فايروس في الجوازات - سهير عبد الرحيم

05:05 PM January, 23 2020

سودانيز اون لاين
Asim Ali-
مكتبتى
رابط مختصر

فايروس في الجوازات
هل تصدق عزيزي القارئ ان الجواز الذي كان استلامه يتم في نفس اليوم او على الاكثر بعد مرور (٢٤) ساعة أصبح يتم استلامه الآن بعد مرور عشرة أيام..؟!
بل هل تصدق ان قسم التأشيرة في مجمعات خدمات الجمهور اصبح يعمل بكفاءة ٣٠٪‏، بعد أن كانت كفاءته ٩٥٪‏، وهل تصدق ان هنالك فايروساً أصاب الاجهزة ولم يتم علاجه حتى الآن.
بل هل تصدق ان هذا الأمر يحدث في كل مجمعات خدمات الجمهور.. الخرطوم وام درمان والخرطوم بحري.
السبب عزيزي القارئ وباختصار ان الدعم الفني والتشغيلي في مراكز خدمات الجمهور واستخراج الاوراق الثبوتية، كانت قد منحت لإحدى شركات الكيزان، بمعنى أن كل الموظفين والعاملين في الشركة إما أنهم كيزان أو يصاهرونهم او من اقربائهم.
وعقب الحملة التي انتظمت أخيراً بغية اقتلاع الكيزان من جذورهم، طالت الحملة تلك الشركة التي تعتبر من أكبر معاقل الكيزان، فعملوا بمبدأ (علي وعلى أعدائي)، سحبوا الدعم الفني والتشغيل وتركوا للمواطن السوداني هدية جميلة عبارة عن (فايروس) أصاب أغلب الأجهزة بعطب لم تستطع العمل بعده.
وقد ظهر هذا جلياً في قسم التأشيرة الذي يعمل الآن بنسبة ٣٠٪، ‏والشبكة أما ضعيفة أو متوقفة طيلة اليوم، هذا غير الجواز الذي اصبح الحصول عليه يحتاج لمبيت ورقاد بالأسابيع.
مجمعات الجوازات كانت من المجمعات الحيوية التي تخدم قطاعاً كبيراً في ما يخص استخراج المستندات والاوراق الثبوتية واجراءات العربات من تراخيص وتجديد ترخيص ورخص القيادة وغيرها.
والآن المجمعات شبه معطوبة، الزحام واكتظاظ المواطنين وبطء الإجراءات يجعل الضجر والتأفف سيد الموقف، فالمواطن لا ينقصه المزيد من الصفوف. وتكفيه الأزمات من صفوف خبز ووقود.
الآن يحتاج ما يُعرف بوزير الداخلية إلى أن ينهض من مكتبه ليزور مجمعات الجوازات برفقة مدير عام قوات الشرطة، وإن لم ينجح الاثنان في علاج مشكلة تقنية فهما غير جديرين بعلاج مشكلات الاحتقانات والتفلتات الأمنية.
أخيراً ما علاقة العميد المسؤول الآن عن نظام الحوسبة وهو لا يفقه في أمور الحاسوب شيئاً حتى يدرك خطورة مثل هذه الفايروسات على الأجهزة والضرر الذي يلحق بالمواطن جراءها.
خارج السور:
سؤال بريء:
هل شاهد أحدكم وزير الداخلية..؟!
هل تعرفون شكله واسمه وماذا يعمل..؟!
سهير عبد الرحيم

حبيبنا عاصم .. تحياتي
كلام خطير جداً .. سوف يتعطل الكثير من الامور بالنسبة للناس
حقيقية هذا هو خبث الدولة العميق والنموذج السيء بالله ما ذنب الناس ومصالحهم
جواز السفر أكل عيش .. وهناك مرضى .. وطلبة وغيرهم
قمة الاجرام من الدولة العميقة .. ما ذنب الابرياء
الناس ديل مجردين من الانسانية ..

تحياتي الحبيب عاصم .. متابعين معاك ..

عمنا الحبيب على عبدالوهاب - مرحب
تساؤل كاتبه المقال فى النهايه ينبه لواقع ان النظام البائد (لم يسقط بعد)

Quote: أخيراً ما علاقة العميد المسؤول الآن عن نظام الحوسبة وهو لا يفقه في أمور الحاسوب شيئاً حتى يدرك خطورة مثل هذه الفايروسات على الأجهزة والضرر الذي يلحق بالمواطن جراءها.

كلام صاح قبل أيام مريت بتجربة مماثلة فى المماطلة ،الغريبة زمنى ده كلو واحد من الوكالات بيقوم لى باللازم قلت طالما انا أصلا ماشية أتصور اعمل كل اجراءاتى براى ، مشيت لقيت شابة مهذبة قالت مالك متاخرة ان شاء تلاقى الخزنة ما قفلت بعد صدقت وعملت شنو وشنو ادتنى ورقة مشيت الخزنة قال لى قفلنا ، ما نبهنى أنى ممكن ادفع بالكرت ،المهم جيت تانى يوم دفعت وأتلفت للتصوير ناداني ضابط كلو دبابير قال جيبى ورقك أديتو الورق عاين قال لى تعال بى هناك إشارة إلى مكان خارج الصالة وبعيد عن محل التصوير المعروف لما مشيت دخلنى صالة مكتوب فيها كبار الزوار شالو ورقى وبعد شوية جاتنى ملازم قالت اتفضلى. وبعد ده دلتنى على صالة للتصوير مكتوب عليها القوات النظامية ، الحقيقة صالة رائقة طوالى قعدت أتصورت ، الشاب الصورنى التفت على جارو قال الاستلام متين قال يوم ١٨ ونحن كنا يوم ١٥ ،قلت مافى مشكلة انا ما مستعجلة يوم ١٨ طوالى على صالة استلام الجوازات سلمت الإيصال لى وحدة منقبة وقعدت بعد شوية ندهت أسمى وقالت شباك ٥٣. مشيت ٥٣ الضابطة قا لى وين الإيصال المالي قلت سلمت. هناك قالت أمشى جيبى ، جيت قلت لو سمحت داير الإيصال قالت إيصال شنو قلت انتى قلت امشى ٥٣ وأنا مشيت وقالو أرجعى جيبى قالت انا ما ندهتك بقينا فى ناديتينى ما ناديتينى دقايق والناس واقفة ،ود حلال ادخل قال ليها هسه المشكلة شنو شوفى الإيصالات القدامك عاين لقت إيصالى وبى قباحة شديدة شفتها عبر النقاب وحسبتافى صوتا ادتنى لى وقالت كلامك مبهم ، وأمشى ٥٣ ان شاء تلقى أتصدق .....قلت فى نفسى أجى هو ما أتصدق وصورونى كيف وقالو لى تعالى استلمى، الفى ٥٣ زولة مهذبة سالتها قالت امشى لازم تصديق إلكتروني فى ٤٢لانو جوازك ما ظاهر فى السستم مشيت ورجعت ٥٣ قالت تمام تعالى استلمى بكره
بكره جيت لى نفس المنقبة أديتا الإيصال نفس الفيلم الجواز ما طلع وارجع تانى ٥٣ هنا لقيت شاب ، قال الجواز طلعتى فى جدة ؟ كتمت ضحكة خايفة قلت لا قال لي طلعتى وين قلت فى القضائية الخرطوم قال جوازك مافى فى السستم امشى للمهندسين فى باب الخشب داك مشيت لقيت شابة اديتا الورق راجعت قالت اسمك اميره إلى آخره. قلت ايوا قالت لى الناس ديل كاتبين رقم الجواز غلط صلحتو ورجعت تانى من الأول ٤٢ للتصديق النهائي وقالو لى بكره تجى تستلمى والحمد لله استلمت بعد زلة وتلتلة شديدة وبالضبط بعد ستة ايام

ومامعروف بكره الازمه الجايه تكون فى ياتو مفصل من مفاصل حياه المواطن السودانى
ولمتين يستمر وجود فئران الدوله العميقه فى دواوين الدوله

ومامعروف بكره الازمه الجايه تكون فى ياتو مفصل من مفاصل حياه المواطن السودانى
ولمتين يستمر وجود فئران الدوله العميقه فى دواوين الدوله

سلامات لك ولكل الضيوف عاصم والله اكتر شي مفرح كان انك تستلم الجواز بعد يوم واحد .. زمان 15 يوم
وبعد داك كلو برضو الموضوع فيو شبكة بتطش وتجي لكن فايروس كيدي معناتا الشغل دا فيو عفانات شديده

تحياتي لكل الاخوة

مريت بأسوأ من تجربة الاخت أميرة ،
عند الاستلام طلب مني مراجعة شباك 53 ، لما راجعت الشباك كان ردهم انو بياناتك بتاعة السجل المدني معلقة في السيرفر.
سألتهم عن الحل ، قالوا لي تمشى قسم الحوسبة في رئاسة الجوازات ، مشيت الرئاسة ، الضابط المسئول قال لي"بشيء من عدم الرضا" ليه رسلوك لينا لأنو كان ممكن تتحل المشكلة عندهم في المجمع لأنو عندهم مهندسين بتاعين كميوتر، أجبته و الله أنا ما عارف، المهم اشتغل شوية و قال لي خلاص أرجع حلينا المشكلة،
رجعت المجمع تاني و بديت اجراءات التصديق من الأول، المهم مريت بمرمطة استمرت عشرة يوم بالضبط، كل مرة يتذرعوا بسبب ، أخيرا استلمت الجواز بعد عشرة يوم.

المشكلة ما في طول مدة الاجراءات ، المشكلة في المرمطة و الجري و التخبط في الاجراءات و التي لا تخلو من فظاظة في المعاملة من "بعض" المسئولين

تحياتي...

Quote: المشكلة ما في طول مدة الاجراءات ، المشكلة في المرمطة و الجري و التخبط في الاجراءات و التي لا تخلو من فظاظة في المعاملة من "بعض" المسئولين

Quote: وبعد داك كلو برضو الموضوع فيو شبكة بتطش وتجي لكن فايروس كيدي معناتا الشغل دا فيو عفانات شديده

مرحب اخ الطيب
البحصل فى الجوازات عينه بس حاجات بتحصل فى دواوين الدوله العندها اتصال مباشر مع المواطن
والادهى غير اسلوب الملاوعه دا ظهر اسلوب تخريب واهدار الموارد بشكل مفضوح