مراجعات(16): هرجلة بنك الخرطوم ،(بنكك) ... وغياب بنك السودان عن الرقابة والضبط (2)
نعود لمواصلة الحديث عن الدربكة الحصلت امس وتوقف التطبيقات المصرفية عن العمل وتوقف عمليات البيع والشراء وعجز المودعين عن التصرف في اموالهم .. سوف اركز على دور بنك السودان في حسم هذه الفوضى لانه هو المسؤول عنها واليوم وبدون خجل اصدر البنك نشرة تفيد باستمرار عمل التطبيقات اثناء عطلة اجازة عيد الاضحى ... اذكر قبل ما ندخل بنك السودان وبعد ان تم اختيارنا للعمل فيه جونا فطاحلة بنك السودان وقالوها واضحة
بنك السودان هو المسؤول عن الاول عن حقوق المودعين بنك السودان هو الضامن الاخير لحقوق المودعين ظلت العبارتين راسخات في ذهني وقد كانت حقيقة على ايامنا الان بنك الخرطوم خصم من جميع عملائه قبل شهرين وانا احدهم مبالغ وبالرغم من توجيه بنك السودان باعادة الاموال لم يرجع المبالغ وربما ذهبت لتمويل الحرب. زي ما قلته سوف اركز على دور بنك السودان الاشرافي والرقابي في ادارة الجهاز المصرفي لأني بعتبر نفسي خريج هذه المؤسسة ايام عزها ولسه وجدانيا مرتبط بيها وعليه اقول:
1. استبدال العملة في هذا التوقيت لم يكن قرار حكيما .... وبعد الاستبدال ليه البنك ما وفر سيولة واجبر البنوك على توفير السيولة للمواطن؟ في زمنا كان بنك السودان يشترط على كل البنوك تخصيص 25 % الى 30 % لمقابلة السحوبات اليومية للعملاء واي بنك يخالف يعاقب بغرامة. 2. وين الصرافات الالية او ال ATM Machine ماف صرافة شغالة الان وليه ما تجبروا البنوك بتشغيل الصرافات الالية بدل الزحمة والصفوف والقرف القدام البنوك عشان العميل يسحب من قروشه وفق سقف معين لحد السحب اليومي اتخيل معاي لو في 100 في ام درمان و100 في بحري و100 في الخزطوم اكيد الفوضى الامس دي ما كانت حصلت. ببطاقة الصراف حقتك تسحب في اي صرافة ما شرط حقت البنك الانت فاتح فيه وبعدين يتولى بنك السودان عمل التسويات اللازمة Recancelation بين البنوك. 3. ليه بنك السودان يسمح لبنك واحد بس يتحكم في 90 من الكتلة النقدية الفي البلد اذا كان بنك الخرطوم محدد لينا سقف للسحوبات والتحويلات اليومية ... وانا متأكد بنك السودان ما محدد ليهم سقف محدد للعمليات والسحوبات اليومية. 4. ليه ما فكرتوا يا ناس بنك السودان في بدايل للتطبيقات البنكية مثل الدفع بالموبايل لمؤسسة مالية تدار بواسطتكم واتخيل مع كل عملية يتم خصم مبلغ للعملية زي ما قاعد يعمل بنك الخرطوم دا مش دخل اضافي للخزينة وللبلد (مافي زول يلكز جبريل ابراهيم عليكم الله هههه) البحرين عندهم حاجة اسمها بنفيت (benifit pay) مسهلة للناس حياتهم لا بنك ولا اوكاش ولا زعيط ما قادرين عليها شجعوا شركات الاتصالات تطور تطبيقات وتكون تحت ادارتكم وشايف شركة سوداني بدت في تطوير تطبيق اسمو صاح ( Sah) يا ريت ينجح عشان يفك الضيقة دي التطبيق تنزله من قول بلي ويتم المصادقة عن طريقة الهوية الرقمية لاثبات الشخصية والمسؤولية القانونية. 5. زمان لما تحصل حاجة زي دي يتم التصرف فورا بضخ سيولة اضافية عشان تفك الازمة هسي الناس بتجي الشغل تتونس وتقلع كرفتاتها وترجع. 6. التطبيقات دي عليها ضغط شديد هي وشبكتكم القومية وسيرفراتكم زفت انتقاوا لاستخدام التخزين السحابي وال Data Cloud بقت علم وهي امنة ومتاحة طوالي عمركم سمعتوا بالانترنت دا قطع في كل انحاء العالم .... كضب ودا مفروض بعد الحرب طوالي نعمل كدا حدثوا انظمتكم وانتقلوا للسحابة
الحصل دا امر غير مقبول ونحن ما عايشين في ام مغد ولا جبيت ولا تنقاسي ولا زالنجي ولا كاوده ولا تمبول
ابدوا بالخرطوم دي وبعدها وسعوا الشغل
7. حدثوا انظمتكم وطوروا من موظفيكم بالتدريب والزيارات الخارجية زمان البنك برسل الناس برة دورات تدريبية للتطوير الاردن الهند امريكا
كل مكان ممكن تستفيد منه ابعث موظف او موظفين دربهم وجيبهم. 8. ما بتقدروا رجعونا لزمن مسك الدفاتر عليكم الله
عجز وغياب بنك السودان عن دوره الاشرافي والرقابي يعني فقدان الثقة في الجهاز المصرفي والناس ح ترجع لي زمن ابوي الله يرحمه تقول ليه احول ليك بقول لا اكتب ليك شيك بقول لا نمشي نودع القروش دي في البنك برضو بقول لا اخر كلام بقول ليك:
امشي جيب لي قروشي وبختها في خزنتو وخلاص
لا فلقوه ولا عوقوه.
مع استبدال العملة بياع سعوط جاب 2 ترليون جنيه في شوال.
واختم كلامي للبنوك التانية غير بنك الخرطوم
التسويق بقى علم وعندكم تطبيقات زيكم زي بنك الخرطوم والشبكة لا حقتو ولا حقتكم ليه ما تسوقوها وتطلعوا ناس تفتح حسابات للمواطنين زي ما عمل بنك الخرطوم في بداياته استقطب العملاء وفتحوا حساباتهم وشغالين
وليه ما تعملوا زي ابو ذر الكودة استقطب الطلاب الشطار في بداياته وتاجر بيهم وانطلق والان مسيطر على البلد هو وبنك الخرطوم بنك الخرطوم ما احسن منكم ولا اغنى منكم والناس زهجت منو خلاص استثمروا الفرصة دي واعملوا تسويق اتعاقدوا مع الشركات والمؤسسات لتنزيل رواتب العاملين والحكاية بتمشي صدقوني ... خلوا فتح الحسابات اونلاين بدون صفوف وقرف
الحلقة الجاية عن دورنا كمواطنين في صنع الصنم بنكك.
..... يتبع
مهندس/ الأمين البشاري ادارة التقنية المصرفية ببنك السودان - سابقا 2026/5/26
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الأمين البشاري
فيس بوك
تويتر
انستقرام
يوتيوب
بنتيريست