هلال وظلال ـ بالرغم من الكلفتة واللخبطة والسوء الباين في تفاصيل دوري النخبة إلا إنو ما بنقدر ننكر إنو في وسط الركام في شعاع نور خجول طالع من وسط الظلام. ـ دوري النخبة أعاد لينا الحياة في الملاعب والمشجعين رجعوا يهتفوا ويشجعوا ويرفعوا الأعلام ويدقوا الطبول كأنو السودان ما فيهو حرب ولا خراب. مشهد الجمهور في المدرجات بيهتف وبيضحك وبيتشاكل وبيتصالح.. دا في ذاتو كافي عشان نقول لسه في أمل. ـ أيوه الدوري متكلفت والملاعب تعبانة ومباريات الليل بتتلعب بضوء بطارية يد والتحكيم مرات يخليك تطلع من طورك والبث التلفزيوني تقول عليه كاميرا حفلة في مناسبة عجاجة ضارب العيون لكن برغم دا كلو الجماهير رجعت والكورة رجعت تتحرك في الميادين والغنا رجع يدوي من الحناجر. ـ دي ما بطولة عادية دي رسالة. ـ رسالة للعالم إنو السودان لسه حي ولسه عندو ناس بتحب الحياة وبتحب الكورة وبتحب الوطن رغم الوجع والدموع. ـ الفايدة الفنية من الدوري يمكن تكون صفر .. ما ح تطلع ليك محترف جديد ولا ح تكتشف خطة تكتيكية عبقرية ولا ح تتفرج على مباريات قوية لكن المكسب الحقيقي روح السودان والتعفر بتراب الوطن ..! ـ بلدنا محتاجة لفرح.. محتاجة لتجمع الناس حول شيء يوحدهم بعيد من السياسة والقبلية والطائفية والجهوية .. وشنو غير الكورة بتعمل الحكاية دي ..؟! ـ إكمال الدوري في الظروف دي ما عشان نعرف منو البطل ومنو الفاز وشال الكاس لكن عشان نأكد إنو السودان نفسو ما مات وإنو قدامو مشوار طويل للتعافي.. ودوري النخبة كان خطوة صغيرة لكن معنوية في الاتجاه دا. ـ لا الهلال ولا المريخ ولا أي فريق تاني هو الكسبان.. الكسبان الوحيد هو الوطن والرسالة الوحيدة الممكن نطلع بيها من دوري النخبة هي إنو السودان راجع والكورة بتعرف تطرد الحزن. ـ في بلادنا المنهكة بالحروب والدموع تكفي مباراة كورة فيها زغاريد وصافرة وهدف وهتاف عشان نصدق إنو بكرة أحلى وإنو الوجع ما بيهزم الإرادة وإنو بين الركام بتولد الحياة من جديد.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبد المنعم هلال
فيس بوك
تويتر
انستقرام
يوتيوب
بنتيريست