البرهان دا مالو كان في حديقة القرشي و لا شنو !! (صورة)

10:33 PM January, 26 2020

سودانيز اون لاين
خضر الطيب-United Kingdom
مكتبتى
رابط مختصر

https://top4top.io/

الزول ده عشان بقى ثوري الكيزان ما حيخلوه في حاله ..حيحاولوا يسمموه عن طريق الطباخ بتاعه الفي البيت ..
وانصحوهو وقولوا ليه تخلص من جميع الطباخين الفي البيت وياكل بس من ايدين زوجته ...
الزول ده فعلا ضعف شديد وكانه كان محبوس مع الاسود في حديقة القرشي

مرحب الراكزة امتثال

Quote: الزول ده عشان بقى ثوري الكيزان ما حيخلوه في حاله ..حيحاولوا يسمموه عن طريق الطباخ بتاعه الفي البيت .. وانصحوهو وقولوا ليه تخلص من جميع الطباخين الفي البيت وياكل بس من ايدين زوجته ... الزول ده فعلا ضعف شديد وكانه كان محبوس مع الاسود في حديقة القرشي

الزول دا عمرو ما كان ثوري
جنرال من القتلة جنرالات المخلوع
و شارك في فض الاعتصام
شوفي في خلال شهور بقى كيف
تباَ لهم بكل اللغات مجرد قتلة تافهين

سلام ياخضر.

فعلا صحته اتدهورت كما هو ظاهر. المصيبة ( يمرق من الدنيا دي كلها) . ونائبه يكون In Charge

الف مرحب بيك اخ هاشم كاروري

Quote: سلام ياخضر. فعلا صحته اتدهورت كما هو ظاهر. المصيبة ( يمرق من الدنيا دي كلها) . ونائبه يكون In Charge

انا ما فتحتا البوست دا الا لي النقطة الانت اشرتا ليها دي
و فعلاَ كارثة لو جا الجاهل حميدتي كرئيس للمجلس السيادي
و الله كارثة
ربنا يجيب العواقب سليمة

والله يا خدر ياخوى الشغلانة دى ماراكبة لي فى رأسى . أنا بقول إنه كلمتى ( قبل ...وبعد ) فى الصور مفروض يتبدلو .
لاحظ ليونيفورم الجيش فى صورة (قبل )هو اليونيفورم الجديد الحلف بيه البرهان القسم لمجلس السيادة . اما اليونيفورم التانى فواضح إنه ده اليونيفورم الأخضر القديم .
ولا أنا غلطان ؟

فقدان وزن البرهان يثير جدلًا واسعًا بمواقع التواصل الاجتماعي
الخرطوم – الراكوبة

أثارت صورة ملتقطة حديثًا لرئيس مجلس السيادة، الفريق أول ركن عبد الفتاح البرهان، جدلًا كثيفًا في مواقع التواصل الاجتماعي، لظهوره بمظهر هزيل.

والتقطت له الصورة خلال حضوره مراسم أداء القسم لوزراء الدولة الجُدد، حيث اعتبر الكثيرين أن فقدان رئيس المجلس السيادي لوزنه يرجع لمعاناته الصحية.

وقال شقيقه عبد القادر البرهان في تصريحاتٍ صحفية اليوم الأحد أنّ رئيس المجلس السيادي أجرى فحوصاتٍ كاملة بمستشفى السلاح الطبي قبل يومين لمزيد من الإطمئنان على مرض السكري الذي لازمه لأكثر من عشر سنوات .

صباح الخيرات يا شباب
يا اخ حسن فرح هل فى الأمكان معرفة الفاصل الزمنى بين اللقطتين ؟

مرحب باشمهندس

Quote: والله يا خدر ياخوى الشغلانة دى ماراكبة لي فى رأسى . أنا بقول إنه كلمتى ( قبل ...وبعد ) فى الصور مفروض يتبدلو . لاحظ ليونيفورم الجيش فى صورة (قبل )هو اليونيفورم الجديد الحلف بيه البرهان القسم لمجلس السيادة . اما اليونيفورم التانى فواضح إنه ده اليونيفورم الأخضر القديم . ولا أنا غلطان ؟

الصورة الظاهر فيها البرهان لابس اخضر و ضعيف دي احدث صورة
و كانت اثتاء اداء القسم لثلاثة وزراء دولة قبل اسبوع
بعد خروجه من المستشفى
اما الصورة العلى اليمين دي كانت اثناء اداء البرهان للقسم رئساَ لمجلس السيادة

شكرا يا خدر على التوضيح .
لكن فعلا التدهور فى صحة البرهان واضح وسريع جدا .
اكيد حميدتى الآن يجلس منتظرا ومتحفزا متعجلا للنهايات .

مرحب بيك اخ حسين فرح
شكراَ للافادة

ان شاء الله يجي يوم قريب جدا
(انماص) كله
ويصبح اثرا بعد سُمُنْ
.........

Quote: شكرا يا خدر على التوضيح . لكن فعلا التدهور فى صحة البرهان واضح وسريع جدا . اكيد حميدتى الآن يجلس منتظرا ومتحفزا متعجلا للنهايات .

تسلم يا هندسة
التوضيح واجب
و فعلاَ في خلال شهرين فقط تدهورت صحة البرهان
و حميدتي اكيد عينو على الرئاسة و ليس لديه مؤهلاتها
مجرد قاتل مأجور و جاهل بأي شئ
انا ما عارف مصيبتنا شنو يكون واحد ذي دا في مجلس السيادة !!

خضر وضيوفك انزيكم
اتا في البرهان والا حميرتي العمل ليهو جضوم بالله لونه فتح.

مرحب اخي عبد المنعم الطيب

Quote: ان شاء الله يجي يوم قريب جدا (انماص) كله ويصبح اثرا بعد سُمُنْ

نتمناهو يتماص لكن عاوزنو حي
لانو قضية فض الاعتصام هو مشارك فيها
بإعتباره رئيس مجلس السيادة
وهو كان من ضمن المجتمعين من العسكر
قبل ليلة من فض الاعتصام
و قرروا جميعاَ فض الاعتصام مهما كانت النتائج
هؤلاء الخونة يجب ان يحاسبوا
لان ارواح شهدائنا ما زالت معلقة تنتظر القصاص
و الدم قصاد الدم
و لو هم رجال مفروض يمشوا يعترفو للجنة التحقيق
ما ينتظروا الاستدعاء

الف مرحب بيك حبيبنا عارف
و حمد الله على السلامة
و الجابك يجيب الطوربيد
تباَ له مقدماَ :)

Quote: خضر وضيوفك انزيكم اتا في البرهان والا حميرتي العمل ليهو جضوم بالله لونه فتح.

كيف ما يعمل ليهو جضوم الحميرتي دا
اكل من القصر الجمهوري
و عربات لاندكروزر مكيفة
و حاجات تانية لا داعي لذكرها
الزول دا تاني مابرجع للحراية
غايتو الشبكنا يخلصنا
يابا يابا
بالله هات ليهو رسمة من رسماتك الكنت بتعملا للمسترزق ضب الادبخانات ود الباوقة
و معاهو كمان البرهان مع اسود حديقة القرشي الجيعانة :)

سبتو الكيزان وقبلتو على البرهان؟!
غايتو خلاص السودان إلا نسبلو مافي فايدة ولا يوجد أمل كان دا الراي
إنتو مغتربين وما عارفين الحاصل في السودان شنو ؟!
ولا عايزين تعرفو أصلاً
عايزين تتكلموا على هواكم بس

سلام يا منتصر

المغتربين عارفين كل الحاصل في البلد و متابعين بشفقة
و كتير من المواضيع العاجلة و الملحة بننشرا هنا
انت في السودان ما جايب ليها خبر
و دا ما تقليل من شأنك و اهتمامك بالحاصل
لكن دليل على متابعتنا لمجريات الاحداث
و انا ملاحظ يا منتصر من فنرة بقى ما عاجبك اي شئ
و اتغير خطك التحريري تجاه الوضع الراهن
الكيزان ما خليناهم و لا حنخليهم لآخر كوز
اذا كان هناك خلل في هذه الحكومة فالسبب الرئيسي هو المجلس العسكري
كنا نتمناها مدنية صرفة لأن للعساكر اجندتهم وهم جزء اصيل من النظام البائد
الآن موضوع مشاركة بعض شبابنا المغرر بهم في ليبيا و اليمن
كان للمجلس العسكري دور كبير في هذه المأساة
و من قام بفض الاعتصام في القيادة العامة هم المجلس العسكري
و من عطل تفكيك الدولة العميقة هو المجلس العسكري

الأخ خضر وعليكم السلام

Quote: كنا نتمناها مدنية صرفة لأن للعساكر اجندتهم وهم جزء اصيل من النظام البائد

والسلطة المدنية السيادية دي من وين كانت حا توفر لنفسها الحماية ساعة من نهار؟!
وهي سلطة حتى غير منتخبة يعني سيجد العسكر من الكيزان حجج كثيرة للإنقلاب عليها في ظرف ساعة واحدة
متى ما تهيأت الفرصة
.الكلام الذي لا يفترض حدوث الذي يطالب به وينظر وبتخيل ما كان سيحدث
سيكون كلامه لا قيمة له
أرجو أن تجيبني ما هي القوة التي كانت ستحمي السلطة المدنية السيادية
من خطر الكيزان المسلحين وجهاز مخابراتهم المسلح ؟؟؟!
كانوا سينتظرون شهرا حتى تهدأ الأمور بل ربما يعكرون
المناخ لتبرير الإنقلاب على السلطة السادية المدنية الصرفة
في الوقت الذي يحدوده بمزاجهم

Quote: اذا كان هناك خلل في هذه الحكومة فالسبب الرئيسي هو المجلس العسكري

دي محتاجة تشرحها لي
ثم هذا مجلس مختلط وليس عسكرياً صرفاً
لأن الاتفاقية مع العسكر نصت على عدم وجود أي صلاحيات تنفيذية لمجلس السيادة
ولا مسؤولي الحكومة المدنية اشتكوا من العسكر وتدخلهم في شئونهم
فمن أين لك يا أخي ما يبرر دعواك هذه ؟!

مساء الخير خضر

الزول دا شكلو عيان جد الجد..
لانو نزول الوزن بالشكل دا ماطبيعى ابدا..
بس بكونوا داسينزالخبر..
اها الحيوانات وجات منظمة عالمية و بتدى الدرب و الحقن للاسود..
الا البرهان البنجدو منو؟
هم فاكرين الحكاية لعب بالبيضة والحجر..

امتثال عبد الله

Quote: الزول ده عشان بقى ثوري الكيزان ما حيخلوه في حاله ..حيحاولوا يسمموه عن طريق الطباخ بتاعه الفي البيت .. وانصحوهو وقولوا ليه تخلص من جميع الطباخين الفي البيت وياكل بس من ايدين زوجته ... الزول ده فعلا ضعف شديد وكانه كان محبوس مع الاسود في حديقة القرشي

كلامك مستفز جدا وفيهو عدم احترام للشهداء والثوار
برهان شنو البقى ثوري؟!
برهان المسؤول عن عدة مجازر في منطقة جبل مرة لمن كان معتمد لمحلية نيرتتي (2003-2005) بقى ثوري؟!
برهان الكان أحد المسؤولين عن ظهور وتسليح حميدتي و علي أنضلة وموسى عيسى وغيرهم من المجرمين بقى ثوري؟!
برهان اللي اترقى في المناصب على يد المخلوع البشير خلال فترة وجيزة بقى ثوري؟!
برهان الكان آخر مفتش عام لجيش السجم في عهد المخلوع بقى ثوري؟!
برهان المسؤول مع حميدتي وبقية مجلس القتلة عن مجزرة القيادة وغيرها بقى ثوري؟!
برهان الحصلت مجزرة القيادة على بعد أمتار من مكتبه و لا حرك ولا جندي واحد لحماية الثوار بقى ثوري؟!
برهان وحميدتي وباقي مجلس القتلة كيزان وتربية كيزان وهم الحاكمين السودان حاليا وهم الحامين الدولة العميقة
و أولى خطوات استرجاع الثورة هي إسقاطهم!

احمد عمر
وقبولكم به رئيسا للسودان، الا يعتبر هذا عدم احترام للشهداء والثوار!؟
وناس قحت ، وهم الماسكين الحكومة الانتقالية ، كل يوم بشكروا في البرهان وحميدتي ، اليس هذا يعتبر عدم احترام وتقدير
لارواح الشهداء وللثوار!!؟؟

مرحب اخ منتصر

Quote: دي محتاجة تشرحها لي ثم هذا مجلس مختلط وليس عسكرياً صرفاً لأن الاتفاقية مع العسكر نصت على عدم وجود أي صلاحيات تنفيذية لمجلس السيادة ولا مسؤولي الحكومة المدنية اشتكوا من العسكر وتدخلهم في شئونهم فمن أين لك يا أخي ما يبرر دعواك هذه ؟!

كنت اتمنى و غيري كثر ان تكون الحكومة الانتقالية حكومة مدنية صرفة
وان يرجع العسكر الى سكناتهم
لن يتفق العسكر مع المدنيين و لن يفهم المدنيين نوايا العسكر

حميدتي الرجل الثاني في مجلس السيادة ولكن ليس في الجيش
تراتيبية الجيش تختلف عن ترانيبية مجلس السيادة
اعتقد ان شغور مقعد البرهان داخل الجيش ومجلس السيادة لن يملأه حميدتي في الحالتين.
جني

Quote: لن يتفق العسكر مع المدنيين و لن يفهم المدنيين نوايا العسكر

ولن يفلح مدنيين يتصدرهم اليسار البليد المفلس
الذين لا يحسنون غير التصفيق والهتاف حينما يكون الهتاف والتصفيق محمي
من بطش الكيزان
وكذلك المتاجرة بدماء شهداء غيرهم وليس شهداؤهم
كلامكم هنا مجرد كلام ونسة لا يحل أي مشكلة ولكنه يمكن أن يضر
لا يوجد في كلامكم حلول للمشاكل الاقتصادية ولا معيشة المواطن
كلامكم هنا دعم كامل للكيزان وبقوة كبيرة
تمسكون بالاداة التي استخدمها الكيزان فبدلا من استغلالها ضد الكيزان
أصبحتم مع الكيزان في خدق واحد ضد الأدواة الوحيدة التي بقيت
وهي الجيش القومي وتركتم الشرطة التي لا زال الكيزان ممسكين بها!
لأنه هاهنا حيث كرسي السلطة البراق هذا هو السبب وليس ما به تدندنون
كذباً وإفكاً مبيناً
فبقية القوى العسكرية
جيشان للزغاوة واحد كيزان والتاني علماني
وجيش للفور علماني
وجيش للنوبة
وجيش لناس النيل الأزرق
وجيوش أخرى منقسمة ومنشطرة عن هذه الجيوش
أما أنتم مارسوا الرعونات بي راحتكم أصلكم خارج البلد
وقضية الوطن عندكم مجرد قصص وحكاوي
تسلون بها وقت الراحة والفراغ بعد دوامات الغربة
المرة ذات العملة الصعبة الدثمة.