عشان الناس تبطل لفحي.. الحادث بتاع انفجار القرنيت، وقع في محلية شرق النيل بالحاج يوسف الشقلة شرق محطة (عشميق).. في حفلة حنة عروس، تمت اقامتها بمنزل الفنانة "انتصار ك"، والزواج مقرر ليهو الجمعة الجاية.. احد منسوبي القوات المسلحة تقريبا وكيل عريف يتبع للاستخبارات العسكرية، من شباب الحي، الصغار في العمر، جاء بيت العرس بالعصر أثناء الحفلة بي كلاش، وضرب زخيرة كتيرة شديد كعادة. معظم النظاميين في الحفلات، لما كتر الزخيرة اتشاكلو معاهو الشباب وطردوهو من الحفلة، وشال الكلاش وفات.. في الحفلة المسائية جاء شايل قنبلة (قرنيت)، وحسب كلام قريبو الكان في الحفلة، قال انو ليهو كم يوم بحوم بالقرنيت ويتخللع بيهو.. تقريبا جاء سكران وشايل القرنيت و داير يشاكل أصحابو اتلمو فيهو شان يقلعو منو القرنيت فسحب التيلة (ابرة الأمان) بتاعة القنبلة، وبحسب كلام الشاهد دا انهم كانو بتقالعوا لحدي ما اتفجرت بيهم كلهم وتقريبا اتوفى اول حاجة، ودي الرواية الاكدوها لي اكتر من شخص ومنهم ناس كانو حاضرين حفلة العصر.. ..
.. الحصيلة الأولية : 5 حالات وفاة بمستشفى البان جديد. 4 حالات وفاة بمستشفى شرق النيل. عدد كبير جدا من الاصابات والحصر الأولى يشير إلى 53 اصابة بينها إصابات خطرة. تم توزيعها بالاتي : البان جديد، شرق النيل، رويال كير، الأمل، بحري.
ملحوظة: عدد الاصابات كبير جدا، وحتى سراير حافلات التبرع بالدم جوة المستشفى مليانة مصابين..
ومعظم الاصابات من الأطفال و وشباب في عمر المراهقة.
واخيرا الشكر لكل لجان المقاومة بالحاج يوسف اللي وفرت كل النواقص الصيدلانية والمختبرية والشاش والتبرع بالدم، وشكرا للشرطة لوقفتها المحترمة وكانت بتنقل المصابين وتنقل المتبرعين واشتغلت في نقل لجان المقاومة لتغطية الحوجة والنقص ما بين المستشفيات، وشكرا لكل الكوادر الطبية الاتطوعت لسد الفجوة، ولجنة الأطباء المركزية،وادارة الصحة بالولاية.. حرفيا الناس كانت شغالة زي خلية النحل، وفي قنوات وهمية زي الجزيرة ومذيعها احمد مين كدا ما بعرف كانت بتصطاد في المياه العكرة، و ايوة تلمع المعتمد وحاشيته، فجأءة دايرين يدخلوهم في فتيل، الا شالو كامرتهم وجرو.. .. وكلامي دا كتبتو على لسان ناس حاضرين حسب كلامهم.. واتصلت على زول زميل للتأكيد، طلع انو ود خالتو ضمن المتوفين و ودو الجثامين المشرحة.. .. في النهاية : كل الضحايا ديل في رقبة القوات النظامية البقت ما مهتمة بي ضبط وربط افرادها، و تتركهم بهواهم مع الأسلحة وسط السكان.. مفروض تغيرو تربيتكم العسكرية دي، بدل يجو ينفخوهم ناس التوجيه المعنوي بالقصص الفارغة ويزرعو جواهم اللا انسانية واللا مبالاة.. يعلموهو كيف يكون حريص على حماية الحوالينو.. وقصة الرصاص الفي الحفلات دي حقو تحسموها، كفاية وجع.. ..
Post: #2 Title: Re: حقيقة انفجار القنبلة Author: علي عبدالوهاب عثمان Date: 01-21-2020, 08:02 AM Parent: #1
الحبيب أبوسن .. تحياتي .. قناة الجزيرة مباشر .. كانت تبث على الهواء مباشرة حتى الساعة الثالثة صباحاً ( بث مباشر ) لقاء مع أم العروس ووالد العروس .. وأبناء الحي .. والكاميرا صورت الصيوان وحتى الدماء التي سالت على الأرض أنا تابعت أكثر من 3 ساعات .. عدد المتحدثين كانوا بالعشرات من الموجودين في الحفل ثم انتقلت الكاميرا مع المصابين الى المستشفى ( البان الجديد) والمخصص لمنطقة الشقلة في الحاج يوسف لم يجدوا أي معينات طبية حتى الابجديات وتم توزيعهم إلى مستشفيات .. بصراحة والحق يقال قناة الجزيرة لم تدلي بأي تصريح بل فقط لقاءات مع أهل الحي من حمل ( قرانيف ) كما قال المتحدثين من أبناء الحي .. كل المتحدثين هاجموا القوات المسلحة كيف تسمح للجنود بحمل السلاح والحصول على القنابل وعدم الرقابة ..
كنت أتمنى من القنوات السودانية أن تكون حاضرة كلها مشغولة بلقاءات وغناء وتنظير تخيل الجزيرة تدخل إلى داخل البيوت حتى لقاء مع أم العروس ووالدها .. ولكن الحق يقال لم تصرح الجزيرة مباشر بأي راي أو تعليق فقط لقاء ونقل رأي الناس من مختلف الاعمار إناث وذكور .. المنظر كان مؤذي جداً ومسحة حزن واكتئاب .. أحذية ودماء على أرض صيوان الفرح شهود العيان تحدثوا بتحفظ كبير عن الشخص تقريباً اسمه أحمد ( منعزل وصامت ) لم يدخلوا في التفاصيل وحسب ما قالوا إن الشرطة حضرت وجمعت الأدلة وقيد التحقيق
الحبيب عبدالحفيظ .. أمس مساهر إلى الساعة الثالثة صباحاً مع الجزيرة مباشر كويس مدير الشركة لم يحضر بعد ..
زعلت من تلفزيوناتنا .. حرام الجزيرة تدخل في بيوتنا حتى المطبخ وداخل عنابر المستشفى ووسط الزوار ومتبرعي الدم كأن المذيع أحد أبناء الحي
طولت عليك الحبيب أبوسن .. المهم ثبت أن الحدث ما ارهاب .. والجزيرة اقتنعت بذلك
Post: #3 Title: Re: حقيقة انفجار القنبلة Author: عبدالحفيظ ابوسن Date: 01-21-2020, 08:04 AM Parent: #2
تشكر علي للافادة المثمرة
Post: #4 Title: Re: حقيقة انفجار القنبلة Author: MOHAMMED ELSHEIKH Date: 01-21-2020, 08:07 AM Parent: #1
رحم الله المتوفين
وعاجل الشفاء للمصابين
تعرف يا اب سن المدة بين سحب التيلة وانفجار القرانيت 10 ثوان فقط !!! حتى الجندي في المعارك لو تأخر في قذفها بعد سحب التيلة سوف تنفجر فيه والجرنيت حسب معلومات سعادة المقدم ابن اختي "عبارة عن قنبلة يدوية تشبه ثمرة القشطة او الانناسة الصغيرة عندو تيلة بتاعت تأمين زي الحلقة لو نزعتها لديك عشرة ثوان فقط للانفجار. بتنزع التيلة و ترميه عند دائرة ينتشر فيها حوالي 15 الى 20 مترا. تنقسم لشظايا صغيرة وكثيرة وقاتلة. يتسلح بها الفرد لمان يكون في عملية خاصة وبيستخدم وقت الزنقة الشديدة وتكون خلاص ميت ميت بتفكو في العدو القدامك استخدامو في الجيش الأن ما كتير وشبه نادر"
Post: #5 Title: Re: حقيقة انفجار القنبلة Author: عبدالحفيظ ابوسن Date: 01-21-2020, 08:25 AM Parent: #4
تشكر ودالشيخ انا لاحظت زمن المقبور العساكر خاتنو طوالي مع الحزام بالجنبة
Post: #6 Title: Re: حقيقة انفجار القنبلة Author: Asim Ali Date: 01-21-2020, 12:16 PM Parent: #5
سلام عليكم اعتقد انو عدم جرد العهده من العساكر بعد العمليات خاصه المليشيات منها هو الخلى عاكر يختفظوا بحاجات زى دى قاتله والحوادث بتاعت القلانيت لو تذكرو كتيره خاصه بين الاطفال مره او كم مره فى جنوب الجزام وكتير فى دارفور تنفدر غالبا فى الاطفال لجهلهم بها سوى انها قطعه حديد. دى مسئوليه قوات الشعب المسلحه انها تحاول تجمع الحاجات من العاييدن من العمليات باى شكل ممكن
Post: #7 Title: Re: حقيقة انفجار القنبلة Author: Asim Ali Date: 01-21-2020, 12:47 PM Parent: #6
Post: #8 Title: Re: حقيقة انفجار القنبلة Author: علي عبدالوهاب عثمان Date: 01-21-2020, 12:56 PM Parent: #7
مع التحية للحبيب أبوسن .. الحبيب عاصم أختنا دي أم العروس ووالد العروس بالجاكيت الأصفر أمس ساهرت معاهم للساعة ثلاثة صباحاً أكثر شيء مؤلم عدم جهوزية المستشفيات
في كم معتوه زي ده عندو كلاشن وقرنيت وحايم وسط الناس؟ عدم تسليم العهدة العسكرية ده إهمال من وحدته العسكرية كان جيش كان شرطة وهذه المسؤولية في عاتقهم ويجب محاكمة المسؤول عن استلام العهدة هذا الشخص
والله الكلام القاله ضابط الشرطة المتقاعد ده كلام عقل وكلام منطقي ...بس حاجة واحدة ما فهمتها بأنه قال انه بيعرف واحد يجي حفل عرس ويكون مسلح بسلاح شخصي، مسدس يعني ، ويطلق طلقة طلقتين في الهواء ، فرحا ولكن ما ممكن يكون شايل قنبلة..... يعني نفهم إطلاق رصاص في حفل عرس شئ عادي ولا شنو ...!!! وبعدين هو متقاعد وشكله انه ما وصل سن المعاش، وضروري بكون فصلوهو تعسفيا من قبل نظام اللصوص والحرامية لانهم فصلوا فصلوا جميع الضباط الأكفاء... بس ان شاء الله ناس البرهان وحميدتي يتخذوا إجراءات لمنع مثل هذه الحوادث المأساوية