* عليك الله يا جبريل، إنت وزير مالية ولا ست ودع فارشة في نص السوق، قال شنو: " أنا كنت عارف انو الدولارحيزيد ويفوت العشرة ألف جنيه، ولسه حيزيد أكتر لأنو الحالة الاقتصادية متدهورة" رهيب إنت والله، ربنا يخليك للبلد لحدي ما الدولار يبقى ماية ألف جنيه"، إنت في وزير مالية زيك؟ ياخ الغنماية في السوق كانت عارفة كلامك ده، الله يرحم القال "الما بشوف من الغربال أعمى"!
* إنت جابوك وزير مالية عشان تتنبأ بالدولار حيبقى كم، ولا عشان تعمل حاجة توقفو عند حدّو؟! المواطن البمشي السوق بعشرة ألف جنيه وما قادر يشتري بيهم حاجة، كان ناقصو شنو غير يطلع ليهو وزير المالية يقول ليهو، إنتو لسه شفتو حاجة؟!
* ياها ذاتها حكاية الزول البيتو مولّع، يقوم يقيف قدام الناس ويقول ليهم: يا جماعة، البيت ده حيتحرق! طيب يا أخي، ما تجيب موية، ما تنادي المطافي، ما تعمل أي حاجة، ولا شغلك تقيف تتفرج، وتوري الناس البيت حيتحرق كيف؟!
* طبعاً يا سيد جبريل، لازم تقول الكلام ده لأنك ضامن الكرسي، وعارف إنو الوظيفة دايمة ليك، وما في زول بيحاسبك، وما في راجل، لا كميل شمعون ولا الحلمان ولا أى جنس مخلوق، بيقدر يقول ليك: "أمشي بيتكم"!
* البلد تقع، الجنيه يبقى ورقة ساكت، والماهية ما تجيب رغيفة، وإنت قااااعد في مكتبك مرتاااح، وجيبك مليااان، وكباب وسمك وشية وباسطة وكنافة، وفنجان ورا فنجان، والكضوم تلمع وترقش وتتنفخ كل يوم ومافي شغلة غير النقة والكلام الفارغ والتصريحات، والدولار طالع السما والاقتصاد منهار. والمليشيات تخم في الدولارات وراكبين العربات الفارهة، وقاعدين في افخم الفنادق، وشي عزايم وشي ولايم وشي سفريات، وده كلو على حساب الكرامة .. ياخي الكرامة تطير وتقع في البير لو ياها دي الكرامة. قال كرامة قال!
* وزير المالية، يا سعادتك، مفروض يطلع للناس يوريهم حيعالج مشاكل الميزانية كيف، حيزيد الإنتاج كيف، حيوقف تهريب الذهب كيف، حيوفّر النقد الأجنبي من وين، وحيعمل شنو عشان المرتبات ما تبقى ملاليم ما بتجيب حق الفطور!
* أما حكاية الدولار طالع والجنيه نازل والظروف صعبة، فدي ما دايرة وزير مالية، دي دايرة ليها مشّاطة مولعة سيجارة وقاعدة تمشط وتقطع في دي وتقطع في ديك، ودي طلقوها وديك عرسوها، ودي دقوها، والجنيه نازل والظروف صعبة !
* بعدين ياخي، إنت وزير في بلد أهلها مشردين وجيعانين ومرضانين، وبيوتهم اتهدمت واتسرقت والأسعار في السما، ما دايرين محاضرات ونبوءات في حاجة عايشنها كل يوم وعارفنها زى جوع بطنهم، دايرين يعرفوا حتعمل شنو عشان الحالة تتصلح، ولو ما عندك حل، قول ليهم ما عندى حل واتوكل على الله، الباب يفوت جمل !
* أخيرا يا جبريل، وبما انك اترقيت من وزير مالية لى وداعية، أسمح لى اهدي لك الغنية دي، مع الإعتذار للفنان الشعبي الكبير عبد الله البعيو: "ست الودع هاكي الودع لىْ كشكشكى، شوفيو لىْ كان فيهو شي قوليهو لىْ ما تختشي، لى كشكشي. اريتو فالك فال عدوك، ده كلام قديم ما زدتو شي، لملم كرامتك وزح بعيد ما يحرجوك، لىْ كشكي".
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير السراج
فيس بوك
تويتر
انستقرام
يوتيوب
بنتيريست