مذكرات زول ساي (لزومو شنو يختطفو زوجة الرئيس الفنزويلي؟!!) كتبه فيصل علي سليمان الدابي

03:47 AM January, 08 2026

سودانيز اون لاين
فيصل الدابي المحامي-الدوحة-قطر
مكتبتى
رابط مختصر

قال الزول الساي الما بسكت ساي وما بقعد ساي:

بيت شعر ساي من شعر الزول الساي:

ما هذه الحياة؟! ولماذا يسود جوها الخبل؟!!
كل الرفاق تساقطـوا وبقيت وحـدك كالجبل!!

نحن كشعب سوداني اتعودنا على العجائب الانقلابية المفاجئة، لكن برضو في حاجات كده في العالم بتخلينا نقيف ونحك راسنا ونقول يا جماعة الخير الحاصل في العالم ده شنو؟!!
يعني مثلاً، في تاريخنا السوداني المسكون بشياطين انقلابات العسكر المغرمين بالاستيلاء المفاجئ على السلطة في ساعة الصفر في عز الظلام والناس نيام عبر إذاعة البيان رقم واحد سيء الذكر!! شفنا رئيس سوداني ينوم بالليل رئيس في قصر الرئاسة، ويصحى الصباح يلقى نفسو سجين في الحراسة!! وشفنا رئيس يقبض رئيس، ويحوّلو في لمح البصر من فخامة الرئيس إلى المتهم الحبيس!! وشفنا سياسي مدني ادعي البراءة بعد ما دبر انقلاب مع عسكري وقال ليهو لزوم التمويه وكده: أنت اذهب إلى القصر رئيساً وانا ادخل السجن حبيساً!! وقلنا مافي مشكلة، دي شؤون سودانية داخلية بتاعت لف ودوران، وكل راجل سوداني أدرى بأهل بيتُه من شفع ونسوان!!
لكن والله الظاهر الأمريكان ديل شكلهم ما دايرين يخلّوا لينا حاجة نتفرّد بيها في العالم ده وعايزين ينافسونا حتى في الفوضى المنظمة بتاعتنا، يعني بالله عليكم، ياخي معقول دولة عظمى زي الولايات المتحدة الأمريكية، لو نيزك عايز ينزل في ارضها بتعرفو قبل أسبوع، ما لقت ليها شغلة غير انها تمشي تختطف وتقبض زوجة الرئيس الفنزويلي؟!!
ياخي لا انقلاب، لا بيان رقم واحد، لا موسيقى عسكرية، لا دبابات في الشوارع، بس طوالي كده اختطاف وقبض ترامبي، وطوالي الامريكان حولو المسكينة زوجة الرئيس الفنزويلي من السيدة الأولى إلى المتهمة الأولى!! ياخي الخطف بتاع تسعة طويلة الأمريكي ده يمين أخير منو خطف تسعة طويلة بتاع السودان!!
والله غايتو الواحد يحس إنو السياسة الدولية بقت زي المسلسلات التركية الخيالية، يعني أمس زوجة الرئيس الفنزويلي كانت لابسة أبيض آخر موضة وواقفة جنب الرئيس الفنزويلي في الاستقبالات الرسمية، واليوم لابسة رمادي ومحاصرة بالشرطة الأمريكية وواقفة كمتهمة إرهابية وتاجرة مخدرات قدام القاضي الأمريكي!!
امرأة سودانية علقت قائلة: ياخي التاريخ بقول كل الحروب بشعلوها الرجال ويموتو فيها الرجال!! الحرب العالمية الأولى والحرب العالمية الثانية اشعلها الرجال وماتو فيها ملايين الرجال!! وفي المانيا تم قتل عشرات الملايين من الرجال وكاد الرجال الالمان ان ينقرضوا بعد هزيمة المانيا في الحرب العالمية الثانية الى درجة انو القانون الالماني عمل شريعة اضطرارية تسمح للرجل الالماني الواحد انو يتزوج 20 امراة المانية!! ما علينا!! ياخي يا رجال خلو النسوان يحكمن العالم ده والله تاني ما تشوفو الحروب تاني ولا تسمعو بيها نهائي!! ياخي عرفنا الرئيس الأمريكي الراجل خطف وقبض الرئيس الفنزويلي الراجل متلو وحوله من السيد الرئيس إلى المتهم الحبيس لكن لزومو شنو الأمريكان ديل يقومو يخطفو ويقبضو زوجة الرئيس الفنزويلي ويحولوها من السيدة الأولى إلى المتهمة الأولى!! طيب ما كان برضو يخطفو كلب الرئيس والحارس الشخصي للرئيس!! والله العالم الخارجي ده بقي غريب جداً جداً والسياسة الخارجية بتاعتو صبحت ما مفهومة كلو كلو لأنها بقت بلطجة عديل كده وما بتفرق بين الرئيس وزوجة الرئيس ونحن ديل غايتو قاعدين نتفرج عليها ونقول: الحمد لله على مشاكلنا السودانية الداخلية لأنها مهما بقت قبيحة وسنيحة هي على الأقل مفهومة بالنسبة لينا!!


(من مذكرات زول ساي)

نعم للسلام ولا للحرب في السودان

فيصل علي سليمان الدابي/المحامي
[email protected]