قائمة الفنانين بجهاز الامن

05:44 AM November, 24 2019

سودانيز اون لاين
عبدالحفيظ ابوسن-no where
مكتبتى
رابط مختصر

جهاز الامن السوداني يمتلك سمعة سيئة وسط الناس .
وهو من الاذرعة التي كان يستغلها النظام السابق في لجم وتخويف المعارضين وارهابهم
انتشرت قائمة بأسماء 15 فنان غنائي وانهم في جهاز الامن
اهلنا بقولو

المابتريدو خاف الله فيهو
يا جماعة دي تهم خطيرة ومامسنودة بأدلة سوي الشك
ف شنو
حقو نتريث شوية قبل اطلاق التهم الجزافية
صحي والله اللستة دي كلها مابحب غنا واحد فيهم الا زول كهل جدا مغزوز في نصهم بقيتهم شباب
ارخو الابنص شوية
والعليهو دليل جيبو بي دليلو

سلام اهل كوستي

انا قايلك جبت اللستة

جهزت القاذفات بتاعتي
والله ناس تخاف الله في بعضها

هههه يا ود الشيخ
أه وين يا
صحي حقو نخاف الله فيهم ونعمل حسابنا
اي مابريدو ولا بحبو لكن برضو اعمل حسابي
نديك دي
قالوا زول مابحب عثمان مصطفي ولسؤ حظو صاحبو جابو في عرسو
وهو كرهانو وما قادر يخلي مشاركة صحبو العريس
صحبو عارفو وداير يكسر الحاجز حلف عليهو طلاق يبشر في الفنان
جا معاهو مكره . وكان بغني ما بتنشتل الزهرة في الارض اليباب
جا بشر فيهو وقال ليهو
والله لو الله اراد ليها في .. امك تقوم

Quote: والعليهو دليل جيبو بي دليلو

افا!! دليل شنو يا قريبك!
إنت عايز تقلب رمادي بعد الثورة ولاّ شنو

مافي دليل يا زول! كدا بس عايز تلخ معانا لخ ما عايز أدينا خشم باب بيتنا

بالنسبة لي فرفور اعترف هو شخصيا واعترافه موجود في لقاء صحفي ، لكن البقية دي ما بعرفهم
الحاجة التانية كان في فنانين في المجلس الوطني اذكر منهم حمد الريح ، ديل برضو مشبوهين

يا ودو ممكن ياخ
فرفور اعترف قبل كدة وقال استقلت !! وهسة ظهر تاني !
تلاتين سنة خشو اي مكان برضو التريث مطلوب . وبعد شوية حتجي لستات قضاة ومحامين ودكاترة واييييك
فحقو شوية نعمل حسابنا
صحي يا عبدالله
فرفور اعترف وفي فنانين غنو للعهد البائد ومنهم من دخل البرلمان او تولي وظيفة مشبوهة . ف شنو
نسل كل شوكة بي دربا
اطلاق الاتهامات جزافا مضر .
هسة ممكن بعد كم يوم تطلع لستة البورداب الفي الامن 😆😆😆😆

Quote: قائمة الفنانين بجهاز الامن

يا حفيظ ... في قائمة ولا ناكل دندرمة ...
يومتا في واحد ضارب لي تلفون في محادثة
أوفرسيز قال لي في دندرمة بياكلوها ...
سنكيت هي ... وباقي المحادثة ما
بتتكتب هنا ...

اذا لم ينفوا التهمة بطريقة رسمية وفردية ذلك يعني صحة الكشف المتداول

Quote: هسة ممكن بعد كم يوم تطلع لستة البورداب الفي الامن 😆😆😆😆

بالله عليك الله بس دي تخليها لي اتنا حاجزها
بنزل بيها بوست

قال ليك يا أبو سن: مونيكا زاتا معاهم

سأعود للرد الراتب
مداخلة خالد في تقديري يجب الرد عليها فورا
يا خالد اهم قاعدة ذهبية في القانون حسب ثقافتي
المتهم برئ حتي تثبت ادانته
كدة عكستها ياخ

Quote: المتهم برئ حتي تثبت ادانته

الا في الحالة دي لسرية المعلومات والادلة

حبيبنا أبوسن .. تحياتي
في لقاء مع ضياء في قناة الازرق .. النصري قال كلام غريب
شن البعض عليه هجوم شديد لأنه ايام الانتخابات غنى في حفلة لقوش
رغم أن أغاني النصري من كلمات حميد فيها عمق ووصف لحال البلد
ربما استغل البعض هذه الفرصة لتصفية حسابات
والمؤسف أن النصري صرح بأنه توقف عن الغناء

أرجو من الشباب من لهم علم بالموضوع .. يمكن متابعين أكثر مننا
في أشياء لا يمكن أن يتلافها الشخص معقول تكون مقاطع العالم (30) سنة
الجماعة زاروا حمد الريح ، نور الجيلاني ... إلخ

تحياتي الحبيب أبوسن

ود ابو سن
كل ثورة وانت طيب
كدى نزل لينا اللستة هنا وانا بفرز ليك منو المنتمي للجهاز القمئ ده ومنو البرئ براءة الذئب من دم ابن يعقوب ...اولا الفنانين الكبار ، القامات في الفن ، استبعدهم تماما ، لكن دون شك في اللستة حيكونوا بعض من ضيوف السر قدور في اغاني وأغاني...

الأخ الكريم عبد الجفيظ أبوسن وضيوفه ...

تحية الود والتقدير والمعزه ...

مصداقا لكلامك وحتى لا نرمي الناس بالشبهات ... شاهدت قبل قليل في الواتساب بطاقتي أمن لفرفور وندى القلعه وظاهر شغل الفوتوشوب فيهما حتى أن البطاقتين بذات الرقم المسلسل .. الظاهر الشغله دي فاتت على من قام بعمل الفوتوشوب ... حقيقة لا أعرف كيف أنقل من التلفون (الواتساب) للمنبر والا كنت رفدت بهما هذا البوست .. وبالطبع بعض الزملاء لديه من القدرات الفنية ما يمكنه من فعل ذلك ...فيا ليته يتكرم بذلك ....


مع خالص حبي وتقديري ؛؛؛؛

إنها فتنة كما قال صاحب البوست

وكلما كترو فامنهم دا فى منو .. ما ياهو فى محيطهم .. زيتم فى بيتم
الخلاصة معاش ثابت ليهم .. حافز فنى .من الحكومةن بدون ضرر على الناس
شفتو ليكم فى ناس جابو فنان فى حفلة الامن كابسهم تانى يوم عشان تقرير
الفنان الامنجى؟ ..

الحكمة تمزيق فايل تعينات الفنانين فى جهاز الامن .. بس يطلعوا لينا
اغنييات الامنجى دا .... وياكا امنجى .. وحرام يا ناس انا ما امنجى
وامنجى فوق راى

هسه أنصاف مدنى دى امنجية على منو .. ولو بقت امنجية
غناها سمح .. تتامنج زى ما عايزة .. بس تواصل تغنى

الاتهام الجزافي يا اب سن ما حبابو لكن كمان التعامل بحسن نية برضو كعب الكيزان ناس ولاجل تمكين حكمهم حشروا انوفهم في كل تفاصيل حياة الناس لبس الناس وازواقهم في الماكل والمشرب ومايجب ان يسمعوه من الفنانين تدخلوا في عادات الناس وتقاليدهم وطريقة سكنهم ياخ فرضوا احياء في الخرطوم فرض وزادوا اسعارها وعلوا اسهمها واماتوا احياء سكنية اخرى عنوة كل ده تم بشكل رتيب وشوية شوية فرضوا أشياء كتيرة على السودانيين والدليل حكاية اعادة صياغة الانسان السوداني كعنوان لما فعلوا من سفه حتى يكون الانسان السوداني اداة طيّعة تتقبل كل مخازيهم وحكمهم النتن والعنصرية كانت سلاحهم الامضى والاقذر السوهو الكيزان ما بروح بالساهل وكلو ده لاننا شعب طيب وعلى السجية تقبلنا بحسن نوايانا وفطرتنا السليمة واستبعدنا انه يكون كل ما حدث لنا ولمجتمعنا من تغيير أمر مخطط له ومرصود لذلك الامكانيات المالية المهولة والكوادر البشرية التي تم شراءها بمال الشعب من فنانيين ومفكرين وصحفيين والمابقدروا يشتروه يكسروا عينه اخلاقيا او يلقوا طريقة يفضحوه حتى يتوارى وينكسر ويبتعد عن الحياة العامة ويقل تأثيره على المجتمع والناس هؤلاء شر من حكم السودان الى يوم يبعثون

سلام عليكم
الموضوع غير مستغرب فالكيزان حرصو طوال ال40 عاما من عملهم داخل المجتمع حرصو على الاستقطاب النوعى على اساس الخلفيات الاجتماعيه او المواهب (ونبدا برعايتهم للمتفوقين بانشاء مدارس خاصه لهم وطبعا فى شغل تانى غير الاكاديميات) والفن لايشذ عن الشرائح المستهدفه بالاستقطاب .
اشخاص ممكن تغالط انهم لاعلاقه لهم بالكيزان (ولا من بعيد ذاتو) لكن فى مراحل معينه تجد عدهم ارتباط لدرجه مريب معهم واتحدث وانا اقف على مايدعم قولى .
ماشفت القائمه لكن من ماتردد هنااما عن الفنان الكان موظف فى جامعه الخرطوم )اعتد) فهو معروف انو كوز قديم من الستينات وممكن يكونكادر لكن لدرجه امنى !الله اعلم .
المهم
موضوع كشف القوائم للمتورطين مع النظام صعب ولايمكن الا بالقطاره البحسبها الجهاز ذاتو ربما عشان يشغل الناس .
فى مصر الناس اقتحمت مبانى امن الدوله وحصلت على مصائب وفضائح من قوائم وملفات شخصيات عامه مجنده لصالح امن الدوله وومستمسكات ابتزاز زى صور وشرائط فيديو وهكذا تستخدم ربما لتدجين المتمرد على التجيند لامن الدوله .
ودا ماحصل هنا عشان الناس تتكلم عن تاكيد لكن نشاط البعض - والتغاضى عن كثير مما يمكن ان يكون عقبه امام فنانين اخرين - ظاهر انو يخدم اجنده الدوله الاخوانيه عبر جهاز الامن.
تانى حاجه
القوى الفاعله فى اجهزه ذات طابع استخبارى كلمايضها موجود فى اطار الاحهزه التنظيميه المختصه (خاصه بعد 11ابريل ) اما الاجهزه الرسميه فاعتقد انو تم سحب الفاعلين منها
بالتالى ممكن يكون مابرز بعضهم قمه جبل الجليد كما بالشرائح الاخرى فى المجتمع لكن جيل الجليد يصعب الوصل اليه اذا اصبح تحت اداره التنظيم وخارج السيطره الرسميه