Post: #2 Title: Re: بلادي أنا - كلمات إسماعيل حسن/ غناء ميرغني Author: علي عبدالوهاب عثمان Date: 02-29-2020, 09:16 AM Parent: #1
حبيبنا كوستاوي .. يا سلام على الجمال والطرب والابداع شكرا كثير على الفيديو هذا هو الاداء الحقيقي لاغنية ديل أهلي بالنسبة لي الكورال وحاجات ديك تشويه لهذه الاغنية أحسن من يؤديها ميرغني النجار بكل الاحساس والطرب وأجمل ناس أهلنا الشايقية لا مثيل لهم في صنع الجمال بالله شوف إلقاء اسماعيل الحسن أجمل من اللحن وغناء ميرغني أجمل من أي أداء يا سلام نحن في الشمالية بين قوسين من الذهب الخالص في اقصى الجنوب أهلنا الشايقية ناس اسماعيل والنعام ... الخ ، وفي اقصي الجنوب السكوت موطن وردي وخليل فرح نحن في منتصف الشمال محظوظين بهذا الترف من الابداع الباذخ
شكرا كوستاوي .. ميرغني انسان موهوب ويغني والابتسامة لا تفارق وجهه ولطيف المعشر عندما تجالسه .. زول اصيل
Post: #3 Title: Re: بلادي أنا - كلمات إسماعيل حسن/ غناء ميرغني Author: علي عبدالوهاب عثمان Date: 02-29-2020, 05:40 PM Parent: #2
يا سلام على القاء اسماعيل الحسن اجمل من الكلام الملحن
يا سلام أهلنا الشايقية ناس مبدعين اكيد مستوحى من جمال الجغرافيا والانسان
شكرا كوستاوي
Post: #4 Title: Re: بلادي أنا - كلمات إسماعيل حسن/ غناء ميرغني Author: Emad Ahmed Date: 02-29-2020, 11:32 PM Parent: #3
بلادي أنا كلمات : إسماعيل حسن
بلادي أنا .. بلاد ناسا في أول شيء مواريثهم كتاب الله ، وخيل مشدود، وسيف مسنون حداه درع تقاقيبا تسرج الليل مع الحيران وشيخا في الخلاوي ورع وكم نخلات تهبهب فوق جروف الساب وبقرة حلوبة تتضرع وليها ضرع وساقيته تصحّي الليل مع الفجراوى.. يبكى الليل ويدلق في جداولو دمع يخدر في بلادي سلام .. خضرة شاربي موية النيل تزغرد في البوادي زرع وتدفق مياه النيل علي الوديان , بياض الفضة في وهج الهجير بيشع بلادي سهول ،،بلادي حقول ، بلادي الجنة للشـافوها ، أو للبرة بيها سمع تشيل الناس وكل الناس وساع بخيرها لينا يسع، بلادي أنا بلاد ناساً تكرم الضيف وحتى الطير يجيها جيعان ومن أطراف تقيها شبع بلادي الصفقة والطنبور ،، ودارتا تنح في الليل وبنوتاً تحاكي الخيل ،يشابن زيي جدي الريل، وشبالن مكنن في طريفو ودع ،، بلاي بلاد من التاريخ من ترهاقا لاعن ميسنا وحتى الجاي عبر الوادي خيل ودروع بلادي أمان وناسها حنان ،يكفكفوا دمعة المفجوع يبدوا الغير علي ذاتن يقسموا اللقمة بيناتن ويدوا الزاد ،حتى إن كان مصيرن جوع يحبوا الدار ، يموتوا عشان حقوق الجار ويخوضوا النار عشان فد دمعة وكيف الحال كان شافوها سايلي دموع ديل أهلى البقيف في الداره وسط الداره وأتنبر وأقول للدنيا ديل أهلي عرب ممزوجة بي دم الزنوج الحارة ديل أهلي ديل قبيلتي لما أدور أفصل للبدور فصلي أسياد قلبي والإحساس وسافر في بحار شوقن زمان عقلي أقول بعضى, ألاقيهم تسربوا فى مسارب الروح بقو كلي محل قبلت ألقاهم معايا معايا زي ضلى لو ما كنتت من زي ديل كان أسفاي وأسفاي وآمأساتي وآذلي. تصور كيف يكون الحال لو ما كنت سوداني وأهل الحارة ما أهلي تصور كيف يكون الحال؟
قصيدة بلادي انا تغنى بها أولا الفنان عبد الرحمن بلاص, ثم الفنان عثمان اليمني رمية, ومن ثم سلمها الشاعر إسماعيل حسن للفنان عبد الرحمن عجيب وقام بتلحينها الفنان ميرغني النجار وأدتها فرقة تماسيح الحامداب (عبد الرحمن عجيب وميرغني النجار والمجموعة).
Post: #5 Title: Re: بلادي أنا - كلمات إسماعيل حسن/ غناء ميرغني Author: علي عبدالوهاب عثمان Date: 03-01-2020, 08:32 AM Parent: #4
الحبيب الرائع الجميل .. عماد .. ما شاء الله عليك كنز .. شكراً وانت توثق لكل ابداعات الوطن عاجز عن الشكر ياجميل ..
تحياتي الحبيب عماد ..
Post: #6 Title: Re: بلادي أنا - كلمات إسماعيل حسن/ غناء ميرغني Author: علي عبدالوهاب عثمان Date: 03-01-2020, 08:37 AM
الأجمل عندما تسمع من ميرغني النجار مباشرة وبدون مكبر صوت قبل سنوات قليلة كان في زيارة للسعودية .. وكانت لنا جلسة معه في جمعية أبناء بنا ديل أهلنا جماعة ناس حبيبنا ( احمد ياسين ) لأن جمعيتهم واسعة وجميلة .. لا أصدق عندما تغنى ميرغني بهذه الاغنية استماع مباشر .. الطرب يسمو بك إلى درجة البسط الصوفي .. مبالغة تعابير الوجه والابتسامة التي لا تفارق محياه طوال الاغنية والونسة ..
يا سلام أهلي الشايقية .. حب الديار في مجرى شرايينهم .. لأن بلادهم جميلة وناسهم جميليين
Post: #7 Title: Re: بلادي أنا - كلمات إسماعيل حسن/ غناء ميرغني Author: علي عبدالوهاب عثمان Date: 03-03-2020, 03:44 PM Parent: #6
جميل ميرغني النجار طرب قمة بدون رتوش .. زول ودبلد تربال ورواس طعم الرطب وريحة الجروف .. الله عليك كأني في ساقية جدي شكراً كوستاوي ..
Post: #8 Title: Re: بلادي أنا - كلمات إسماعيل حسن/ غناء ميرغني Author: علي عبدالوهاب عثمان Date: 03-04-2020, 07:49 AM Parent: #7
الحبيب كوستاوي ده أجمل بوست أنا أعشق غناء ميرغني النجار وخاصة هذه الاغنية والجميل في بوست طريقة إلقاء اسماعيل حسن للقصيدة أجمل من اللحن .. لأن الكلام طالع من دواخله
التحية لأهلي الشايقية .. أجمل ناس فوق ..
Post: #9 Title: Re: بلادي أنا - كلمات إسماعيل حسن/ غناء ميرغني Author: Kostawi Date: 03-05-2020, 03:50 AM Parent: #6
الحبيبان عماد أحمد و علي عبدالوهاب, يا سلام ! عليكما... و شكرا على التعليق، و رحم الله شاعر "تلقى الحبية بتشتغل منديل حرير لحبيب بعيد"...و رحم الله صديقي وردي، و كان آخر لقائي به في واشنطن دي. سي، قبل رحيله للسودان هو و زوجته المرحومة. هل يا ترى السودان في مقدوره إنتاج مقدرات تفوق مقدرة هذا الثنائي ؟
لكما التحايا
Post: #10 Title: Re: بلادي أنا - كلمات إسماعيل حسن/ غناء ميرغني Author: Kostawi Date: 03-05-2020, 03:55 AM Parent: #9
و أهدي لكما غنية الطير المهاجر
Post: #11 Title: Re: بلادي أنا - كلمات إسماعيل حسن/ غناء ميرغني Author: Elamin Medani Date: 03-05-2020, 07:13 AM Parent: #10
اغنية الطير المهاجر - كلمات / صلاح احمد إبراهيم - غناء / محمد وردى
غريب .. وحيد في غربتو حيران .. يكفكف دمعتو حزنان.. يغالب لوعتو ويتمنى بس لي أوبتو طال بيه الحنين فاض بيه الشجن واقف يردد .. من زمن بالله يا الطير المهاجر للوطن زمن الخريف تطير بإسراع ما تضيع زمن أوعك تقيف وتواصل الليل للصباح تحت المطر وسط الرياح وكان تعب منك جناح في السرعة زيد في بلادنا ترتاح ضل الدليب أريح سكن فوت بلاد وسيب بلاد وإن جيت بلاد تلقى فيها النيل بيلمع في الظلام زي سيف مجوهر بالنجوم من غير نظام تنزل هناك وتحيي ياطير باحترام وتقول سلام وتعيد سلام على .. نيل بلادنا وشباب بلادنا ونخيل بلادنا بالله يا طير قبل ما تشرب تمر على بيت صغير من بابه ومن شباكه بلمع الف نور وتلقى الحبيبة بتشتغل منديل حرير لحبيب بعيد تقيف لديها وتبوس إيديها وانقل إليها وفاي ليها وحبي الأكيد
Post: #12 Title: Re: بلادي أنا - كلمات إسماعيل حسن/ غناء ميرغني Author: علي عبدالوهاب عثمان Date: 03-05-2020, 07:25 AM Parent: #11
شكراً الحبيب كوستاوي .. لقاء القمم .. تخيلوا وردي .. وصلاح أحمد ابراهيم في هذه التحفة الفنية .. بالاضافة إلى ابداع وردي .. صلاح رسم صورة رائعة يمكن تجسيدها لاستحضار فتيات ذلك الزمان الجميل .. بالله في أجمل من هذه الصورة :- تمر على بيت صغير من بابه ومن شباكه بلمع الف نور وتلقى الحبيبة بتشتغل منديل حرير == سحر المكان .. الغرفة الصغيرة المعزولة للبنت في البيت والمنديل رمز المحبة والطهر والعفاف .. وتلك الحبيبة التي تنتظر عودة حبيبها ..