البَلْطَجِـــيْ!

04:17 AM February, 02 2020

سودانيز اون لاين
Adil Sid Ahmed-السودان
مكتبتى
رابط مختصر

البَلْطَجِـــيْ!

ومهوُوس، حرامي... أوانطجي
مليان فلوس وحبرتجي
بالحظ يسوس وقمرتجي
محروس بتمنة وأمنجي
تجي ذي ما تجي
نهبوا البلد
كتلوا الولد
نشروا الفساد
و الاضطهاد
أكلوا الجراد
ذلّوا العباد
والكان مبلّم بالسكات
طنطن رطن
ضاع الوطن
زي القُراد
شفطوا اللبينة الكنّا يومي بنشربا
مصُّو اللِّبا
ضبحوا البقيرة الكنّا ديمة بنحلبا
صفراء’ فاقع’ لونها
ماتت وليدا بجانبا
خسفوا القمر
باعوه في سوق الحجر
غاب الهلال
ضاعت مراسم حجتو
و الصوم كمان و الابتهال
كسفوا الشمش
هبطت ضلمّة أبت تمش
في جنحها، سرقُوا السبيبة من الرمش
أمست بيوتنا مَشَطِّبة
طبقوا السما
دكّوها دكّة مع الأرض
طفت النجوم
خبا ضوؤُها
تاه المُنجِّم، و صنعتو
راحت مواسم زرعتو
و شردت مياه النيل شمال
خلّت وراها جِنِسْ مَحَلْ!
والبحر، دخل إحتكارُم ومرضتُو
باعوا السمك!
قبضُوا اتمان الجُّزُر
حتّى البحر؟
مدّ البصر، ملّ الصبُر
طال إنتظارو وقرفتو
على صخرة القَهَر انتحر
والمطر، حرد النزول
صمتت رعودو كما القبور
وعدمت بروقُو الكهربا
عبّوا الهوا، وصرفوه وَصْفَة، كما الدوا!
حتى الذباب، و الطين مدوِّد و الهباب
من ألف باب، دخلو العُلُوق...
وما خلّوا شِي
الباع ضميرو بيختشِي؟
دجّال،حرامي... ومُرتشِي
عدمان من اللَّحم الوشِي
اللِّيْلة، حَانْ يُوم لَوْعتُو
الحسرة واحساس طعمُو مُر
سفَّ التراب و الهَضربة!