"بتصرف" عملية قلب اللحاف تمت بنجاح… والشهود: كرتيهم ذاتو، بعد ما وقّع على شهادة وفاة “الإنقاذ” وقال: فشلت، والبشير شايل الكرت الأحمر كامل غير منقوص. القصة باختصار – وللمرة الألف – نفس الجماعة، نفس الوجوه، نفس الكرفتات، لكن اللحاف اتقلب. مرة كان أخضر، هسع بقى أخضر فاتح شوية، باسم جديد: حركة المستقبل للإصلاح والتنمية يعني المؤتمر الوطني بعد ما غسل وشو، حلق شنبه، ولبس جلابية شبابية. علي كرتي، الأمين العام للحركة الإجرامية، طلع علينا وقال: – هدفنا الاستراتيجي التخلص من المؤتمر اللاوطني وتركة حكمه الثقيلة. طيب يا مولانا… المؤتمر اللاوطني دا ما كان ابنكم البِكْر؟ ولا دا زي الولد المشاغب لما يكبر تقول: “دا ما ولدي… دا ولد الشارع”؟
الأطرف من دا كلو، إنو الإنقاذ سقطت، وفشلت،" والبشير" هو السبب. يعني السفينة غرقت… والكابتن غرق، لكن الطاقم واقف في الشاطئ ببدل التيشيرتات، وبيقول: “نحن أصلاً كنا معارضة بحرية”. أما الإطار النظري، فدا موضوع مهم وخطير. أمين حسن عمر، صاحب النظريات المرنة، وضع الإطار. إطار شنو؟ إطار سيارة قديمة، من كتر ما لفّ بيهو السياسة بقى أملس، ما بمسك في أسفلت الواقع، وأول مطب ديمقراطي ينفجر. الإطار النظري دا، زي العجلة الإحتياطية: ما بتستعمل إلا لما العربية تكون أصلاً خربانة. وبخصوص الوجود الخارجي، كرتي قال: – ما عندنا مكتب في تركيا بقيادة محمد عطا. لكن عندنا مكتب تاني… وفيهو مهدي إبراهيم، عصام البشير، عبد الحي يوسف، وفيصل حسن إبراهيم، وأحمد الشايقي، وحامد ممتاز، ومجلس إعلامي بقيادة البصيرة ام حمد والتوم. يعني ما مكتب… دا فرع كامل مع صالة انتظار وكافتيريا. وبرضو المكتب القيادي متعيّن، عشان المنتخبين مشوا مع تيار تاني. يعني الديمقراطية ماشّة كويس… بس دايماً بتضيع في الطريق. أما المرجعية الفكرية، فطبعاً بنشر علي عثمان محمد طه. "رمز الوطن والإسلام زورا،" النسخة “السوبر” من السياسة: ما بتظهر إلا في الأزمات، وبتختفي قبل الحساب. أحمد هارون؟ قالوا الجنائية عاملة ليهو مشكلة في الحركة. يعني مطلوب بديل “خفيف حركة”، سريع، مرن، بدون قيود دولية… كأنو إعلان لوظيفة: مطلوب قيادي، لا يشترط سجل نظيف. وفي العلاقات الدولية، الحركة ما بترفض الحوار، لكن بترفض مجموعة إبراهيم محمود. يعني الحوار مرحب بيهو… بس مع الناس الصح، وبالطريقة الصح، وفي الزمن الصح، وتحت الإطار الصح. أما الجيش، فهم داعمين البرهان، لكن حذّروه من تحول القوات المشتركة لدعم سريع جديد. يعني النصيحة جاية من ناس كانوا بيخلقوا المليشيات زي ما الناس بتعمل شاي العصر. ودارفور؟ قالوا مشتعلة، وأضعفت السودان، وممكن نموذج جنوب السودان يكون حل. يعني بعد كل دا… الخيار الأخير: نقسم البلد ونقول: “خروج آمن وسلمي للجميع”. الخلاصة: اللحاف اتقلب، الإطار اتنفخ، والعربية لسه واقفة مبنشرة منتظر اطار أمين ولستك كرتى. والسؤال البسيط البسألو المواطن: لو الإنقاذ فشلت، والمؤتمر اللاوطني تركة ثقيلة… إنتو كنتو وين؟ ولا كنتو بس ماسكين اللستك؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الأمين مصطفى
فيس بوك
تويتر
انستقرام
يوتيوب
بنتيريست