نحن قاعدين ساي!!.. بقلم:عادل هلال

05:54 PM December, 20 2020

سودانيز اون لاين
عادل هلال-السودان
مكتبتى
رابط مختصر

☄️أحوال





*عبارة موجعة هتفت بها إحدى المتظاهرات أمس أمام بوابة البرلمان تلخص و (تختصر) كل الحاصل في السودان !!..
*أي والله قاعدين ساي بعد سنتين من عمر الثورة ..
*لا إنتاج ..
*ولا مدارس و جامعات (مستقرة) ..
*ولا شبكة !!..
تمشي لقضاء أي غرض في أي مرفق حكومي يقولوا ليك ماااااافي شبكة !!..
*ولا صحة ..
*ولا تعليم ..
*ولا (مصير) واضح لطلاب المدارس و الجامعات ..
*ولا سيطرة على التدهور الإقتصادي ..
*ولا سيطرة على حالة الإرتباك و (اللخمة) الحكومية ..
*ولا (فرملة) لتصدير اللحمة لمصر التي تغرق أسواقنا بحلاوة (بلي) و مختلف البلاوي المسرطنة !!..
*ولا نجاح في إنهاء أزمة الخبز و الوقود الخانقة ..
*ولا إيقاف لمهزلة قطوعات الكهرباء المخجلة !!..
*ولا موية نضيفة أو حتى (وسخانة) !!..
*ولا ضبط للإنفلات الأمني ..
*لا أمن ولا أمان
والسرقة بالإكراه في وضح النهار ..
*وقبل أيام سرقوا موتر جارنا طارق (عكاشة) من جوة البيت !!..
*أي والله من جوة البيت مع إنه كان مربوط بجنزير في السرير !!..
*ولا شوارع زي شوارع البني آدمين .. ولا نظافة .. ولا عامل شايل مقشاشة ..
*واستهسال و (ليونة) و (غباء) مؤذي في كيفية التعامل مع (آفة) الوجود الأجنبي داخل العاصمة و الولايات !!..
*كل أمم العالم (التاسع) عندنا !!..
*شئ من نيجيريا .. و شئ من أفريقيا الوسطى.. و شئ من بنين .. و شئ من النيجر .. و شئ من إريتريا .. و شئ من الكاميرون ..
و(عيييييييييك) من الحبشة !!..
*وشئ من مالي ..
*والكل يقول انا مالي !!..
وإدارة الأجانب ما فاضية إلا للتحصيل طواااااالي !!..
*كل هؤلاء و هؤلاء يزاحموونا في إيجارات المنازل .. و (صفوف) الخبز .. و الغاز .. و المواصلات بلا حسيب وبلا رقيب !!..
*و حول شارة مرور واحدة وسط الخرطوم ممكن تلقى (7) جنسيات (تشحد) ..
*والسودان هو الدولة الوحيدة في العالم التي لا تجد فيها من (يدقق) و يسأل عن الهوية أو الإقامة !!..
*وأيضاً نحن قاعدين ساي بلا وضع حد لفوضى الدولار ..
*ولا إهتمام (بمعايش) الناس ..
*ولا أية محاولة لترك (عادة) الصرف الحكومي البذخي ..
*أواخر الأسبوع الماضي تم (دفق) تلاتة مليار و (677) مليون جنيه عشان شنو .. و في شنو؟!..
لتوصيل خط (موية) جديد لمنزل والي نهر النيل آمنة المكي !!..
*ويا مزيكا دقي !!..
*ولا قصاص عادل و (سريييييع) لمن أفسدوا و أجرموا وعملوا (السبعة و ذمتها) و (برطعوا) في البلاد .. و ظلموا و قهروا العباد ..
*ولا حسم (للمتسللين) و وبتاعين الفنادق الأوروبية و المتسلقين و ناس (زعيط و معيط) الذين لا هم لهم سوى الإستحواذ على جزء من (كعكة) السلطة بأية وسيلة كانت !!..
*و لا مجلس تشريعي ..
*ولا قيادات ذات كاريزما و دراية و حنكة و هيبة و (خبرات) !!..
*ولا محكمة دستورية ..
*ولا سكوت عن الكلام الكتيييييير المو نافع !!..
*شابكننا (مسارات) .. و (سلامات) .. و (حسابات) ..
*والنتيجة المزيد من الفشل و الإحباط و (الخيبات) !!..
*ولا إلغاء للأتاوى و الجبايات ..
*ولا إتفاق على إنتشال البلاد من الهاوية التي تكاد أن تعصف بها ..
*ولا أي حاجة !!..
*يعني قاعدين ساي ..
*وقاعدين في (السهلة) بحق و حقيقة !!..
*و
*الله في ..

صحيفة النيل الدولية