♧ اللون الخمري ليلة .. و الخد الزهري ليلة£

08:28 PM February, 28 2020

سودانيز اون لاين
دفع الله ود الأصيل-
مكتبتى
رابط مختصر

♤ و لنا في الألوان طشاش أيها الأحباب
ألوانَّا جايطة شديد يا شيخ .تلقى زولنا أخدر
ليموني و كمان بغنوا ليه:"زولي هوي .. زولي
اللخدر ..كان شفتو بخَدَر .. الشوق فوقي زاد
قليبي أصلن راد..و إن فات بلا ميعاد بتوشح
السواد..أسامر النجوم..همي البِقا لي زاد .. يا
زولي هوي منايَ ترجع ليَّا يا مشنق الطاقية "

▪ حدثنا الوريف هاتريك عن أبيه عن جده كابراً عن
كابرٍ نقول: في التوصيف زول أخدراني طويل كده .
و دا زول أخدراني خدرة زرعية نااااعمة كده. كان ذلك
بمثابة دلالة وسامة في عصور ما قبل الفسخ و الجلخ .
لكن برضو كان عندنا زول أصفر و زول أحمر نوع الحمرة
ديك(الأباها المهدي) و بصراحة ما عارفو ظاطو أباها ليه.
سوداني أسمراني أزرقاني(جل) و زول تاني أبيضاني !!

مواصفاتنا في الجواز الظهري القديم مسلن:
الطول 5 قدم و 6 بوصة ، و لون الشعر أسود
قرقدياً مان أم فلفلياً أو سبيبياً.و لون العيون
عسلية مع إنو كل غنانا في العيون السوداء
أهوى العيون السودة و أحب سمار في خدودها

● و اللون الأسمر قالوا خمري .. اللون الخمري ده
واحد و لا بختلف حسب ماركة الخمرة هسه الويسكي
لونو زي المريسة و لا كيف ؟؟ الزول السمح و اللون القمح
و بالجد دي ماركة مسجلة أصلية و تايواني (موش صيني)

▪بصراحة إلا بس السواد الكالح مظلوم معانا ،
قاعدين نتزاوغ منو ..ما عدا كجراي حين قال :
يا قطعة ليل في لوحة.. تتجسد أنثى زنجية
يا شهقة أعصابي الحيرى يا لذعة نار قدسية
الباذنجان الأسود ..في نهديك ثمار برية
و هذا على سبيل الغزل ....

ثم الطيب العباسي حين قال لفتاته الشقراء:
فلماذا أراكِ ثائرةً .. و علام السِبَابُ يضْطَرِدُ
والفراء الثمين منتفضٌ كفؤادٍ يشقى به الجسدُ
أَلأَن السّواد يغمرني .. ليس لي فيه يافتاة يدُ
و هذا على سبيل الاحتجاج و التذمُّر .

● لكن عمنا خليل فرح كتب و لحن و غنا :
صَبّـغْ الخـدين حُمرة .. بعد ساعة بتشوف صفرة
الاصفـرار ده كتيـر أخجلـوك يـا أميـر ولّا نُمّــت نهـار
فلو أرجعنا الاحمرار إلى الخجل فهل يكون الاصفرار
من نصيب تعسيلة القيلولة بالنهار و لا ما هل ؟!!!

Quote: زولي هوي منايَ ترجع ليَّا يا مشنق الطاقية "

جميل يا جميل متابعين

Quote: جميل يا جميل متابعين

♤ مرحبتين حبابك حمدوي و اليوم السعيد االبلة
جابك يا راقي. إذن الخد الزهري مرغوب.. لكن ما هو
اللون الظهري و الذي يطلقونه على اللون الأزرق إذا ما
كان غامقاً كحلياً، يمكن جاي من لون الظهرة حقت
الغسيل.أما إذا كان فاتحاً أو باالأحرى فاقعاً بنقول
عليه (لبني) ؛و اللبني زاتو مرات بكون لبني فاتح.

▪ طيب، بما أنو قمحي منسوبة للقمح ، إذن اللبني
مفروض تكون من مستقات بياض اللبن ، حسب دايناميكا
منطق الأشياء ؛ ولًّ مُوش كدي يا حمودي خوي¿!!و كمان
عندنا من المستورد لون فوشي و لون بصلي و لون بترولي
و أقصى درجات السغافة لون (بيربل ( دا أظنو بنفسجي) .

______________

▪ ود أخوياً لينا حنكوش مولود و متربي في بلادِي برة.
فمرة فطر معانا فطور رمضان في حلتنا أم صفقن عوراض و ليست
(حشرو عباس ) كما يحلو التندر بها على لسان عمنا جقود . أها الجنا
أكل معانا كسرة دبليبة لُقمة عيش ود عكر ، و كمان بي ملاح لوبة عفن
و كمان وكتين الملاح قصَّر و انكطع في يدينا ناولنا جدي الإبريق تماها
باركا لينا من موية الوضو. فالجنا قام بالله مطفر متل الملدوغ !! يا زول مالك
قول : بسم الله و كمل أكلك. قال: أكمل شنو ياخي و عمك دا غسل يدينو فيها
عديل كدا ؛ و ما فاضل إلا يكطع الجُمار!! أها لامن مشى لناس أمو و أبوه بيحكي
قال ليهم: المتخلفين ديل أكلونا ليك عصيدة بس موش بيضا زي بتاعت (ماما)
دي مختلفة لونا (بيربل) و عاملين عليها (طوبنغ) بي صوص كدا لونو بيجي!!

▪ فبالله عليك ولدنا الطريفي ما ليه حق وكت العربي محمد موسى في مسرح
دبي قال ليه حيي الجماهير ديل؛ قعد يتلفت جاي و جاي و قال: أحيييي أنا ☺

● ذكرنا أنو اللون الأسود الفاحم هو الوحيد المظلوم في عرف
ثقافتنا و أدبياتنا كظلم الحسن و الحسين من بين بانوراما الألوان
و التي يلاحظ سعيُنا اللاهث للتفنن في اختراعاتها ، ليس إلا دليلً
دامغُ لا، بل إنه عرض نفساني لرهابنا من وصمة عار السحنة السمراء.
و هو ما يفسر لنا ظاهرةً لافتةً هي أننا مصنفون بأننا الشعب الأكثر
انفاقاً من قوت يومه على كريمات تفتيح البشرة. و ذلك لشعورنا بأننا
مشيقحين (خاتفين لونين) ، لانا راضين ب(رأس) زنجية جيراننا
الأفارقة، و لانا لامين في التشبث ب(ذيول) خيبة أمل العروبة.

♤ هذا يقودنا مباشرةً إلى النبش مراراً و تكراراً في
قضيةٍ سبق لنا و طرحناها هنا تحت عنوان " عنصرية
مقنعة"من القِناع و ليست من القَناعة التي هي كنزٌ لا يَفنَى).
▪ موضوع وجب طرحه مِنْذُ زمان في ظرفنا الراهن المحيط.
حيث لا تزال تُثار نعراتٌ (منتنةٌ) كهذه منذ قديمٍ على منصاتٍ
شتى(للتناصل اللا-اجتماعي) عبر أثير الأسافير و قبل سنين عدداً
من انفصال جنوبنا الحبيب. و كم كنا نخشى مما آل إليه حالنا اليوم
من تمايُزٍ بغيضٍ و (تمركٌزٍ و تهميشٍ) بين أبناء جٍلدةٍ واحدةٍ و ترابٍ
واحدٍ ، تاسيساً على صفاتٍ و مزايا واهيةٍ تُطلَقُ جُزافاً هنا و هناك
بحكم عرقٍ أو دينٍ أو سحنةٍ أو خلفيةٍ ثقافيةٍ أو جهويةٍ و حيثُ:
( كلُّ زول عاجبو الصَّارُّو، و كلُّ حزبٍ بما لديهم فرحونَ). و كمان
حلاة يقولو ليك نحنا و نحنا و العارف عزو مستريح ، قال!!

♧ لست مجنونًا، و لكن جئتُ رغم أنفي £ (: دفع الله ود الأصيل)

♧ حجوة عصمان ود الكويس£
----------------------------
●حدثنا هاتريك عن أبيه عن جده. قال و الذمة على الرواة
عندنا جارن لينا اسمو/ عصمان ود كويس.. و الله سحي ، أنا
غايتو كويس دي لا عارفها كُنية و لا لقب و لا ساكت و لا صفة .
المهم ود كويس ده زول ما شاء الله كفاءة جد و مكمل التعليم بس بقى
مشكلتو متردد في اتخاز غراراتو المصيرية الحاسمة ؛ فلو عايز يشتري مسلن
قزازة بستي كوليا الواحدي دي ساي من بغالةساي لازم يعمل دراسة جدوى و
تحليل أفقي رأسي للناتج الغومي المحليو. فعادي جدن ممكنتلقاه شايل قلم ورقة
و آلة حاسبة و علبة هندسة و يحسب و يجازف لإبجاد المركباتالبايوغيةل و لا كمان
بتروكيميكال للأحماض الأمينية الظاخلة فيانتاج المنتج المشروب السحري نفسو
و كذا الأثرالعضوي اللون البني المايل للغمقان على الخلايا الجذعية لدماغ
المستهلك الآدمي.ولاي جد!!

●ود كويس لما مات خالو عِبدله خلى ليو قريشات ورثة يعني نصيبو منها
طلع زي خمسينألف بالجديد و ده طبعاً في زمنا دا مبلغ غير محترم نوهائي،
فاكر لو إستثمره كويس يعمل بيمشروع يطمن باقي حياته. تلاته شهور كاملات
قضاهن ود كويس بسألأي زول يلاقيه الغاشي و الماشي(السلع و الأصناف القالبة
في السوق الأيام دي شنو).. و طبعاً مع كل إجابة لازم يرجع للورقة القلم و علبة
الهندسة و الآلة الحاسبة يوثق كويس..ما طبعن زول علمي و منضبط خالس.

● المهم بعد مرور تلاته شهور على التلاته الأولى و حوالي تلاتة و تلاتين
دراسة جدوى كدي،ود الكويس قرر يشتري أمجاد ماركة داماس لونها كحلي
لعدة أسباب من ضمنها البعد النفسي زاتو للون الليلى و هادي. ستة شهور تاني
و ود الكويس يدرس في عروض العربات المقدمة ليه و علبة الهندسة و القلم
و الورقة و الآلة الحاسبة زادن أدوات تانية نظارة مسح و غوغل ماب
(GPS) و عوعل إيرث. زول علم يا جماعة ود كويس
ماتنسو الحكاية دي مهمة جدن.

● بعد مرور سته شهور على الستة شهور و زي خرتمية
عرض و دراسة جدوى وجد رسيود كويس على العرض
المناسب؛ و النصيحة العربية كانت مووووبالغة..و بمعاونة
علبة الهندسة و الورقة و القلم و باقي الأدوات ااتؤ منو ،
بدأ ود كويس مفاصلات صفقة القرنالبيع و الشراء بي يفتح
الله و يستر الله و( البيعان على الخَيار ما لم يفترقا؛ و كدي).
~ أها ، عايز كم في الأمجاد دي يا مولانا؟ يا زول الجنا
بسميهو أبوه قول كلامك.
~ أسمع أنا كلام السماسرة ده ما بنفع معاي إطلاقن أنا أول
ما بديت أفكرت في مشروعى ده كانت زي عربيتك دي ما
بتساوي أكتر 30 ألف لاكين أنا عشان تضريبالحسابات ضيع
مني زمن و هي الحديدة بصرامة نضيفة؛ أها بنديك ال40،
كيف معاك؟
: 40 شنو آ زول
~ 40 مليون
: آ زول علي الطلاق الكلام ده كان زمان والله حسة قروشك
دي ما تركبكعجلة رالي.. و لا أقول ليك حاجة و الاه ظنيت
دحش مكادي بهنق ما برضى بيهن.
● الشاهد : الآن بال50 مليون ود كويس إشترى آله حاسبة
جديدة ساينتفيك لنج صيانتففيك خالس ولاي سحي!!!
☆ ملحوظة
------------
القصة خيالية و إن تشابهت أحداثها مع الواقع.
☆تخريمة بالدرب التحت:
ثمح كويس جدن و ما بطال خالس يا هتركة، عمنا ود كويس دا( بالمناسبة عندنا الاسم) لو أها كونو مسلن يعني لو يوم بطنو كركربت و ماصتو ساي و نزل من مواثاات (عفينة) الشيخ عوض الجيد، و فللي على حمامات السوق السغير ديل القالو (مقضات الغرد) فيهن بقت بالتسعيرة منيو عديل كالعاتي :
20ألف/ خفيف موية عادي
30/ كَبابات إسهال بحتروب؛
40~50/ متقلات هيفي ديوتي حسب درجة الكثافة،
مع مفرقعات ثانيأوكسيد اللعوتيك ؛ تتفجر في مواقعها
الطبيعيةو (ساحات فداها).المعني في الحالة دي عمنا ود
كويس آلتو الحاصبة الصيانتيفيك دي بنتفع لي تحليل
بكتريا «عفن الخبز و الخاببز»و لا يبلها و يشرب مويتا.

يا جنا لماذا نسيت غزل الشاعر الجاهلي الذى قال :-
ودخلت فى ليلين فرعك والدجى
ولثمت كالصبح المنور فاك
وايضا قول عنترة:-
يعيرون لونى بالسواد جهالة
ولو لا سواد الليل لما طلع الفجر
تحياتى
يا حبوب فعلا عندك عمى الوان ههه

Quote: يا جنا لماذا نسيت غزل الشاعر الجاهلي الذى قال :- ودخلت فى ليلين فرعك والدجى ولثمت كالصبح المنور فاك

عمى ألوان الطيف أنا يا خاطب ليل،
ياخي دي «جارة الوادي» لأحمد شوقي!!
عمومن الطلة عيدية ، و يا ريت لو كان
معاها غمتة لندتك ن مقبولة منك. لأنو
قفلنا باب التهاني وفتحنا الطواقي!