حلم في حلم… البارحة يا جماعة، شفت في المنام حاجة عجيبة… لقيت نفسي ماشي في شارع طويل، لا لافتة فيهو، لا اسم شارع، ولا حتى زول عارف نحن ماشيين وين. لقيت مناوي واقف في نص الشارع، عيونو في السماء، ووشّو مليان هم. قلت ليهو: ـ مالك يا مناوي؟ شايل الهم دا كلو ليه؟ قال لي: ـ إنت ما سمعت؟ قلت: ـ سمعت شنو؟ قال: ـ قالوا مجلس السيادة ح يمشي! قلت: ـ يمشي وين؟ قال: ـ دي المشكلة! ما قالوا لينا. قلت ليهو: ـ طيب، يمكن يمشي إجازة! قال: ـ إجازة شنو يا زول؟ أنا خايف يختفي ذاتو! قلت: ـ وبعدو؟ قال: ـ بعدو يرشحوا البرهان رئيس! قلت: ـ رئيس شنو؟ قال: ـ رئيس السودان. قلت: ـ طيب ومجلس السيادة؟ سكت مناوي. قلت ليهو: ـ ومجلس السيادة وين؟ قال: ـ يكون ما كان! قلت: ـ كيف يعني «ما كان»؟ قال: ـ يتشال من الصورة… وتتعمل حاجة كدة اسمها مجلس مساعدين. قلت: ـ مساعدين شنو؟ قال: ـ مساعدين شرفيين! قلت: ـ يعني يساعدوا شنو؟ قال: ـ يساعدوا في الشرف! هنا، والله يا جماعة، ما قدرت أمسك نفسي من الضحك. قلت ليهو: ـ يا مناوي، إنت خايف من شنو بالضبط؟ قال: ـ خايف نصحى الصباح نلقى السودان عندو رئيس واحد… والمجلس بقى صورة في الحيطة! قلت: ـ وبعد داك؟ قال: ـ وبعد داك نلقى نفسنا رجعنا للزمن القديم… لكن بدل «الرئيس» القديم، عندنا رئيس جديد، وبدل المؤسسات، عندنا مجلس مساعدين شرفيين! قلت ليهو: ـ يا مناوي… إنت مالك مستعجل؟ يمكن الحكاية كلها حلم! قال: ـ أها، وأنا خايف يكون الحلم دا حلم في حلم! وفجأة، ظهرت الجماعة أصحاب المبادرة. واحد منهم رفع الورقة وقال: ـ نحن شباب مستقلون، لا ننتمي لحزب ولا تنظيم ولا أيديولوجية… نحن فقط مع المطلق السوداني والمؤسسات القومية! مناوي بص ليهم وقال: ـ طيب والمؤسسات القومية دي… لو مجلس السيادة اختفى، بتكون وين؟ واحد منهم قال: ـ موجودة! قال: ـ وين؟ قال: ـ في الروح الوطنية! مناوي مسك راسو. قلت ليهو: ـ خليهو يا مناوي… ـ النومة بتريّحو! لكن مناوي قال: ـ لا يا زول! النوم ذاتو ما بقى مريح… أخاف أنوم وأصحى ألقى «المخلوع» رجع في المنام، لابس بدلة جديدة، وقاعد في نفس الكرسي! وهنا انطفأت الأنوار… وسمعنا صوتاً من بعيد: «أيها المواطنون… لقد دخلنا مرحلة جديدة من الاستقرار!» مناوي صرخ: ـ استقرار شنو؟! قلت ليهو: ـ اسكت يا مناوي… خليهو يا مناوي… النومة بتريّحو! وفجأة صحيت من النوم. لقيت نفسي عرقان. قلت: ـ الحمد لله… حلم! لكن بعد شوية فكرت… وقلت: ـ يا ترى الحلم انتهى هنا؟ ولا نحن ذاتنا جوة حلم أكبر؟ حلم في حلم…
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الأمين مصطفى
فيس بوك
تويتر
انستقرام
يوتيوب
بنتيريست