الأسافير بين حرية التعبير والانحدار الأخلاقي كتبه عبد المنعم هلال

10:54 PM January, 14 2026

سودانيز اون لاين
عبد المنعم هلال-الخرطوم-السودان
مكتبتى
رابط مختصر

‏هل وظلال
‏
‏
‏
‏
‏ـ الأسافير زيها وزي أي ساحة عامة بتعكس حال المجتمع وأخلاقه وثقافته لكن الحاصل اليوم في فضاءات التواصل الاجتماعي السودانية يدعو للقلق بل وللحزن.
‏ـ بدل ما تكون منابر للفكرة والحوار وتبادل التجارب والمعرفة بقت في كثير من الأحيان مسارح للردح والتجريح واستعراض أسوأ ما في النفوس.
‏ـ شباب وفتيات السودان.وخصوصاً البعيدين عن الوطن بعضهم تعامل مع الميديا كأنها مكب نفايات نفسية.
‏ـ كل غضب مكبوت وكل فراغ وكل إحباط ينسكب في بوستات وتعليقات مليانة إسفاف وسخرية وقلة أدب.
‏ـ الغربة والحرية في بعض البلاد ما مبرر للانفلات ولا المسافة بتدي الإنسان رخصة يشيل أخلاقو في جيبو ويطلعها متى ما داير.
‏ـ المؤلم أكتر إنو الظاهرة دي ما وقفت عند الصغار أو قليلي التجربة في صحفيين وفنانين ومثقفين ناس مفروض يكونوا قادة رأي بقوا جزء من المشهد القبيح دا وبدل ما يطفوا النار نفخوا فيها وبدل ما يرفعوا مستوى النقاش نزلوا بيهو للقاع.
‏ـ تشوف وتسمع صحفي يشتم أو فنان يردح أو (متصوفح) يلهث وراء اللايكات ولو على حساب الكرامة.
‏ـ ردحي القونات بقى مادة يومية صراعات مفتعلة وكلام سوقي وتشويه متبادل ومكاوات بالأغاني وحركات اليدين.
‏ـ صراع الفنانين والفنانات ما بقى تنافس إبداعي بل بقى معركة ألفاظ مبتذلة ونبيح بعض الصحفيين والمتصوفحات بقى زي الطبول الفارغة صوت عالي وما في مضمون منظر يجيب الرمد للعين ويصيب السمع بالتلوث ويقرف أي زول عندو ذوق.
‏ـ المتصوفحات والقونات هن المشكلة فقد أصبحن يقدن الرأي العام ورا.. ورا.. ورا ..!!
‏ـ في ناس لسه فاكرين إنو الأسافير ساحة حرة بلا قانون ولا أخلاق وإنو الشتيمة شجاعة وقلة الأدب صراحة والتجريح قوة ودا فهم معكوس وخطير.
‏ـ حرية التعبير ما معناها حرية الإساءة والنقد ما معناهو الهدم ولا التحقير والاختلاف ما بيفتح الباب للبذاءة.
‏ـ الأخطر من كل دا إنو السلوك دا قاعد يتطبع ويصبح عادي والزول البشتم اليوم بكرة بيتشتم وبعد بكرة يشوف الشتيمة كأنها لغة طبيعية وهنا الكارثة لأنو لما القبح يتطبع ما بنحس بيهو ولما ينعدم الاستنكار المجتمع كلو يدخل في مرحلة انحدار أخلاقي صامت.
‏ـ النشء الصغير هو الضحية الأولى أطفال ومراهقين قاعدين يتربوا على مشاهد السب والفضائح والتشهير وبيتعلموا إنو أعلى صوت هو الغالب وإنو قلة الأدب بتجيب شهرة وترند وقروش وإنو الاحترام ضعف جيل بالشكل دا كيف ننتظر منو يبني وطن أو يحترم اختلاف أو يصون كرامة ..؟
‏ـ محاربة البذاءة في الأسافير ما مسؤولية جهة واحدة الأسرة مسؤولة تربي وتراقب والمدرسة مسؤولة تغرس القيم والإعلام مسؤول يكون قدوة والفنان مسؤول عن رسالتو والصحفي مسؤول عن قلمه وكل زول فاتح حساب مسؤول عن كلامو.
‏ـ الموبايل ما ألغى الضمير والكيبورد ما أسقط القيم.
‏ـ نـحتاج نراجع نفسنا قبل ما نكتب ونسأل الكلام دا بفيد منو ..؟ برفع من شنو ..؟ تأثيرو شنو..؟ ولا بس بفضحنا قدام نفسنا قبل الناس ..؟ ما كل رأي لازم يُقال وما كل غضب لازم يُنشر وما كل خلاف لازم يتحول لمعركة علنية.
‏ـ الأسافير ما حتكون أنظف من ناسها لو نحنا نظفنا لغتنا ارتقى خطابنا ولو استمرينا في الردح والصعلقة والبذاءة بنحصد مجتمع متعب ملوث سمعياً وبصرياً وأخلاقياً والخسارة الأكبر حتكون جيل كامل تربى على القبح وتعود عليه وما عاد يشوف الجمال إلا حاجة غريبة.
‏ـ الأسافير خير سفير إذا ما تم استغلالها الاستغلال الصحيح.
‏ـ قوموا إلى الكيبورد وانشروا المفيد قبل ان يدرككم الموت.
‏