سلام ابو الأمير المترو ما بغطي كل المناطق حتى في مرحلته الأخيرة و مافي Park and Ride و لا حتى في ليموزين ولا كروة قريبة بالنسبة للسياح و الناس العاوزين يتمشو و يشوفو البلد هي فكرة جميلة غير كده لا بوصلك محل الشغل من بيتك ولا بجيبك لي بيتك من محل الشغل بالذات في الصيف
Post: #5 Title: Re: بقينا زى ناس امريكا واوربا بنتنقل بالمترو Author: بدر الدين الأمير Date: 12-22-2019, 06:43 PM Parent: #4
ياود الطيب لحدى الان التشغيل تجريبى وهناك محطات بها بصات زى محطة الوكرة وبصات صديقة للبيئة تعمل بالكهرباء انا الان متحرك بالمتور من مكتبة قطر الوطنية للسد وصلنا خلال ربع ساعة وبالسيارة كانت تاخد قريب ساعة قضينا اكثر من ساعتين فى المكتبة بدون هم السواقة والزحمة وانا بطبعى بكره السواقة جدا سنة ١٩٨٩م مشت العمرة بالسيارة ولسا مرعوب من فكرة انى سقت ١٨٠٠ كيلو ماشى وزيها راجع وناس السعودية تقول ليهم فلان وين يقولو ليك ساكن قريب بس مية وعشرة كيلو ودا ابعد مكان بنمشيهو فى قطر ومابتمشيهو براك مترو قطر عينى باردة بس افلام هوليوود والناس سمحين ونضاف على قول مصطفى سيد احمد لابسين هدوم العيد هههه وانا اليومين ديل شغال اكتشاف المترو والمحطات البمشيها اهل العوض هههه
Post: #6 Title: Re: بقينا زى ناس امريكا واوربا بنتنقل بالمترو Author: بدر الدين الأمير Date: 12-23-2019, 07:26 AM Parent: #5
على طريقة صلاح غريبة خبير الفيسبك انا بقيت خبير في مترو قطر الخط الاحمر الخط الاخضر الخط الذهبى والمحطات سبحان من سرى بى من خبير حواشات ومواسم زراعة الى خبير مترو هسى انا متحاوم بالمترو وصلنا مول قطر
Post: #7 Title: Re: بقينا زى ناس امريكا واوربا بنتنقل بالمترو Author: محمد نور عودو Date: 12-23-2019, 08:47 AM Parent: #5
سلامات الاخ بدرالدين الأمير وكل سنة انت والاسرة بالف خير المترو وسيلة نقل مريحة جدا داخل المدينة . يا اخي في زول قال لي المترو في دولة الإمارات ودولة قطر فيها محل خاص لناس VIPالكلام دا صحيح؟
Post: #8 Title: Re: بقينا زى ناس امريكا واوربا بنتنقل بالمترو Author: Mohd Ibrahim Date: 12-23-2019, 08:51 AM Parent: #7
اتجدع فيهو هسي لكن في الصيف مافي زول نصيح بهوب عليهو ..
Post: #11 Title: Re: بقينا زى ناس امريكا واوربا بنتنقل بالمترو Author: بدر الدين الأمير Date: 12-23-2019, 11:11 AM Parent: #8
ود ابراهيم مع انو ود ابراهيم دا اسم بجيب الدولارات انا ساكن فى السد وشركتنا فى بنى محمود وين ماتقبل محطة مترو امس المدام اتصلت قالت وينك قلت فى محطة المترو فى لحظة ديك حسيت نفسى انى مصطفى سعيد والخواجية الجمبى دى هى جين مورس تبادلنا الإبتسامات خمسة دقائق هى نزلت فى محطة مشيرب بعد شوية تانى المدام اتصلت قالت المشوار عشرة دقائق وليك ساعة ما وصلت قلت ركبت المترو الغلط
ود الأمير إذا صحي في مكان خاص لناس الvip يبقى ده عيب كبير ...في مترو نيويورك يوجد مكان مخصص للعجائز والناس العندهم إعاقة جسدية ، ..وحتى عمدة نيويورك ذات نفسه نلقاه واقف ونحن جالسات في الكراسي ، واذا في واحد حاول يقوم ويخليه يجلس مكانه تلقى العمدة يرفض بشدة ويقول ما ممكن اخد مكانك بدون وجه حق .... وبالمناسبة عمدة نيويورك بيحكم مدينة سكانها ١٢ مليون نسمة ، يعني اكثر من سكان جميع دول الخليج.... يا ربي متين نلحق ديمقراطية الناس ديل !!! لكن برضه ما بننكر مجهودات سمو الأمير تميم، حفظه الله ورعاه ، والذي يعمل بجد وجهد كي تكون دولة قطر من الأمم المتقدمة في كل المجالات...ويكفي أن الخطوط القطرية هي خطوط ذات خمس نجوم حتى الآن...ومن افخم خطوط الطيران في العالم ..
مقاعد الـ VIP تكون للمسافات البعيدة. على الاقل ساعتين.. فى الصين عندنا القطار السريع، يسافر ب 450 كيلومتر فى الساعة (نزلوها 380) و زارنا رجل أعمل أمريكى كان عنده شغل معاى,, قطعت تذاكر فى القطر دا درجة أولى.. و دى الكبينة فيها كرسيين فقط، و إنترنت و الكرسى الواحد من هنا لى هنووووك و فيه يد تنزلها يبقى سرير. و سفنجات تحت المقعد.. و الستاير و كله أبيض فى أبيض.. الجرسونة لما تجى تقعد فى الواطاة و تعاين ليك فوق و تهمس فى اضانك تقول ليك عاوز شنو.. الزول دا لغاية ما وصلنا ما قعد إلا دقايق.. مرة يمشى يمين يقول صورنى هنا.. و صورنى هنا.. قلت ليه رأيك شنو أحسن دا و اللا أيمتراك Amtrack ) القطر المشهور فى امريكا.. قال I am embarrassed أى محرج.
Post: #20 Title: Re: بقينا زى ناس امريكا واوربا بنتنقل بالمترو Author: بدر الدين الأمير Date: 12-24-2019, 08:10 AM Parent: #16
هل مساراته آمنة لا تتقاطع مع مشاة أو خط سير سيارات؟ وسرعته كم؟
أكيد فيه إرشادت صوتية مثل المحطة القادمة كذا، وعند التوقف هذه محطة كذا هل فقط باللغة العربية أم أيضا الإنجليزية.
سؤال آخر هل مسارات القطارات تمر بمحطات قريبة من تجمع الفنادق وتمر بالأسواق والمولات وأماكن الترفيه الليلى وإستادات كرة القدم (بغرض التجهيز لفعاليات كاس العالم 2022).
المترو كم عربية، وهل حسب حجم حركة الركاب بيزيد أو ينقص عدد العربات؟ وحاالياً ما طول فترة الإنتظار بالمحطة إنتظارا لوصول وركوب المترو، وهل ثابتة طوال اليوم أم تعتمد على حجم الحركة.
شنو الاسئلة الصعبة دي يا نادر ، هو اصلو ممتحن لجامعة هارفارد ..والله المدير العام القطري لهيئة مترو قطر ما ممكن يجاوب على أسئلتك دي ، خليك من ود الأمير....
يا نادر دى اسئلة شنو.. ما وكتها ياخ.. خلى ود الأمير يأخد عضة فى المترو شوية و يتفشى فى ناس أمريكا..
Post: #27 Title: Re: بقينا زى ناس امريكا واوربا بنتنقل بالمترو Author: بدر الدين الأمير Date: 12-25-2019, 01:58 AM Parent: #23
نادر الفضلى جنس حسادة عليك يعنى داير تفشلنى كخبير مترو بس انا لها ولكل سؤال تعسفى اولا مترو قطر معظم خطوط سيره تحت الارض ونادر تراهو فوق الارض وكل خطوطه اومساراته خاصه به يعنى لافى شارات ضوئية او توقف فى غير المحطة يوجد تنبيه للمحطات التى يسير فيها المترو وانت داخل المترو اوخارجه التنبيه مكتوب بالغتين العربية والانجليزية وبرضو منطوق بالغتين نعم كل الاستادات بتاعت كاس العالم يصلها المترو لذا كاس العالم فى قطر حايتميز بكون المشجعين يمكنهم حضور مباريتين فى نفس اليوم وهناك محطات بتنزلك جوة المولات الانتظار فى المحطة وحسب خبرتى الكبيرة هههه لايتجاوز العشرة دقايق
Post: #26 Title: Re: بقينا زى ناس امريكا واوربا بنتنقل بالمترو Author: بدر الدين الأمير Date: 12-25-2019, 01:31 AM Parent: #22
حامد ياود حامد وحامد تقولى شنو وتقلى منو كدى اكتب فى قوقل معبر شرق وشوف هذا المشروع بتاع النقل البحرى على جرف الخليج بالدوحة على فكرة كلمة الدوحة لاتعنى الشجرة الظليلة بل تعنى قوس المياه أى دوح
Post: #28 Title: Re: بقينا زى ناس امريكا واوربا بنتنقل بالمترو Author: بدر الدين الأمير Date: 12-25-2019, 02:02 AM Parent: #26
الأحباب امتثال وابو الريش اتمنى ان اكون نجحت فى امتحان نادر الفضلى
ما اظنك ذاكرت كويس يا ود الامير ،،،قليل من الاجتهاد وكنت حتجيب النمرة الكاملة ١٠ من ١٠ ،، ولكن برضك نجحت بنسبة ٧ من ١٠ ،،لانك ما جاوبت على سؤال مهم وهو كم عربية في المترو !؟
لا لا يا بدر كدا أمريكا رفعت الراية البيضاء و مبروك المركز الأول.. بس حكاية الكمسارى الفى جوة القطر دى خربت ليكم القصة كلها. الكمسارى نزلكم لمستوى Amtrak
يشيلو الكمسارى قوام قوام... شين خلاص خصوصا هم يستعدون لتهيئة البلد للسياحة و كاس العالم جايى.. المترو أساسا مزروب، و لو هم عاوزين يتأكدوا راكب التذكرة العادية لا يتحول للذهبية فممكن يكون كمسارى (ذكى) بدل الكمسارى البشرى. و لو عاوزين مساعدة قولوا لينا عووك.
و إلا بعد الضحك حنقول بقى عليكم المثل: العرجا لمراحها.. أو القلم لا يزيل بلم.
Post: #38 Title: Re: بقينا زى ناس امريكا واوربا بنتنقل بالمترو Author: بدر الدين الأمير Date: 12-25-2019, 07:24 AM Parent: #37
ياحاسدين مترونا نحن لسا فى مرحلة التجريب ومال انا كيف بقيت خبير مترو
Post: #39 Title: Re: بقينا زى ناس امريكا واوربا بنتنقل بالمترو Author: محمد مجيدو Date: 12-25-2019, 07:32 AM Parent: #1
يا برنس ...
شوف مترو القاهرة ..... بتذكرة واحدة تركب اكثر من خط داخل النفق .. تقول لي كمساري ؟؟؟
لا يا ابو الريش انا عندي كريديت كارد وفي محلات كتيرة وخاصة محلات البنزين وعندما تدخل الكرت في الماكينة يسألوا عن الباسورد ..لكن فقط في حالة ال Tap ما في باسورد .... بعد شوية يا ود قباني ناس قطر ديل حيفوتوا أمريكا والصين في الاستخدامات التكنلوجيا وخاصة إذا سار أميرهم الهمام بنفس الهمة والجهد نحو الازدهار والنمو رغم الحصار الجائر...
دى يا إمتثال تعتمد على ال mode بتاعة المكنة.. ال default مرات تكون ديبت، و فى الحالى دى يسالك من الباسوورد. لو أخترتى كريدت كارد أو ضربتى Enter ساكت برضو يمشى. أنا مرات كتيرة أكون زهجان و ما داير أطقطق الباسوورد فى Rite Aid بس أول للبت خليه كريدت، و أدفع بالديبت عادى بدون باسوورد.
Quote: نادر الفضلى جنس حسادة عليك يعنى داير تفشلنى كخبير مترو بس انا لها ولكل سؤال تعسفى اولا مترو قطر معظم خطوط سيره تحت الارض ونادر تراهو فوق الارض وكل خطوطه اومساراته خاصه به يعنى لافى شارات ضوئية او توقف فى غير المحطة يوجد تنبيه للمحطات التى يسير فيها المترو وانت داخل المترو اوخارجه التنبيه مكتوب بالغتين العربية والانجليزية وبرضو منطوق بالغتين نعم كل الاستادات بتاعت كاس العالم يصلها المترو لذا كاس العالم فى قطر حايتميز بكون المشجعين يمكنهم حضور مباريتين فى نفس اليوم وهناك محطات بتنزلك جوة المولات الانتظار فى المحطة وحسب خبرتى الكبيرة هههه لايتجاوز العشرة دقايق
الخبير بدر .. أبدا ما القصد تفشيلك، لكن أسئلة أراها مشروعة لتقييم المشروع وشكرا على الإيجابات وأهو إمتثال وأبو الريش أدوك العلامة الكاملة.
عن السلامة بإعتبار ترماى أمدرمان الذى تم إيقافة بسبب حوادث أليمة ومثلة ما يحدث فى ترمايات بلاد أخرى.
الفيديو الأنزله أبور الريش مفيد وفيه توضيح إجابة لبعض الأسئلة مثل إستخدام لغتين للتنبيه ،والمسار الآمن المعزول، والقناة تحت الأرض بالمدينة وكذلك الكبارى العللوية (ألشاهقة) مخيفة فى حالى تعطل عندها. أيضا لاحظت وجود مسارين للمترو رايح جاى (أرجو تأكيد ذلك) أعتقد أن المترو يعمل بالطاقة الكهربائية.
كما أن الخواجة بالفيديو أيضاً أيد حدسى بأن مشروع المترو يمر بالإستادات وهو من ضمن مشروع البنية التحتية إستعداداً لكاس العالم 2022 أحد الشبان تجاذب معهم الحديث، الشاب قال أنه ركب من محطة أو منطقة إسمها نجمة قرب من (كراون بلازا) ، وأعتقد هذا إسم هوتيل، فأإلى حد ما أجاب عى سؤالى عن مرور المترو قرب تجمعات الفنادق (دا سؤال أصبح مهم بعد تأكيد المشروع عشان كاس العالم 2022)
الشى الإستغربت ليه أنه بالمترو ظهر كمسارى بيفتش على التذاكر والخواجة مد له كرتين التانى قال له بتاع زوجتى وأشار بيده نحوها وهى لم تظهر فى الفيديو طوال تجواله ولا بالمترو!! الزول دا خواجة أم عربى قطرى ؟! لو خوايجة يبدو تأثر بثقافة قطر وفى حتة المترو قد يكون الحريم لهم جناح خاص، وقد ظهر حاجز شفاف مزخرف لتغبيش الرؤية خلفه مقاعد وناس قاعدة. بس كمسارى أو مفتش بالمترو دى أعتقد ما عندها لزوم ما دام فى نظام إلكترونى للدخول والخروج من المحطة، وكمان السعر واحد (2 ريال). الخواجة عند دخول المحطة و مع الكمسارى إستخدم (كرت ملون) وليس التذكرة الورقية البيضاء، ويبدو هنالك (أبونيه).
دا كله كوم والنظافة واللمعان كوم تانى ما فى أى غرة أو تراباية حايمة ليس فقط داخل المبانى والمترو، ولكن حتى فى اللقطات بالمناطق المفتوحة بالمدينة .. فى لقطة ظهرت فيها رملة متعمد وضعها حولها أرصفة نظيفة لم تجرؤ حبة رمله على الإنتقال إليها! .. عايتو زمان الخرطوم كانت بتلمع ..
Post: #50 Title: Re: بقينا زى ناس امريكا واوربا بنتنقل بالمترو Author: Mohammed Alhasan Mohammed Date: 12-26-2019, 05:30 AM Parent: #41
Quote: وهناك محطات بتنزلك جوة المولات الانتظار فى المحطة وحسب خبرتى الكبيرة هههه لايتجاوز العشرة دقايق
بعد اذن السيد الخبير ..
الانتظار للقطار حال وصولك للرصيف لايتجاوز ال 4 دقائق ..حتى ياتيك قطار ....وفى وبعض المحطات التى يمر بها قطارين مختلفين لاتتعدى 2 دقيقة ..
الكمسارى او الكمسارية الراقية ..لاتراه الانادرا ..واحيانا مهمته/ا تكون تنبيه العزابة الانتقال الى من مقصورة العائلات الى المقصورات الاخرى
توجد وبلا شك مقاعد مخصصة لكبار السن وذوى الاحتياجات الخاصة كما توجد مصاعد مخصصة لهم
توجد ايضا منطقة lمخصصة لوضع الشنط يعنى المسافرين ممكن عادى يستقلو المترو للمطار ..
مترو لينك خدمة مجانية لنقل الركاب من والى المحطات عبر حاافلات حديثة ....
عدد عربات المترو 3 عربات 2 اقتصادية وثالثة عائلات او vip
1. من يحدد من هو الشخصية الهامة VIP؟ 2. وقد عرفنا تذكرة الشعب 2 ريال، كم تذكرة ال VIP؟ 3. هل توجد تذاكر شهرية؟
Post: #52 Title: Re: بقينا زى ناس امريكا واوربا بنتنقل بالمترو Author: بدر الدين الأمير Date: 12-26-2019, 06:35 AM Parent: #51
ياناس اوربا وامريكا ياخى شوية علينا نعم نحن برالما بس ماتحقور بينا بنستفيد من ملاحظاتكم وتوجيهاتكم هسى انا وانا الخبير ماناقش اى حاجة من كلام قبانى وامتثال وابوريش والفضلى وعلى فكرة يابو الريش نقلت ملاحظاتكم اول باول للاخ الصديق عبدالعزيز السليطى ريس مجلس ادارة شركة اوكسينت وهو احد المسؤلين الاداريين للريل والريل هو الاسم الرسمى لشركة مترو قطر
بس المجهجهنى انو الاخ محمد الحسن طلع اخبر منى بالمترو شكلو من طرف نادر الفضلى وعلى فكرة امير ولدى ذو الاربعة سنوات ونصف خبير مترو وبعرف الاجراءات امس ورانى التذكرة بختوها وين عشان البوابة تفتح انا نظرى كويس بس كنت ناسى نظارة القراية في البيت
سلام للجميع (عدد عربات المترو 3 عربات 2 اقتصادية وثالثة عائلات او vip) المترو والبصات الداخلية والترام هي وسايل نقل عامة داخل المدن ومعظم مستخدمي المترو والبصات والترام داخل المدينة هم البسطاء والعمال وكبار السن والاسر برفقة الأطفال لذلك تجد في أوروبا وأمريكا وكندا وفي مصر والجزائر لا يوجد عربات ViP أو عربات مخصصة لعائلات أو شخصيات بعينها بل هناك مقاعد واولوية لأصحاب زو الاحتياجات الخاصة وكبار السن ومرافقيهم والنساء الحمل . انا في تقديري تخصيص مكان في المترو ل VIP أو اماكن درجة اولي لبعض الناس شئ غير جميل في المواصلات العامة
من الفيديو ماكينة قطع التذاكر كل المعلومات بالشاشة بلغة واحدة الإنجليزية وهنالك أربع خيارات لأختيار واحدة منها one Journey رحلة واحدة Day Pass باص ليوم واحد New Travel Card بطاقة (كرت) ترحال جديدة Top Up Travel Card شحن بطاقة ترحال (إعادة شحنها)
عند الإختيار ينتقل لخيارين : Standard أساسى Golden Club ذهبى وكل منهما لدية خيار Adult أو Child يعنى 2 ريال تسعير كبار، أطفال قد تكون 1 ريال
باص ليوم واحد قد يكون أقل تكلفة لأنه يتيح إستخدام المترو متنقلا من واحد لآخر ورايج جاى خلال يوم واحد
بطاقة الترحال ياهو دا الأأبونى وقد تكون خياراته شحنها بتكلفة أيام، إسبوع، شهر .. مفيد لتنقل الموظفين اليومى رايح جاى وتبقى المقارنة بينها وين إستخدام السيارة وتكلفة البنزين الشهرية وإعتارات الزمن والراحة.
هذا يقود لسؤال هل المحطات خاصة فى الأطراف بها مواقف مساحتها كبيرة للسيارات .. ليستخدمها ركاب المترو. فى تقريش سياراتهم (يثلوا من منازلهم بالسيارات للمحطة)
وأيضا لفعالية المترو كخدمة مواصلات عامة، لإكمال المشوار المحلى أو حتى للوصول لمحطة المترو هل توجد خدمة ممتازة لبصات تغطى المنطقة المحلية وبمواعيد منسقة مع مواعيد المترو؟ كدا بيكون المشروع متكامل.
ويا بدر أمريكا خشم بيوت مدن محددة بها خدمة المترو .. لأن أمريكا مسيطرة عليها الرأسمالية ومضانع العربات فرضت اأسلوب الحياة اى شخص العربية من الضروريات والطرق السريعة متوفرة وحتى فى المدن الكبيرة فالمترو لا يغطى كل المناطق المنتشرة
(إستمتع بالبحث) .. حولناك لخبير وباحث فى شئون مترو قطر.
Post: #57 Title: Re: بقينا زى ناس امريكا واوربا بنتنقل بالمترو Author: بدر الدين الأمير Date: 12-26-2019, 07:20 PM Parent: #56
نادر الفضلى كدى هون علينا يا اخ العرب نحن فى دولة قطر اقصى جهة ممكن تمش ليها بالسيارة لاتزيد عن ١١٤ كيلو متر ولليوم تعداد سكان دولة قطر لم يصل الثلاثة مليون نسمة ومن المتوقع ان يزور دولة قطر خلال كاس العالم ٢٠٢٢ حوالى اربعة مليون زاير وخلينا من خبيرك الرسلتو منافس لخبراتى الموجعنى خضر الطيب شايل حالى كونى نسيت نظارة القراية فى البيت وهو عندو سبعة نظارات واحدة للسواقة وتانية للقراية وتلتا للكتابة ورابعة للكمبيوتر وخامسة للتلفزيون وسادسة للمشى فى الكرنيش عشان الكلسترول وكدا وسابعة لفرز الالوان
نادر الفضلي تعليق أوسكار.. وفعلا زي ما قلت أمريكا خشم بيوت...الا مدينة نيويورك، عاصمة العالم فإن المترو يغطي كل شبر من مساحة مدينة نيويورك ، ناهيك عن البصات الكثيرة العدد، التي تمر في محطاتها كل ٥ دقائق...قرأت مرة في مجلة أن أكبر وأوسع خطوط مترو في العالم توجد في ٤ مدن في العالم وهي موسكو، ونيويورك ، وطوكيو ، ولندن ، وأن ارخص مواصلات في العالم في نيويورك ... وحتى الناس الساكنين في أطراف مدينة نيويورك، يمكنهم إيقاف سياراتهم في مواقف سيارات واسعة ومجانا ويركبوا القطارات لمسافة بسيطة، حوالي ٦ او ٨ كيلومتر ، ومن هناك يجدون محطات المترو في حدود المدينة ، كي يصلوا مكان عملهم.... ...يا ترى كم محطة مترو داخل مدينة نيويورك ...جاياكم بمهلة بعد الفراغ من التسوق ،، اليوم الاسعار في الواطة ..وكان السلع مجان ....نشوفكم المساء ان شاء الله ..
Post: #60 Title: Re: بقينا زى ناس امريكا واوربا بنتنقل بالمترو Author: بدر الدين الأمير Date: 12-26-2019, 08:23 PM Parent: #58
نادر الفضلى وأمتثال ومعكم ابوريش مع انكم اصحابى ليش مادايرين تدعمونى اوترشحونى كاخبير فى مترو قطر ضحكتو فينى نجمة وامير وقالو لى انت مابتعرف مترو نحن البنسوقك للمترو دى اخرتها
توجد ٤٦٩ محطة قطارات انفاق في مدينة نيويورك، ، ،،وهذا سوف يتجول بنا في احدث الخطوط التي تم افتتاحها فقط قبل عامين تقريبا....
Post: #63 Title: Re: بقينا زى ناس امريكا واوربا بنتنقل بالمترو Author: adil amin Date: 12-27-2019, 09:57 AM Parent: #62
شوف المترو زمن الجداد غمت في الخرطوم النظيفة يا مدنايوو
https://up.top4top.net/ جاي تقشر لينا بي مترو الدوحة 2020
Post: #64 Title: Re: بقينا زى ناس امريكا واوربا بنتنقل بالمترو Author: بدر الدين الأمير Date: 12-27-2019, 10:07 AM Parent: #63
ووصل عادل الحوثى كاره الفرح والافراح اناياعادل لولا حبى لزاريا كان وريتك المكشن بلا بصلة على عبدالوهاب ماتجينى وتطلب منى الترجمة امش اسال قوقل عن الكشن بلا بصلة
Quote: ووصل عادل الحوثى كاره الفرح والافراح اناياعادل لولا حبى لزاريا كان وريتك المكشن بلا بصلة على عبدالوهاب ماتجينى وتطلب منى الترجمة امش اسال قوقل عن الكشن بلا بصلة
هسة مالك جبت ليك مترو الخرطوم زمن التوب الاسمو محمد نجيب المزعلك شنو وسلامي لي ناس الدوحة وانا حبيتي ضحي في سنغافورة
لا ..دي والحالة انا استخدمت الأسلحة القديمة زي البنادق الخرطوش ،،لاني لو نزلت الصور والفيديوهات الاخدتها بالجوال عن مترو أنفاق نيويورك ،،يا دوب بكون استخدمت القنابل الذرية والقضاء قضاءا مبرما على امال واحلام ود الأمير ومواطني قطر بالوصول إلى تقنيات مترو نيويورك ....اسهل وارخص مواصلات في العالم... في احدي المرات زرت لندن وركبت الunderground ....ولقبتو أغلى مواصلات في العالم ...لأنهم مقسمين المدينة إلى زوناتzone..وكل زون عنده قيمة ...يعني اذا قطعت تذكرة، ودخلت المحطة لازم تحتفظ بالتذكرة لغاية ما تطلع من المحطة عند وصولك لأنك لازم تدخل التذكرة في ماكينة بوابة الخروج كي تخرج...واذا فت حد الزون ..ما بتقدر تطلع لأنك لازم تدفع غرامة ... ..والحاجة المضحكة اول يوم نزلنا من الفندق وسألنا بريطاني أمام الفندق أين نجد أقرب subway ,,فنظر الينا باستغراب وقال ما بيعرف الsubway....وبعد جهد جهيد وجدنا المحطة ووجدنا مكتوب عليه underground ....وبالطبع كنا بنفتش كيف نصل السوق الشعبي بتاع الإنجليز..وفيه الثياب السودانية الفاخرة واظن اسم السوق شبردبوش ...اذا ما غيروا الإسم....
ده بقى تسألي منه عجايز المنبر و ( شاباته الكبار ) هههه
يا ربي منو هنا بكون بعرفه :).
Post: #72 Title: Re: بقينا زى ناس امريكا واوربا بنتنقل بالمترو Author: بدر الدين الأمير Date: 12-29-2019, 05:55 AM Parent: #71
امتثال انت مابتعرفى عبدالصمد القرشى للعطور مالك دايرنى اصنفك مع الحوثى الشرير عادل امين والاجنبى دينق ودنق العروبى وعلى عبدالوهاب الرطانى والمطرطش عزام فرح خليك مع الزمن ياريس هههه
Quote: برينسات فتوار - العمارة أرخص منهابكتييييييير
دى كم ميل يا هندسة؟ ما أظن أرخص.. يعنى من كونى أيلاند لحد شارع 245 فى البرونكس.. ب 3 دولار فقط.. و لو غلطت فى العنون و حبيت ترجع ما تدفع و لا مليم.. تركب القطر الراجع بس. أكتر من كدا: من شارع 245 نهاية البرونكس و حتى مطار كندى برضو 3 دولار.. (ما عارف القطر رقم 1 لسة يصل المطار ام لا) و ما بين ذلك تغير القطارات اليوم كله 24 ساعة زى ما عاوز و لا تدفع اى شئ زيادة. بس ما تطلع برة السيستم.
