها "الفكرة" دي
|
Post: #9
Title: Re: حل عاجل لمشكلة الدولار وتجار العملة، البن
Author: Hafiz Bashir
Date: 03-01-2020, 03:28 PM
Parent: #7
Quote: يا حافظ تجار العملة ديل قاعدين
وحتى اذا تم تعويم العملة |
أنا متفق معاك تماماً في إنو الحل في تعويم سعر الصرف، مع معالجة بعض الآثار الناتجة عن التعويم.
بعد ما يتم تعويم العملة ولو حصل إستقرار في سعر الصرف
ما بيبقى إسمهم تجار عملة بتبقى خدمة صيرفية
الفرق بين بتاع الصرافة وتاجر العملة هو إنو بتاع الصرافة يتكسب مقابل خدمة الصيرفة التي يقدمها للزبون
تاجر العملة يتكسب من التغيير في سعر الصرف.
فيأي صرافة بتلقى سعرين للدولار، سعر بيع وسعر شراء. والفرق بينهما هو المال الذي يأخذه صاحب الصرافة مقابل الخدمة.
تاجر العملة يشتري الدولار بسعر اليوم ليبيعها في اليوم التالي بسعر أعلى بسبب التغيير فيسعر الصرف بسبب تغير العرض والطلب
|
Post: #11
Title: Re: حل عاجل لمشكلة الدولار وتجار العملة، البن
Author: احمد محمد بشير
Date: 03-01-2020, 03:48 PM
Parent: #9
الحل للثغرات الانت قولتها يا حافظ كالاتي:
اولا:
لابد من تعويم الجنيه، لانه مافي زول قاعد يفك او يحول بسعر البنك الوهمي.
ثانيا:
لابد ان يكون تاجر العملة او الصرافات الصغيرة (وسيط) بين المواطن و البنك، يجيبو دولار للبنك ويكسبو. الفرق يكون رمزي بفارق ٢ جنيه كحد اقصى، واكيد مربح لتاجر العملة.
ثالثا:
البنك يشتغل في استيراد الدواء و جلب كل شيء بجي من برة بالدولار.. (يعني للسلع الاساسية والبتدخل البلد ببكميات كبيرة كالقمح و البنزين، بشتغل فيها البنك ويكون حصري لهم فقط) اي مورد (كبير) يسارع و يشتغل مع البنك بصفة رسمية، والبنك يكون ملزم ويوفر له الدولار الجاي عن طريق تاجر العملة.
الفكرة الاساسية انه تاجر العملة لازم يتوظف في البنك.
|
Post: #10
Title: Re: حل عاجل لمشكلة الدولار وتجار العملة، البن
Author: Mohd Ibrahim
Date: 03-01-2020, 03:32 PM
Parent: #7
حل سليم في حالة انو بنك السودان عندو تحكم في الكتلة النقدية خارج النظام المصرفي ..لكن الحاصل دمار كامل كامل ناس عندها طابعات ويستحيل التميز بين الحقيقي والمزيف ..كلما عليت السعر ستجد شخصا يرفعة لان الموضوع في الاساس حرب اقتصادية ..الحل في جذب مدخرات
المغتربين في مقابل مغري ..مثل تقسيط شقق او اراضي زراعية او حتي اعفاءات من الضرايب
|
Post: #12
Title: Re: حل عاجل لمشكلة الدولار وتجار العملة، البن
Author: احمد محمد بشير
Date: 03-01-2020, 03:58 PM
Parent: #10
تسلم كتير يا محمد إبراهيم على الملاحظات القيمة:
في حال انه البنك يطبع عملة ويشتري مقابلها دولار او ذهب ده في حد زاته بيجعل الورق البنطبع ده عنده قيمة حقيقية، ومعروفة ومسجلة بإيصالات رسمية عند تاجر العملة وتضمن له سلامة امواله.
ممكن يتم تغيير العملة ومسح الاصفار علشان تعرف كمية الورق اللافي في السوق كم؟ وتعرف كم دولار او كم جرام ذهب دخل بدل الورق الى الخزنة.
في نفس الوقت لابد للحكومة ان تنتج وتدعم الانتاج لمشاريع زراعية كبيرة بالتعاون مع الاتحاد الاوربي واصدقاء السودان، خلال ستة شهور كده اي شيء بيتصلح وطريقة تعامل البنوك مع دعم تجار العملة حيبقى شبه سيستم بتاع دولة.
الكل ربحان كده..
نعيد ونكرر، لازم تاجر العملة يشتغل بصورة رسمية وندخلو في المعادلة
|
Post: #13
Title: Re: حل عاجل لمشكلة الدولار وتجار العملة، البن
Author: Hafiz Bashir
Date: 03-01-2020, 04:27 PM
Parent: #12
| Quote: لابد ان يكون تاجر العملة او الصرافات الصغيرة (وسيط) بين المواطن و البنك، يجيبو دولار للبنك ويكسبو. الفرق يكون رمزي بفارق ٢ جنيه كحد اقصى، واكيد مربح لتاجر العملة. |
متفقين شديد في الحتة دي. بس طالما هو بيربح من فارق سعر معروف ومعلن قبل الشراء أنا بشوفو مختلف خالص من تاجر العملة الحالي وبيبقى زيو وزي أي بنك او صاحب صرافة في أي دولة من دول العالم.
| Quote: لابد من تعويم الجنيه، لانه مافي زول قاعد يفك او يحول بسعر البنك الوهمي. |
هنا بنختلف. لأنو أنا حسب معلوماتي في زول قاعد يفك ويحول بسعر البنك.
لو عايز تصدر خروف من السودان عليك فتح إعتماد في بنك السودان وينزل فيهو سعر الخروف الذي يحدده البنك بالدولار.
يعني مثلاً البنك ممكن يقول ليك مقابل كل خروف تصدرو من السودان لازم ينزل في حسابك في بنك السودان 50 دولار مثلاً. لو إنت بعت الخروف ب100 دولار في 50 دولار ممكن تنزل ليك في حساب تاني مختلف وقد يكون خارج السودان.
ال50 دولار النزلت في بنك السودان حيديك ليها بالجنيه السوداني بحسب السعر الرسمي المعلن من بنك السودان.
الدولارات البيشتريها بنك السودان بالسعر الرسمي المنخفض دي هي نفسها الدولارات المفروض تمشي لتغطية شراء الأدوية والقمح والوقود.
طيب لو بنك السودان أعلن سعر 107 مثلاً لشراء الدولار ما حيقدر يشتري الأدوية بدولار منخفض وبالتالي سعر الدوا في السوق حيزيد.
طيب زيادة سعر الدوا والبنزين والقمح مشكلة؟
أيوا مشكلة ومشكلة كبيرة كمان، لكنها مشكلة لا تمنع أن نتبع سياسة التعويم لأن هنالك حلول أخرى لهذه المشكلة؟
أنا داير أقول إنو التعويم هو الحل ولكن نحن محتاجين مع التعويم إيجاد معالجات للآثار السالبة للتعويم.
|
Post: #14
Title: Re: حل عاجل لمشكلة الدولار وتجار العملة، البن
Author: احمد محمد بشير
Date: 03-05-2020, 11:51 AM
Parent: #13
السعر حصل ١١٣ يا استاذ حافظ.
مافي حل الا البنك يشتري من تاجر العملة بصورة رسمية ، ونفس البنك وشركاته يشتغلو في الاستيراد ، حصري الاستيراد يكون مهمة البنك ... ويرفعو ستعر التحويلات البنكية الجاية من الخارج لسعر ١١٠ علشان تاجر العملة يستفيد و البنك يستفيد.
مافي حل غير كده لاستقطاب اموال المغتربين بصورة رسمية ، وعلى مدار الساعة الاموال حتدخل البنوك.
انا بعد ردودك عرفت انه في ثغرة في حكاية بيع الدولار بعد يستلمو البنك ، فوجدت انه البنك مافي داعي يبيعوا، عبر البنك نفسه طوالي يمشي يستورد الدواء و القمح وكل حاجة.
واشكرك على الردود المفيدة ،، واذا في ثغرة جديدة يا ريت تنورونا
|
Post: #15
Title: Re: حل عاجل لمشكلة الدولار وتجار العملة، البن
Author: قلقو
Date: 03-05-2020, 02:40 PM
Parent: #14
حبيبنا احمد بشير ,
مسئول من الخير يا خوى , دحين مكنة الفاتح عزالدين بتاعة ربربربرب ما مكن تربرب لينا دولار وكده ؟
|
Post: #16
Title: Re: حل عاجل لمشكلة الدولار وتجار العملة، البن
Author: عبد اللطيف بكري أحمد
Date: 03-05-2020, 06:27 PM
Parent: #15
حبيبنا أحمد
عساك بخير وصحة ، وشكراً على الإسهام في هذه المعضلة العصية.
وهنا أعلق عليه واضيف:
١- كلامك عين العقل أن يتساوى السعران الرسمي والموازي ولا حل غير ذلك.
٢- مافي حاجة اسمها تاجر عملة،، الصرافات تقوم بدورها الأساسي مقابل العمولة
المشروعة والمتفق عليها ، ولا مانع من المضاربة في نسبة العمولة زيادةً ونقصان.
٣- وهذه النقطة الأهم : يمنع منع بات الإستيراد من الموارد الذاتية !! هذه هي النقطة
التي ينشط فيها تجار العملة خارج الحدود وشراء مدخرات المغتربين.
٤- اعيد النقطة أعلاه مرة ثانية لأنها أس البلاء،، ماذا يستفيد تاجر العملة في الخارج
من العملة الصعبة لديه؟ إما تهريب أموال للخارج أو شراء بضائع للداخل وهنا
يكمن الداء في تجفيف النظام المصرفي من العملات الحرة لأنها لا تدخل اساساً ويتحكم
فيها البعض خارج الحدود تاركين الدولة وشعبها في حالة الإفقار الأبدي.
٥- فرض رسوم جمركية محددة لأي سلعة تدخل السودان كما هو الحال مثالاً في السعودي:
أي سلعة جماركها ٥٪ وتوقف الدولة عن الجباية المبالغ فيها وفرض رسوم خرافية على
السيارات والآليات وتحديد موديلات بعينها،،
٦- تفعيل النظام المصرفي العتيق والعمل بالإعتمادات المستندية دون سواها في الاستيراد
والتصدير ،،
الآن انظر اي سيوبر ماركت او مول او هايبر ماركت في الخرطوم : هل يقومون بالإستيراد
على أصوله المعروفة؟ لا إنهم يقومون بتجارة المقايضة وشحن البضائع كأمتعة شخصية
بالدفارات والحاويات والبراميل وكل ذلك مستفيدين من تجارة العملة خارج الحدود.
الحلول واضحة ، وإنجازها يتطلب جرأة وبعد عن الفساد والمفسدين!!
تسلم حبيبنا
|
Post: #17
Title: Re: حل عاجل لمشكلة الدولار وتجار العملة، البن
Author: منتصر عبد الباسط
Date: 03-05-2020, 11:24 PM
Parent: #16
لماذا البحث عن الحلول السهلة
هناك حلول كتيرة جدا منها
1ـ تصدير الدهب عبر شركات تتعامل مع البنوك السودانية بشفافية
ولا تتعامل إلا عبر المصارف السودانية الرسمية
2ـ زيادة الضرائب بصورة كبيرة تتجاوز 100% على تعرية الاتصال والنت
3ـ تعيين مدراءأجانب أو شركات أجنبية لشركات البترول والكهرباء وشركات البنية التحتية
لفترة بين عام أو عامين لتنظيف الدولة العميقة وتدرب جيلعمل جديد
4ـ فتح التصدير للإنتاج الزراعي بعد التحسين والتطوير والتصنيع والتغليف والتسويق الجيد
5ـ عمل اساطيل وبواخر بحرية كثيرة لنقل الانتاج الزراعي والحيواني للخارج
عمل بنية تحتية لنقل الانتاج الزراعي من مناطق الانتاج لمناطق الاستهلاك في الداخل والخارج
وغير ذلك
6ـ عمل مؤسسات للتصدير ضخمة م للتعامل من المنتج مباشرة دون وسطاء
|
|