سِفْر الإِرهاق كتبه عبدالماجد موسى

07:06 PM January, 07 2026

سودانيز اون لاين
عبد الماجد موسى-UK
مكتبتى
رابط مختصر

سِفْر الإِرهاق

زَيَّفْتُو أوراق العنب
شَدَّيتو روح ساقيتنا ديك
وقفلتو أبواب العصافير
شوق المسامير للخشب
بلدنا ذابت في رجب
عريانه
فاض بيها العذاب بعد التعب
لا قادرة ترجع زي زمان
لا حب يقودها للأمام
لا ضحكة
لا شوق من عدم
وبقينا بعد الموت نشوف
دنيتنا بي منظار مخيف
أصوات ظلام
صراخ شوارع تنضبح
وأنين توسل
وانكسار
ودمار أسيف
ألوان جريحة بترتعِش
جافاها نوم
سَرَحَت مع الموج البِمِش
وادي العذاب
تتكسر الصفحات سريع
والناس هناك لازم تبيع
البيع صِبِح لعنة ضمير
مبيوعه فيهو عروض
ذِمَمْ
كل المنافي بِقَت صقيع
يا دنيا طعمك جد مسيخ
حتى الدموع
رافضات تقع في الغربة
تبقى هناك
تشيخ
و الأمنيات بالعودة راسمه المستحيل
دا خرابنا جيل

عبدالماجد موسى/ لندن