عوافي ياخرطوم عوافي انفعالات: ازهري أبواليسر مدني

01:38 PM July, 21 2023

سودانيز اون لاين
ازهري أبواليسر مدني-USA
مكتبتى
رابط مختصر

عوافي يا خرطوم …….عوافي
ابقي الصمود ..اوعك تخافي
لوكي الصبر
خلي ليل الهم يمر
وانضمي …….التاريخ قوافي
حجي بيها اللسه جاي
ما اصلو سهم الغيب بوافي

شيخ فرح ….يومو التنبأ ….بعقابك
لانو شافك …انو سهم العين اصابك
وينا سوبا ……….لما سكانك سنابك
اقري تاريخك موثق………في كتابك

أكتبي التاريخ صحيح…………و خلي نومك
ومزقي صحف الخيانة والعمالة ما تسومك
غزي سيفك …في طغاتك …وفي خصومك
في اللباعك وليك أغتصب وشرط هدومك

يا مسلمة……. انتي من قبل اسلام الحثالة
الربو دين الكوز دقن …،،…….فوق للريالة
وختموا ليك بالجنجويد …….آخر الرسالة
ما تخافي منهم ديلا فاقدين ………الرجالة

سرقوا عيشك سرقوا جيشك …وكل حاجة
أنتي البتدي الناس ..ويوم ما كنتي محتاجة
تربي اولاد الحرام ..الجدهم خدم الخواجة
كل ما تدوري تقومي قوّمو فوقك… عجاجة

الحرب مهما تطول بتقيف مصيرا وتنحسر
وحرب الخونة ديمة……فيها انتي المنتصر
خليكي دايما مستعدة الشوكة لازم تنكسر
بكرة جايك الأهم بس نعدي اول.. للجسر

والحرب لازم تقيف ……….الليلة قبل بكرة
ما كل أطراف النزاع ….بتنازعوا فيكي ثورة
حرب مرتزقة ولصوص ………سرقوا دولة
وخايفنك كمان وبخوفوك ..ما تبقي حرة