إذا صحت القصة المنقولة ادناه فهذا وفق تقديري الكليل معناه ان صاحب القصيدة الحقيقي كان الفنان محمد كرم الله كما كان سيد البيت الاهم فيها الا وهو : يمكن أنا ما الم فيك تاني (مين عارف المصاير)؟ "القدر"!
هذا لا ينقص بالقطع و للانصاف من شاعرية محمد سعيد دفع الله و جودة نظمه لمشاعر الفنان ……. حتى الطيف رحل خلّاني الاغنية:-
القصة: منقول:-
قصة اغنية حزينة جدا قصة اغنية حتي الطيف رحل خلاني ******* قصة اغنية في وجدانى كتب بروف هاشم مساوى - استشارى علم الامراض
قبل سنوات .... زارنا الفنان محمد كرم الله في بيت اختنا علوية مساوي في السجانة ... كان قد اشتهر باغنية الطيف ... ألحانها من اروع الالحان و كان قد اعجب بها عدد من الفنانين وتغنى بها وردى سألت عنها محمد كرم الله عليه رحمة الله و كان وقتها متوقف عن الغناء ... اى تاب .... فقال لى لن اغنيها لك و لكن احكي لك قصتها ... و انا شاب يافع كنت ازور اختي في كورتي في الاجازات ... و انا داخل على البلد قابلنى صديق عزيز من ابناء البلد راكب لوري في طريقه للخرطوم ... و قال لى ... (استناني بمشي و اجيك باكر) ... و كان مسافر ليحضر اسبير لوابور الزراعة .... لكن تاني يوم فجعت بخبر انقلاب اللوري و وفاته ....
حزنت شديد و كنت اردد في كلامه (انا لا تقولي كدا استناني بمشي و اجيكا باكر ... امكن انا ما الم فيك تاني مين عارف المصاير) ... و هذه الكلمات الوحيدة التي رددتها باستمرار ثم اكمل الشاعر محمد سعيد دفع الله الباقي و هكذا كانت اغنية الطيف مشتركة بين وجدانين ... مولودة في جوف الحزن ... من اعمق الاغاني السودانية لحنا و اداء .
الطيف كلمات / محمد سعيد دفع الله غناء / الراحل محمد كرم الله
حتى الطيف رحل خلاني أي قليل يا طيف أقيف وارجاني وين فايتني عابر وأنا شن حارس وراك أنا تاني ياني معاك مسافر وين حتى الطيف رحل خلاني ما طيب لي خاطر الليلة لاتقولي هيّ كدي استناني بمشي بجيك باكر يمكن أنا ما ألم فيك تاني من عارف المصاير وين حتى الطيف رحل خلاني ما طيب لي خاطر الليلة هاك أسمع رنين ألحاني أبقى معاي سامر خفف لي قليل أحزاني ياما أنا عشت صابر وين حتى الطيف رحل خلاني ما طيب لي خاطر الليلة شوف كيفن يسوي زماني ديمة علي جاير آه مر العذاب وراني سهمو في قلبي غاير وين حتى الطيف رحل خلاني ماطيب لي خاطر الليلة شوف كيف بستاني الكان باشي ناضر من حر السموم بيعاني طيرو يفر يهاجر وين حتى الطيف رحل خلاني ماطيب لي خاطر الليلة جفّ يبس صبح صناني لافح حرو كافر عدمان الضليل سواني مجنون قالوا شاعر وين حتى الطيف رحل خلاني ماطيب لي خاطر الليلة كل ما تمر تعدي ثواني منو أسراب تغادر رحل الفيهو صر وحداني نازل ومر سادر وين حتى الطيف رحل خلاني ما طيب لي خاطر أنا بحوم وأرجع وأصد بكاني مقطوع راسي حاير وين أحبابي وين خلاني آه يالله قادر وين حتى الطيف رحل خلاني ماطيب لي خاطر الليلة ما عارف العلي تراني فوق كرعي ساير وأسكت وأسوي في أوزاني أشعار مالا آخر وين حتى الطيف رحل خلاني ماطيب لي خاطر الليلة وإت ياطيف عليك أحزاني لي شويه كابر عشان خاطر قليبي عشاني لحظات بس تخاطر وين حتى الطيف رحل خلاني ماطيب لي خاطر أما النوم أبى وجافاني وأصبح داجّي ساهر وين حتى الطيف رحل خلاني ما طيب لي خاطر الراحلين ود كرم الله اختيار الصوره مبارك الله جابو ود اصول مع تحياتي منقول ٠٠…. هذه الصورة ادناه للفنان محمد كرم الله و الرئيس الراحل جعفر محمد نميري كانت الصورة المرافقة للقصة المنقولة أعلاه عن نفسي: حضرت عهد النميري و قرات عنه و سمعت كثيرا و قابلته عليه رحمة الله لمدة و جيزة بالقاهرة بعد سقوط حكمه بسنوات و لم اكن متحمسا لحكمه الدكتاتوري عندما كنت في ريعان الشباب وما زلت اومن بما يردده الكثير من العالمين ببواطن الامور في السودان بان فترة حكمه كانت السبب الأساسي لما عاناه السودان منذ انقلاب ٢٥ مايو ١٩٦٩ و حتى الان و هذا لا ينقص من المسؤلية عن الاخطاء التي وقع فيها قادة السياسة في السودان و التي كانت قد تركبت فوق اخطاء الدكتاتورية
