كنت أترقب اعلان السعر التركيزي للقمح .. لا أعرف المقصود شنو من التركيزي ( عبارة غريبة ) ولكن المهم والأهم .. سعر الشوال 3 الف جنيه .. معقولة في الشمالية ما عارف باقي السودان ..
شكراً كثير كثير حمدوك .. تشجيع للمزارعين .. المساحة المزروعة في كل السودان حوالي 740 الف فدان في كل السودان .. الشمالية وحدها يمكن زراعة 10 مليون فدان العافية بالدرجات .. باقي فترة بسيطة للحصاد
تقريباً السنة دي أقل انتاج للفدان في الشمالية ممكن 15 شوال .. الشتاء كان كارب ما عارف ( الشتاء مذكر أو مؤنث ) المهم البرد كارب .. بعد ده الجازولين هو الأهم
عندنا الوالي الظاهر عليهو زول ود البلد من مروي لأنه يتكلم عن زراعة كأنه تربال معروف أهلنا الشايقية خطيرين في الزرعة .. خلوا الوالي ده لحد نهاية الموسم قول معاي كده زي شهرين
تاني شكراً يا حمدوك .. القرار تقريباً اليوم من مجلس الوزراء ..
Post: #2 Title: Re: شكراً حمدوك .. السعر التركيزي للقمح .. Author: عمر سعيد علي Date: 02-25-2020, 06:28 PM Parent: #1
الحبيب علي عبد الوهاب . . قالو القمح السنة دي مبشر ولله الحمد . . والحمد لله انو السعر مجزي للمزارعين زي ما تفضلت . . عيب انو بلدنا تستورد قمح . .
Post: #3 Title: Re: شكراً حمدوك .. السعر التركيزي للقمح .. Author: علي عبدالوهاب عثمان Date: 02-26-2020, 08:06 AM Parent: #2
قالو القمح السنة دي مبشر ولله الحمد . . والحمد لله انو السعر مجزي للمزارعين زي ما تفضلت . . عيب انو بلدنا تستورد قمح . . ===================== حبيبنا عمر .. تحياتي شكرا على حضورك الجميل .. صدقني يا عمر الحبيب أنا كل همي في أهلنا الترابلة ديل في ضواحي الدنيا السنة دي الشتاء كان على كيفك ما شاء الله برد شديد في دقنلا 2-3 درجة مئوية كده القمح ما يحتاج سقي كثير وده توفير للجازولين .. والسعر بالنسبة للشمالية ممتاز مجدي جداً .. نعم الحبيب عمر .. الزراعة هي الحل .. ما ممكن نحن نستورد القمح من المانيا وورسيا .. يعني ترابلة ألمانيا وروسيا يتعبوا ونحن قاعدين جنب ستات الشاي نقاش بدون فائدة ( سياسة ، برشلونة ، ريال مدريد ، ليفربول ... إلخ) والتربال الالماني تعبان عشان يبيع لينا خبز .. ما شاء الله شباب مفتلين عضلات في صف الخبز ساعات .. حرام صحة وعافية وخمول !!!
تحياتي الحبيب عمر .. باقي الجازولين الحصادات والخيش ( الشوالات )
Post: #4 Title: Re: شكراً حمدوك .. السعر التركيزي للقمح .. Author: Ali Alkanzi Date: 02-26-2020, 09:11 AM Parent: #3
الحبيب ابوعلوة الحاجة حلوا خبر مبشر على الحكومة ان تشتري المنتج الزراعي مثل الذرة والقمح والسمسم باسعار تفاضلية اي افضل من سعر السوق حتى يتجه انسان السودان للزراعة وتعود الهجرة من المدينة إلى الريف الهند خلال نصف قرن اصبحت من الدول العظمى لانها اهتمت برفع كفاءة الانسان الهندي بالتعليم والتدريب والانتاج ونحن يمكننا ان نكون من مصاف الدول الغنية اذا اهتممنا بالتعليم والتدريب والانتاج والصحة الوقت في السودان لا قيمة له والانسان يمضي يومه في فراغ عريض خاصة قطاع الشباب اغلب المصانع مغلقة لالف سبب على كل نحتاج لجهد جماعي لترتقي البلاد لك ودي واحترامي اخي الحبيب ابوعلوة
Post: #5 Title: Re: شكراً حمدوك .. السعر التركيزي للقمح .. Author: علي عبدالوهاب عثمان Date: 02-26-2020, 09:35 AM Parent: #4
الحبيب الكنزي .. تحياتي عندنا في الشمالية بالأسف اختفوا تجار المحاصيل ولا تجد المحصول في السوق حليل زمان .. اليوم الشركات والبنوك تأتي في ( القيساب ) يستلموا القمح في الحواشة زمان كان مضاربة في الاسواق .. ==================================== الحبيب الكنزي أمس قرأت بأن الهند احتلت المرتبة الخامسة في الاقتصاد العالمي وأزاحت بريطانيا وفرنسا .. الهنود لم يغيروا شيء من الإرث الاستعماري ( الانجليز) وأقصد في مجال الادارة والتعليم والمرافق ( مثل السكة حديد ... إلخ ) حافظوا على الموجودات والنظام الاداري ..
نحن دخلنا في فلسفة ( السودنة) تعيين سودانيين بدون كفاءات وحزبيين فقط مكان الخواجة المتخصص وبدأ الانهيار في كل المرافق ( السكة حديد ورشة الحوض النقل الميكانيكي مشروع الجزيرة .... إلخ ) إلى أصبح ( زيرو ) اليوم .. وعكسنا الهنود حافظواعلى هذا الإرث مع التطوير المحكم ببطيء شديد دخل القطارات في الهند يفوق 31 مليار دولار رغم قدم الخطوط والمعدات ولكن المهم حسن الادارة وكمان حافظوا على المنهج التعليمي من أيام الانجليز .. ونحن أيام نميري ( السلم التعليمي ) قضينا على كل شيء كلو من قريبنا محي الدين صابر الله يرحمه ===================== الحبيب الكنزي معنا في الشركة عدد كبير من الهنود .. تخيل هذا الهندي لا يهتم إلا بعمله وكيفية برمجة حياته وحساب الدخل والاعاشة يصرف بأرقام معروفة لديهم وبدون أي كماليات وصرف أجوف .. لا يتحدث في السياسة ممكن يعرف فقط رئيس الدولة .. أما وزير الخارجية والداخلية والتعليم ( لا )
الهندي منتج كما كان أهلنا الترابلة في السابق فقط همه قوت العائلة .. لذا تجد المزارع في الهند ربما يملك فدان واحد ولكن ينتج من الأرز مثلاً ما يكفي بيته وهكذا لا يحتاج إلى الحكومة وتجده يعيش في منزل متواضع جداً ربما غرفة واحدة .. كمان البقرة تسكن معاهم في البيت حتى الملايس لا يشتريها بترف تجده بدون قميص فقط ربطة في الخصر أو سروال ولكن يعمل وينتج
أذكر آباءنا عندنا في الجزر في الشمال كانوا بنفس الطريقة .. لا يعلمون من يحكم السودان إلا أيام الانتخابات أمة أو اتحادي وهذا كان يتم عن طريق العمدة .. ودليل ذلك خالي أحمد الله يرحمه كنت في تاريخ سابق جداً أتحدث معه عرفت شيء غريب جداً كان يعتقد أن نميري استلم الحكم من عبود لم يسمع بأكتوبر وحكومة اكتوبر ... ========================== أما نحن فنتمدد في الظل .. الونسة والجلسات والمآتم والسمايات والزواج والعزائم ما في إنتاج .. وعند السؤال .. ( كلو من الحكومة .... ) الشماعة ..
تحياتي الحبيب الكنزي .. حولت البوست إلى كلام مفيد جداً شكراً كثير كثير زملائي هنا هنود أحبهم جداً وناس مرتبين في حياتهم .. يكفيهم محتكرين دبي ..
تحياتي يا جميل .. يا رب توفر الخيش والجازولين للحصاد .. الباقي هين
Post: #6 Title: Re: شكراً حمدوك .. السعر التركيزي للقمح .. Author: walid taha Date: 02-27-2020, 09:35 AM Parent: #1
Quote: تقريباً السنة دي أقل انتاج للفدان في الشمالية ممكن 15 شوال
علي أمبس بشرك الله بالخير.
Post: #7 Title: Re: شكراً حمدوك .. السعر التركيزي للقمح .. Author: علي عبدالوهاب عثمان Date: 02-27-2020, 09:59 AM Parent: #6
علي أمبس بشرك الله بالخير. ========== وليد أمبس تحياتي .. احياناً الأزمات تأتي بفوائد مع بعض الناس تعرف يا وليد (5) فدان قمح دخله أكبر من عمارة سكينة كم طابق كده مؤجرة في الخرطوم لاحظ القمح تقريبا الصرف يكون كده ( 4 ) شهور إذا المزارع يعني متوسط ممكن (20) شوال الفدان الخمسة فدان (100) شوال تقريبا في 4 شهور .. 100 شوال × 3.000 جنيه ===================== والقمح يا الحبيب وليد هبة من عند الله سبحانه وتعالى أولاً التكلفة بسيطة جداً مقارنة مع المحاصيل الاخرى ثانياً ما في مرض يصيب القمح في الشمالية عكس الفول دائما مصاب بأمراض ( العسل .. بورود بالنوبية) ثالثاً فقط البرد ومن النادر جداً أن يكون الشمال بدون برد رابعاً كلما اشتد البرد كلما قل عدد مرات الري .. خامسا : لا يمكن للطير أن يأكل حب القمح لأنه مغلف رباني سادساً : حصاده ساهل جداً والجو جميل جداً وقت الحصاد آخر أمشير في الشتاء زمان كان فزع وقرع دكاي ..
المشكلة فقط في الجازولين يعني لازم تضمن الجازولين قبل الزراعة
أحسن محصول مربح حسب دراسة الجدوى للترابلة عبر مئات السنين ( القمح مجدي ) حتى التخزين ساهل جداً .. حب الذرة محبوبة لدى الحيوانات ( حمار غنماية نعجة .. إلخ) إلا القمح للبشر وطبعاً حسب المنطقة وثقافة القمح فيها وموروثها يمكن ان تصنع منها ( الرغيف البيتي ، القراصة ، وقرقوش أيام الداخليات في المدارس الزلابية ، والبسكويت بالبيض وبسكويت موية .. عشرات الاطعمة .. الخ) حاجات من الامتداد النوبي في مصر .. أما الذرة فقط ( كسرة ومريسة ) لاغير
وكمان القمح كان يستخدم عندنا ضمن مواد التجميل ( عجين بطريقة خاصة ) بالنوبية ( بوكريه ) أو الدلكة المحلية الصنع وانتشرت في باقي السودان لأن القمح فيه لزوجة ما زي الذرة
أذكر عندنا زمان الذرة كانت أكل المساكين .. وكان الترابلة يعتقدوا أن الذرة فقيرة من ناحية المواد الغذائية .. كانوا يقولوا ( كثرة الذرة تسبب السفر sofor وهي اصفرار في الجسد والعينين .. سوء التغذية ) إلا في حالات لكسر روتين القمح
يا سلام يا وليد يا اخي خليتني أدخل في متاهات زمان .. تحياتي حضورك كانت دفعة لإعادة ذكريات أهلنا الترابلة .. يا ربي الجازولين .. آمين ..
كدة اعلى من السعر العالمي 535 دولار للطن يعني الشزال 26 دولار حوالي 2700 جنيه بسعر السوق الاسود
================ حبيبنا خالد تحياتي .. الظاهر الجنيهات السودانية مخزنة من زمن ( الطباعة ربرب .. أيام المخلوع) لأن الحصول على الدولار صعب .. مدام بالعملة المحلية يمكن يبدروا المبلغ
تحياتي الحبيب خالد .. إن شاء الله بعد الحصاد نشوف الموضوع كيف أهم حاجة جازولين الحصادات ..
مودتي الحبيب خالد كده جميل عشان نشرح للترابلة في البلد .. يا ريت الحكومة اشترت بالدولار
فتحت علي الخيال صفحة ملامح لي وطن آتي بزاكر فيهو يوماتي مشلخ في الشمال ساتي وترطن في الغرب خالتي علي ورق الخريطة بشوف وطن شامخ وطن عاتي وطن متعدد الاوصاف والاعراف وطن انسانو ما بيخاف وجد مضياف بقسم اللقمة لي جارو وبعزم حتي لو كان ماف ---------------------------------------------------------- الحبيب / علي عبد الوهاب ان شاء الله يا رب بشرى طيبة لاهل السودان ويا رب ببركة شهر رجب الكريم يبقى السودان دائما في شموخ وعز وتتحل كل مشاكل الوطن والمواطن ونعيش تحت سقف واحد تجمعنا الانسانية لاننا لسنا بني الاحزاب بل نحن بني السودان
ان شاء الله يا رب بشرى طيبة لاهل السودان ويا رب ببركة شهر رجب الكريم يبقى السودان دائما في شموخ وعز وتتحل كل مشاكل الوطن والمواطن ونعيش تحت سقف واحد تجمعنا الانسانية لاننا لسنا بني الاحزاب بل نحن بني السودان ================= آمين يا الحبيب النعمان .. من حروفك يظهر قلبك على الوطن .. جميل يا سلام عليك ابيات الشعر معبرة جداً مختصر ومفيد لتنوع السودان ولكن يجمعهم الكرم والضيافة
علي عبد الوهاب السودان وطن جميل يستحق الحب والمحبة ويستحق التضحية بالدم النفيس بدون تردد --------------------------------------------- الكلمات الشعرية الجميلة دي للشاعر الجميل حسن احمد حسن وتغني بها الفنان امجد الشاطرابي وليك رابط الاغنية https://www.youtube.com/watch؟v=8INFB5O_zUQhttps://www.youtube.com/watch؟v=8INFB5O_zUQ
تحياتي الحبيب علي وضيوفه بالإنتاج لن نحتاج لأمريكا أو إسرائيل ومن لا يملك قوته لا يملك قراره.. تشجيع الانتاج هو أول الخطوات الصحيحة لانتشال البلد من وقعتها هذه ونتمنى أن ينسحب هذا الدعم لمنتجي الذرة والدخن والبصل والطماطم والاهم هو التوجه نحو الانتاج الرأسمالي والنقدي بغرض التصنيع والتصدير.. وهنا يتاورني سؤال من قديم الزمان ومنذ عهد جنيف وقمح ريجان.. هل يمكن أن ينتج السودان القمح بكميات تكفي الاستهلاك المحلي وتفيض للصادر؟
ونتمنى أن ينسحب هذا الدعم لمنتجي الذرة والدخن والبصل والطماطم والاهم هو التوجه نحو الانتاج الرأسمالي والنقدي بغرض التصنيع والتصدير.. وهنا يتاورني سؤال من قديم الزمان ومنذ عهد جنيف وقمح ريجان.. هل يمكن أن ينتج السودان القمح بكميات تكفي الاستهلاك المحلي وتفيض للصادر؟ ================== حبيبنا التاج .. تحياتي .. دائماً طرحك واقعي وبعيد عن الاماني .. نعم الامريكان هم من نشروا ثقافة القمح في كل السودان زمان كان في الشمالية وولاية النيل أو قل في الغالب .. أذكر في بداية الثمانينيات أيام نميري ربما بعد المجاعات التي ضربت افريقيا ارسل الامريكان كميات مهولة من القمح فائض عن حاجة أمريكا وبالمجان وكان التوزيع بقيمة متدنية جداً حتى عندنا في الشمال كنا نستغرب من نوع القمح كان عندنا القمح البلدي ( حبة كبيرة ) وهكذ الامريكان يسحبوا المعلقة من الفم .. وبدأ انحسار استخدام الذرة واليوم الذرة متوفرة ولا تصلح إلا غذاء للبهائم ومن ذلك التاريخ بدأ التصاعد في استهلاك القمح إلى أن انتشر في كل السودان .. السعر الحالي طبعاً جميل معانا في الشمالية .. وربما في باقي الوطن لا أعرف جيداً ولكن توفيراً للعملة الصعبة ومن المفترض كان يكون قبل الزراعة يا ريت الدعم لكل المنتجات ولكن طبعاً الأولوية للقمح لا أحد يرفع صوته طالباً البصل أو الذرة .. عقدة القمح .. ( الرغيف ) ما سمعنا أي مطلب أو مظاهرة عن ( الكسرة )