(سلام قدال) شعر/ علي تولي

05:10 PM July, 08 2021

سودانيز اون لاين
علي تولي-USA
مكتبتى
رابط مختصر

(سَلَامْ محمَّد طَهَ القَـدَّالْ)

قَامْ قَالَدنَا
وُقَدَلْ وَدَّعنا
قَال وَادَعْنَا هَمْ وَطَنُوالعَليْ اتْـرَابَعـْنَا
مَعَ الشَّلْوَاح
اِنْشَايَح خَبَرْ رَوَّعْـنَا…!!!!!!
مَوَاجْعًا مَا انْـقطَعْ طَارِيْهَا
آاااه من أاااها…!!!
يا ود طه
دَهَرَابَ الْهمُومْ شَقـَاقْ عَتَامِيرْ تِيْهَا
مَحَلْ مَا يْقُـصْ رِقَابْ مِنْ جَيشَا
نَلْقَى جَنَاهَا قَامْ تَابِعْـنَا…!!
فَاقْـدَاكَ الْمَدَامِيكْ يَا بَـنَّـا
شَاشَايًا سَكَتْ لا نَمْ وَرَاكْ لَا غَـنـَّا…
إِلَّا تَرَاكَ بَاقِي مَعَانا
لا في التُّـربَةْ..
مَا بِبْـقَى الحُزُنْ تَالَاكَ لينَا الهُرْبَة
منو اليغباك
تقالد أجيالنا
بيك وبي نفايلك كل ضمير بتربا..
*******************
يُودْ نَـلقَاكَ في الشارعَ العَليهو طَلَعنَا
نَبَاشْرَك بي مَصَابِيحَ السَّمَا المِنـْزَرْبَةْ..
فألًا بَقَّ بِي ضَيَّ الفَنَارَ اِتْـعَبَّا..
بيكَ طَرَابَا فِي شَارَعَ النِّـهُـوضْ وَالتَّـبَّةْ؛
نَـبَـشِّـر بيكَ يَا قَـدَّال
وُمِنْ جُـوَّةَ النـِّفُـوسْ مِنْـخَرْبَةْ..!!
بِالحُزُنَ الكَبيرْ
بِالفَـقْـدَ المَرِيرْ….
*****************
حين نادى الرحيل ود طه..!
بِالكُورْ وَالشَّـلِيلْ..!!
ظَعَنَكْ مِخَـبِّــبْ لَــبَّـا.
رَحَلْ قَلَّامْ رُقَـاب ديْشَ الْكِضِبْ
رَحَلْ حَدَّارْ فِقَـيْرَاتًا مَسَمَّنَـةْ بي حُقُـوقْ شَعْـبًا تِـعِـبْ..!!
*******************
جَايـِيْكْ عَـريسْ أَرْضَ الجَزِيرةْ..
إِيْــدُو الْبـِتَـقْطَعْ فِي الرَّحَـطْ فـُوقَـا الحَرِيرةْ
جَايِـيكِ فَـارْسِـكْ يَا مِهيرَةْ…
تِـلِّـي كَتْــفَ الرَّقْـصَة تِنْهَدِلَ الْجَدَايِلْ
مَا لِيْـهُو غيرْ نِـيـْلِكْ بَدَايِلْ..!!
قَـلْبُـو صَافِي عَلِيكِ صَرَّرَّر
هُو كَانْ قُـلُوبَ أَوْلَادْنَـا يُومْ زَنَـقُو الْكَجَر
كَانَ المتاريس وَالحَجَر
والسَّاسُويَةْ لِلْفَـقَدُو البَصِيرَة
عُمْيَانَ البَصَائِرْ وَالبَصَرْ..
الْجُونَا ضُـرّْ
نَاسًا كُـتُـرْ…!!!
دَاقِــينْ دَنَاقْــلَ المُوتْ عَلِي أوْلَادنا السُّـمُر….!!!
********************
يَا وَدْ طَهَ…
يَا جَهْجَاهْ الدِّقُـونَ العَامْلَةْ حَقَّـنَا جَاهَا..!!
كِيزَان السَّجَمْ
ذاكَ الخَبُوبْ.. زَاهْقِي الذِّمَمْ.. بَوَّ العَبُـوبْ.. شَبَهَ الرِّمَمْ..
حَبَلَ الكِضِبْ زَمَّاهَا
***************
يَا قَائِدْنَـا يَا الْمِـنَّك فُلُوْلُهُمْ لَاجَّـة
يُودْ تَـقْـمَاهَا..
شِنْ جَابِرْهَا لِي فِيخَ العَطَبْ وَدَّاهَا…!!!!
كَلَالِيْبَ النَّـصُر فَاتْـحَةْ وُمَنـَّـقَـشَةْ قَـاجَّةْ
لِلْنَّـاسَ التَّـسَرْبِقْ التَّمُوتْ بِعَـمَاهَا
النَّـاسَ البِـتَسْرِقْ
فَاسَك وَلَا بِيَـغَـبـَاهَا
وُعَلِي أرْضَكْ
عَدِيلَةْ اتْـوَشَّحَتْ أرَضَكْ
وُهِي الْبِي طُوْلَها كَانْ عَرْضَكْ
تقالد مصطفى المَقبول..
باهي المحيا بيك محجوب
كمان حميد..
وجمل كون مجيك وردي
معاك حبَّ الأرض فرضي
***************
بيك يا ود طه
يا أرضي
أيا القدال
يا دُخْـرِي الوَطَنْ بتَّق
وَطَـنـَا العِزَّةْ يَا جِنْيَاتْ..
غيرو وُاِنْـتُـو إيْهْ عِـنْـدِي…؟ّ!!
وُمَا حَيْ وُوووب
قُـلُوبْ تِخْضَرّْ:
هُولَبْ لَبْ
يَا صَهَدْ حَرَّ الصَّحَارِي الحَارَّة هُولَبْ لَبْ…
يَا سَعَدْ نَـسْمَ البِـلُودَ المَاطْرَةْ هُولَبْ لَبْ
يَا الفِي غَرِبْنَا هُولَبْ لَبْ
يَا الفِي شَرِقْـنَا هُولَبْ لَبْ
يا الفي شمالنا هولب لب
يا الفي جنوبنا هولب لب
نَقَالِد فِي الشِّعِرْ قَـدَّالْ
نَهِزْ بِي قُـوَّتُو وُنَبْرَاهْ
شَوَارعَ الثورَةْ مَاشَّةْ وَرَاهْ
وُتَـمْشِي اجْيَالْ وَرَاها اجْيَالْ
تَـقَالِـدْ خِيرَها وَالكَانْ فِي سَمَا الآمَالْ
سلام قدال
سلام قدال

علي تولي
8 يوليو فينيكس أريزونا USA