يا ناس هووي .. السيادي القائد حميدتي .. خط أحمر .. دا شنو دا!

11:47 AM January, 15 2020

سودانيز اون لاين
Biraima M Adam-أمريكا الشمالية
مكتبتى
رابط مختصر

محاولات كبيرة من التنظيمات وقحت .. لاحتواء القائد حميدتي .. حتى سيدي سيد صادق المهدي جاء شايل الدركسون بتاعوا وعايز يشعّقة في مركبة الدعم السريع ويسوقها ..

رجاء ما تسرقوا مننا زولنا .. نحن شقينا دفاعاً عن القائد حميدتي من أجل مصالحنا في غرب السودان .. معولين إذا أنصلح حال غرب السودان سوف ينصلح حال السودان أجمع ..
المرض الكبير في الوطن واحد .. لكن الحلول لا تأتي جملة بل تأتي قطاعي .. حل مشكلة دارفور، حل مشكلة المناطق الثلاثة، حل مشكلة الشرق .. وفي نهاية المطاف تنحل المشكل السوداني ..

لكن تسرقوا زولنا وتخلونا ضهرنا مكشوف ساكت .. وتتركونا خشمنا ملح ملح .. عيب منكم .. أنتم السياسيون بتاعين فحلوة وسرقة نضال .. وكمان بتاعين بتزوغوا في المحكات الصعبة..

حالياً، مازلتم تركبوا في حميدتي .. مراكب السمبك في عرض البحر .. شنوا دخل السيادي حميدتي بإخماد تمرد المخابرات ..؟ مش نفس السيناريو بتاع فض الاعتصام .. لبدتم وشيلتوه وجه القباحة ..؟؟
يا ناس أتقوا الله ..

بريمة

هل هناك شيئ يخلي القائد حميدتي يخرج للناس لشرح تمرد المخابرات .. لماذا لا يتحدث وزير النشر؟ أو أي الناطق الرسمي؟ أو أي متحدث باسم الحكومة ؟

إلي متي هذا التعمد في أقحام القائد حميدتي ..؟

هل تصدقوا حتي الشيخ البهلواني داك .. قال الحلو يتكلم عن العلمانية .. والله تفرفر حميدتي قاعد .. ولم يقل أنا أو طائفتي؟! .. لكن لم يتف علي الحلو كما فعل مع تراجي .. 52 تفه في المايك علي تراجي.

مازالت الحكومة الديمقراطية غير مستعدة لتحمل استحقاقات المرحلة .. لماذا؟

بريمة

وجهة نظري،
الحكومة الانتقالية عليها الجلوس وكتابة مطلوبات المسميات السيادية كما فعلت مع المسميات والوظائف الوزارية .. مثلاً لماذا التعايشي .. كرجل سيادي يكون متحدث باسم الوفد المفاوض؟

بريمة

وقت الباردة .. هم، السياسيون، الذين يفعلون .. كذا وكذا .. وكذا .. يعنى الخير تجقلب والشكر ليهم هم .. و وقت الحارة جري إلي مخابئهم الأمنة .. في حواضنهم السياسية والحزبية ..
الناس يجب أن تتساوي في الحارة والباردة ..

بريمة

لأانه من زمان وقبل الاحداث دي يا بريمة قلنا ليك حميدتي كلـــب حراسة ...
حميدتي مُستخدم
حميدتي يُستاجر ولا يرأس

افهم الوضعية دي كدة بقى
حميدتي الآن تستاجره قحت والقوى المدنية لكنس بقية الكيزان
وهو سعيد هكذا
بل وفرحان
وعشمان يتمحي او الناس تنسى ملفه الأسود
بعض الهتيفة ومدلكي البيــوض معشمنو يبقى رئيس

نقول مالو العشم ما كعب والله كريم وكرمو واسع للبر والفاجر
هسه الينجز المهمة الفيها دي وبعدها لكل حادس حديس :)

المهم هسه ما تشغلوا لينا هالكليــب بهوهوة جانبية

تحياتي

أها يا أخوانا .. شوفوا جنس حالة حيدر الزين دي ..

Quote: بعض الهتيفة ومدلكي البيــوض معشمنو يبقى رئيس

أنت مازلت في ضلالك القديم .. يا حيدر .. !!
المسؤولية في تحمل أعباء المرحلة تضامنية .. الجميع مفروض يكون في نفس المخاضة .. ومفروض تظهر (كوكة) الجميع في نفس المخاضة ..

توصيفك لمثل الشيخ البهلواني وغيره .. مدلكي (بيوض) .. شينة في حقك ..


-----------------------------------------------------
disclaimer الناس مقامات ويخاطبوهم حسب عقولهم .. ودا "سينس". هههاي!

بريمة

يا بريمة ولدكم ما بعرف يلعب سياسة ..
بجي واقع بخشمو براهو نسوي ليهو شنو .
أنا مكانو كنت بلز البرهان أو كباشي يقولوا الداير يقولوا..
كلام الإمام الصادق كتيرين ما فهمو أو قصدوا ما يفهموهو..
طبعا حميتي بعد لبس البدلة وبقى رمز سيادي ما برجع تاني يبقى قائد كتائب عسكرية ..
عشان كدا أقترح عليه يكون حزب أو ينضم لحزب الأمه إذا عايز.

سلام يا بريمة
انا ما شايف في فرق بين تراجي و حميدتي
الجهل مصيبة يا بريمة

انت يا بريمة
سلسلة الناس الاسنهلكم المركز عبر العصور طويلة
خلي حميدتي
هسة حمدوك ده مشا في برنامج الهامش المحترم دستور2005 وتفاقية نيفاشا ولي مشل مع ناس ق ح ت في الاعلان الدستوري الفطير2019 ويمشط في الانقاذ بي قملا معاهم
حميدتي قال عنده بكل فخر 30000 جندي مرتزق في اليمن ولاترزاق عند نوعك ده فضيلة ورسلو قبض ولد عمه الحر الواعي موسي هلال بطريقة مشينة خدمة للمركز زيك زمان لمن كنت في الدفاع الشعبي في البورد
بس حمدوك املس ومهذب يصرف مسكنات كل اليوم في اجهزة الاعلام وماشي في نفس كار وخط الانقاذ وما واجه المشكلة الاساسية وهي الفدرالية التزح من راسنا ناس المركز ديل واسيادهم في العالم العربي قرود السيرك الامريكي الخمسة رسل الخراب والدمار في كل مكان
لذلك حميدتي وحمدوك لم ياتي بالجديد ولا المفيد
قال برنارد شو
لا تصارع الخنازير في الوحل ..ستتسخ انت وسيفرح الخنزير \وهذا ما تعمله الانقاذ من 1989 لحدي الليلة2020 تلوث في الناس وقاعدة وماشا في عفنا وقحت اتلوثت وهي تلهث بي المحاصصة بدل تلزمهم هم بالتغيير وفقا لشروط قر ح ت قعدت معاهم حاصل فارغ
والدولة مؤسسات وليس اشخاص وفلان وخرجت من 30يونيو 1989 ولم تعد حتي الان ولن تعود بي الطريقة دي
اثبت انك رجال وزوال مرجلة كلم حميدتي ده يطلق سراح موسي هلال
وستتغير المعادلة في دارفور وكل السودان ودي المهدية الجديدة

أقسم بالله يا بريمة قبل يومين فاتح بوست عمر التاج جات بتي الصغيرة عمرها سنتين بقت تأشر لي على صورتك وتقول لي بلغتها المكسرة (دة عمو .. بضحك) كنت عاوز اسجلها ليك فيديو
أنا شغال أقول ليها والله يا بتي هو بضحك لكن ما ظنيتو يرضى كلمة عمو دي
الزول دة منزلنا كلو كلو عادينا جلابة وفارز عيشته مننا

Quote: نحن شقينا دفاعاً عن القائد حميدتي من أجل مصالحنا في غرب السودان

ليه النظرة الضيقة دي ياخ!
حالياً حميدتي حاكم السودان بالكامل ما الغرب .. والمجلس السيادي مسؤول عن مصالح السودان كلها موش أي عضو يشوف أهله وقبيلته

بريمة
كلامك القلتو ده فيه غلط كبير ، وهو قولك ""نحن بندافع عن حميدتي عشان مصالحنا في غرب السودان ٠٠""وكان من المفروض تقول نحن بندافع عن حميدتي عشان مصلحة الوطن، أما كلامك عن إذا انصلح حال دارفور فسوف ينصلح حال السودان فهو كلام غير مقنع ، لأن حال دارفور الآن ممكن ينصلح إذا وافقت الحركات المسلحة وضع السلاح والانخراط في الحكومة......
وبعدين يا بريمة إذا انت عاوز مصلحة حميدتي قول ليه سيب الكلام الكتير وما تتكلم كتير في التلفزيون وخلي التصريحات الكتيرة ، واعمل بس عشان الناس بقت تميل ليك ، بس فضل تقرير اللجنة المكلفة بالتحقيق في فض الاعتصام تبرئك وبعد داك رئاسة السودان حتجيك جارة اذيالها ، وحتكون رئيس لوطن خال من اللصوص والحرامية ، ،بس لازم تعرف ان رئاسة السودان في العهد الديمقراطي لفترة ٤ سنوات فقط غير قابلة للتجديد....

أها شوفوا مولانا المك بقول في شنو؟

Quote: يا بريمة ولدكم ما بعرف يلعب سياسة .. بجي واقع بخشمو براهو نسوي ليهو شنو . أنا مكانو كنت بلز البرهان أو كباشي يقولوا الداير يقولوا.. كلام الإمام الصادق كتيرين ما فهمو أو قصدوا ما يفهموهو.. طبعا حميتي بعد لبس البدلة وبقى رمز سيادي ما برجع تاني يبقى قائد كتائب عسكرية .. عشان كدا أقترح عليه يكون حزب أو ينضم لحزب الأمه إذا عايز.

مولانا جاي بالكلبشات .. براحه .. زي فلانة بت سودا .. عايز يشبكهم في حميدتي ..!
يا مولانا المك .. قول دا تقصير من الحكومة الانتقالية وفهلوة من قحت .. لكي لا يتحملوا المسؤولية ..
نسموا الأشياء بمسمياتها .. عشان الحكومة وقحت يؤدوا دورهم المنوط بهم ..

هسي ظهور حميدتي ممكن يرسل رسالة خاطئة إلي الحركات المسلحة التي بدأت تنحاز نحو السلام وقبول راي الشعب السوداني .. هل تتفق معي في هذا؟

بريمة

ول أبا خضر،
سلام

Quote: سلام يا بريمة انا ما شايف في فرق بين تراجي و حميدتي الجهل مصيبة يا بريمة

نفترض أتفقنا معك .. أنظر لما رئيس في الغرب يأتي إلي الرئاسة .. ماذا يتم بشأنه؟
مش قاعدين يكونوا معه فريق كامل .. في جميع المجالات .. حتى لا يخرج عن المسار المرسوم ..
ساعدوه ما دام قلعتموه وبقي زولكم ..

نحن أهل الغرب أهل حكمة .. بالله أنظر لمني مناوي أو عبد الواحد النور .. يجئ يقول ليك ما عندنا مشكلة مع حميدتي؟
هل هناك تجاوز للمرارات أكبر من كده من أجل وطن يسع الجميع .. ؟ ..
هل تصدق هناك كم هائل من الفيديوهات التي تنادي بعودة حميدتي إلي الغرب .. ملأت السيبر ..
وحتى نستطع إخماد تلك الأصوات .. عايزين المسؤولية تكن تضامنية في الحارة والباردة ..
وهناك تكن لنا حجة بأن حميدتي مشارك وليس الوحيد في الساحة ..
الناس شعرت أن أبناءهم يتحملون أكثر من غيرهم من أعباء ليس لهم فيها ناقة ولا بعير
وخايفين لو مركب حميدتي أتوحل .. ما يغرّق أولادهم .. مما يقود إلي أشعال حروب جديدة وبروز حميدتي أخر ..

أحذروا ..

بريمة

يا باشمهندس بريمة
الغرب دا فيهو علماء ذي ما في باقي السودان
ما لقيتو غير الفاقد التربوي دا
ياخ دا كلام عادي ما بعرف يتكلم

ول أبا أحمد عمر،
سلام ..

Quote: أقسم بالله يا بريمة قبل يومين فاتح بوست عمر التاج جات بتي الصغيرة عمرها سنتين بقت تأشر لي على صورتك وتقول لي بلغتها المكسرة (دة عمو .. بضحك) كنت عاوز اسجلها ليك فيديو أنا شغال أقول ليها والله يا بتي هو بضحك لكن ما ظنيتو يرضى كلمة عمو دي الزول دة منزلنا كلو كلو عادينا جلابة وفارز عيشته مننا

حلاااااتا ما شاء الله .. تربي في عزكم .. بالله سجلها لينا عشان نسمعوا صوتها ..

أنا أكتر زول واقعي .. السياسة بالنسبة لي كلها مناطقية .. all politics are local ..
لو حلينا مشاكل السودان بهذا المنهج .. سوف تخمد نار الفتنة وإلي الأبد .. هل يعقل اليوم ناس الجنينة عندهم قضية أهم وأكبر من تحقيق العدالة لذويهم الذين قتلوا بالأمس؟
وهذا المثال يسري في أي بقعة في أرض الوطن .. الحلول الفوقية سوف يرفضها الناس .. وتقود للمشاكل .. كما رفضوا الكيزان والناس وقفت معهم نار منقد.

تجارب الشعوب خير واعظ لها ..

بريمة

ول أبا عادل أمين،
سلام ..

Quote: اثبت انك رجال وزوال مرجلة كلم حميدتي ده يطلق سراح موسي هلال

أنا كلامي أنتهي زمان .. وعلي وشك مغادرة هذا المكان بدون رجعة .. منتظر يوم توقيع السلام .. بإذن الله إلا زول يرسل لي في الخاص ..
والسبب لأني إنسان ديمقراطي .. أفهم معنى التكليف .. الشعب السوداني كلف أبناءه الذين أختارهم .. ح أقول شنو فوق رأي الشعب السوداني؟
هناك صحافة حرة، قضاء عادل، وجهات مسؤولة .. هم من يتحدثون عننا ... ونحن كشعب علينا المحافظة علي المنظومة برمتها لكي تكون فاعلة ..
أنت يا عادل يحق لك رفع شكوي لأطلاق سراح الشيخ موسي هلال .. ما الذي يمنعك؟ .. أنا مع أطلاق سراح الشيخ موسي هلال دون قيد أو شرط ..
لكن الناس الذين اخترناهم .. يعنى نريسوهم .. ونتيسوهم ولا شنو؟

أنت عرفك بالديمقراطية .. أو القرارات السيادية شنو؟ .. أنت من دكتاتورية لأخري .. وحتى وجودك في الغربة في بلاد العرب التي تخلوا من أي أثر للديمقراطية .. رجعت للوراء فراسخ ضوئية
بربك أنت تتعلم الديمقراطية من وين؟ أنت قايل الكراس بديل للاستاذ؟ او بديل لمعركة الحياة؟ .. أنت بعد دا عليك تبلع لسانك وتسكت ساكت .. عندك صوت واحد فقط لا أكثر لا أقل .. ترمي صوتك وتطلب الله.

بريمة

Quote: بريمة كلامك القلتو ده فيه غلط كبير ، وهو قولك ""نحن بندافع عن حميدتي عشان مصالحنا في غرب السودان ٠٠""وكان من المفروض تقول نحن بندافع عن حميدتي عشان مصلحة الوطن، أما كلامك عن إذا انصلح حال دارفور فسوف ينصلح حال السودان فهو كلام غير مقنع ، لأن حال دارفور الآن ممكن ينصلح إذا وافقت الحركات المسلحة وضع السلاح والانخراط في الحكومة...... وبعدين يا بريمة إذا انت عاوز مصلحة حميدتي قول ليه سيب الكلام الكتير وما تتكلم كتير في التلفزيون وخلي التصريحات الكتيرة ، واعمل بس عشان الناس بقت تميل ليك ، بس فضل تقرير اللجنة المكلفة بالتحقيق في فض الاعتصام تبرئك وبعد داك رئاسة السودان حتجيك جارة اذيالها ، وحتكون رئيس لوطن خال من اللصوص والحرامية ، ،بس لازم تعرف ان رئاسة السودان في العهد الديمقراطي لفترة ٤ سنوات فقط غير قابلة للتجديد....

كلام عقل يا أمتثال ..
لكن سؤال .. هل تعتقدين لو وضعت الحركات المسلحة السلاح .. وعم السلام ربوع السودان .. هل تحل جميع مشاكل السودان؟ نو .. يكون حلينا مشكلة واحدة فقط هي مشكلة الحرب .. يبقي الفقر، التنمية، الأقتصاد، الأرتقاء بالتعليم وحياة الناس .. وعييك.
يبقي السؤال ماذا بعد السلام ..؟ أول شيئ أنظري لحال الأمريكان .. كل صباح جديد يأخد 22 أمريكي من الذين خدموا في الجيش في مناطق الحروب أرواحهم .. بسبب مرض ال PTSD
شوفي كم طبيب نفسي .. يحتاجهم السودان .. لكي يحصن الشعب ضد جرائم الذين ولغوا في الدماء في الحروب؟ .. أو حتى ناس الأجهزة النظامية الذين عركوا الحروب والموت .. صاروا مثل منظمة الكلاش الأجرامية .. كلها إفرازات للحروب.

المشوار طويل ..

بريمة

ول أبا خضر،

Quote: يا باشمهندس بريمة الغرب دا فيهو علماء ذي ما في باقي السودان ما لقيتو غير الفاقد التربوي دا ياخ دا كلام عادي ما بعرف يتكلم

ما يمر به السودان .. وضع استثنائي بكل المقاييس ..
من الذي صوت لقيادة الحركات أن تحمل السلاح بالأنابة عنا؟ .. شالو سلاح غصباً عنا .. واليوم نحن جاكيين وراهم نستجدي عطفهم .. لماذا؟
ما شفت ناس المصارعة .. الواحد ضخم مثل "البك شو" .. وويلك لو سألته سؤال مشاتر .. أقل شيئ يشيل منك المايك ويطق به الوطا لو ما بلعك ليهو ..
ما زلنا كشعب تحت رحمة دكتاتوريين الحروب .. لكن .. حتي مسمي لوردات حرب .. خايفين منه خوف عديل ..

القائد حميدتي خرج من مخاض سنين .. من أجل البقاء وسط حروب غاب .. القائد حميدتي عرف أن الشعب هو السلطة العليا .. فرهن نفسه لإرادة الشعب ..
أنا أفتكر مفروض يكون عنده "كرديت" كبير .. وما مفروض الناس تحاول النيل منه بطرق غير أخلاقية ..

بريمة

الناس الذين تداخلوا كلهم مروا مرور الكرم .. علي كمة "خط أحمر"؟؟! .. من الذي وضع الخط الأحمر؟
زي ما قال شيخ الجلابة البهلواني .. "يا الحلو تفرفر علمانية علمانية .. حميدتي قاعد .. والله صحي"! ..
أها أنسل الشيخ البهلواني .. ورمي داءه في حميدتي ..

أنا ليس لدي بعد اليوم أي خط .. لا أحمر لا أصفر لا وردي ..
لكن الحكامات في الغرب .. قالن حميدتي خط أحمر ..
ومكونات الغرب مكونات قبلية .. وهذا شيئ يعرفه القاصي والداني ..
ونحن البقارة والأبالة .. مام* نداوسوا إلا إذا هزينا في الحكامة ..
وأحذروا لو لحقنا وهزينا في الحكامات .. ممكن نطلّعوا ليكم جيش أكبر من بتاع القائد حميدتي ..
وهناك تكون عليكم مصيبتين بدل مصيبة واحدة.

------------------------------
كلمة مام .. تعني لا النافية ..

بريمة

حبيبنا بريمة .. تحياتي ..
حميدتي اصبح رقم حتى لدى مخابرات وحكومات الدول والمحاور التي تهتم بالسودان
حميدتي زول ود بلد ( كما ترابلة عندنا في البلد ) الكلام بكل وضوح ودون أي تردد
هذا الاسلوب لا ينفع في السياسة كما تعلم الحبيب بريمة السياسة ، خداع ، ونفاق ، ولف دوران .. إلخ
الكلام الواضح يمكن بالعربي ( دوغري ) عكس السياسة ( فن الممكن ) والنموذج الساطع في التاريخ الاسلامي ( سيدنا معاوية)
وبناء على هذه الفكرة كانت لي مداخلة في بوست سابق وهي كالتالي :
=====
حميدتي .. يجب أن يغير من طريقة خطابه لأنه اصبح الرجل الثاني في الدولة
وألا يتمسك بنفس الخطاب أيام الدعم السريع ومخاطبة العامة .. ( بطريقة ود البلد )
وحميدتي بهذه الطريقة سوف يكون صيد سهل ..
قوش رغم أننا نريده داخل الزنزانات .. ولكن الرجل خطير أكيد يكون لديه ملفات
عن حميدتي ( لأنه محترف مخابرات ) .. ربما خلافهم سوف يكون في صالح الثوار أو من هم ضد حميدتي
والخاسر الأكير سيكون حميدتي .. قوش خطير وانتهازي وكأنه ولد رجل مخابرات
وحميدتي مهم في هذه المرحلة من الثورة فهو الغطاء لما أصاب الجيش والشرطة من بعض الهشاشة
عليه الابتعاد من منابر الخطابة واطلاق التصريحات لأن هذا يحتاج إلى خبرة وقراءة ما وراء السطور
وأكثر ما أصاب البشير من اهتزاز في شخصيته عندما اكثر من الخطابة بسذاجة وبلغة ليست عامية فقط بل سوقية
خطاب حميدتي في جوبا عن التمرد في جهاز المخابرات كان فيه نوع من عدم الخبرة ة وممارسة السياسية
اختيار الالفاظ والحركة الجسدية وطريقة الخطابة .. إلخ
نصحية لحميدتي الحبيب أنت في حدقات العيون .. ولكن ابعد عن المنابر والخطابة

وابعد عن قوش لأنه خطير ومجرم ومتمرس مخابرات .. وهو الذي ورط المعزول ..
وأترك أمره للثوار وحقت والمهنيين ..ربما هم قادرون ..

حميدتي الأفضل له كما بدأ للعامة أن يكون زول فزع .. بعيداً عن الخطابات والمؤتمرات الصحفية
الانسان كلما تحدث كثيراً كلما ظهرت عيوبه وهذا ما يتربص له الجانب الآخر ..

شكراً الحبيب بريمة .. تحياتي .. أين الحبيب اسماعيل عبدالله .. واحشنا .. وكمان الحبيب صديق الغالي

حبيبنا علي عبد الوهاب
أها .. دي الحكم والمشورة الحسنة التي نريدها .. لو توفرت الإرادة الجمعية لمخاطبة مثل تحديات تمرد جهاز المخابرات .. وخاطبت الحكومة الانتقالية الحدث من خلال القنوات المنوط بها التحدث للناس يكون كفونا شر الكلام.
لكن صدقني لبدوا .. وكل زول خايف علي مستقبله السياسي .. في مثل هذه الحالة يجب أن يخرج الناطق الرسمي المنوط به التحدث للناس بشرح الحقائق .. لكن ما حصل .. ولم يضعوا النقاط فوق الحروف حتى تهدأ الأمور ..

ولو لا ظهور حميدتي لاهتزت ثقة الناس في الحكومة الانتقالية .. أيش معني الحكومة جرت الجنينة وخاطبت الشعب .. وكذلك في أحداث بورتسودان .. ولم تخاطب أزمنة نشأت في قلب عاصمة البلاد؟

شكراً يا علي .. وإن شاء الله تكون رسالتك وصلت لمن يهمهم الأمر ..

بريمة

حميدتي يا بريمة متسرع شديد و دي نقطة ضعف
اتمني ان يجد من ينبهه لها. و هناك اكتر من فخ منصوب امامه
مثلاً
قبوله اعضاء الامن المُسَرحّين في قوات الدعم السريع
هل هو إضافة لهم؟ و له؟
أم خصم عليهم؟ و له؟
و كيف نحترم قوة عسكرية بها عناصر القتل
في جهاز الأمن و مليانين حقد علي الثورة و الثوار؟
و لماذا قبل و صمت؟
ببساطة لانه ما فكر في الموضوع بعمق.
من حقكم تقدموه كقائد
لكن من واجبكم تنصحوه ايضاً

الأخ حامد الصاوي،
سلامات ..

Quote: من حقكم تقدموه كقائد لكن من واجبكم تنصحوه ايضاً

شايفك يا أخي حامد الصاوي، وبعامل حاسة القحاتة العالية التي يتميزون بها .. وأن كل صيحة عليهم وضدهم .. أرك طوالي ذهبت إلي تقرير حالة .. "من حقكم"! .. من هم في هذا الجمع؟ .. أنا زول فرد فتحت هذا البوست؟!
ثم قبل وبعد سقوط النظام .. أنا أدعم قيادات حركات الكفاح المسلح .. أن يطرحوا أنفسهم للشعب السوداني .. وأن ليس هناك حاجز ولا حاجب بينهم وبين القوي التي تؤمن بخطابهم .. والساحة السياسية ملعب وكتاب مفتوح للجميع والحشاش يملأ شبكتو ..
أنظر الأتي:

القائد مني مناوي .. يتجلي .. والسلام وشيك بإذن الله (فيديو)القائد مني مناوي .. يتجلي .. والسلام وشيك بإذن الله (فيديو)

برضو ح تجئ تقول لي من حقكم تقدموا القائد مني مناوي .. وأنا أقول من حقه أن يقدم نفسه .. ومن حق حميدتي أن يقدم نفسه .. وأنت وأي شخص يأنس في نفسه الكفاءة وتحمل أعباء المسؤولية .. هل حميدتي زولنا أكثر منكم الأن؟ نحن ما عايزنه أصلاً يكون في الخرطوم ..

بريمة

Quote: أنت عرفك بالديمقراطية .. أو القرارات السيادية شنو؟ .. أنت من دكتاتورية لأخري .. وحتى وجودك في الغربة في بلاد العرب التي تخلوا من أي أثر للديمقراطية .. رجعت للوراء فراسخ ضوئية بربك أنت تتعلم الديمقراطية من وين؟ أنت قايل الكراس بديل للاستاذ؟ او بديل لمعركة الحياة؟ .. أنت بعد دا عليك تبلع لسانك وتسكت ساكت .. عندك صوت واحد فقط لا أكثر لا أقل .. ترمي صوتك وتطلب الله. بريمة

انا الديمقراطية البعرفا علمني ليها لورد كتشنر made in England وانا من سودانيين وست منستر والوعي بتاع الشخص ما بحددو المكان القاعد فيه وامريكا اصلا ديمقراطية اقتصاد السوق التي يتحكم فيها الايباك واقرا لي نعوم تشومكسي وروجهي غارودي مفكرين غربيين اخلاقيين
انا ما مباري شيوعيين وبعثيين ناصريين ايتام بابكر عوض الله ولا كيزان وسلفيين ايتام الترابي في البورد في البورد ولي في السودان
انا سوداني حر ومثلي الاعلي الاربعة ديل فقط
السيد عبدالرحمن
السيد علي
الاستاذ محمود
د جون قرنق
وديل عندهم برانمج واحزاب ديمقراطية جماهيرا تسد عين الشمس وفي زمنهم زمن بابو نمر ودينق مجوك كانت الدنيا عوافي وهسة مع البروفسرات والدكاترة وبدعت التكتوقراط وهؤلا ليس صنيعة مخابرات مصرية القذرة او تنظيم الاخوان المسلمين الدولي الاكثر قذارة
ووبباري القيم العليا في المجتمع السوداني وادعو الي رفع الظلم من كل اهل السودان بالدستور والقانون وانت يا دباب الدفاع الشعبي والترابي تباري الطغاة والمتجبرين وتدافع عن باطل الناس في البورد وما قادر تطلع من كار الاخوان المسلمين ووعيك دون جون قرنق ومحمود محمد طه وعايز تبحث عن عروبة مستعارة ذى ايتام بابكر عوض الله وقادننا بي علم الخدم ده لحدي الليلة 2020
عايز تتطلعني ما بعرف ديمقراطية وتستهين بي اليمن الكسرت ناموسكم انت وقحت الفاشلين اكثر
كتب وشرح
الديمقراطية
الفدرالية
الاشتراكية
المحكمة الدستورية
التنمية والاقتصاد
وفي الوعي
الوطني
الاقليمي
الدولي
الكوني
بوستات في البورد
وعل قدر اهل العزم تاتي العزائم

Quote: انا الديمقراطية البعرفا علمني ليها لورد كتشنر made in England وانا من سودانيين وست منستر والوعي بتاع الشخص ما بحددو المكان القاعد فيه وامريكا اصلا ديمقراطية اقتصاد السوق التي يتحكم فيها الايباك واقرا لي نعوم تشومكسي وروجهي غارودي مفكرين غربيين اخلاقيين انا ما مباري شيوعيين وبعثيين ناصريين ايتام بابكر عوض الله ولا كيزان وسلفيين ايتام الترابي في البورد في البورد ولي في السودان

أعترف يا عادل، أعترف .. أنت لا تفهم في الديمقراطية .. لا تكابر .. من حق الشيوعيين والناصريين وأيتام بابكر عوض الله من حقهم العيش بكرامة والتطلع إلي حياة أفضل وممارسة حقوقهم كجزء أصيل من أبناء الشعب السوداني.

بريمة

Quote: القائد حميدتي خرج من مخاض سنين .. من أجل البقاء وسط حروب غاب .. القائد حميدتي عرف أن الشعب هو السلطة العليا .. فرهن نفسه لإرادة الشعب .. أنا أفتكر مفروض يكون عنده "كرديت" كبير .. وما مفروض الناس تحاول النيل منه بطرق غير أخلاقية ..

هههههه
انا مش قلت ليك دا الحاصل ؟!

المهم انك كدة فهمت الفكرة تماماً وكلامي وقع ليك ..

خيار انه يرجع الغرب تاني ما وارد والناس البينادوهو عاوزة تدقسوا
حميدتي ضاق ليمون الخرتوم تاني ماااابيمشي يا بريمة..
خليهو هنا بنحتاج ليهو قدام كان ما اخد المعاش الإختياري

يا باشمهندس بريمة ما تشكر لي الراكوبة في الخريف
انا ما عندي اي مشكلة مع المكون السوداني
يجي رئيس من الغرب من الشرق من الجنوب
ما عندي اي مشكلة في الموضوع دا
بس يكون على قدر المسئولية و فاهم يعني شنو رئيس
اما حميدتي دا لا يصلح لأي شئ و هسي هو في امرن ضيق
لا عارف يقعد لا عارف يطلع
مصيبة البلد دي كبيرة طالما تصدر المشهد نوع حميدتي دا
و الله دي كارثة وقنبلة موقوته هذا الحميدتي
مرة بروفيسور التجاني حسن الأمين كان عميد كلية البيطرة بجامعة الخرطوم
عينوهو والي في دارفور و استقبلوهو اهل دارفور بكل ترحيب
في الكلمة بتاعتو قال ليهم من نعم الانقاذ عليكم انو يكلمكم بروفيسور ذيي
طلعو ليهو عشرة بروفيسرات في الساحة من نفس المنطقة فبهت

ول أبا خضر،

Quote: مصيبة البلد دي كبيرة طالما تصدر المشهد نوع حميدتي دا و الله دي كارثة وقنبلة موقوته هذا الحميدتي

يا أخي أنت ملاوز شديد من القائد حميدتي لماذا؟ .. القائد حميدتي ملتزم بأجندة المرحلة .. وصابيها معاكم في كل كبيرة وصغيرة .. وياهو الدليل بالعمل في موقفه القوي من فلول المخابرات.
أضف، القائد حميدتي رجل علي نياته .. يضع أمامكم كل شيئ علي بلاطة ..

وبعدين مسألة الحكم والإدارة تحتاج لموهبة .. تقول لي هل هناك مساواة ما بين الرئيس باراك أوباما .. والرئيس دونالد ترامب؟ شوف الموهبة والكاريزما والحضور الذي يتمتع به الرئيس أوباما أو بيل كلنتون .. مفروض الناس تنظر إلي جوانب القوة وما يمكن أن يقدمه القائد حميدتي للوطن .. بدل المناحة ..
الرجل سوداني أصيل وود بلد .. وقلبه علي السودان وأهله .. أدوه فرصة .. وظللنا نقول لكم وما نسمعه عنه من الناس في مناطق الغرب .. الرجل عصامي وحاضر الذهن ويقف علي دقائق التفاصيل بنفسه ..

بريمة

حيدر،

Quote: حميدتي ضاق ليمون الخرتوم تاني ماااابيمشي يا بريمة..

نحن أهل ضهاري .. وحاشا شراب الليمون والحاجات التانية.. ما تدخلوا فينا لوثة أهل المدن .. أشربوا ليمونكم براكم.
بخصوص أنتم عايزنه .. عارفين .. لكن بعد توقيع السلام نحن عايزنه حاكم لغرب السودان .. أها الكلام مش كويس معاكم .. ترتاحوا شوية .. يا الله يدكم معانا في مساعدته.

بريمة

مافي مشكلة يا باشمهندس بريمة ح اقيف على مسافة واحدة
ننتظر و نشوف

قال الشاعر طرفة ابن العبد :_

سَتُبْدِي لَكَ الأيَّامُ مَا كُنْتَ جَاهِـلاً ويَأْتِيْـكَ بِالأَخْبَـارِ مَنْ لَمْ تُـزَوِّدِ

حبيبنا بريمة اتمناك بخير والضيوف الأركام
بتصور لحدي قبل الاحداث الاخيرة الكيزان كان عندهم امل في حميدتي والبرهان.
أحداث جهاز الامن وهيئة العلميات كانت تاريخيه ومفاصله حقيقيه
وقتل لكل امال الكيزان في الضرب على وتر الصراع بين المكون المدني والعسكري
. اليوم كل قروبات والميدا بتاعت الكيزان شغاله شتم في حميدتي
وبذات اللغه العنصريه والمتعاليه بوصفه مجرد راعي ومرتزق.
من جانبنا في تطور كبير في خطاب الشراكه. السياسيون تجاوزوا محطه الخوف من الردم والاتهامات الي لغه واقعيه
تغلب المصلحه الحقيقيه للثوره والثوار وتدعو لشراكه منتجه نحتاجها لمحابهه الموامرات لأنها كتيره ومنظمة ولن تقف عند أحداث جهاز الامن
لذا التفكير خارج الصندوق وبلغة رجال الدولة مهم جدا حتي نخرج من المأزق التاريخي لكن الغضب لا يبني وطن
والركون الي المرارات يدخلنا في دائرة الطوفان وفلنعترف اذا كان هناك متضرر اكبر من حميدتي
اهلنا في الغرب والحركات ولكن في ظل موازين القوي التي فرضت هذا المشهد علينا التعامل
مع الواقع لمصلحة البلاد بعيدا عن الانتصار للذات سواء خاصة او حزبية او جهوية او قبلية من اجل التعافي الوطني

Quote: أعترف يا عادل، أعترف .. أنت لا تفهم في الديمقراطية .. لا تكابر .. من حق الشيوعيين والناصريين وأيتام بابكر عوض الله من حقهم العيش بكرامة والتطلع إلي حياة أفضل وممارسة حقوقهم كجزء أصيل من أبناء الشعب السوداني. بريمة

كلام يا عوض دكام
طيب ما يقعدو في راسنا بالمحاصصة ويرفسو وقبل كده قعدو بالانقلابات انقلاب مايو 1969 وعملو حاجات وسخة كثير
وهسة الانقلاب ده 2019 ايضا تحت غطاء المحاصصة عايزين يقعدو في راس الناس في المركز والاقاليم لي شنو
ياخ دي ايدولجايات شمولية مصرية وعربية علاقتا بي الديمقراطية ذاتا شنو
انت كبر دماغك الصغير ده
يقعدو بي حجمهم بس وما برفضو حاجاتهم
انا عاجنبي علم الاستقلال
والاقليم
والانتخاباات
والادارة الاهلية
والايقاد والصين
بالتلاوطو مالهم في البورد وفي السودان ويفرضو علي قرود السيرك الامريكي الخمسة مصر والسعودية والاماراات وقطر وتركيا ليه وايضا امريكا والبنك الدولي
الانتخبهم منو
انت ما بتعرف ديمقراطية ولا بتعرف فيدرالية يا كوز وهم شهبك عديل في كارك عايزين يبقو عرب علي حسابنا

يابريمة معاك تب في الامر دا .. والغرب دا ان شاء الله يكون ولاية واحدة شاملة مقاطعتي كردفان ودارفور..


صدقني اذا ترشح للحكم اول زول اديهو صوتي
ما تسمع كلامنا دا ب بس قالوا الموية تجرب الغطاس وموية حميدتي فض الاعتصام ..!
حميدتي بيركز ويلوك في مسألة القانون والعدالة وكل شئ حا يتضح
مخاضو تحقيق العدالة واثبات براءته وانه كان زول مدقس ساي وركبوهو الكيزان الطرورة زيو والكتيرين في القصة
بعدها
حبابو تب هو والصندوق

تحياتي

الأخ بريمة اولاً سعيد بالحوار معك جداً
و سعيد جداً بالإختلاف الطبيعي بيننا
و أشهد لك بانك حريص علي السلام و سيادة حكم القانون و العدالة
كتبت سابقاً

من حقكم تقدموه كقائد
لكن من واجبكم تنصحوه ايضاً

شايفك اعترضت علي صيغة الجمع وكتبت

Quote: شايفك يا أخي حامد الصاوي، وبعامل حاسة القحاتة العالية التي يتميزون بها .. وأن كل صيحة عليهم وضدهم .. أرك طوالي ذهبت إلي تقرير حالة .. "من حقكم"! .. من هم في هذا الجمع؟ .. أنا زول فرد فتحت هذا البوست؟!

صيغة الجمع جات من مداخلاتك السابقة و بتتكلم عن زولكم

Quote: رجاء ما تسرقوا مننا زولنا .. نحن شقينا دفاعاً عن القائد حميدتي

قلت ليك بدل تدافعوا عنه انصحوه
و كتبت انت

Quote: حالياً، مازلتم تركبوا في حميدتي .. مراكب السمبك في عرض البحر

وكان ردي
هناك اكتر من فخ منصوب امامه
لا اظن هناك إختلاف و لكن تباين وجهات نظر و انت عاوز تحمل
هفوات حميدتي ل قحت. قلت

Quote: أنتم السياسيون بتاعين فحلوة وسرقة نضال .. وكمان بتاعين بتزوغوا في المحكات الصعبة

انت هنا نسيت القضية الاساسية و مهمة بناء السلام و مشيت لجانب
آخر يوضح عدم ثقتك في السياسيين و ده ما بخدم بناء السلام بل
يضع العراقيل امامه


عموما أنت مؤهل لكي تلعب دور كبير في صناعة السلام
و إزالة كل المرارات التي صنعتها الحكومات السابقة
فلا ترسخ قلمك لغير ذلك.
خليك بريمة البكلمنا عن التراث الغني و الملهم
لاهلنا في الغرب و انظر للتفاعل الايجابي من اعضاءالبوست
مِنْ مَنْ تنعتهم باولاد الجلابة
و لغة الحوار الجادة بعيدا عن السخرية و التخوين مهمة
ايضاً و لنعمل جميعاً لصنع سلام حقيقي

و ركز في الكلام ده الصادر من قلب وسط السودان


كلّ طلقه..بينا
نحن تبقى وفره
سمسماً ..وبفره
سكراً وشاى
تترا سايكلين..
جاى وجاى وجاى
مافى حاجه ساى
كلّو عندو دِين
كلّو عندو راى
بور..وبورسودان
بارا.. والجنينه
عبرى ..ولاّ واو
حاجه مش كويسه
كلّ زول براو
هى سودانا بكره
من سودانا ناو

فُتْتَك بعافية

غايتو يا بريمة ،،القلم ما بزيل بلم ...

ول أبا حسن العالم،
سلام وجيداً جيت ..

Quote: التفكير خارج الصندوق وبلغة رجال الدولة مهم جدا حتي نخرج من المأزق التاريخي لكن الغضب لا يبني وطن والركون الي المرارات يدخلنا في دائرة الطوفان

وهذا مهم جداً .. صدقني الهامش السوداني لم يواكب تطورات المرحلة والناس مازالت تقبض علي الجمر وتعزل نفسها نتيجة التوجس والخوف الذي سكن فيهم ثلاثون عاماً .. عايزين نشوف ندوات سياسية وفعاليات مجتمعية وشبابية تدعوا إلي مخاطبة تطلعات شعوب الهامش.

بريمة