Post: #2
Title: Re: يا مولانا الملك ... قبل صدور الحكم اليوم
Author: جلالدونا
Date: 12-30-2019, 05:01 AM
Parent: #1
لا اود ان اشير الى اركان الجريمة
من ادلة و شهادة شهود
و لا تقييم البينات
لكن داير رايك فى الحالة التى يمر بها قاضى الموضوع
فى اللحظة التى يصيغ بها الحكم القضائى
و فى بالى المبدأ القانوني النبوى
ادرأوا الحدود بالشبهات
و اثر المبدأ ده شنو فى قرار القاضى
|
Post: #3
Title: Re: يا مولانا الملك ... قبل صدور الحكم اليوم
Author: محمد على طه الملك
Date: 12-30-2019, 05:31 AM
اصبحنا واصبح الملك لله ..
مالك علي يا جلال ياخي ..
بصراحة كدا أنا ما تابعت وقائع القضية دي ..
ولا عارف حيثياتها شنو ..
مش لأنها ما مهمة لكن اعتقد الكيزان عملوا منها راو أكثر مما تستحقة جرائم مماثلة ..
بالنسبة لسؤالك عن درء الحدود ..
الجريمة محل المحاكمة دي ما حدية بل توصيفها جريمة قتل ..
والتوصيف الشرعي لعقوبة القتل هي القصاص..
اما عن الحالة التي يمر بها الفاضي ..
اجابتي بتكون من خلال تجربتي ..
الحالة دي بتكون قبل النطق بالادانة ..
أنا شخصيا كانت وقائع واحداثيات القضية وكلام الشهود ..
بدوروا في راسي كأنك مشغل خلاط جو دماغي ..
في الحمام الموضوع مدور ..
قعدت أكل الموضوع مدور لدرجة ممكن عادي لما اقوم عشان اغسل ايدي أسال نفسي الأكلتو دا كان شنو!!
زوجتي تكلمني في شيء اشوف عيونا زاغن من الدهشة على ردي ..
عشان كدا ما كنت بطلع سائق براي لو عندي قضية بكتب في حكمها ..
لكن بعد تقتنع وتتوصل للإدانة أو البراءة تاني كان ختوك قدام مدفع ما بتتراجع ..
وتوقع عقوبة الإعدام وتمشي تحضر التنفيذ بقلب لا يداخله أدنى شك .
|
Post: #4
Title: Re: يا مولانا الملك ... قبل صدور الحكم اليوم
Author: جلالدونا
Date: 12-30-2019, 06:21 AM
Parent: #3
شكرا مولانا الملك على كريم تفضلكم بالرد
كدى بى رواقة كده نفكفك ردودك دى
مع تقييمى لها| Quote: الجريمة محل المحاكمة دي ما حدية بل توصيفها جريمة قتل |
اذن طال ما هى ما حدية ففى القانون الوضعي تقابلها عقوبة نصية واجبة التنفيذ
نجى للحتة دى| Quote: التوصيف الشرعي لعقوبة القتل هي القصاص |
و القصاص قد تدرأه الشبهة فى حد شرعي
اها ... يبقى الشبهة كمؤثر على الحكم قايم فى الحالتين ... الشرعية الالهية و الوضعية البشرية...ولها باب من ابواب تحرّى و اقامة العدل
اوضحت مشكورا الحالة النفسية التى يعيشها القاضى لحظة بحثه عن اصدار الحكم
بفتش فى الشبهة فى الحالة دى
و اثرها فى قناعته بى اصدار الحكم
|
Post: #5
Title: Re: يا مولانا الملك ... قبل صدور الحكم اليوم
Author: جلالدونا
Date: 12-30-2019, 11:26 AM
Parent: #4
طيب يا مولانا الملك
بعد الحكم بى اعدام 31 متهما و سجن اخرين
نسمع رايك فى الاجراءات
الحق الخاص و الحق العام
درجات التقاضى
لحين ضدور الحكم النهائي
كثقافة يعنى
كثقافة قضائية بس
لو سمحت
|
Post: #6
Title: Re: يا مولانا الملك ... قبل صدور الحكم اليوم
Author: جلالدونا
Date: 12-30-2019, 12:26 PM
Parent: #5
و يا ريت كمان تشوف لينا موقف الجانب التحريضي قانونيا فى ارتكاب الجريمة دى
و بيانات تضليل العدالة الصادرة من مواقع رسمية فى اجهزة الدولة
و موقف شهداء الزور برضو
يا مولانا الملك
بجرجرك فى الكلام لقناعة بى ان هذه القضية تؤسس لسابقة قضائية يهتدى بها
فى جرائم مماثلة مستقبلا
|
Post: #7
Title: Re: يا مولانا الملك ... قبل صدور الحكم اليوم
Author: محمد على طه الملك
Date: 12-30-2019, 12:47 PM
Parent: #5
مفهوم الحق الخاص والحق العام دا من مفاهيم الفقه الوضعي ..
في المفهوم الشرعي الديني جريمة القتل حق خاص لورثة القتيل ..
لهم بموجبه حق المطالبة بالقصاص أو طلب الدية أو العفو ..
التشريعات الوضعية لا تعتبر جريمة القتل العمد حقا خاصا فقط بل هو أيضا من الحقوق العامة لما لها من أثر مباشر على المجتمع ..
الحديث عن الأثر الاجتماعي طويل وفيه فلسفة كتيرة ..
لذلك لا تتوقف التشريعات الوضعية عند حد الحق الخاص ..
مثلا في الشريعة اذا قبلت الورثة بالدية فلا يحق تنفيذ اي عقوبة إضافية على الجاني بعد دفع الدية ..
حيث تسقط الدية أي عقوبة باعتبار أن دفعها تطهير لذمة الجاني ..
بل أكثر من ذلك عفو ورثة القتيل ايضا يقوم مقام الدية والقصاص وهذا ما أخذ به قانون العقوبات السوداني ..
المهم الكلام الاجتهادي في هذه الجوانب مؤلفات ..
مع ذلك قانون العقوبات السوداني الحالي أخذ بمبدأ الحق العام المعمول به في التشريعات الوضعية ..
مازجا بينها وبين الأحكام الشريعة ..
ونص على توقيع عقوبة السجن عند سقوط عقوبة القتل قصاصا لأي من الأسباب التي نص عليها القانون ..
شخصيا بالنسبة لوقائع الجريمة المرتكبة ضد المعلم لم اتابعها بدقة كما أسلفت ..
لذا لا أعرف التكيف الذي أخذت به المحكمة ..
ما إن كانت جريمة قتل أم جريمة ضد الإنسانية وفق احكام الفصل الثامن عشر من قانون العقوبات..
سؤالك عن درجات التقاضي فهى الدرجات العادية المكفولة في حالات الحكم بالاعدام .
|
Post: #8
Title: Re: يا مولانا الملك ... قبل صدور الحكم اليوم
Author: محمد على طه الملك
Date: 12-30-2019, 01:00 PM
Parent: #7
Quote: و يا ريت كمان تشوف لينا موقف الجانب التحريضي قانونيا فى ارتكاب الجريمة دى
و بيانات تضليل العدالة الصادرة من مواقع رسمية فى اجهزة الدولة
و موقف شهداء الزور برضو |
دي كلها تعتبر جرائم مدانة حسب قانون العقوبات السوداني إذا تم إثباتها ..
جريمة التحريض والاشتراك عقوباتهما قد تماثل عقوبة الفاعل ..
أما تضليل العدالة فهي جريمة قائمة بذاتها مفصله في قانون العقوبات ..
كفاية فكنى الله يرضى عليك..
تبسيط الكلام في الحاجات دي صعب شديد..
لما قد ينتج عنه من فهم خاطئ .
|
Post: #9
Title: Re: يا مولانا الملك ... قبل صدور الحكم اليوم
Author: جلالدونا
Date: 12-31-2019, 07:30 AM
Parent: #8
شكرا مولانا الملك للتوضيح الضافى
____
كنت متوقع احكام الاعدام على الاكثر تطول تلاتة متهمين عشان كده
كان الاستفسار عن حالة القاضى قبل صدور الحكم
اتاريهو بحر القانون ده واسع خلاص
و اهو الواحد عرف الفرق بين وصف التضليل القانوني و التحريض و الاشتراك
للمرة التانية شكرا مولانا الملك
|
Post: #10
Title: Re: يا مولانا الملك ... قبل صدور الحكم اليوم
Author: محمد على طه الملك
Date: 12-31-2019, 12:57 PM
Parent: #9
يا جلال الفرق بين الاشتراك والتحريض فرق تكييف للوقائع والبينات المعروضة أمام المحكمة ..
في كل الاحوال المحكمة بتكون ملزمة بمناقشة كل الفرضيات أثناء تكييفها ووزنها للبينات..
أرجح أن تعاد أوراق القضية إلي المحكمة إن صح ما لاحظته عند النطق..
لماذا ؟
دا الما بقدر اقولو.
|
Post: #11
Title: Re: يا مولانا الملك ... قبل صدور الحكم اليوم
Author: جلالدونا
Date: 01-01-2020, 06:44 AM
Parent: #10
بالتأكيد ترجيحك ليهو وزنو القانوي لانو قرايتك بالتأكيد فاحصة و عن علم
اما بالنسبة لى بتمنى الحاجات تمشى على كده لانو الادانة لا تشمل المدانين فقط
الادانة تدين الجهاز بكل منسوبيهو
و على كل من اجرم ان يتحسس رقبته
|
|