لَو عِصَتْ الحُرُوف كتبه عبدالماجد موسى

03:18 PM January, 01 2026

سودانيز اون لاين
عبد الماجد موسى-UK
مكتبتى
رابط مختصر

أطفال صغار
كانوا بْ يَلَقِّطُو في حبيبات داكنة
في ميدان سلام
وفجأة
قبل الليل يسيل
هَبَّت رياح
ساخنة
وعنيدة
ومزعجة
في القيف هناك
أطفال صغار
إِتْشَتَّت فيهم مدن
وقُرَى
وصباح
أطفالنا مليانين جِراح
ورَوْيانين شقا
دي حماقة الناس الكبار
مابيفرزو الباقِي المُحَطَّم
من الناجي البِقا
أوراق رماد
أو ذكرى حايمه
مبرقعة
ود ابكر
نَوِّرنا يا الوجع الغريق
مين مسح المعاني السمحة
مِن حِلًّتنا
مِن نيلنا البتول
دا منو البحاول يحرق
الصاحي الدليل
وعيونو فيها كبير دليل
طبعاً مُحال
بل مستحيل
الوَجْعَة زارتْ كل بيت
والحُرْقَة حارَّة
أَبَتْ تَنُوم
أماني ..
وين أختِك أمل
وأَمُّونَه
والقمري الرًّحَل
ماتجاوبو ..
يا قادتنا
يا الفاقدين خجل
دِي الصورة لازم تِكْتَمِل
ونضيف صُوَر
قَهْرانه
تَنْتَّح فيها روح
للذكرى
للجايِي الخريف
عَضِّيو لسانك يا خروف
خَلِّي الزمن ينقذنا
لو عِصَت الحروف
مبروك
على الناس المكسَّرة في النظام
ومليانه خوف
وحالفه في ضهرو بتقيف
وكمان تموت


عبدالماجد موسى/لندن