عتمان والافندية راجع اول !!! كتبه الأمين مصطفى

11:32 AM April, 23 2025

سودانيز اون لاين
الأمين مصطفى-السودان
مكتبتى
رابط مختصر

يا عتمان يا أفنديَّة أم النديَّة، يا متصحفي الانقلابات، بيتك ده حكاية! سكر سايح والنمل والذباب والبعوض عاملين فيهو حفلة، ده غير الريحة الطالعة من المصرف الصحي اللي تحتو، بلاوي متلتلة!
تقول لي حرب أبريل دي نهاية "دولة الأفندية"؟ أفندية شنو يا زول؟ هو السودان ده بقى ليهو أفندية ودويلات؟ الظاهر ليك الأفندي اللي قاعد في مكتبو المكندش وفاكر نفسو ماسك البلد من طرطورها عاجبك جنس عجب!
ياخي الأفندية دي صنفين، زي ما قال ليك الزول: فيهم الغلبان الشغال بالقانون ولا بالدبابة، ده كل همو قبض الشهر وبدل المواصلات، يجري ورا الصراف زي الفار المزنوق عشان علاوة ولا بدل وجبة، حتى لو كانت من زمن المخلوع! ده مسكين يا عتمان، صحيح ليهو دور في التدهور بس أخف شوية وهو ماشى بفكر الفقر من باب المهنية بلا أخلاق كما يعتقد.
لكن المصيبة الكبيرة، النوع التاني، أفندية الضلالة! ديل عصابة لابسة جلابية أفندي، يكذبوا الحقائق ويزوروا الأقوال في إعلامهم المدفوع مقدمًا، وإنت يا عتمان رائدهم! زمان صحافة الدبابة ديك، اللي دم الجنود لسه ما نشف فيها، وتتوزع في سوق الكانتو وهى صادرة من الرقيب بتاع الأمن لا تحتاج لرقيب !
الأفندي اللي بينبطح تحت جنزير الدبابة عشان التمكين والتزوير اول أيام المخلوع، ده ما عندو حق يتكلم عن الأفندية لا زين لا شين! ده في قاع السلم يا معلم، ده من "أفندية الإنكشارية" زاتهم! حتى إنت يا عتمان !!!