بالسوداني: لمان المراة قالت :يا نبي الله الخضر .و ما جاها كتبه د. احمد التيجاني سيد احمد

02:51 PM December, 16 2023

سودانيز اون لاين
احمد التيجاني سيد احمد-ايطاليا
مكتبتى
رابط مختصر

@يحكو في زمان لمان كان الامان طابع حياة السودان
@ يحكو عن امراة جميلة و قوية الإرادة
**كانت تعيش في قرية بعيدة.
**كانت قاعدة تمشي لي شغلها كل يوم بالمواصلات.
**مرة اتاخرت و ما لقت لا بص ولا ركشة ولا عربية كارو.

@قعدت واقفة واقفة ومافي في الافق سوي اصوات الطيور و نقيق الضفادع في المجاري المتغطية بألواح الإسمنت

@لمان تعبت راحت تعاين للسماء و تقول يارب الكون يا مسهل.
@فجاة جاء واحد قال ليها اخدي الحصان ده يوديكي حلتكم . ركبت الحصان و لمان وصلت بيتها كانت الواطة مضلمة والليل اليل !
@فكرت تشتري علف للحصان
@ جاء واحد قال ليها مافي علف لكن هل ممكن تبدلي الحصان بعربية؟ كدة ما بتحتاجي تفتشي ليهو علف. قامت قبلت العرض و اخدت العربية بدل الحصان. وبقت تركب عربيتها كل يوم للمدينة ولا هم ولا غم .
@بعد كام يوم فكرت في الحصان المسكين ! قالت لي روحها حسه الحصان يمكن جعان و حزنان . @راحت تفتش علي الحصان في كل الحلال وعرضوا عليها حصين كثار بعد ما طلعت اشاعة بانو المرة عايزة تبدل عربيتها بحصان !
@مين يصدق؟ المهم مافي حصان عجبها .
@فجاة جاها الراجل الجاب ليها الحصان و العربية . قال ليها أنا برجع ليكي الحصان لو رضيتي تستبدليه بالعربية. قالت تمام و رجعت الحصان. ناس الحلة قالوا شوف المرة المجنونة دي.. تبدل العربية بحصان !!
@قامت اترددت لكن الراجل قال ليها ولا يهمك .. ممكن ترجعي العربية اي وقت انت ما عايزاها .

@قامت قالت ليهو :انت منو؟

@**قال ليها أنا نبي الله الخضر **

@وقت ما عايزة الحصان قولي يا نبي الله الخضر .بيجيكي الحصان وتروح منك العربية. و متي ما عايزة الحصان : تقولي يا نبي الله الخضر . بتجيكي العربية و يروح الحصان.

@عاشت المراه في تبات ونبات الي ان جاء شر الجنحويد و الكيزان👹👿

@ اولا جو الجنجا اخدوا العربية بعدما ما خوفوها بالكلاشنكوف
@ تانيا جو الكيزان ديش البرهان وقصفت طياراتهم بيتها .. !
@ نادت يا نبي الله الخضر. نادت و نادت . لكن ما جاها تاني
@اتوكلت علي الله : مشت و مشت و مشت لمان وقعت وماتت.
@😢😢

د. احمد التيجاني سيد احمد
١٦ ديسمبر ٢٠٢٣ روما إيطاليا