بخصوص مشاكل السيكيوريتي في الموقع الالكتروني للجنة التحقيق في فض الاعتصام

05:21 AM December, 21 2019

سودانيز اون لاين
أحمد محمد عمر-
مكتبتى
رابط مختصر

من أمس الفيسبوك مدور في موقع لجنة فض الاعتصام اللي عملوهو لتلقى الشكاوى والشهادات
لكن قبل ما نتكلم عن مشاكل السيكيوريتي الخطيرة دي في موضوع هاميني شديد داير اطرحو الأول

قسم الجراحة في مستشفى مدني مزدحم والغرف مليانة فبيضطروا يختوا سراير شبه ملصقة مع بعض في البرندات للمرضى في وجود كمية من البعض والذباب والمريض البطنه مفتوحة دة ممكن تصيبه أي عدوى خطيرة من مريض مجاور ومن سريره دة على المقابر
وطبعاً دة مخالف لمعايير السلامة الصحية العالمية
ممكن الناس فكرة عن التطبيب في جو صحي من مستشفى جون هوبكنز الامريكي
ولأجل سلامة المواطنين نطالب وزارة الصحة الولائية والاتحادية بإغلاق مستشفى مدني فوراً وإيقاف هذه الكارثة الصحية إلى حين تمكنها من عمل مستشفى بإمكانيات جون هوبكنز



طيب وعلاج العيانين؟

عند أم حنين

الواحد تلقاهو عايش في البلاد الجليدية البقدر يشتري فيها شهادة SSL في ثانيتين ويجي يقول ليك الموقع غير آمن ومفروض يعملوهو HTTPS بي شهادة SSL!
انت قايل ماري انطوانيت لمن قالت الشعب الجيعان دة ماا ياكل باسطة! كانت غلطانة؟
أبداً كانت زيك كدة ما عارفة إنه الشعب ما عندو باسطة

إس إس إل في عينك وانت ما عارف السودان محاصر وممنوع من استخدام شهادات السيكيوريتي



.

السادة منظراتية الآي تي بتاعين الويكيبديا وقوقل
وحتى المحترفين البستخدموا برمجيات البنتريشن في التشييك على سرية المواقع الحكومية
ما لم يتم رفع السودان عن قائمة الدول الراعية للإرهاب حتظل كل مواقعنا الرسمية غير آمنة


دة سودانا عامل كدة
ما عندنا أي حاجة مطابقة للمعايير العالمية
تحبوا نقفله ونأجره لشركة تشطبوا لينا ديلوكس وتخلص حقها في 30 سنة حتى بعد داك نجي نستلمو؟!

هههههه
برّاحة عليهم ياخ, التحقيق دا بهم الناس كلّها و قلبهم على شفافيته و أمن الشهود, القلقانين على أمن الموقع عارفين الكيزان و غيرهم عندهم امكانيّات يخترقوه ويعملوا مشاكل
طيب ما ممكن تتم استضافة الموقع و تأمينه في سيرفر دولة تانية ما عندها مشاكل, إن شا الله أمريكا زاتها

اذا كان في لسه خوف من جهاز الأمن وانه ممكن يعتقل الشهود يبقى الثورة دي لسه ما نجحت
ولا كيف؟

Quote: طيب ما ممكن تتم استضافة الموقع و تأمينه في سيرفر دولة تانية ما عندها مشاكل, إن شا الله أمريكا زاتها

كدة يادااااااب كشحت بياناتك في السهلة :)
مافي موقع حكومي امتداده gov بيتم استضافته في سيرفر خارجي
السيرفر الحكومي لازم يكون موجود فيزيائياً كدة قدام عينك
لأنه انت ما عندك أي كنترول علي السيرفر الخارجي ولا بتشوف الجهاز بي عينك
يعني حتى لو موقعك آمن ممكن يتم اختراق السيرفر عبر موقع تاني غير آمن
وبالمناسبة شهادة SSL الداقين فيها جرس دي لا تحمي من الهكر .. والله صحي
دي بتشفر البيانات بين المتصفح بتاع المستخدم والسيرفر يعني لو اعترضها زول في النص ما بفهمها .. وبس
لكن بتتبل عادي بي باقي طرق التهكير
يبقى لو مشيت برة بتقفل الشباك المكسور لكن بتفتح باقي أبوابك كلها على الشارع :)

Quote: عارفين الكيزان و غيرهم عندهم امكانيّات يخترقوه

ما عندهم التكتح .. والله صحي :)
انت عارف إنه التعيين في سوداتل بتم بشهادة عمليات .. صاح؟
يعني كوز وفي الكيزان مجاهد ولا عندك واسطة من كبار الكيزان
ناس سوداتل ديل يا سيدي جابوا سيرفر ضخم قبل أكتر 10 سنوات سعر الجهاز براهو مليون دولار
السيرفر دة مفروض يشيل كل المواقع السودانية عشان تتحل مشكلة الحظر الامريكي وبرضو يكون دخل للشركة ومن ثم للدولة
اتعملت ليه غرفة عمليات من خبراء سوداتل للإشراف على تشغيله
عارف السيرفر دة شال كم موقع خلال العشرة سنين دي؟ زيرو موقع .. والله جد
بل حتى الويب سايت بتاع السيرفر نفسه المتاح للمشتركين واقع
ماااااا بعرفوا يا محمد ما بعرفو أي حاجة واعتمادهم كلو على شركات خارجية

صاحبي شغال في برج الاتصالات
مشى مؤتمر مهم برة ومعاهو زملاءه وأنا أشيل وأوصي فيه إنه يختني في الصورة ويرسل الاسلايد البتتعرض في المؤتمر ولو في مجال نعمل اتصال صوتي اسمع بيه خبير معين كدي في المؤتمر
بعد يومين من سفره راسلته بالواتساب وقلت ليه يا عمك رسل لي صور من فعاليات المؤتمر
رسل لي صوره هو وزملاؤه بالبرمودات في البحر حوالينهم الحور الحسان وكتب لي تحت الصور (مؤتمر بتاع فنيلتك! )

Quote: اذا كان في لسه خوف من جهاز الأمن وانه ممكن يعتقل الشهود يبقى الثورة دي لسه ما نجحت

كل ما يجينا شك في إنه النظام القديم قاعد قحت تتحفنا بي لقطة ترجع الأمل
بقال فك إشاعة استقالة حمدوك بالليل صباحيتها طوالي طلع قانون بل المؤتمر الوطني :)
عدى ليه اسبوع فك إشاعة إلغاء المحكمة الدستورية للوثيقة الانتقالية تاني يوم عينوا محمد ضياء مسؤول من شركة المواصلات وقال خطبته العصماء ديك :)

يا عمك مافي خوف الناس دي محكومة من برة وأي فرفرة بلقوا روحهم في المحكمة الجنائية

Quote: قلبهم على شفافيته و أمن الشهود

أقسم بالله لولا إنه شفت دق الجرس دة عند مناضلين معروفين كنت قلت عليه شغل جداد
ياخي شنو ما فيه https وبتاع!
هو البنوك ما فيها شهادة سرية! خايفين على فيديوهات وتسجيلات صوتية!
دة غير إنه في شهود كتار ظهروا بي وجوههم وحكوا الحاصل في فض الاعتصام شفت واحد فيهم اتهبش!

لو أي واحد فيكم هسع دي فتح موقع التقديم الالكتروني للحج ودخل أي رقم وطني بتجيهو كووووووول بيانات المواطن وتلفونه وصورته الشخصية
بس تدخل رقم من طرف
الكلام ما محتاج خبير بتاع آي تي عشان يكتشف إنه العملية دي مخالفة لأبسط قواعد الخصوصية والسرية
طيب لو جينا نقيم الموقع هل خدم الناس ولا لأ؟ الشاف فيكم صفوف أعمامك الكبار واقفين من صلاة الصبح للتقديم قطع شك بشوف الموضوع دة نقلة كبيرة ريحت الناس من المساسقة والسماسرة والرشاوى
طيب البيانات المكشحة دي في زول استفاد منها؟ يطرشنا ويعمي جيرانا

لو جينا نحل المشكلة دي معناها نعمل رسالة تأكيد بالتلفون تصل لصاحب الرقم الوطني موش؟
أبششششركم مافي أي تكامل بين أنظمة الاتصالات والسجل المدني
يعني لو غيرت رقم تلفونك إلا تمشي تااااااني تطلع رقم وطني جديد لأنه التعديل فيه مشكلة والله صحي :)
ياخي تكامل شركات شنو؟ لو مشيت دفعت ضرائب المغتربين في مدني وجيت السنة الجاية تدفعها الخرطوم بتمشي لي جهاز كمبيوتر اسمه الولايات يعملوا ليك برنت اوت من معاملتك وترجع بيها لموظف الخرطوم عشان يدخلها يدوياً .. يعني تكامل جوة المؤسسة الواحدة ذاتو بباح

فالفكرة يا عالم إنه أي نفاج بتاع تكنلوجيا نستفيد منه وما نطالب بي شغل بروبر نحن بعيديييييين شديد ياخ لسة بدري علينا

الفكرة يا أحمد مش انو نتحمي الموقع من اختراق الدولة الاجنبية بل تحمي شخصيات الشهود و معلوماتهم من كشفها داخليا مما ربما يعرضهم لتهديد او انتقام أو حتى احراج ساي
اها لخصوصية موضوع فض الاعتصام دا و هو حدث واحد فاعتبر ان التحقيق كان دولي مثلا! اكيد سيكون الموقع على سيرفر محمي خارج السودان


بالنسبة لكلامك الاخير عن الشغل البروبر, تعرف عندما بدت سوداتل و موبيتل كانوا الاحدث عربيا و أفريقيا وأن خدمة الجيل التالت انطلقت في الخرطوم قبل ان تكمل اتصالات الاماراتية تغطية الدولة بها! وان شبكة الفايبر النفذتها كنار في السودان احدى اول الشبكات الاستوفت معايير الكيبل البحري العالمي قبل ان تستوفيه بعض دول الخليج!
الفكرة شنو انو في تكنولوجيا الاتصالات و البيانات ما محتاج وما مفروض تبدأ من الصفر, وأن الاجيال الاحدث اقل تكلفة في بنيتها التحتية من الاجيال الاسبق (عدا الجي 5 ولفترة مؤقتة)
طبعا الحظر الامريكي لاعب دور لكن كمان مع العالم المفتوح و توفر البدائل و سيطرة هواوي الصينية على السوق مافي عذر لعمل غير مكتمل و اعذار زي الشبكة وقعت وغيرها
القصة اشرت ليها انت في مثالك الضربته عن ناس برج الاتصالات, القصة في عدم الكفاءة في كل شي و غياب الارادة لعمل شيئ جيد و متقن وللصالح العام, اذا هم كل المخططين واصحاب القرار كان في محصور في حقنا وين لا تتنظر منهم انجاز اي شي بصورة سليمة

Quote: من أمس الفيسبوك مدور في موقع لجنة فض الاعتصام اللي عملوهو لتلقى الشكاوى والشهادات

سلامات يا احمد محمد ..
أنا ما عندي شغلة ولا فهم بشقل الأي تي وملحقاته ..
سؤالي كيف لجنة تحقيق تعمل موقع على الفيس لتلقي الشكاوى والشهادات ؟
أكيد دا شغل مضروب ولا يستقيم مع فهمنا للقانون وإجراءاته ..
و تحت احسن فروض حسن النية شغل الناس وتشتيت وبلبلة أفكارهم.

عارف يا البشرى
أنا شغال متطوع في منظمة افريقية تابعة لدولة فقيرة لمن داقة الدلجة
عاملين شغل تقني مبالغ فيه لكمية من المؤسسات
مستخدمين فيه أحدث التقنيات والبرمجيات العالمية .. كمثال:
شغالين خدمات العملاء بي برنامج salesforce دة المستخدم الواحد فيه بي 30 دولار في الشهر
إدارة المشاريع والفرق العاملة والتوظيف مستخدمين ليها Jira ودة بحاسبك بي 14 دولار شهرياً على الراس
الناس التعبانين في التقنية عاملين ليهم facebook workplace ودة بكلف 14 دولار للنفر في الشهر
ايميلاتنا في السيرفر بتاع مايكروسوفت outlook ودة النفر فيه بي 5 دولار شهرياً
بنستخدم برضو سيرفر الجي ميل لبعض المجموعات بنفس السعر
الحاجات دي لي 500 مستخدم بتكلفك 400 ألف دولار في السنة
كل المواقع والأنظمة الخاصة بتاعتنا مستضيفنها في الكلاود بتاعة مايكروسوفت Azure بي اشتراك سنوي 3500 دولار علماً بإنه الأنظمة الفوق ديك مستضافة في شركاتها يعني ما بتستهلك مننا حاجة
ودة غيض من فيض .. لأنه لو سرحت ليك في باقي الحاجات الصفحة ما بتشيل

عارف الميزانية الضخمة دي بندفع منها كم في السنة؟ زيرو دولار .. والله جد
كلها مجااااااان للمنظمات غير الربحية بس شرطها تكون ما من الدول الستة المنكوبة بالحظر الامريكي
الداير اقوله إنه التطور التقني في العالم متسارع بمعدل خرافي والأنظمة البتساعدك على أتمتة شغلك بالمجان وعلى قفا من يشيل لكن نحن مؤخرانا الكفوة الدخلنا فيها البشير الله لا كسبو
وصدقوني بمجرد رفع الحظر الخدمات الالكترونية حتقفز فجأة كدة قفزات لمن تحيرك
بس نطلع من حفرة الحظر الامريكي وبعيدها الناس تتمنى زي ما عاوزة

سلامات مولانا
الموقع ما في الفيس وإنما موقع انترنت عادي يساعد الجمهور في المساهمة بمعلومات حول فض الاعتصام حتى لو عن طريق رفع فيديوهات
الشهود العيان اللي عندهم الرغبة في الشهادة بتواصلوا معاهم ويوفروا ليهم الحماية اللازمة بكل تأكيد
يعني مجرد واجهة تقديم معلومات وليس اجراءات رسمية

الموقع تعرض لحملة شعواء منذ صباح الأمس وتحذير للناس منه وأي واحد بفهم ألف باء التهكير حب يستعرض فيه لحدي ما اضطروا في النهاية قفلوهو

يا ابو حميد لا احد ينكر دور الحظر الامريكي, لكن السؤال معانا رسميا خمس دول في هذا الحظر هل تفتكر الخدمات في إيران او كوريا الشمالية أو سوريا (قبل الحرب) بسوء مستواها في السودان؟ لا اظن
اضف الى ما سببه الحظر كمان فقر الابداع و ايكال الامر لغير اهله زي ما ضربت انت أمثلة فوق عن غير مالمؤهلين المتولين مناصب يد كبيرة في التدهور!
يعني رفع الحظر وحده لن يحيل الليل صباح, نحتاج لإعادة بناء وإعادة ثقة في النفس و فتح المجال أمام المبدعين واصحاب التفكير الخلّاق لتولّي المسؤولية

ديك دول غنية بالنفط والكفاءات وبتقدر تظبط أوضاعها زي ما عايزة
يعني البرنامج البنتشابى ليه نحن دة هم بيجيبوا مبرمجين في نفس المستوى وبدفعوا ليهم زي مايكروسوفت ويخلوهم
ماهو عشان تعمل برنامج لمؤسسة كبيرة يا إما تشتري حزمة جاهزة وتعمل ليها customization ودي أي بتاع آي تي بي تدريب بسيط بقدر ليها، يا إما تجيب ليك فريق مبرمجين ممكن يكونوا 100 والنفر فيهم شهرو بي 15 ألف دولار
لو اترفع الحظر بعد دة المنظمات والمؤسسات التعليمية بدون دعم حكومي حتتطور تقنياً
دة غير إنه حتى الأسعار بتدق الدلجة لو دخل الدفع الالكتروني لأنه المنافسة بتبقى عالية والخيارات بتكتر
أنا مؤمن بي إنه إدخال التقنية في الحياة السودانية بقلبها 180 درجة .. أخد أقرب حاجة النقلة العملها ترحال
أو النقلة الحتمعلها التجارة الالكترونية بعد فتح الفيزا .. تاني أي اسرة ممكن تنتج جوة بيتها وتبيع في موقع السوق الالكتروني

مسألة تغيير الطاقم العامل كلو دي مستحيلة .. يعني محمد ضياء بي فهمو دة لو ودوهو سوداتل بسلموهو المفاتيح يشتغل براهو والله صحي :)

Quote: اعتبر ان التحقيق كان دولي مثلا! اكيد سيكون الموقع على سيرفر محمي خارج السودان

بس ما بتعتمد على سيرفر تجاري
مثلاً تحقيق تبع الأمم المتحدة وأرادوا استخدام الموقع الالكتروني في شغل اجرائي بعملوا سيرفر خاص بيهم وبأمنوهو فيزيائياً
الجامعات البنوك المواقع الحكومية والمؤسسات المشابهة كلها ما بتستخدم سيرفرات تجارية نهائي

طبعاً أنا بتكلم عن الشغل العلمي ما عن الطرش بتاعيننا ديل
هل تعلم إنه سفارة السودان في الرياض مشترين ليها دومين سعودي؟ أي والله ملبسينه عقال sudanembassy.org.sa
عليك دينك سمعت بي موقع حكومي دوت أورغ؟ نان gov. دي داسينها لليوم الأسود!

طبعا طبعا ح يحدث تغيير حقيقي وملموس بس لابد يواكبه تغيير في العقلية على الأقل طالما تغيير الشخوص مستحيل مرة واحدة
العقلية بتاعة تعليق اي شي على شماعة العقوبات و خت اليد في الخد و الاستسلام دي لابد تتغير
هناك حلول دائما لكنّها لا تأتي لمن ينتظرها

بعدين كوريا الشمالية بترول شنو العندها يا زول - انادي ليك مولانا حافظ اسي يملاك غلاط

هي دي ما بتاعة الهيونداي يعني؟

Quote: العقلية بتاعة تعليق اي شي على شماعة العقوبات و خت اليد في الخد و الاستسلام دي لابد تتغير

يلا يا محمد التغيير البتكلم عنه أنا هو التغيير بتاع أنظمة المجتمع المدني ما الحكومة
الرهان على الحكومة هو خت اليد في الخد وانتظار الحلو
لكن منظمات المجتم المدني بتقدر تنجز بالدعومات الخارجية .. إذا كانت حكومتنا نفسها تسعى للدعم الخارجي فما بالك بالمنظمات
أديك مثال
متذكر الصورة بتاعة الطلاب القاعدين في الواطة وتاكلين ليهم سبورة تحت شجرة بدرسوا فيهم في غرب السودان!
أنا شفت صورة زيها وأسوأ في قرية افريقية نائية البلد كلها جاهلة والمدرسة في العراء وفيها مدرّسة واحدة فقط بتحارب في الجهل وحيدة
لو حاولنا نحل ليها المشكلة دي بي دعم مادي كان حنبني مدرسة وخلاص لأنه الحكومة ما شغالة بالقرية ويمكن ما معترفة بيها ذاتو بالتالي حنضطر نجيب ليها اساتذة ونعمل ونعمل يعني باختصار نحن كمنظمة طوعية ما عندها بند قروش إلا نشحد ليها
لكن ببساطة أولادنا جابوا جهاز كمبيوتر من إحدى الشركات الداعمة ومعاهو بروجيكتور .. اتواصلوا مع شركة اتصالات فتحت ليهم هوت سبوت بالستالايت وادتهم جهاز .. اتواصلنا مع معهد خيري فيه اساتذة متطوعين بدرسوا اونلاين
وبي بساطة كدة الاستاذة بقت مجرد مشرفة تطلع الكمبيوتر للطلبة وتقعد تتفرج الاساتذة كلهم شغالين اونلاين ومظبطين ليهم السيستم بتاع التعليم الالكتروني بحيث إنه الطلبة ما يحتاجوا يفتحوا أي حاجة غير الكمبيوتر في البداية وتاني المحاضرات بتجي تباعاً براها
أنا في الحقيقة كان دوري محدد ما تابعت باقي المشروع لكن لاحقاً عرفت إنه الموضوع اتطور شديد ودخلت فيه كورسات مهن منزلية للنساء وتعليم كبار ومنتديات ثقافية للشباب وعيييييييك

الفكرة يا محمد إنه الحظر بحرمنا من جنس الحلول الكرييتف دي