هلال وظلال ـ الحرب ما هجّرتنا من السودان هجّرت السودان مننا ..! في ناس كتار رجعوا السودان لكن السؤال البسيط البقلب كل الحكاية هل السودان رجع ليهم ..؟ لأنو ممكن الزول يرجع الخرطوم يمشي الحِلة يقعد في بيتو يشرب شاي في نفس الحوش ويمر من نفس الشارع لكن جواهو حاجة بتقول ليهوزإنت ذاتك ما إنت. والحقيقة القاسية إنو الحرب ما هجّرت السوداني من وطنو وبس الحرب هجّرت السودان من داخل السوداني. أخدت مننا حاجات ما بتتعوض بسهولة.. أخدت الأمانزوأخدت الثقةزوأخدت بساطة التعامل وأخدت جزء من قدرتنا على إننا نختلف من غير ما نكره بعض وأخدت من ناس كتار الإحساس القديم إنو الجار سند وإنو الغريب ممكن يبقى صاحب وإنو الإنسان مهما اختلف معاك، برضو إنسان. ـ:الحرب عملت فينا أكتر من البعملتو في البيوت!البيت المهدوم ممكن يتبني لكن القلوب والنفوس منو البيبنيها والقلب البقى خايف من كل الناس، منو الببنيهو ..؟ ـ السوداني البنعرفو كان عندو حاجة نادرة كان بسيط لكن بساطتو ما كانت عجز. كان متواضعولكن تواضعو ما كان انكسار. كان زاهد لكن زهدو ما كان فقر. وكان ممكن يملك القليلزلكن يشعر إنو الدنيا كلها في يدو ليه ..؟ لأنو ما كان بقيس قيمتو بالحاجة البملكهاوكان عارف إنو الإنسان أكبر من ممتلكاتو. ـ السوداني زمان كان ممكن يلبس أبسط حاجة ويركب أبسط حاجة ويسكن في بيت بسيط لكن يستقبل الضيف كأنو جاب ليهو الدنيا كلها. وكان ممكن يختلف معاك اختلاف السماء والأرضزلكن لو شافك مكسور ينسى الخلاف ويجبر خاطركودي كانت عظمة السودانيزإنو الخلاف ما كان بيلغي الإنسانيةزوالستر كان سترزوالجيرة كانت جيرةزوالضيف كان ضيفزوالكلمة الطيبة كانت صدقة. ـ لكن الحرب جات وما خربت البيوت بس خربت تعريفات كتيرة جوّانازخلتنا نسأل قبل ما نثقوالزول ده تابع منو ..؟ واقف مع منو ..؟ ممكن أأمن ليهو ..؟ ولو ساعدتو هل ممكن يضرني ..؟ بقى الواحد أحياناً شايل جواهو كمية خوف ما بتظهر في ملامحو يضحكولكن حذر. يسلم عليكزلكن ما مطمّنزيقعد معاك لكن جزء منو واقف على الباب ومستعد يهرب. وده أخطر أثر للحرب إنها تخليك تعيش بعد النجاة بعقلية الناجيووالناجي ما دايماً بعرف يعيشوهو بعرف ينجو وديل حاجتين مختلفات. ـ عشان كده نحن محتاجين نفهم إنو العودة للسودان ما مفروض تكون مشروع عودة طوعية مجانية ومواصلات وترحيل وبس العودة الحقيقية مشروع استرداد للإنسان عايزين نرجع السوداني لنفسو. نرجع ليهو البساطة لكن ما السذاجة. نرجع ليهو الكرامة لكن ما الغرور. نرجع ليهو القوة لكن ما القسوة. نرجع ليهو التدين البينعكس أخلاق ما التدين البينعكس خصومة. نرجع ليهو الاختلاف البينتهي بنقاشزما بكراهية. نرجع ليهو جبر الخاطر.. حتى لو الزول القاعد قدامك ما من جماعتك. لأنو في النهاية الإنسانية ما مفروض تكون عندها عضوية حزبية وعصبية قبلية نحن ممكن نبني السودان منوجديد لكن لازم نعرف إنو إعادة الإعمار ما معناها بس أسمنت وحديد. المباني عندها مقاولين. لكن النفوس عندها شغل أصعب. حنحتاج نبني الثقة. نبني الجيرة. نبني التسامح. نبني احترام الاختلاف. نبني فكرة إنو الزول الممكن يختلف معاك اليوم، ممكن يقف معاك بكرة في المصيبة. ونبني من جديد الحاجة البسيطة الكانت مميزة في السوداني إنو ما يفرح بانكسار أخوه. لأنو أخطر حاجة ممكن تحصل بعد الحرب إننا نرجع السودان لكن نرجع بأرواح ما عندها علاقة بالسودان. نبني عماراتزونفقد الجيران. نفتح الأسواقزونقفل القلوب. نرصف الشوارعزونخلي المسافة بين الناس أكبر. نرجع الكهرباءزلكن ما نرجع النور الجوا الإنسان. عشان كده السؤال هو ليس متى يرجع السوداني السودان ..؟ إنما السؤال متى يرجع السودان للسوداني .؟ ومتى يرجع السوداني ذاتو ..؟ ومتى يرجع الزول السوداني الكان قبل الحرب ..؟ الزول البضحك من قلبو. الزول البساعد من غير ما يصوّر مساعدتو. الزول البستر أخوه. الزول البجبر خاطر المكسور. الزول البختلف معاكزلكن ما بتمنى ليك الشر. الزول البعرف إنو الدنيا واسعة وإنو رزقك ما بنقص رزقو. الزول البعرف إنو ممكن تكون كبير من غير ما تصغّر زول. دي هي المعركة الحقيقيةزلأنو الحرب ممكن تنتهي باتفاق لكن السلام ما بيدخل البيوت إلا بعد ما يدخل القلوب. وعشان كدهولو رجعنا السودان وما رجعت روح السودان نكون رجعنا للمكان لكن ما رجعنا للوطن. الوطن ما هو التراب بس. الوطن هو الطريقة البنتعامل بيها مع بعض. والوطن هو الذاكرة. والأخلاق. والبساطة. والستر. والكرامة. والجيرة. وجبر الخاطر. والقدرة على إنك تقول أنا مختلف معاك.. لكن ما عدوك. يمكن دي تكون أهم حاجة لازم نستعيدهاولأنو السودان المهدوم ممكن يتبني لكن السودان المفقود جوّانا لو ما رجعناه حنكون خسرنا الحرب حتى بعد ما تسكت البنادق ويتوقف القتال. الحرب ما هجّرتنا من السودان بس الحرب هجّرت السودان مننا. والعودة الحقيقية ما يوم نصل السودان. العودة الحقيقية يوم السودان يصل لينا من جديد. ويوم الإنسان السوداني يرجع يلقى نفسو.. ساعتها بس.. نقدر نقول السودان رجع. ونهتف في المدرجات وجع وجع السودان رجع
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبد المنعم هلال
فيس بوك
تويتر
انستقرام
يوتيوب
بنتيريست