قالوا:

00:09 AM December, 22 2019

سودانيز اون لاين
النذير حجازي-رشموند ڤرجينيا، بلاد العم سام
مكتبتى
رابط مختصر

فكرة الپوست مسروقة من جيرانا سودان فور اول، وهي نقل المقولات المشاترة
وابن حلال يفتح الباب

Quote: (إذا كانت هنالك رغبة من الدعم السريع للإندماج في حزب الأمة فنحن جاهزون لذلك ومرحبون ونتمنى لهم مسيرة ناجحة في تحقيق أهدافهم). الصادق المهدي

يا النذير، لو عندك باقي علاقة مع حسن موسى دا، اتوسط لي يدوني حساب معاهم

فترت من ملل الكتابة مع الرجرجة

ينوبك ثواب

هاك ليها حارة من خشم سيدا

Quote: يا النذير، لو عندك باقي علاقة مع حسن موسى دا، اتوسط لي يدوني حساب معاهم فترت من ملل الكتابة مع الرجرجة ينوبك ثواب

سلام يا مستنير وجلال، وعودا حميدا يا يا أبو لمبة والمنبر نور والله
تعرف والله الأستاذة نجاة دي ظالمنها ساكت، ادخل الموقع بتاعهم وح تلقى إيميلها، رسل ليها إيميل معاهو مكان اقامتك وتلفونك وصورتك، في خمسة دقائق ح ترسل ليك العضوية، والله أنا ندمت إني شاكلتهم، ناس ظراف شديد

راسلتها ورسلت ليها أجمل صورة عندي
ببدلة وكرفتة نظام زول محترم
لكنها الظاهر متابعة كتاباتي هنا وخافت من المنافسة
فتجاهلتني

الحسد بين المبدعين قديم

قالوا عن الصهريج 😀

Quote: #حمدوك : هذا الصهريج يجب الإستفادة القصوي منه ومن مساحة السطوح أيضا .. ومن الظلام المحيط بالمكان حتي يتسني لنا الخروج من الأزمة #كباشي : لم نكن نقصد وضع هذا الصهريج في هذا السطوح بل في سطوح الجيران .. حدث خطأ وحدس ما حدس #حسين_خوجلي👳‍♀ : صهريجنا ماخد مساحة ال98%من السطوح يا الدقير .. وباكر دي بنكشح الموية الفيهو .. اكشحوا أبوها زاتو #الدقير : مولاي الصهريج الظهَري خُذني فأنا المشروب الشارب #منعم_سليمان : سنكشف لكم اليوم بالوثائق لم تم تغيير طلاء هذا الصهريج ولمصلحة من ومن هم الأفراد المتورطون في هذا الجرم ومن اللذي اتي لهم بالطلاء .. انتظرونا بعد قليل #صديق_يوسف : موقفنا واضح للجميع .. هذا الصهريج لم يلبي طموحات الشعب السوداني وبهذا نعلنُ عن وقف كل أشكال الشرب منه والعودة لصفوف الجماهير .. عاش نضال الشعب السوداني #الحلو : عمِلنا دائما لسودانٍ يسع الجميع ويستطيع فيه الصهريج ان يتمدد فوق السطوح وان يأخذ كامل حقوقه #تراجي : انتاااا يا صهريج يااااا تااااااافه يا حقير قايلني ما عارفة تاريخك؟؟؟؟ ملفاتك كلها عندي والبل البتعملو كل يوم بالليل والموية البتنقطها عارفاها نقطة نقطة يا وسخ يا كلب يا جزمة يا حقير .. قرف يقرفك #عرمان : نحن بالتأكيد مع وجود الصهريج فوق السطوح ولكن لن نسمح باقصاء باقي الصهاريج والسطوحات في السودان مع الإبقاء علي السطوح كضامنٍ للحقوق #بركة_ساكن : أسهل لصهريجٍ أن يلج فتحة التصريف من أن الموية ما تقطع يومي #اسعد_التاي : الصهريج زي الجيش زادوهو موية #جبريل : لابد ان نغير الصهريج من اجل المهمشين وقضاياهم ..مع مراعاة المهمشين وقضاياهم وقضايا المهمشين والمناطق المهمشة والمهمشين وقضاياهم المهمشة #الصادق_المهدي : انا القلت ليهم يخُتّوا الصهريج دا هنا .. ولعلمك اخي الكريم انا قدمت مبادرة تحت عنوان ازمة الصهاريج والسطوحات في مطلع العام ٧٦ .. وهلمجرا .. عموما المسألة عاوزة تأني وحكمة وبُعد نظر #البرهان : التحية للصهاريج الواقفة قنا والسطوحات والسانات #الميرغني : صهريج شنو وسطوح شنو؟ #مناوي : الصهريج ليس عدونا عدونا هو السطوح الذي سمح للصهريج بإستخدام اراضيه #حميدتي : ايّا سهريج .. ايّا سهريج ما يلتزم بسطوحو حنحاسبو بالغانووون يخوانا #عبدالواحد : نحن في حركة جيش تحرير السودان لا نعترف بالصهريج ولا بالسطوح زاتو *وهكذا هي السياسة والضياع للشعوب يلا بلاش دفاع عن أحزاب وسياسات فاشلة

...
..
.

Quote: #صديق_يوسف : موقفنا واضح للجميع .. هذا الصهريج لم يلبي طموحات الشعب السوداني وبهذا نعلنُ عن وقف كل أشكال الشرب منه والعودة لصفوف الجماهير .. عاش نضال الشعب السوداني

ثم بعد ساعة:
أداء الصهريج لا يعجبنا ولا يشبه الثورة رغم أننا قدمنا له النصح وسلمناه استراتيجية متكاملة للعمل, سنقدم توصية لرئيس الوزراء لإستبداله بصهريج آخر.

اهلا النذير

ماسأحكيه نقلاً عن اصدقاء لا يصبّ في مجرى البوست،

لكنه يوضّح إلى أي مدى يمكن للشتارة أن تحرِّف الكلام..
ِّ
يُقال ان مغنية شتراء غنّت كالآتي:

Quote: منديلي الكويتو وختّيتو في الدولاب

هههههههههه

شرح النكتة للثقيلات والثقلاء من القارئات والقرّاءء:
مفروض تقول:
"وفي الدولاب ختيتو"

هههههه

Quote: #تراجي : انتاااا يا صهريج يااااا تااااااافه يا حقير قايلني ما عارفة تاريخك؟؟؟؟ ملفاتك كلها عندي والبل البتعملو كل يوم بالليل والموية البتنقطها عارفاها نقطة نقطة يا وسخ يا كلب يا جزمة يا حقير .. قرف يقرفك

😁😁😁😁😁
🙈🙈🙈🙈
الله يجازي محنك يا ناصر

كسرة لحبيبنا ود البشرى: مالك قارش ملحة لعمنا صديق؟!
بالمناسبة الشيوعيين ديل رأيهم هو بشوفوا الجماهير شايتة وين وبشوتوا معاها، علشان كدا مافي زول بقدر يمسك عليهم حاجة

Quote: اهلا النذير ماسأحكيه نقلاً عن اصدقاء لا يصبّ في مجرى البوست، لكنه يوضّح إلى أي مدى يمكن للشتارة أن تحرِّف الكلام.. ِّ يُقال ان مغنية شتراء غنّت كالآتي: Quote: منديلي الكويتو وختّيتو في الدولاب هههههههههه شرح النكتة للثقيلات والثقلاء من القارئات والقرّاءء: مفروض تقول: "وفي الدولاب ختيتو" هههههه

😁😁😁😁
اهلا بحبيبنا الخواض، ودائما تسعدني زيارتك
عندنا واحد صاحبنا بقول:
كلام الطير جمب البنطون 😁😁
الناس تصححو وتقول ليهو ما بقولها كدا، بقولوا:
كلام الطير في الباقير
بقول لينا كدا غلط لأنو كلام الطير في الباقير فيهو سجع ونظم للكلام، لكن الشتارة عايزة جملة مشاترة زيها، زي البنطون كدا علشان تكون مافي أي علاقة وشتارة مائة في المائة 😁😁😁😁

Quote: راسلتها ورسلت ليها أجمل صورة عندي ببدلة وكرفتة نظام زول محترم لكنها الظاهر متابعة كتاباتي هنا وخافت من المنافسة فتجاهلتني الحسد بين المبدعين قديم

😁🙈😁🙈😁
بي كلامك دا يادوب رفضوك، لو كنت مكانك تراسها وتقول ليها ممكن أعرف سبب الرفض شنو؟!
غايتو أمريكا دي علمتنا الرسميات، أي رفض لازم تعرف السبب شنو؟!
وبالمناسبة أنا زاتي ح أراسلها، لو رفضتني ح أرسل ليها تاني أقول ليها ممكن أعرف سبب الرفض شنو؟!

Quote: راسلتها ورسلت ليها أجمل صورة عندي ببدلة وكرفتة نظام زول محترم لكنها الظاهر متابعة كتاباتي هنا وخافت من المنافسة فتجاهلتني الحسد بين المبدعين قديم

هههها غايتو بكوري بذكرني المرحوم سيجمان يختف و يخطرف!
الله يجازي محنك..
اليشوف كتاباتك يقول ما بتزعل أبدا لكن في جماعة كدا شايف بطلعوك من طورك..
طول بالك و قول
they go low, we go high

ساكون يالنذير حارسًا لهذا البوست ولو من باب رفعه.

هاكم دي عن العلاقة بين اللغات وبطلها الرئيس الفرنسي "ماكرون" نقلاً عن بي بي سي :

Quote: ارتكب الرئيس الفرنسي إيمانويل ماكرون غلطة بروتوكولية أدهشت جمهوره الأسترالي. وكان ماكرون في زيارة دبلوماسية لأستراليا يناقش قضايا من العيار الثقيل مثل تغير المناخ والدفاع. لكن لغة الرئيس الفرنسي خذلته في اللحظة التي كان يشكر فيها رئيس الوزراء الاسترالي مالكولم تيرنبول. وقال ماكرون "شكرا لك ولزوجتك الشهية على ترحيبك الحار، وعلى التنظيم المثالي لهذه الرحلة. شكراً لك وللوسي، شكراً جزيلاً لك، سيدي رئيس الوزراء"، ومن ثم تصافح الرجلان. وقد كان الرئيس الفرنسي يتحدث بالإنجليزية، لكن البعض ممن كانوا يشاهدون المؤتمر الصحفي ارتبكوا لدى سماعهم ما قاله ماكرون عن زوجة تيرنبول، ولم يستطيعوا حسم ما إذا كانوا قد سمعوه بشكل صحيح وإذا ما كان ماكرون قد ارتكب غلطة دبلوماسية وأهان قليلا زوجة تيرنبول. وبعد العودة للتسجيلات الخاصة بالمؤتمر الصحافي تأكد أن ماكرون كان قد أشار بالفعل إلى زوجة رئيس الوزراء لوسي هيوز تيرنبول، الحاصلة على وسام أستراليا ورئيسة لجنة سيدني الكبرى، على أنها "شهية". لكن الأمر ليس كما بدا عليه، فكلمة "ديليسيو" بالفرنسية والمقابلة لكلمة "ديليشس" بالإنكليزية، يجوز استخدامها للإشارة إلى وجبة طعام شهية، ولكنها تعني أيضا شخصا لطيفا جدا، وبذلك فيبدو أن اختيار ماكرون للكلمة التي تجسد المعنى الذي أراده لم تكن موفقة. غير أن الأمر مختلف بالنسبة للإنجليزية، فالكلمة يمكن استخدامها للإشارة إلى الطعام الشهي، ويمكن استخدامها للإشارة للأشخاص لكنها في هذه الحالة تحمل إيحاء جنسيا

نور المالكي رئيس الوزراء العراقي السابق ارسل تهنئة للشعب العراقي قال فيها:

Quote: أهنئكم بعيد الأضحى "المجيد" ؟؟؟

Quote: غير أن الأمر مختلف بالنسبة للإنجليزية، فالكلمة يمكن استخدامها للإشارة إلى الطعام الشهي، ويمكن استخدامها للإشارة للأشخاص لكنها في هذه الحالة تحمل إيحاء جنسي

😁🙈😁🙈😁🙈
دي لو كان قالها في دولة عربية كان راح فيها 🙈😁😁

وصف ماكرون للسيدة الاسترالية الاولى مثل ان تقول بالسوداني لسوداني آخر:
"احب ان اشكر زوجتك "اللذيذة"". .
ههههه

رسالة المالكي للعراقيين يا النذير مكونة من ١٠ كلمات وفيها ٤اخطاء،

عراقي في مواقع التواصل الاجتماعي علّق قائلا:

Quote: مواقع التواصل الاجتماعي تسخر من رسالة نوري المالكي رئيس الوزراء السابق حيث يرسل رسالة تهنئة بعيد الاضحى للشعب العراقي من 10 كلمات فيها 4 اخطاء كارثية حيث كتب: (أهنئكم بعيد الأضحى المجيد جعلة الله يوم خيرا وفتحا ونصر للعراقيين جميعا) الاخطاء هي ١. المسلمون يصفون الاضحى بالمبارك والسعيد و لا يسموه مجيد بل المسيح يسمون عيد الفصح المجيد . 2. يوم (خير) وليس يوم (خيرا) 3. فتح وليس (فتحا) 4. جعله وليس جعلة #جيبولنا_مصحح_لغوي

قالو بنحب قلنا ليهم مالو
وكل عاشق ومشاتر عقبالو

مع الإعتذار ل وردى طبعا

النذير والرهط الكرام

عوافى

برضو بعيد شويه ما كتير عن "سياغ" الموضوع

زى ما قال الخواض وزى ما قلت انت فى حكاية سجع ونظام كلام الطير فى البنطون

ناسنا يقولو ليك

الحسنه فى المنعول ... زى الشرا فى القندول

بداية الشتاره طبعا جات فى المنعول دى

الصفة دى جايه من النعلات ولا كيف يعنى ؟

هم طبعا قاصدين الملعون

وطبعا قافية المنعول جات نايمه نوم مع القندول

قميص عامر
هههه

رأيكم شنو نغيرها ونبقيها

الحسنه في الملعون ... زى الكوز في القانون

ههههههه
موافقين يا المطر ومنورين الپوست يا بوعمير والمطر

يا خواض، يظهر الرؤساء الفرنسيين كلهم شتر، شوف ساركوزي فاكر القهوة العربية في السعودية خمرة 🙈😁🙈😁

دي يا ابوذر والنذير زي "شعر الغزل " الحلمنتيشي، أي نهايته:

Quote: انتي في ُعلوْ وانا في حدارةْ حبّك رماني من الحمارةْ ليه يا ام قدارةْ مابترفعيني فوق الحمارةْ خليتيني اتلفّتْ زي الزّرزورْ

طفيتينى زى السجاره
وطبلتينى جوه السحاره
حرام عليك يا مكاره
والريده فيك خساره

خليتينى تحت الشمس مشرور


على ب الحرام دى مجارة ولا أحمد شوغى زات نفسو

هههههههه

Quote: على ب الحرام دى مجارة

حيجيك يا ابوذر "بهلول جهلول النجّار" يغالطك في مجاراتك ،

ويقول ليك دي ما "مجاراة"، انت قصدك تورينا نموذج الشعر الحلمنتيشي البليغ ......

ههههههههههه

المهم "الجاتك في مجاراتك سامحتك" ....

هو هو هو هو ....

مع الاعتذار للكلـ،،،،،،،،،...........اب الاوفياء...

ونواصل في "قالوا".....

خليهم يقولو
زى ما الناس يقولو

أو كما قال عبيد

لا والله بالجد دى فعلا مجاراة

للطرافه واللطافه وربما الهيافه
إنما القصد الظرافه

هههههه

Quote: خليهم يقولو زى ما الناس يقولو

الغالاطجي يا ابوذر، حيقول ليك :
البيت دا ما كدا..

كيف؟ تسأل الغالاطجي.

يقول:
خليهم يقولو
زي ما يقولو الناس

هههههه

مصطفى مدثر بحكمته الساخرة، له مقولة اسفيرية مشهورة تدول حول ان "الغلاط" هي السمة التي تميّز السودانيين...

بعدين يا ابوذر "مش الراجل بمسكوهو من لسانو"؟؟؟

الغالاطجي حيشوف ليهو مقصد تاني من "مجاراتك"،،،

وهذا بالضبط هو جوهر "المكاواة"....

المنابر السودنية كانت تفتقر لمنبر جاد 100%، و سودان فور أول ملأت هذا الفراغ. إذاً دعونا نستفيد من المواد الجادة هناك و النقاشات فى دروب السياسة و العلوم و الفنون و الاداب، و ندردش
فى المنابر التانية التى تتيح الدردشة العادية إضافة للمواد الجادة أيضا.

طيب يا النذير هاك دي من الاخطاء اللغوية الانجليزية:

Quote: كما وقعت وزيرة التعليم الأميركية، بيتسي ديفوس، في خطأ لغوي، لفت انتباه الصحف العالمية والشبكات الاجتماعية، إذ كتبت "تشرفت بحضور حفل التنصيب التاريخي (Historical)، ومراسم أداء اليمين للرئيس الـ 45 للولايات المتحدة"، في كانون الثاني الماضي. والخطأ برز في استعمال كلمة Historical التي تدل على أحداث مضت بدلاً من كلمة Historic أي الحدث التاريخي أو البالغ الأهمية.

أمّا "التغريدة الشهيرة" فلها قصة ،نحكيها غداً، ياالنذير..

يديكم العافية يا حبايبنا ابو الريش والخواض لإثراء الپوست، قطعاً يا خواض التغريدة ح تكون لترمپ، الزول دا أمي 🙈😁🙈

Quote: قطعاً يا خواض التغريدة ح تكون لترمپ، الزول دا أمي 🙈😁🙈

نعم يا النذير "قطعيتك" صحيحة.

ليس "قطعية" الحلاقة ههههه

سنعود إليها بالتفصيل ..

صحيفة المرصد:

حذف الرئيس الأميركي دونالد ترامب تغريدة الـ “covfefe ” ، بعد نحو ست ساعات عكف خلالها رواد مواقع التواصل الاجتماعي على محاولة تفسير الكلمة غير المفهومة.

وكان ترامب كتب في تغريدة في ساعة مبكرة من صباح اليوم :”رغم الـ /covfefe/ الصحفية السلبية”، في إشارة على ما يبدو إلى كلمة التغطية (coverage) الصحفية التي كثيرا ما يصفها ترامب بأنها تنشر “أخبارا زائفة”.

وقام ترامب قبل قليل بحذف التغريدة وكتب مازحا :”من يستطيع معرفة المعنى الحقيقي للـ /covfefe/؟؟؟ استمتِعوا”.

وانتشر وسم #covfefe، وأطلق رواد تويتر لخيالهم العنان لتفسير الأسباب الحقيقية للتغريدة.

صورة التغريدة مع تاريخها:

هههههههه
مبالغة يا الخواض، الزول دا أمي عديل كدا، قالوا بوقع وما بقرأ 🙈😁🙈

حنواصل يا صديقي النذير في "خد وهات" على طريقة كرة القدم حتى غيابي القادم من النت.

ودا أثر من آثار تلك التغريدة الترامبية "اكواب قهوة":

السخرية من شعار ترامب الانتخابي:

وعدتُ بحراسة البوست، مااستطعت إلىه سبيلاً..

وها أنذا اودّعه مرغماً، إلى حين..

الميكرفون للصديق النذير..

ترافقك السلامة يا حبيبنا الخواض، ومنتظرين كتابتك عن الخرطوم، مثل بوستك القديم: رأيتُ الخرطوم

آخر قطرة يا النذير عن ابنة ترامب:

Quote: إيفانكا تقع في الخطأ تاريخ النشر:24.11.2019 | 08:26 RT تعرضت إيفانكا ترامب، ابنة الرئيس الأمريكي دونالد ترامب، لانتقادات واسعة إثر نشرها لتغريدة غير دقيقة تناولت إجراءات عزل والدها. وكتبت إيفانكا: "من المحتمل أن يتسم تراجع الأخلاق العامة في الولايات المتحدة بإساءة استخدام سلطة المساءلة كوسيلة لسحق الخصوم السياسيين أو طردهم من مناصبهم"، مشيرة إلى أن التغريدة هي اقتباس من كلمات المؤرخ الفرنسي ألكسي دو توكفيل. ورد مؤرخون على تدوينتها بالقول: " ليست صحيحة، وهي اقتباس مزيف"، حيث تعود المقولة في الواقع لقاض أمريكي اسمه جون إينيس كلارك هير، من كتابه "القانون الدستوري الأمريكي - 1889". وأضاف المؤرخون أنه وبأخذ المقولة في سياقها الكامل، نجد أن كلارك هير كان يتحدث في الحقيقة عن ضرورة المساءلة والعزل، وفي هذه الحالة فإن استشهاد إيفانكا بمقولته لا يخدمها ولا والدها. يذكر أن إيفانكا كانت وصفت في وقت سابق إجراءات عزل والدها بـ "محاولة للانقلاب على نتائج الانتخابات".المصدر: "تويتر"

هههه‍هه
ابنة الوز عوامة يا خواض هههه