عن تأشيرة الزيارة العائلية والحجر المُؤسسي نكتب.. عناية الإخوة المُغتربين بالمملكة السعودية...

02:12 PM June, 14 2021

سودانيز اون لاين
جمال أحمد الحسن-الرياض-السعودية
مكتبتى
رابط مختصر

بقلم: – الرياض يونيو 2021م

حدث كثير من الإلتباس على الإخوة المغتربين بخصوص الحجر المؤسسي للقادمين الجُدُد إلى المملكة العربية السعودية عن طريق الزيارة العائلية..
عهداً قطعناه بهذه الصفحة سننشر كل ما نراه ينفع الناس.. ولهذا سأنقل لكم تجربتي الحديثة (أمس الأحد 13 يونيو 2021م) مع هذا الأمر.. نقول وبه الإعانةُ بدءاً وختما.. وصلى اللهم وبارك على سيدنا محمد ذاتاً ووصفاً واسما:

وعشان الموضوع يكون واضح نضرب مثال طوالي... نفترض الشخص القادم للزيارة هي زوجة وطفلين 12 سنة و7 سنوات مثلاً...

* يجب على الزوجة أخذ جرعتين من تطعيم الكرونا والمتاح بالسودان هو (استرا زينيكا)... بعد أخذ الجرعتين.. تمشي القمسيون الطبي في بحري لتصديق كرت التطعيم بختمين هناك.. واحد من وزارة الصحة (ختم بارز) والثاني من القمسيون الطبي (ختم عادي).. وعشان يصدقوها ليك لازم تكون المُستندات التالية معاك جاهزة:
- (أصل كرت التطعيم)
- صورة الجواز
- صورة الرقم الوطني
- صورة تذكرة السفر..

* بعد تصديق القمسيون الطبي.. تمشي في نفس اليوم يصدقوها ليك في وزارة الخارجية.. (كل الأختام والتصاديق دي مجاناً) شكراً مكين تيراب...
بكدة المدام تكون جاهزة مائة بالمائة.. وأهم حاجة مواعيد سفرها من آخر يوم أخذت فيهُو الجرعة الثانية يكون 14 يوم أو زيادة...

* المدام + الأطفال يلزمهم فحص كرونا قبل 72 ساعة من مواعيد سفرهم...
وقبل 72 ساعة من مواعيد سفرهم تسجيل بيانات المدام اللي موجودة في ورقة القمسيون الطبي ومصدقة من الخارجية في موقع مخصص لهذا الغرض ومربوط بوزارة الداخلية – الجوازات.. عشان شنو دا؟؟ لمَّن تجي داخلة هنا وينزلوا بياناتها في النظام.. وأول ما تجي تسجل ليها في (تطبيق توكَّلنا) تظهر عندك (محصَّن) باللون الأخضر الغامق..

**وعشان الكلام جاب الكلام.. طريقة التسجيل في توكلنا بعد يصلوا بالسلامة.. تحاول تطلع ليها رقم سعودي من المطار هناك.. يسجلوهو ليها بي (رقم الحدود) ولو عندك شريحة تانية ما محتاج تشتري ليها من المطار.. أها بعد تجي تدخل في توكلنا حقك إنت المُقيم.. في حاجة اسمها الخدمات.. تدخل فيها تلقى زوجتك وأولادك أضافُوهُم ليك فيها.. تضغط على تعريف رقم الجوال.. وتضيف رقم زوجتك الاشتريتو من المطار أو شريحتك التاني الفايضة.. وبعدها تدخل في توكلنا بجوال المدام وتسجل ليها في خانة (خليجي/زائر) برقم جوالها ورقم الحدود.. وعلى طُول حا تظهر ليك الحالة محصَّن)...

كل الأوراق الذكرناها فوق دي ياخذوها معاهم المطار (للمعاينة فقط) وماب ياخذوها منهم خالص..
أرجُو أن أكون وضَّحت كثير مما التبس على إخوتي المغتربين.. وإجازة سعيدة نتمناها لأبنائكم بالمملكة العربية السعودية..
وجاهزين لأي إستفسار...