هدى عربي في (فتيل) .. يا صديقتي مالك و مال قمر دورين ؟

Post: #1
Title: هدى عربي في (فتيل) .. يا صديقتي مالك و مال قمر دورين ؟
Author: يحي قباني
Date: 02-17-2020, 01:09 AM
Parent: #0

00:09 AM February, 16 2020
سودانيز اون لاين
يحي قباني-فى الدنيا العجيبة
مكتبتى
رابط مختصر

عمركم شفتو زول بقلد الكابلي ؟

هل مر عليكم زول سمى روحو الكابلي الصغير ؟

هل ممكن يكون فنان بقلد كابلي على شاكلة حيدر بورتسودان الابيض ؟

انا احب هدى عربي جدا ... لكن غنا الكابلي صعب ... بكشف المستور ...

Post: #2
Title: Re: هدى عربي في (فتيل) .. يا صديقتي مالك و مال ق�
Author: امتثال عبدالله
Date: 02-17-2020, 01:38 AM

لكنها يا ود قباني حاولت . .واظن محاولتها كانت ناجحة نوعا ما ،على الرغم من أن تقليد الكابلي صعب بالحيل. ..
لكنها ، هدى عربي كانت متناغمة مع الأوركسترا...ولم يكن هناك نشاز في صوتها ..
وانا شايفة الكابلي وكانه علق على غناها مع فيصل محمد صالح، وزير الثقافة ..
يا ريت كان عرفنا قال شنو في غناء هدى عربي في قمر دورين ..

Post: #3
Title: Re: هدى عربي في (فتيل) .. يا صديقتي مالك و مال ق�
Author: خضر الطيب
Date: 02-17-2020, 04:15 AM
Parent: #2

مرحب حبيبنا قبة
ذي ما عارف انو في تكريم الفنانيين من قامة كابلي
اي فنان آخر بغني اغانيهو في الاحتفالية
زمان كان عندنا برنامج في التلفزيون
خمسة فنانيين بغنو اغاني بعض في نفس الحلقة
اي واحد بكون عندو طريقة مختلفة في الآداء
انحنا اتعودنا اغاني الحقيبة و على اغاني الفنانين بعد جيل الحقيبة
في البداية حاولنا نستوعب طريقة غناهم لاغاني الحقيبة
في فترة وجودي في التلفزيون ظهر الجميل نادر خضر
و اسامة و محمود عبد العزيز و الفنان وليد زاكي الدين
و حيدر بورتسودان
كلهم بدو بآداء اغنيات الغير بطريقة مختلفة
و بقى عندهم جمهور عريض من نفس الجيل
و الجيل البعدو
كدي اسمع يا قمر دورين بصوت الكابلي و بتوزيع المبدع اسامة علي
Osudan Records

Post: #4
Title: Re: هدى عربي في (فتيل) .. يا صديقتي مالك و مال ق�
Author: يحي قباني
Date: 02-17-2020, 05:04 AM
Parent: #3

يا بتنا ...
ما بنفع نقول حاولت ...
الغنا ده مسئولية ... و الكابلي مسئولية ...
ما بعرف حسيتها بتدافر في الغنا و تحاول تظبط رقبتها و غالبها ...
الغنية صعبة و فيها لعب كبير على هدى عربي ...

Post: #5
Title: Re: هدى عربي في (فتيل) .. يا صديقتي مالك و مال ق�
Author: Mohamed Adam
Date: 02-17-2020, 05:27 AM
Parent: #4

يا ابو اليح ياخوي الأستاذة ماقصرت طلعت آخر ماعندها..
بعدين دي هدي عربي وداك الكابلي كل واحد ليهو لونيتو الخاصة بيهو...
انا غايتو اعجبت جدا بأدائها..
غايتو فتيلك ده، تدخل فيهو براك ويا كمان انا إتصرف وأدخل فيهو صاحبك بريمة ود بلل ..

Post: #6
Title: Re: هدى عربي في (فتيل) .. يا صديقتي مالك و مال ق�
Author: يحي قباني
Date: 02-17-2020, 06:21 AM
Parent: #5

Quote: و بقى عندهم جمهور عريض من نفس الجيل
و الجيل البعدو
كدي اسمع يا قمر دورين بصوت الكابلي و بتوزيع المبدع اسامة علي

خدوري يا صديقي ...

التقليد ما هين ... و غناء الاخرين من اصعب الاشياء ... خاصة من هم في مقام كابلي ...

انا افهم انه ده تكريم ... و لابد من ترديد اغانيه ...
لكن الكابلي صعب و كان لابد من التجهيز اكتر من كده ...

صعب يا خضر ... حتى عركي ما غنا غنا كابلي بسهولة ...

Post: #7
Title: Re: هدى عربي في (فتيل) .. يا صديقتي مالك و مال ق�
Author: يحي قباني
Date: 02-17-2020, 06:39 AM
Parent: #6

خدر ... اسف نسيت ...

توزيع اسامه علي لطيف جدا ... :)

Post: #8
Title: Re: هدى عربي في (فتيل) .. يا صديقتي مالك و مال ق�
Author: يحي قباني
Date: 02-17-2020, 06:42 AM
Parent: #7

Quote: يا ابو اليح ياخوي الأستاذة ماقصرت طلعت آخر ماعندها..
بعدين دي هدي عربي وداك الكابلي كل واحد ليهو لونيتو الخاصة بيهو...

عوجة يا ابوحميد و انت رجل فاهم يا صديقي ...

بون شاسع بين لونية خاصة و بين محاولة لاداء الاغنية ...

كدي تعال لي في بوست مصرية في السودان ... عشان اوريك اللونية الخاصه معناها شنو ...هههه

Post: #9
Title: Re: هدى عربي في (فتيل) .. يا صديقتي مالك و مال ق�
Author: SILVER MOON
Date: 02-17-2020, 07:02 AM

من المطربين الذين نجحوا فى تقليد سفير الأغنية السودانية لحد ما الفنان هاشم الكابلى
ولاكنه سجن نفسه فى عباءة التقليد وضيع احساسى الابداعى الخاص به
دمت بود

https://www.youtube.com/watch؟v=WbT_kKbeZS8https://www.youtube.com/watch؟v=WbT_kKbeZS8

Post: #10
Title: Re: هدى عربي في (فتيل) .. يا صديقتي مالك و مال ق�
Author: ياسر السر
Date: 02-17-2020, 10:19 AM
Parent: #9

فعلا يا باش مهندس محاولتها كانت مش ولا بد وليس على قدر الاغنية فالأغنية من عيون الغناء السوداني وفيها ما فيها من محك كبير لكل فنان وهي اجتهدت ولكن حسب راي لم تكن على ما يرام ,,,
واحيانا تكون هناك ظروف ليس لنا علم بها فمثلا عدم الترتيب والبروفه الكافية للعمل يتسبب في ضعف العمل والأداء ,,,,
ولكن يظل الأستاذ عبد الكريم الكابلي عصي على الجميع ,,, بالرغم من انني أرى هناك اجتهاد واضح من اخونا الفنان الجميل هاشم كابلي الى حد كبير فهو اجاد كثيرا للأستاذ الكابلي ويا ريت القى لي مقطع انزلو هنا ..

شكرا يا باش مهندس ...

تحياتي : ياسر العيلفون ...

Post: #11
Title: Re: هدى عربي في (فتيل) .. يا صديقتي مالك و مال ق�
Author: خضر الطيب
Date: 02-17-2020, 10:32 AM
Parent: #10

حبيبنا قبة
انت زول سميع و فنان
دي ما فيها اختلاف
و بتشجع الغناء الجميل
و الدليل موجود
Quote: خدوري يا صديقي ...

التقليد ما هين ... و غناء الاخرين من اصعب الاشياء ... خاصة من هم في مقام كابلي ...

انا افهم انه ده تكريم ... و لابد من ترديد اغانيه ...
لكن الكابلي صعب و كان لابد من التجهيز اكتر من كده ...

صعب يا خضر ... حتى عركي ما غنا غنا كابلي بسهولة ...

في نوع من الفنانيين كابلي و حسن عطية و عثمان حسين و الجابري و العطبراوي و احمد المصطفى و ابو داؤود
الموضوع محتاج ما لي مباصرة
محتاج لشغل كتييير و الشغل محتاج لي وكت و ناس متمكنيين
في آخر سهرة اخرجتها للفنان عثمان حسين في العام 2006
كان معانا في الرياض قعد مع الفرقة الموسيقية و هي فرقة مكتملة و مكونة من عازفيين متمكنيين
لمدة طويلة عشان يغني فيصل الصحافة اغاني عثمان حسين
و اجازه بعدها عثمان حسين عشان يغني اغانيهو
و فيصل الصحافة فنان ملتزم
محبتي يا جميل

Post: #12
Title: Re: هدى عربي في (فتيل) .. يا صديقتي مالك و مال ق�
Author: tabaldy
Date: 02-17-2020, 11:39 AM
Parent: #10

تحياتي

الكورال المصاحب وأداء الفرقة الموسيقبة كانوا خصم على الأداء

الرقيص والانطرابة والابتسامة البتوزع فيها على الجمهور ما عندها علاقة بالأغنية وكل الحاجات البتحتويها وزي ما قال ياسر العيلفون فالأغنية من عيون الغناء السوداني وفيها ما فيها

كورال الفلبين أداءهم في رايي كان ممتاز مقارنة مع أداء الفنانة هدى عربي (أو السلطانة زي ما قالت المذيعة البتخنق في الكلام) بالرغم من كونهم برضو عدوها ابتسام وانبساط واندياح شديد، لأنهم قعدوا واشتغلوا وتعبوا، الاستعجال ود عم الكلفتة، والكلفتة ما حبابها مع الأستاذ الكابلي

تحياتي

Post: #13
Title: Re: هدى عربي في (فتيل) .. يا صديقتي مالك و مال ق�
Author: يحي قباني
Date: 02-17-2020, 04:37 PM
Parent: #12

Quote:
من المطربين الذين نجحوا فى تقليد سفير الأغنية السودانية لحد ما الفنان هاشم الكابلى
ولاكنه سجن نفسه فى عباءة التقليد وضيع احساسى الابداعى الخاص به
دمت بود

تحياتي سلفر موون ...

سمعت هاشم كابلي قبل شوية بغني ضنين الوعد ...

و ما كملتها ...

Post: #14
Title: Re: هدى عربي في (فتيل) .. يا صديقتي مالك و مال ق�
Author: Kabar
Date: 02-18-2020, 07:46 AM

والله ما جاب الفتيل يا ول ابا يحي

حضرت الحفلة لايف ،
غاظتني طريقة التقديم ، خصوصا المذيعة المتطنقعة الكانت بتقدم البرنامج (تحديدا ناس سودانية 24 ، يعني غالبكم كان تجيبوا ليكم زولة ولا زول مخضرم شوية عشان يعمل تجسير للحكاية ويظبط ليكم الشغل؟)؟؟
حضرت الحفلة ،

اول ما عيني وقعت عليها ، لقيتها في سودانية 24 ،
محنة سودانية 24 ، الصوت مصرّج..يعني بيشق اضانك وكده..!
لفيت في قناة تانية ، وكانت ناقلة نفس الحفلة ، والصوت شوية افضل..ولكن..!

لمن هدى عربي غنت..حسيت انها شغالة نظام تطبيع وكده..!!..والله صحي..!

يعني حسيت هدي عربي جديدة..زولة بتغني وكأنها ماشة حبل المشنقة..!

وبدون ما اشعر ياهدي عربي ، بديت ادندن لي روحي: دناب ..دناب يا الله فوق زينب..!

ويا ريت تختيها في بالك ، لمستقبل الأيام ياهدى..!

في الحفلة ، اتمنيت هدى تشتغل اغاني الكابلي بتاعة الحماسة (دود الوعر ، خال فاطنة ، دناب ..الخ)..ببساطة ، في ظني ، دي الحتة الممكن تدي مساحة واسعة لهدي عربي عشان تتجدع شوية..وتهز (الكتيف)..!!!!

لول..
الموضوع ، بعد شوية ح يجيب شنو كده ما عارف..!

والله ما جاب الفتيل يا ول ابا يحي..صحيح هدى في حكاية (قمر دورين) جانبها التوفيق..لكن صدقني لو اشتغلت (زينب) أو (دود الوعر) أو (خال فاطنة)..على بالحلال تعدي ليك في اللحو: فووووووووووووووو..!!!

كبر

Post: #15
Title: Re: هدى عربي في (فتيل) .. يا صديقتي مالك و مال ق�
Author: محمد أبوالعزائم أبوالريش
Date: 02-18-2020, 07:59 AM
Parent: #14

كلامك صحيح يا دفعة ... دخّلت روحها في حتة ضيقة ... خاصةً إنها من الفنانين القلائل البيلزموا نفسهم بالأداء حسب النسخة الأصلية.

لكن العزاء إنو الحفل تكريم للكابلي ... ما حينفع تغني فيهو أغنية للكاشف مثلاً

ورّطوها.

Post: #16
Title: Re: هدى عربي في (فتيل) .. يا صديقتي مالك و مال ق�
Author: محمد مجيدو
Date: 02-18-2020, 08:13 AM

يا هندسة ... وضيوفك ... سلام

انا غايتو هدى عربي دي اصلو ما خشت لي في راسي...
وفعلا بهدلت اغنية الكابلي ..

في شاب اسمو هاشم .. هو الوحيد القدر يقلد الكابلي بجدارة
هاك اسمعوو ..

Post: #17
Title: Re: هدى عربي في (فتيل) .. يا صديقتي مالك و مال ق�
Author: علاء سيداحمد
Date: 02-18-2020, 07:01 PM
Parent: #16

قبانى يا صديقى

هاشم ميرغنى اجاد فى اداء بعض اغانى الكابلى
وفعلا هدى عربى حشرت نفسها فى حتة ضيقة

هاك استمتع مع هاشم ميرغنى

Post: #18
Title: Re: هدى عربي في (فتيل) .. يا صديقتي مالك و مال ق�
Author: حسام الدين حمودة
Date: 02-18-2020, 11:05 PM
Parent: #17

فعلاً دخلت نفسها في فتيل ،، وفتيل بنسلين فاضي كمان ههههه
دائما تقييمي للفنان صعب ، وهدى عربي في رأيي لا تمتلك لا لونة ولا تمييز محدد في نبرة صوتها ،،، ليس هي فقط ولكن كل جيلها لم أستسيغ أصواتهم ،
آخر الأصوات التي شكلت لونية منفردة كانت زيدان وعبد العزيز المبارك والخالدي وبعدهم فراااااغ كبير ، ربما قليلاً نانسي عجاج لها حضور وجمال صوت وألق .
محاولات التقليد ليست جديدة ، بل إن معظم الفنانيين ما بعد الحقيبة غنوا أغاني الحقيبة حتى ظننا أنها لهم ، بل إن الإذاعة فرضت على الفنانين أداء بعض أغاني الحقيبة جبراً ، فغنى أبو اللمين بدور القلعة وجوهرا ، وغنى أبو داود (يخجل البدر يخمد المصباح ياليل هات لينا صباح) ويبدوا إنه أدرك الثروة في الحقيبة فنهل منها الكثير وغنى كذلك خضر بشير (برضي ليك المولى الموالي) وهكذا باقي الفنانين غنوا للحقيبة ...
الفرق بين جيل الفنانين الكبار والأساتذة العظام هي الإلتزام ، فلو غنى أحدهم أغنيته مثلا 20 مرة فلن يخرج عن اللحن أو التون وحتى العازفين لا يألفوا من رأسهم كما يحدث الآن ، إلتزام كامل بالنص واللحن والأداء ،،،،،
غنى الكابلي لوردي (19 سنة) فكبلنها مع الإلتزام باللحن ،، وغنى حرمان لحسن عطية ومرة أخرى كبلنها مع الإلتزام بالنص واللحن والموسيقى ..
كذلك غنى إبن البادية لسيد خليفة (أنشودة الجن) وأيضاً (مسافر وناسي هواك) وظللها بلونيته وصوته بدون الخروج عن اللحن ،،، وغنى لحسن عطية (حرمان) وأيضاً (هل تدري يا نعسان) وأيضاً (خداري) وأبدع أيما إبداع ،،،، ولم يخرج عن اللحن إطلاقاً
هذا هو الفرق بين الفنان وبين مدعي الفن ،،،
أرفق لكم أغنية حسن عطية حرمان لأنها مشتركة غناها الكابلي وغناها إبن البادية لتوضيح كيف يكون الإقتباس والأداء وليس التقليد ،،،،

حرمان صلاح بن البادية

حرمان الكابلي

.

.

Post: #19
Title: Re: هدى عربي في (فتيل) .. يا صديقتي مالك و مال ق�
Author: سامى عتبانى
Date: 02-19-2020, 02:53 AM
Parent: #18

والله يا باش مهندس تكون عملت للراجل ( الكابلي) هارت اتاك
هههههه

Post: #20
Title: Re: هدى عربي في (فتيل) .. يا صديقتي مالك و مال ق�
Author: يحي قباني
Date: 02-19-2020, 05:28 AM
Parent: #19

Quote: في نوع من الفنانيين كابلي و حسن عطية و عثمان حسين و الجابري و العطبراوي و احمد المصطفى و ابو داؤود
الموضوع محتاج ما لي مباصرة
محتاج لشغل كتييير و الشغل محتاج لي وكت و ناس متمكنيين

ده الكلام المفيد و من الاخر يا خدر ...

Post: #21
Title: Re: هدى عربي في (فتيل) .. يا صديقتي مالك و مال ق�
Author: HAIDER ALZAIN
Date: 05-10-2020, 08:32 AM
Parent: #20

بوست ممتع..

Post: #22
Title: Re: هدى عربي في (فتيل) .. يا صديقتي مالك و مال ق�
Author: يحي قباني
Date: 05-10-2020, 09:05 AM
Parent: #21

Quote: بوست ممتع..

حيدرنا ... ده لقيتو وين ؟ ياخ انا سيدو نسيتو ...

بركه الما قرينا سوا في الكتاب ...:)

Post: #23
Title: Re: هدى عربي في (فتيل) .. يا صديقتي مالك و مال ق�
Author: HAIDER ALZAIN
Date: 05-10-2020, 11:27 AM
Parent: #22

حبيبنا الجميل

وقت نعدم المفيد في الجديد بنجرها ضهر .. ونجتر المطايب الفاتتنا

تحياتي

Post: #24
Title: Re: هدى عربي في (فتيل) .. يا صديقتي مالك و مال ق�
Author: علي عبدالوهاب عثمان
Date: 05-10-2020, 04:10 PM
Parent: #23

الحبيب قباني تحياتي
قبل فترة الشباب يحكوا وأنا اسمتع ليهم كان الموضوع عن قيمة الريال
واحد قرأ من الفيسبوك تعليق :
(( حاجتين لا يمكن الثبات في السودان الدولار وكتف هدى عربي ))
وقتها لم أفهم النكتة
وقتها لم أرى بنتنا هدى عربي .. ولكن بعد اغاني واغاني .. فهمت الموضوع
فعلا كان تعليق اوسكار

الحبيب قباني .. الشباب حلوين ..