*لا تبتسم أنت في جمهورية (مليشيان) !!.. *كان ياما كان .. ولسة كان .. في قديم وجديد الزمان جماعة كدا إسمهم الكيزان ،، *وندخل في الموضوع بدون لف ودوران .. *كانوا ومازالوا يحبون و(يهرشون) من أي إنتهازي مزعج أو نفرين تلاتة شالوا السلاح وعايزين ينافسوهم في السلطة والعضة والصولجان !!.. *تعال يا مبارك الفاضل يا ما (إنتهازي) نبقيك مساعد رئيس ووزير صناعة لأنك لا خاين ولا في أي مواطن منك زعلان حتى لو حرضت أمريكا تضرب (بلدك) السودان بصواريخ كروز وتوماهوك وقذائف الطيران !!.. *تعال يا عقار حتى لو تمردت زمان نديك ولاية النيل الأزرق كلها وتبقى السلطان مالك بن عقران !!.. *تعال. حتى لو بوظتها وتمردت تاني واعلنت انفصال الولاية عن السودان .. تعال نختك نائب مجلس (جدادة) - لا والله سيادة - وتسافر موسكو وتجي راجع وتسافر اليابان وتجي راجع وتسافر بلاد تركب الأفيال وبلاد تأكل أبو الجعران وتتفسح بقروش الشعب السوداني الجاعان !!.. *تعال يا التوم هجو يا الماك جبان .. يا بتاع الجبهة الثورية اللي خوفت وكتلت العزل والآمنين في أبوكرشولا وروعت الأطفال والنسوان وحا نطيرك السماء وتبقى بتاع (موز) سوبرمان .. *تعال يا مناوي يا رئيس حركة تحرير شنو كدا المسلحة عشان نديك مناصب مجيهة ومصلحة!!.. *تعال يا أبوقردة وأنزل من الغابة ومناطق الشدة نبقيك وزير صحة لابس كرفتة وتدحر الملاريا في كل حتة يا فردة .. تعال يا جبرين يا بتاع عمارات دي لازم نمسكها .. *نمسكك أي حاجة انت عاوزها حتى لو بنوك الصين !!.. *تعال يا الطاهر حجر وسيبك من طاخ طاخ وحركات الغجر .. حا نريحك وما في داعي للشغل الخطر ،، *تعال يا أردول خرمج في الدهب بدون ما يسألك أي زول .. *تعال يا كيكل انت بطل الأبطال وأرجل الرجال اللي ما ارتكبوا الجرائم والكبائر .. *لا بشتنت حال الناس في الجزيرة ولا نهبت ولا كتلت ولا خليت زول نازح وحائر ولا اغتصبت الحرائر ولا سرقت المخدات والسراير .. ولا إلخ...... *تعال يا عريسنا الساير !!.. *أما انت يا حمدوك يا مؤدب وما بتعرف تشيل سلاح وتكركب وتكضب وتهدد وتجيب خارجيات وتجقلب .. والله مافي ليك اي طريقة للرجوع تاني حتى لو أشرقت الشمس من المغرب !!.. *وشوفوا يا بتاعين قحت وتقدم يا عملاء يا خاينين يازفت .. *والله تاني لو جيتوا حا نضبحكم أكبر ضبحة .. كرهتونا الدغمسة وحرمتونا من الفنجرة والقرضمة والسمسرة والسرقة والشرشحة والتحلل والكشحة .. *والله تاني تشموها قدحة .. *وحا نتصالح مع شلحة وبلحة وشوتال وجلحة .. *حا نتصالح مع ولدنا حمايتي ذاتو بحسب ما قالته وقررته الفريق أول سناء حمد بدون أي مجمجة واعتراضات وقحة !!.. *المهم : لا لدنيا قد عملنا نحن ل(التمكين) فداء .. فليعد للتمكين مجده أو ترق من الشعب الدماء .. أو ترق كل الدماء !!!!!!.. *و *الله في ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عادل هلال
فيس بوك
تويتر
انستقرام
يوتيوب
بنتيريست