Post: #1
Title: نَص يتصبب عَرَق s كتبه عبدالماجد موسى / لندن
Author: عبد الماجد موسى
Date: 05-22-2024, 06:57 PM
06:57 PM May, 22 2024 سودانيز اون لاين
عبد الماجد موسى-UK
مكتبتى
رابط مختصر
[email protected]
قال لي تعال
ما تسمع كلام البان بعيد
أُخْدَ الإجازة وهِب علينا
نحن طيبين في بلادنا
ولسه نشتري بالشوال
تعال يا خوي تعال
ما تسمع كلام حزب الكلام
أو تسمع لناس عَجَبْ القصار
ولا الحركات البعمل فيها
نطَّاط الحبال
وكل ديوك العِده لايفات الغبار
لكن تعال ! وريني بس
كيفن أجيك
والناس تعاني الحسرة فْ خِشيمات العيال
كيفن أجيك
وعصفورنا الصباحي الرَّكَّ بين أفراحنا داك اليوم
الكانو بنسجو حولو سجنين من إطار
خرق السفينه وفرَّ طار
كيفن أجيك والحرب ما ردَّتْ على الستين سؤال
وما سحبت براميل العواره
سَدَّادَةْ إضينات الحوار
ولا غُلات ناس السياسة وقيل وقال
كيفن أجيك !
والبلد الكبيره الماهله سايقاها العواطف بالنعال
كراهيه وفتن
وجنون وعار
والكل فهمان السياسه نتف لسان
وكتل شقيق
وإثاره للسم الزُّعاف
قول لَيَّا بس كيفن أجيك !
والحُزُنْ صادم غزير
في ميادينا العِمَتْ
والشوارع المُبهمه
ومخنوقه فاض بيها العذاب
والملامحَ الإنْشَوَتْ
في نيلنا
في الساقيه العَوَتْ
دا الخوف بطولو عِرِق وخاف
كيفن أجيك بلدي الجميل
قول لَيَّا بس
والضفتين خالفين مَسار
مُستلطِفين جَوَّ الخراب
جَوَّ العيون الإنْخَوَتْ
والقلوب السَّادَّه باب
المبسوطه في البلد البَرَكْ
صَحْيان وغاب
صَحَيانو غاب
|
|