بالصدفة اكتشفت هذه الفاكهة قبل خمسة سنوات ؛ كنت اظنها طماطم لسنين طويلة.
الحصل :- كنت فى احدى البقالات العربية فى كالقرى برفقة الدفعة سلطان ؛ فجاة التفت إلينا رجل يبدو انه لبنانى واقترح نجرب فاكهة كنت نقف بجوارها ؛ وافقت على الاقتراح و اشتريت صندوق به سته قطع كبيرة جدا . مشيت البيت و اخدت قرمه و عييييك وقعت فى حبها ..بقيت انتظر الشتاء مخصوص عشانا . معظم الاصدقاء لا يعرفونها ؛ اهديت واحدة لصديق إثيوبي ؛ استغرب فى البداية و بعد داك عيييك دخل الماسورة و بقى مدمن مثلى.
اى زول لم يجربها بعد لازم يجرب ؛ اهم شء اتاكد انها ripe و معسله لانها لو نيه تبقى تافهة جدا.
http://
http://
http://
Post: #2 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 03:33 AM Parent: #1
ويكيبيديا قالت :-
التين الكاكي أو الكاكا أو القاقا أو الخرما أو بيريسيمين (بالإنجليزية: Persimmon) معروفة لدى قدماء اليونان بـ " ثمرة الآلهة ".[1][2][3] اصلها من اليابان وتزرع في شمال وشرق قارة آسيا في درجة حرارة لا تتجاوز 27 درجة مئوية تتميز بطعمها الحلو والرائع تزرع في جميع قارة آسيا وفي بلاد الشام وتركيا وفي الشمال الغربي للبلاد التونسية (بمنطقة "وشتاتة" ولاية باجة) و يسمى بالـكـريـمــة ولها أنواع كثيرة تختلف في الحجم والذوق.
Post: #3 Title: Re: اجمل فاكهة على وجه الكرة الأرضية Persimmon Author: ناذر محمد الخليفة Date: 11-19-2019, 07:43 AM Parent: #1
سلام النصري ..
انت قبل كم سنة مش عملت بوست عن فاكهة القشطة وقلت دي اجمل فاكهة على وجه الأرض ولا ما انت ..
صراحة ما جربت فاكهتك دي كدي رسل لينا منها صندوثين تلاتة ههه
Post: #4 Title: Re: اجمل فاكهة على وجه الكرة الأرضية Persimmon Author: محمد البشرى الخضر Date: 11-19-2019, 08:06 AM Parent: #3
يعني دي ما طماطم!! مخيّر الله
Post: #5 Title: Re: اجمل فاكهة على وجه الكرة الأرضية Persimmon Author: قلقو Date: 11-19-2019, 08:46 AM Parent: #3
ناذر خليفة والله ليك وحشة . صناديق شنو يا ناذر ؟ ياخى لو إنت عايز صندوقين تلاتة أطلب كونتينر عشان النصرى يتلافا البلا بالبليلة ويقوم يرسل الصندوقين تلاتة . دى تكتيكات إتعلمتها من المدام , وهى تكتيكات ناجعة جدا . خليك ثقيل وعلي سقف طلباتك ولازم تتعلم من نظرية الفاتح عزالدين الأقتصادية (نظرية تعلية السقف و رب رب رب ) ولمن النصرى يقوم بواجب الأرسال ختنا معاك فى الصورة .
Post: #6 Title: Re: اجمل فاكهة على وجه الكرة الأرضية Persimmon Author: mohmmed said ahmed Date: 11-19-2019, 09:01 AM Parent: #5
كل يوم اشوفا واعاين ليها باحتقار وازدراء وتجاهل وتعالى
اها الليلة على مسؤوليتك يا نصرى
بشتريها ولو غالية وطلعت كعبة حسابك معاى عسير رغم انك ختيت ليك مراقة انو معسلة وما معسلة
Post: #7 Title: Re: اجمل فاكهة على وجه الكرة الأرضية Persimmon Author: Hafiz Bashir Date: 11-19-2019, 09:40 AM Parent: #6
سلام يا النصري وأنا أعرفها كيف معسلة ول ما معسلة؟ قبل كم سنة كدا اشتريت منها كيلو او كيلوين ما متذكر اكلت منها قدر الضواقة بس ورميت الباقي وقررت تاني ما اشتريها. هسه جاني خاطر وقلت يمكن الاشتريتها ديك ما كانت معسلة حاقوم أجربها تاني لو ما طلعت جميلة بدفعك تمنها.
Post: #8 Title: Re: اجمل فاكهة على وجه الكرة الأرضية Persimmon Author: محمد مجيدو Date: 11-19-2019, 09:40 AM Parent: #1
Post: #9 Title: Re: اجمل فاكهة على وجه الكرة الأرضية Persimmon Author: أحمد محمد عمر Date: 11-19-2019, 09:44 AM Parent: #8
اشتريها يا محمد سيد احمد على مسئوليتي أنا دة .. وما غالية بالمناسبة طعمها أقرب حاجة ليه المانجو لكن ما فيها الحموضة الشديدة ولا صكة السنون بتاعة المنقا يا حافظ المعسلة حمراء وعنوان البووست صحيح 100%
Post: #10 Title: Re: اجمل فاكهة على وجه الكرة الأرضية Persimmon Author: Haytham Ghaly Date: 11-19-2019, 09:53 AM Parent: #9
بالله عليكم وصفو نعرف النجيضة كيف
اهو احمد قال المعسلة حمرة ..
طيب الشي دي باكلوها كيف .. نقشرها وللا نعضي ساي ههههههههه
جني وجن الحاجات الجديدة علي وما بعرفها لكن انتو مااا بتريحو
Post: #11 Title: Re: اجمل فاكهة على وجه الكرة الأرضية Persimmon Author: علي عبدالوهاب عثمان Date: 11-19-2019, 09:58 AM Parent: #10
حبيبنا النصري .. تحياتي .. توافق غريب جداً هي الكاكا الايامات دي رخيصة جداً مقارنة بباقي المواسم الكيلو في أسواق بنده (4-5) ريال من أجمل الفواكه النوع المستوي مرة يمكن تسلخ القشر الخارجي منتشرة في اسواق السعودية بكثافة هذه الايام مع التحية الحبيب النصري
Post: #12 Title: Re: اجمل فاكهة على وجه الكرة الأرضية Persimmon Author: جمال ود القوز Date: 11-19-2019, 10:05 AM Parent: #11
غايتو يا نصري الدعايات والترويج عندك .. كاكا شنو كمان .. العامل ليها قومة النفس دي .. أقل من عادية ولا سمحة ولا حاجتين ..... لكن النصيحة لي الله أخير من أم العفين الجيت روجت ليها ديك .. حدك قرمة وااااحدة ماتعرف تبلعها ولا تتفها شدة ما ريحتتها عفنة .. الريحة تكابس خيشومك قبل ماتبلع ذااااتو ...
Post: #13 Title: Re: اجمل فاكهة على وجه الكرة الأرضية Persimmon Author: Mohd Ibrahim Date: 11-19-2019, 10:22 AM Parent: #12
واللة يالنصري عندنا ناس كتار قاعدين في الدول الاوربية دي ..لما تتكلم معاهم تحس انهم لسي قاعدين هنا في الضهاري (علي راي الامير توفيق) ..وتلقي شايل معاو ويكة وبلح وفي حالة عزلة تامة داخل الغربة ..لكن تفاعلك واندهاشاتك وتجاربك البتنقلها هنا بتحسسنا بتفاعلك الايجابي و انو الدنيا دي جميلة ومختلفة وتستحق العناء..
Post: #14 Title: Re: اجمل فاكهة على وجه الكرة الأرضية Persimmon Author: mohmmed said ahmed Date: 11-19-2019, 10:23 AM Parent: #12
كا كا ههههه زمان فى مصر سالنا بائع الفاكهة دى شنو قال كاكا محمد الشاويش قال ليهو كاكا...كاكا ههههه هسا دا اسم فاكهة
Post: #15 Title: Re: اجمل فاكهة على وجه الكرة الأرضية Persimmon Author: معاوية المدير Date: 11-19-2019, 10:55 AM Parent: #14
يا النصري الخميس قرّب، بلآ كاكا بلآ رونالدو ...
Post: #16 Title: Re: اجمل فاكهة على وجه الكرة الأرضية Persimmon Author: Ahmed Yassin Date: 11-19-2019, 11:47 AM Parent: #15
النصري حيرتنا معاك انت هسي قبل كم شهر ماقلت ماشي تشتري اعفن فاكهة في العالم لكن لذيذة... دوىيانdurian
Post: #17 Title: Re: اجمل فاكهة على وجه الكرة الأرضية Persimmon Author: أحمد محمد عمر Date: 11-19-2019, 03:33 PM Parent: #16
من زمني الشافع فاكهتي المفضلة كانت الشمام لكن في الثانوي ارتبطت عندي بالحوادث .. كلما آكل شمام بالليل بصحى ملجّن قدر ما حاولت أنفي التهمة من الشمام كل ما يجي موسمه بثبتها في نفسه أكتر بقيت باكل منه قطعتين بالكتير لحفظ السلامة الشخصية :) أيام الجامعة مشيت لجماعة بلدياتنا في بيت عزابة بعد نهاية اليوم الدراسي مباشرة قلت أتغدى معاهم واتراوح على داخليتي .. لكن الونسة جرتنا وحلفوا علي أبيت معاهم وناسنا حلافييييين ولواييييق جابوا لي جلابية أنوم بيها وانا كزول حساس وخجول ومسكين - والله جد - أبيت البسها وقلت ليهم نحن طلاب داخليات كوبيين عادي ننوم بالهدوم ونمشي بيهن الجامعة بعد اتعشينا جاء واحد كان مافيش وجاب معاهو شمامة وانا أعاين فيها زي الداير يدوني حقنة .. داير أقول ليهم جيبوا الجلابية لكن خجلت أها ختوها كدة أكلت قطعتين وداير اغسل يدي الحلايف اشتغلت .. ما قلت ليكم لواييق! ما خلوني أغسل يدي إلا بعد آخر قطعة .. رقدت نمت زي الساعة 12 بالليل .. ثم حدث ما حدث وحاتكم الساعة 2 بالليل دخلت الحمام غسلت الهمبوبة وبقيت تيوبلس .. الكفر البراني كانت حمته خفيفة حاولت أنفض البتاع الصوت بقى عالي بصحي الناس بقيت أهبب براحة براحة لقيت الشغلانة ما بتبقى .. شريتو في الحبل وبقيت مصنقر في السرير ممحن منتظره العالمين كلها نايمة في الحوش يعني كان واحد صحى بكتشف آثار الجريمة وانا زي طبعاً خجول وحساس عارفكم ما مصدقين لكن وحاة الله جد أها فرد صنقيرة من 2 بالليل لحدي آذان الصبح بس أول واحد اتحرك داير يصحي ختفت البتاع وجريت الحمام ومن ديك تاني الشمام حرمته حتى بعد اتزوجت بس كل ما أشوفه أتذكر منظري الجيعااااان داك في بيت العزابة وقلبي ياباهو
Post: #18 Title: Re: اجمل فاكهة على وجه الكرة الأرضية Persimmon Author: Osman Musa Date: 11-19-2019, 03:52 PM Parent: #17
اخونا النصري سلامات ظنيتك قعادك الطويل في الغربة نساك طعم منقة كسلا الحلوة وصافي لونا وتومتي فريدة غرب القاش سكونا . والله يا النصري بعد التصور الزراعي الحصل في تجارب المنقة السودانية في جماعة زراعيين قدرو يطورو نوع اسمو شندي تو . منقة حبة صغيرة وعندها قديديم زي السنارة والله يا النصري تاكل منها في شندي الا تحلف تبيت قبلك وتترك السفر . برضو نفس الخبراء ديل انتجوا فرووت اسمو الببلو مبالغة مبالغة . تعال الزيداب شهر ١١ ياخ من البنطون يضربك اريج اليوسفي والبرتقال . يا زول عندنا حتي النجيلة ليها عطر خاص . والله العظيم فاكهتك دي هسع قدامي بجيبوها لينا من المزراعة في ثاوث كارولاينا . لكن وحاتك ولا بهوب عليها . تحياتي
Post: #19 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 06:24 PM Parent: #18
بداية ؛ وصلتنى رسالة ظريفة من احد القراء :
سلامات استاذنا النصرى مسطول بتكلم مع التمساح بقول ليهو والله انا كنت بحترمك جدا من يوم عرفتك بتبيض فقد احترامى ليك
دحين يااخوى انت كنت كاتبى المفضل لكن من عرفتك بتاكل الفاكهه الاسمها الكاكا دى غيرت لى لتوفيق عيسى
ياخ بالنسبه لى اكل مال اليتيم ولا اكلها هى اللهم الاكاكتم غير كاكتنا الانا اكلتها.
Post: #20 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 07:04 PM Parent: #19
نعم يا ناذر البوست كان بعنوان (القشطة فاكهة الجنة) ، دورت فيها فترة طويلة مع انها غالية لكن قاصمة الظهر لمن مشيت مرة سوبرماركت الصينيين ، ما لقيت القشطة العادية لكن لقيت واحدة كبيرة ضخمة فى حجم البطيخة وهى نوع من نفس فصيلة الفاكهة ... المهم اتوكلت على الله و شلتها و مشيت على الكاشير ، طلعتةبالوزن و الرطل خمسة دولارات ؛ يعنى تكلفتها 27 دولار ؛ اتفرزنت لبضع ثوانى ؛ معقول اشترى لى قطعة فاكهة واحدة بسبعة ووعشرين دولار ...يا زول اتوكلت و اشتريتها و عندى احساس بالذنب و تأنيب الضمير.
مشيت البيت ؛ شقيتها ؛ طلعت نيه أسوأ من التبش ؛ زعلت داير انفقع . انتظرتها يوم، يومين، اسبوع عشان تستوى ابت كله كله ..فى الاخر رميتها و كانت نهاية قصة حب استمرت ثلاثة سنوات . بس ربنا اكرمنى بافضل منها .
اقول ليك كلام ؛ اوعدك لمن اجى السودان ؛ اجيب ليك معاى كم قطعة (للضواقه). وهى فرصة نهديها لأصدقاء اخرين
Post: #21 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 07:10 PM Parent: #20
محمد البشرى و محمد سيد احمد اتوكلوا على الله و جربوا النصيبة دى. و الله العظيم انا بحب الشتاء عشان الفاكهة دى . بس تذكروا انها انواع واشكال ؛ الجوافة موش فى نوع طاعم و نوع ماحلو . نفس الفكرة ؛ فى نوع من الكاكا زى الليمون تافه جدا . الاسبوع الفات اتمقلبت و اشتريت من النوع الكعب دى ؛ والله تحرق الشلاليف عديل. اضطريت ارميها. اعتقد هى سلالات لكن احسن نوع بالتجربة هى ضخمة جدا و مافيها حب seeds.
اى واحدة فى حب فيها شك
Post: #22 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 07:14 PM Parent: #21
يا حافظ ؛ تكون اشتريت السلالة التافهة. المشكلة صعب تعرف الحلوة من المرة ، زى البطيخ لكن صاحب البقالة يفترض يجرب الفاكهة اول قبل بيعها . مثلا لمن القاها فى Costco بشتريها من طرف لان ناس Costco ما بيبيعوا اى حاجة قبل ان تنجح فى الاختبارات. البقالات الصغيرة (خاصة بتاعت الصينين ) ما عندهم ضمير ؛ لقوها رخيصة يبيعوها رخيصة و انت الخسران.
Post: #23 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 07:15 PM Parent: #22
معليش قلقو شكلك فى السودان؛ العينة تصلك ام شاء الله فى فبراير
Post: #24 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 07:18 PM Parent: #23
شكرا مجيدو على الفيديو المفيد
Post: #25 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 07:21 PM Parent: #24
شكرا احمد محمد عمر (بالمناسبة بتلخبت بينك وبين احمد عمر محمد)
Quote: وعنوان البووست صحيح 100%
يا سلام يا سلام
Post: #26 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 07:24 PM Parent: #25
يا هيثم ؛ انا نفسى مرات بتمقلب و بشترى التافهة لانه صعب تفرز بين الاثنين. لكن بصورة عامة كلما يكون لونها احمر يكون احسن . بعدين كلما تكون soft زى المنقه المليانه عصير ؛ يعنى تقرب تفجخا الطماطم . الطريقة التانية تشتريها من محل محترم ما بغش الزبائن مثلCostco
Post: #27 Title: Re: اجمل فاكهة على وجه الكرة الأرضية Persimmon Author: امتثال عبدالله Date: 11-19-2019, 07:32 PM Parent: #26
غايتو نكتة المسطول والتمساح من اجمل النكات السمعتها في الفترة الأخيرة...نكتة أوسكار.... أما اجمل فاكهة في الأرض دي ما بعرفها وما أكلتها قبال كده ...المهم حاتوكل على الحي الذي لا يموت واشتري لي دستة لكن اذا لقيتها مرة ترجع لي دولاراتي على داير السنت ....
Post: #28 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 07:32 PM Parent: #26
اهلا يا على ... لازم تكون رخيصة الايام دى لانه ده الموسم لكن للاسف موسم قصير. اشتريتها امبارح (المعلومة دى لناس كندا من Super Store الرطل ب 78سنت لكن النوع الصغار ، طاعم ما بطال لكن ما زى النوع الضخم الاحمر الفتاك . بس الزول احسن يعزل المستوية و النجيضه
Post: #29 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 07:35 PM Parent: #28
يا ود القوز ، عندى صاحبى يقول غايتو انت لمن تدور الحاجة تطيرها السما و لمن ما تدوا تضرب بيها الواطة. انا متاكد انك وقعت فى النوع التافه من الكاكا كدى جرب تانى و اشتريها من محل محترم لا يبيع بضائع مضروبة. اتاكد انها soft و مليانه عصير و مافيها حب
Post: #30 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 07:39 PM Parent: #29
محمد ابراهيم والله صدقت ؛ بالرغم ما عندى اصحاب خواجات(ماعدا عرفة الشغل و التى تنتهى بانتهاء الدوام) لكن بحاول اتجاوب مع كل شي حولى. زرت لندن لاول مرة فى فبراير وفى زيارة لمنزل احد الاصدقاء وقفت متحير فى جهاز التدفئة كنت بقارن بينه وبين النظام فى كندا و لو ما خجلت كنت سالت مليون سؤال.
بقيت ةى حاجة اقيف فيها و اتامل ههههه خليك من الحاجات الغريقة البتجيب الكلام ههه
Post: #31 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 07:41 PM Parent: #30
يا مدير ؛ الخميس بعيد من محل الأجنحة المنتهى ده . فى مطعم هندى رهيب جنبنا و على الكاكا النوع ابوكديس. كلم الشباب و كل زول يدفع رياله براه
Post: #32 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 07:47 PM Parent: #31
يا عثمان موسى والله ناوى نيه ما عادية اجرب كل شي فى السودان فى زيارتى فى فبراير. وطبعا الفواكه فى اعلى القائمة. لمن مشيت كوستاريكا ؛ وقعت ليك فى موز صغار كده والله طاعم طعومية و الغريبة فيهو حبة حداقه ..مبالغة عديل .
اقول ليك كلام ..و الله من البوست ده ..فكرت اشيل كيس صغير بتاع تيراب بذور تقاوى كاكا و اهديها لمزارعين فى مناطق جبل مره ، احتمال الكاكا دى تنجح فى المناطق ديك
Post: #33 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 07:54 PM Parent: #32
اوريك الحصل شنو يا احمد يسن بخصوص الفاكهة العفنة Duran
مشيت سوبرماركت جنبنا اسمه Safeway ما لقيتها ..سالت الولد الشغال فى قسم الخضروات والفواكه ؛ قال لى ما فى زبائن للفاكهة دى فى المحل ؛ المنطقة دى غالبيتها الساحقة من الهنود البنحاب السيخ. مشيت محل تانى ضخم اسمه Super Store ..لقيت الفاكهة دى كيس ؛ الرطل منها بخمسة دولارات. وزنها على الاقل تلاته كيلو؛ يلا احسب . طوالى صرفت النظر . لكن لمن نقبض بونص الكريسماس ممكن نجازف. الأيام دى غى فلس حاصل
Post: #34 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-19-2019, 07:56 PM Parent: #33
يا امتثال عليك الله اشتربها كن محل محترم ولو ممكن اسالى صاحب البقالة انها sweet كلما تكون نجيضه و معسله يكون احسن
Post: #35 Title: Re: اجمل فاكهة على وجه الكرة الأرضية Persimmon Author: Ahmed Yassin Date: 11-19-2019, 10:47 PM Parent: #34
Quote: الرطل بخمسة دولارات وزنها على الاقل تلاتة كيلو..يلا احسب
٣× ٢.٢٥ = ٦.٧٥ × ٥= ٣٤ دولار تقريباً الليلة اتذكرتك والله اول ما شوفتا الكاكا ...سعر الكيلو تقريبا اقل من ثلاثة دولار
Post: #36 Title: Re: اجمل فاكهة على وجه الكرة الأرضية Persimmon Author: mohmmed said ahmed Date: 11-20-2019, 04:37 AM Parent: #35
اكلتها ولو اديتا 7 من عشرة بكون جاملتها وما تقول حمراء ومعسلة ولينة دى كلو فى بس
المهم ما غالية الكيلو 8 درهم مرمية فى التلاجة مافى زول غيرى قرب ليها
ياخ حبة جوافة فى السودان ريحتا تطق من بعد كيلو تقول لى كاكا
Post: #37 Title: Re: اجمل فاكهة على وجه الكرة الأرضية Persimmon Author: أحمد محمد عمر Date: 11-20-2019, 06:48 AM Parent: #36
لا لا ما لينة يا عمك لينة دي بايظة قوامها زي التفاح أو أقوى شوية
Post: #38 Title: Re: اجمل فاكهة على وجه الكرة الأرضية Persimmon Author: محمد جلال عبدالله Date: 11-20-2019, 07:15 AM Parent: #37
النصري إزيك .. أنا لي قريب 20 سنة في الغربة وما عرفتها إلا قبل 3 سنة بس كنت بظنها نوع غالي من الطماطم وفعلا فاكهة لذيذة جدا ورائعة جدا النجيضة منها المعسلة غالبا لونها بكون برتقالي عديل وليس برتقالي مائل للأصفر وأهم شي لمن تجي تاكلها لازم تسلخ الجلد بتاعها زي لما تسلخ جلد البلح الرطب النجيض شديد لو أكلتها بالقشرة القشرة طعمها مسيخ شديد وبايخ جدا بضيع عليك حلاوتها
Post: #39 Title: Re: اجمل فاكهة على وجه الكرة الأرضية Persimmon Author: محمد جلال عبدالله Date: 11-20-2019, 07:20 AM Parent: #38
Quote: وأهم شي لمن تجي تاكلها لازم تسلخ الجلد بتاعها زي لما تسلخ جلد البلح الرطب النجيض شديد
تشيل الراس بتاعها وتضغطها من أسفل ومن الجمبات بجيك القلب بتاعها مارق جمبلغ كده طعمها لذيذ جدا وأشبه بالمنقة تاكلها وتستمتع بالطعم وحبتين تلاتة ما بكفوك والجمبك ما بتديه حيفضل باقي من عصارة الثمرة جوة القشرة ما تبقى دني وتحاول تاكلو لأنه ما حتقدر تاكله بدون القشرة ولو أكلت القشرة مساختها حتروح عليك حلاوة الأكلته.. ترميها طوالي طعمها كده زي طعم البلح الني مش مسيخ وبعمل إحساس ما حلو في اللسان والحلق؟ نفس الشي
Post: #40 Title: Re: اجمل فاكهة على وجه الكرة الأرضية Persimmon Author: ناذر محمد الخليفة Date: 11-20-2019, 07:48 AM Parent: #1
أووووووووووو حبيبنا قلقو من الزمن الجميل
Quote: ناذر خليفة والله ليك وحشة . صناديق شنو يا ناذر ؟ ياخى لو إنت عايز صندوقين تلاتة أطلب كونتينر عشان النصرى يتلافا البلا بالبليلة ويقوم يرسل الصندوقين تلاتة . دى تكتيكات إتعلمتها من المدام , وهى تكتيكات ناجعة جدا . خليك ثقيل وعلي سقف طلباتك ولازم تتعلم من نظرية الفاتح عزالدين الأقتصادية (نظرية تعلية السقف و رب رب رب ) ولمن النصرى يقوم بواجب الأرسال ختنا معاك فى الصورة .
اخبارك يا رجل . وين أراضيك ؟ غايتو النصري وعد يجيب لينا منها في فبراير .. لكن انا ما صبرت أمس دخلت لي محل فكهاني لكن للأسف ما لقيتا .. لحدي فبراير لو بقيت في السودان بضوق بتاعة نواحي كندا دي هههههه
Post: #41 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-20-2019, 01:36 PM Parent: #40
يا محمد سيد احمد
Quote: ولو اديتا 7 من عشرة بكون جاملتها
تكون اشتريت النوع نحن زاتنا بنديه سبعة من عشرة. ياخ فى نوع من الفاكهة دى نديه واحد من عشرة . ابحث عن الفصيلة الذهبية
Post: #42 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-20-2019, 01:41 PM Parent: #41
اهلا محمد جلال نعم فى نوع لازم تطلع الجلد زى المنقه ، تكون حلو من جوه لكن الجلد تخين و طعمه مر. السلاله الذهبية تاكل من طرف. انا باكلها زى التفاح ، اقرم من طرف ..الجلد طعمه حلو جدا . فعلا مرة اشتريت واحدة بتعمل حركة (الجمبلغ ) دى😂 يعنى لازم تكون براك لانها messy جدا بتخليك تتعاور .
ياخ انا الأيام دى بغنى يا زمن وقف شوية . عشان الفاكهة دى بتختفى بعد شهرين
Post: #43 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-20-2019, 01:46 PM Parent: #42
يا احمر عمر نحن تخاطب المؤلفة قلوبهم ؛ مرحلة التفاح دى للمتقدمين السناير. خلوهم يبدوا بالمعسله ولمن مستواهم يتصلح يجربوا النوع القوى شوية زى التفاح
Post: #44 Title: Re: اجمل فاكهة على وجه الكرة الأرضية Persimmon Author: محمد بدرالدين Date: 11-20-2019, 02:14 PM Parent: #43
النصرى عاشق الفواكه ... ههههه و انا احب سلطة الفواكه .. فعلا الكاكا حلوة و طاعمة ... و انا و اولادى من المدمنين عليها و موجودة باسواق المملكة هنا كما قال حبيبنا و كبيرنا شيخ على و كذا فاكهة القشطة ...اووو روعة و قالو وقاية من البتاع الكعب داك بعيد عننا و ربنا يشفى الجميع و تتخيل يا حبيب ان فاكهة القشطة لقيتها موجودة و شايلة كمان فى بيت واحد قريبنا بالخرطوم ؟ انا صراحة ما قريت عن جوها و طقسها المناسب .... و ممكن حبيبنا بريمة يورينا السودان بلد العجائب و نحن رايحين منها ... وا مسكينتو وا بلدو بالهنا و الشفا ... وكل المودة و المحبة
Post: #45 Title: Re: اجمل فاكهة على وجه الكرة الأرضية Persimmon Author: احمد عمر محمد Date: 11-20-2019, 04:21 PM Parent: #44
برغم اهتمامي بالفاكهة وزياراتي المتكررة لشراء الخضرة والفاكهة الا انني لم اعيرها اي اهتمام البتة منَ قبل، ولا أعتقد انني كنت ساغترب منها، ولكن اليوم فعلت بعد أن اطلعت على بوستك فبادرت بشراء أربعة قطع كيلو وربع تقريبا على ذمتك، بثلاثة دولاراتَ فقط، ساقوم بتجربتها بعد الغداء اليوم ومن ثم ساقول رأي فيها، السؤال هل تؤكل ثمرة هكذا، ام تحضر عصيرا أيهما الأفضل طعما ومذاقا وفائدا غذائية.
Post: #46 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-20-2019, 06:59 PM Parent: #45
اهلا محمد بدر الدين
Quote: فعلا الكاكا حلوة و طاعمة ... و انا و اولادى من المدمنين عليها
الحمدلله لقيت ناس زى كده ؛ حقو نعمل جمعية محبى الكاكا و القشطة ...
لاحظت حاجة ؟
ناس الشربه ما بياكلوا فواكهة بالمره 😂.
عندى صاحبى بتاع شربه اخر مرة اكل فواكه فى السبعينيات.
الفواكه و الطحنيه الد اعداء الجماعه ..
عندى اكتشاف تانى، حلاوة فلبينية مبالغة...البوست فى الفرن 😂
Post: #47 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-20-2019, 07:03 PM Parent: #46
و الله يا احمد عمر لو اشتريت السلالة الملكية تاكلها بقشرها زى التفاح . لو طلعت مره او قشرتها لازعة تعرف انك اشتريت النوع البروليتاريا.
كلما تكون زى الطماطم (تتفجخ) ومليانع عصير ، كلما تكون حلوة. غايتو دعواتنا تكون اشتريت النوع الطاعم لاننا محتاجين لمشجعين يفندوا مقولة اجمل فاكهة على وجه الكرة الأرضية. فى انتظار النتيجة
Post: #48 Title: Re: اجمل فاكهة على وجه الكرة الأرضية Persimmon Author: امتثال عبدالله Date: 11-21-2019, 01:19 AM Parent: #47
النصري مشيت دكان الخضروات ولقيت الفاكهة دي ..لكن مكتوب عليها Vanilla Persimmon فهل في أنواع غير vanilla ... وبعدين لقيت الفاكهة قوية زي التفاح مع أن الشكل زي الطماطم بالظبط ...فهل من المفروض الفاكهة النجيضة تكون لينة ..ام لا .. ولقيت الكرتونة وفيها ٨ فاكهات بسعر ٣ دولارات ...فقط ....وقلت في نفسي الرخيص برخصته يضوقك مغصته والغالي بغلاته يضوقك حلاته ...هههههههه..وعشان كده قلنا ننتظر ردك ....لكن اشترينا الكمثرى نصبر بيها لبكره ....
Post: #49 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-21-2019, 01:48 AM Parent: #48
يا امتثال ؛ اعتقد ال vanilla من السلالات الشريفه 🙂 غايتو لو من النوع تمسكيها و تفجخيها زى الطماطم دى حلوة جدا و هى المفضلة عندى.
جربى بكره عشان نعتمد رسميا الفانيليا من الطبقات السامية
Post: #50 Title: Re: اجمل فاكهة على وجه الكرة الأرضية Persimmon Author: Biraima M Adam Date: 11-21-2019, 07:48 AM Parent: #49
شكراً يا النصري، بوست ممتع ..
أستأذنك لأضع الفيديو التالي عن زارعة القشطة في مصر .. للحبيب بدران، طلب معلومات أضافية عن زارعة القشطة
القشطة في الأصل نبات أستوائي .. تحتاج إلي مناخ معتدل وتربة خصبة .. في جنوب كردفان تزرع عادي في المنازل مثل الجوافة والليمون .. المشكلة في القشطة في المناطق الجافة هى التلقيح .. ضعيف جداً .. لأن الزهرة تذبل في حالة أرتفاع حرارة الجو .. أو نتيجة لتقلبات الطقس .. ومما يجعل المزارع يزرعها عن طريق العقل، التعقيل طريقة مشهورة (تكاثر خضري) في زراعة كثير من الفواكهه .. هناك فيديوهات كثيرة تشرح طرق مختلفة للزراعة ... أنا ليس لدي أهتمام دراسي بأشجار الفواكه .. دا تخصص قائم بذاته في علوم الزراعة يسمى Horticulture وأتمني أن يمر أنسان متخصص في هذا المجال.
بريمة
Post: #51 Title: Re: اجمل فاكهة على وجه الكرة الأرضية Persimmon Author: محمد جلال عبدالله Date: 11-21-2019, 08:05 AM Parent: #50
Quote: حقو نعمل جمعية محبى الكاكا و القشطة
وبمناسبة القشطة دي يا النصري بتذكر قبل 6 سنة كنت نزلت السودان وفي السوق المركزي الخرطوم لقيت بتاع درداقة خاتي قشطة وأداني ضوقتا وكانت نجيضة شديد ولينة وسكر سكر من شدة السكر الفيها تقول حلاوة هريسة .. السكر بجيك مارق كده زي حبيبات السكر العديل .. ما قادر أشرح لكن أظن الرسالة وصلت .. المهم يا زول اشتريت لي منها كم كيلو ووديتا البيت وطلعتا ما رجعت إلا تاني يوم لأني مشيت نمت عند ناس الوالدة .. المهم لمن جيت تاني يوم لقيتهم قضوا عليها قضاء مبرما لأنو جوهم ضيوف وكان معاهم شفع وحبة واحدي ما خلوها لي (وش باكي) وأنا ما أكلت غير الضواقة بتاعت سيد الدرداقة في السوق، ومنها طوالي سافرت ومن اليوم داك ليوم الليلة ما أكلت قشطة، لكن طعمها لي هسي في خشمي وعشان كده المرة دي وصيت يجيبوها لي وبكرة حا توصلني بإذن الله ..
Post: #52 Title: Re: اجمل فاكهة على وجه الكرة الأرضية Persimmon Author: ياسر السر Date: 11-21-2019, 08:06 AM Parent: #49
فعلا فاكهة جميلة جدا جدا وطعمها اكثر من رائع انا طبعا مغرم بيها لي كم سنة كده والشي الجميل انو الأيام دي في السعودية متوفرة بكثرة وسعرها معقول وامس اشتريت لي كيلو معسسسسسسل هههههههههههههههههه يا ناذر لو ما فاطر ما تخاطر ههههههههههه اشتريها وعلى مسئوليتي ...
تحياتي : ياسر العيلفون .....
Post: #53 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-21-2019, 10:49 PM Parent: #52
شكرا بريمة. شكراعلى الفيديو المفيد.
هل تصدق القشطة الواحدة كنت اشتريها بدولار كندى. كنت انتظر الطيارة تصل يوم الأربعاء مع فيتنام عشان امشى الخميس اشتريها. اتخيل معاى لو كل الأراضى الزراعية المناسبة لزراعة القشطة استغلت لهذا الغرض !!! ممكن نصدر للعالم كله
Post: #54 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-21-2019, 11:08 PM Parent: #53
معذرة القطعة الواحدة خمسة دولارات لا احب تعديل المداخلة
Post: #55 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-22-2019, 01:06 AM Parent: #54
تعرف يا محمد جلال . القشطة دى تنفع لقعدات الونسة ؛ لانك تنقى فى اللب الابيض وسط طن من الحبوب السوداء (البذرة) اذكر ايامها كنا مجموعة من الأصدقاء معظمهم بورداب هنا (منصور المفتاح ، طلعت الطيب و معاوية المدير و دكتور عبد المنعم موسى و عبدالعظيم كودى و شهاب طه) كنا نمشى مطعم سمك هندى ، و بعد الاكل نفتح كيس القشطة ، ناكل و ننقى اللب الابيض اللذيذ و نطلع الحب و نتونس ؛ احتمال القشطة الواحدة تحتاح نصف ساعة عشان تنقى كل الحبوب السوداء التى اظن يصل عددها المئات فى القشطة الواحدة.
حاجة ممتعة فعلا ... ونسة و تنقية و استمتاع بالفاكهة
خلاص نعملةجمعية محبى الفواكه السودانية ؛ الهدف الأساسي to promote زراعة و تسويق الفواكه المحلية و الاجنبية
Post: #56 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-22-2019, 04:25 AM Parent: #55
مرحب ياسر العيلفون مشيت قبل شوية سوبر ماركت جنبنا فى NE اسمه Safeway لقيت النوع المعسل
الصور تحكى
http://
http://
http://
http://
Post: #57 Title: Re: اجمل فاكهة على وجه الكرة الأرضية Persimmon Author: احمد عمر محمد Date: 11-22-2019, 12:43 PM Parent: #56
شكرا يا النصري فعلا فاكهة تستحق الاحتفاء جميلة جدا ةطاعمة لقد فتحت اعيننا على جديد
Post: #58 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-22-2019, 02:44 PM Parent: #57
اهلا أحمد عمر سعيد و الله انها عجبتك. داير الناس كلها تشاركنى فرحتى.
Post: #59 Title: Re: اجمل فاكهة على وجه الكرة الأرضية Persimmon Author: عمر التاج Date: 11-22-2019, 03:17 PM Parent: #58
الكاكه دي ما ضفتها وما قاعد احب الحاجات الغريبة غريبة خاصة في الفواكه الا بكره بجرب واتمني ما تطلع زي اخر واحده اشتريتها وماعرف اسمها طلع طعمها زي القرع الني. في كل الأحوال مافي احلى من الفواكه السودانية، موز كسلا ومنقة شندي ديل من ثمار الجنة، عضوا عليهم بالشلاليف.
Post: #60 Title: Re: اجمل فاكهة على وجه الكرة الأرضية Persimmon Author: احمد عمر محمد Date: 11-22-2019, 03:33 PM Parent: #59
Quote: الفواكه السودانية، موز كسلا ومنقة شندي
للأمانة ياود التاج الفاكهة السودانية فعلا طاعمة جدا بل تحس انك فعلا بتأكل موز ساعة بتكون تأكل الموز وكذلك الالبان لا تغيب نكهتها المميزة عن انفك و ان تشرب حليب البل او حليب البقر. الفاكهة في البلدان الاخرى ليس لها الطعم المميز الذي عرفناه لكل فاكهة لكن نأكلها ونتلقفها من باب العادة. بالنسبة للكاكا و لا البريسموون حقت النصري انصحك تلحق الموسم اول مرة ااكل فاكهة وانا اصرخ لجمال طعمها بالجد، بس على قول النصري ان شاء الله تقع ليك واحدة ام فانيلا الملكية وابعد من حق البرولتاريا حسب كلامو. تحياتي
Post: #61 Title: Re: اجمل فاكهة على وجه الكرة الأرضية Persimmon Author: Dr. Ahmed Amin Date: 11-22-2019, 04:23 PM Parent: #60
غايتو يا النصري الناس تذوقهم بختلف انا اشتريتها قبل سنة وما عجبتني ولا عجبت الاولاد... ومن ديك ما قربنا منها هههههههههه
ما حبيناها كلو كلو
Post: #62 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-22-2019, 05:32 PM Parent: #61
يا عمر التاج لو محظوظ تلقى النوع فى الصور الأخيرة... ملمسها زى الطماطم ؛ حلوة حلاة عجيبة. لو حظك نحس تلقى النوع زى التبش
Post: #63 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-22-2019, 05:33 PM Parent: #62
يا دكتور ادينا فرصة تانية. فتش للسلالة الذهبية... غالبا تكون وقعت فى النوع المر البحرق الشلاليف. جرب تانى و اتاكد من الفصيلة
Post: #64 Title: Re: اجمل فاكهة على وجه الكرة الأرضية Persimmon Author: محمد أبوالعزائم أبوالريش Date: 11-22-2019, 06:12 PM Parent: #63
دي يا النصري فاكهة الكاكا (إسمها ما سياحي) وهي فعلاً جميلة. أهل الخليج بيستوردوها غالباً من أيران وبعض الدول الأخرى.
رغم جمالها، لكن حكاية (أجمل فاكهة) دي ... أصبر وأعمل جولة في فواكه الشرق الأقصى، حتعرف إنه (حواء الفواكه والدة).
تحياتي
Post: #65 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-22-2019, 06:47 PM Parent: #64
طبعا يا ابوريش لم نكتشف كل عالم الفواكه البديع لكن قدر الجربناه ؛ الكاكا هى الأولى. لكن اقول ليك كلام !! قد يكون هناك منافس قوى جدا ليها ؛ ما حاتصدق شنو ؟
الدليب ؛ ياخ انا بهاتى للدليب ده من سنة 80 و كنت شايفه اجمل فاكهة سودانية. ان شاء الله عند زيارتى المرتقبة السودان حافتش الدليب ده لغاية سقط لقط.
--- وبالنسبة للفواكه الآسيوية ؛ هناك مئات و احتمال الاف الأنواع لم نسمع بها ؛ الحل الوحيد الزول يسافر هناك ؛ فكرت فى السفر لتايلاند ؛ صاحبى قال لى ده بلد شبهة 😂 ابعد عنها
Post: #66 Title: Re: اجمل فاكهة على وجه الكرة الأرضية Persimmon Author: قسم الفضيل مضوي محمد Date: 11-22-2019, 06:49 PM Parent: #64
. سلامات ... النصري وشركاؤه... بعد تعرشوا بوست التحلية دا .. نرجو فتح بوست يبحث في اسباب اقبال الشعب السوداني على الكافيار * ... ودمتم ... . .. . * الحقوق لي م ح المشرف ...
Post: #67 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-22-2019, 07:25 PM Parent: #66
اهلا قسم الفضيل خلاص قربنا نعرش و احتمال نكون هدينا الف سودانى لطريق الكاكا المستقيم.
اى حاجة من البحر ما نافعة ماعدا أسماء المياه العذبة مثل البلطى.
أكلت اخطبوط فى مطعم مشهور فى اونتاريو قبل كم سنة ، جسمى كله ولع نار ، حساسية و كاروشه ، توبة تانى من الأخطبوط ..اما الكافيار بيض السمك لو كتلونى ما اكله
Post: #68 Title: Re: اجمل فاكهة على وجه الكرة الأرضية Persimmon Author: أبوذر بابكر Date: 11-23-2019, 07:26 PM Parent: #1
النصرى والرهط السمحين
طبعا يا نصرى الفواكه دى مجالى انا
ياها عمارى
ههههه
ما خليت فاكهة فى هذا الكوكب إلا ضقتها
اكتشفت انه أجمل فاكهة الأرض هى الفواكه الإستوائية
زى ما قلت ليك فى حوامتى بين القارات اول شى بفتش ليه هو الفواكه
طبعا لا عندى شغلة بى لحوم ولا يحزنون
تصدق بعد ده كله ما لقيت أجمل و أشهى من الموز
ياخ الموز ده إبداع الهى ب الجد
موز الله والرسول ده
هههههه
فاكهة مسالمة وشهيه وهديه ورضيه
حلوه ومفيده
عايزك بالله تعيد اكتشاف هذا الموز البديع
Post: #69 Title: Re: اجمل فاكهة على وجه الكرة الأرضية Persimmon Author: Hafiz Bashir Date: 11-24-2019, 05:44 AM Parent: #68
أقر وأعترف أنا مولاكم حافظ بشير بأنه قد تم تدقيسي عند شرائي للكاكا في المرة السابقة. وعليه فقد تم إعادة تصنيفها مع الفواكه اللذيذة في المركز الثاني عشر بعد الكيوي مباشرة بدرجة 10/5.3. يظل البرتكان أبو صرة في المركز الأول بدرجة 10/10.
Post: #70 Title: Re: اجمل فاكهة على وجه الكرة الأرضية Persimmon Author: محمد أبوالعزائم أبوالريش Date: 11-24-2019, 08:45 PM Parent: #69
شايف أكتر من واحد إتكلم عن (القشطة) ... يا جماعة القشطة فاكهة موجودة في السودان ... نعم ما منتشرة، بس موجودة ... شخصياً علاقتي بيها قديمة من ما وعيت على الدنيا.
Post: #71 Title: Re: اجمل فاكهة على وجه الكرة الأرضية Persimmon Author: النصرى أمين Date: 11-30-2019, 06:29 PM Parent: #70
شكرا ابوذر و حافظ وابوريش على المرور.
الأيام دى استمتاع شديد. نازل ب كاكا طالع ب كاكا. امبارح مشيت السوبر ستور لقيت النوعين الصغار و الكبار
اشتريتهم الاتنين ابوالرخا. و اخر استمتاع . الصورة توضح النوعين
