قال شاعر الثورة شيخون :نحن بخير و نحن الخيرً واريتو الوضع يبقي أخير كتبه د. احمد التيجاني سيد احمد

02:24 PM May, 07 2023

سودانيز اون لاين
احمد التيجاني سيد احمد-ايطاليا
مكتبتى
رابط مختصر

قال شاعر الثورة شيخون :نحن بخير
و نحن الخيرً واريتو الوضع يبقي أخير

يحيط بي الظلام و الإحباط .
فشكرا لشاعر الثورة الشاب شيخون.
لعلنا نجد في كلماته بلسما و أملًا

الشاعر شيخون : شاعر الثورة و الشباب

نحن بخير
و نحن الخير
واريتو الوضع يبقي اخير
سلام للقعدوا تحت القصف
سلامً للحتو زي الطير
سلامً للكايس اللقمة
وسلام للمويتو بالتقطير
سلامً للعاشو كم فكرة
و سلام للماتو بالتفكير
سلامً لي جرحنا النازف
سلام لي شعب متالف
سلام لي كل طفل خايف
و للمستشفي كايسة سرير
و نحن بخير
وحتعدي
مادام شايف الوطن محتاج
وهو البيدي
ما دام في الشدة متكاتفين
منو البقدر يقيف ضدي
و اذا كان الوطن نازف
حاضمد جرحو بي يدي
وبدال الدم
في خير حيعم
فما تشيل همً
وكل الشعب متحدي
و حتعدي
شعب زي الدهب بيلمع
كلما تزيدو بي نارك
وين ما تمشي تلقاهو
بزيد و يعلي مقدارك
بترحل من ضلام الموت
بتلقي بيوت
بقت دارك
فسيب دارك
لانو بلادي مختلفة
دي فيها بعلو مقدارك
فيا البتسجل التاريخ
أفتح أنصع الصفحات
و اكتب أنو ده السودان
وطن ما بيشبه الاوطان
وطن شامخ علم مفرد
و فيهو الخير كتير بالحيل
فيهو شباب بشدو الحيل
و لسة اللوحك مليونً ميل
شهامة و نخوة فايته الحد
و لو تسال عن الراحوً
و كيف حنداوي لجراحو
صباحو و عزو وصباحو
فهاك مني الجواب وًالرد:

هو السودان نعشقه
و عهدي في الهوي باق
وبين العاشقين عقود
بطهر الارض ميثاقي

د. احمد التيجاني سيد احمد