رئيس الوزراء حمدوك .. من أي ولاية ومحلية .. في السودان (جائزة)

01:24 PM November, 16 2019

سودانيز اون لاين
Biraima M Adam-أمريكا الشمالية
مكتبتى
رابط مختصر

أها الحشاش يملأ شبكتو ..!

الجائزة كتاب .. وسوف تعلن اللستة للكتب لاحقاً ..

بريمة

علم لا ينفع

مالك ما تميتها:
علم لا ينفع وجهل لا يضر ..

من القائل لهذه المقولة المشهورة .. من يعرف برضو له جائزة .. أها الجوائز كترت.

بريمة

والله يا بريمة يا خوي بستغرب في زول عايش في الغرب حيث المساواة وتلقى تعليم في مؤسسات عالمية وعايش أفضل حالات التحضر الإنساني ورغم كدة لسة بقيس الناس بي جهاتم وألوانهم!!
لما الناس أجمعت على حمدوك بسبب سيرته الاقتصادية
ما كان عندو أولاد أهل ولا قبيلة بسوقوا ليه عشان يبقى الرئيس منهم

حسي عليك الله أنا سوقت ليه؟ .. يا أخ رئيس الوزراء كان راعي غنم فاشل ساكت .. أنا سرحت أحسن منه، أنا سرحت بالغنم وترقيت وسرحت البقر .. سنين عددا ..
وهو هرب من السرحة وجري للمدرسة ..
وأنا بسرح وبمشي المدرسة ..
لكن هو شاطر بقي شيوعي !

بريمة

ما سوقت لي حمدوك وإنما بتسوق لي حميدتي

أنا داعم لي حمدوك ومؤيد ليه بدون ما أعرف منطقته في السودان
ما فارقة معاي نهائي يكون من العمارات ولا ام طرقاً عراض
ملفات التقسيم الجهوي دي ما نازلة في سيستمنا .. أي سوداني بشتغل معاهو

كانسان فى القرن الواحد وعشرين يهمنى (فقط) اعرف جهه انتما سودانى زى لما يعبر عن جهتو بواسطه ثقافتو وفنو.
انا ابن معلم ايام انتقال المعلم من اقصى السودان الى اقصاه وبعض حياتى فى المدينه اعرف جارى فى الحى او زميل الدراسه دون انتباه او اهتمام لتمييزه عن الاخرين بمعرفه اصولو القبليه او الجهويه
لمن اين حمدوك ؟
قراتها عرضا فى بدايات تقلده لرئاسه الحكومه وانسانينها الله كما انسى دائما مايتعلق بهذا الامر ويكفى انو نعلم انو سودانى وتمييزكل سودانى عن الاخر بانجازه وعلمه
تحياتى

بريمة اعرض عن هذا

Khalid Abbas
شنو أعرض عن هذا؟
دي مؤهلات .. أنا جايبها من بيتنا .. حزت عليها بجدارة .. أنظر الأتي:

Quote: حسي عليك الله أنا سوقت ليه؟ .. يا أخ رئيس الوزراء كان راعي غنم فاشل ساكت .. أنا سرحت أحسن منه، أنا سرحت بالغنم وترقيت وسرحت البقر .. سنين عددا .. وهو هرب من السرحة وجري للمدرسة .. وأنا بسرح وبمشي المدرسة .. لكن هو شاطر بقي شيوعي ! بريمة

الثروة الحيوانية ثاني أكبر دخل في ميزانية السودان قبل البترول وبعد أنفصال الجنوب .. ما ياهو أنا رجل أقتصاد .. مربي بقر تقول لي أليس هي مؤهلات؟ أتعجب من هؤلاء.

بريمة

Quote: أنا داعم لي حمدوك ومؤيد ليه بدون ما أعرف منطقته في السودان ما فارقة معاي نهائي يكون من العمارات ولا ام طرقاً عراض ملفات التقسيم الجهوي دي ما نازلة في سيستمنا .. أي سوداني بشتغل معاهو

برضو رأي .. لكن ما ح تلقي الكتاب ..

بريمة

Quote: قراتها عرضا فى بدايات تقلده لرئاسه الحكومه وانسانينها الله كما انسى دائما مايتعلق بهذا الامر ويكفى انو نعلم انو سودانى وتمييزكل سودانى عن الاخر بانجازه وعلمه تحياتى

أتأكد المعلومة التى أعطوها لك غلط .. سبب البوست كل ما ورد عن منشأ سيادة رئيس الوزراء كان خطأ .. عشان كده أنا وضعت جائزة لهذا السبب.


بريمة

غلط ولا صاح هل سيؤثر لك على انتمائه للسودان ؟ او يميزه كمواطن عن باقى المواطنين ؟

Quote: غلط ولا صاح هل سيؤثر لك على انتمائه للسودان ؟ او يميزه كمواطن عن باقى المواطنين ؟

معقولة .. هل صار الإنتماء مسبة؟ .. لقد سمعت أناس كثر يرمون بانتماءاتهم .. تهرباً من دفع أستحقاقات الأنتماء .. كالمدارس التي تبني بالعون الذاتي والخدمات العامة ..

لن يكن عندي الأنتماء مسبة .. أفخر بجذوري كما أفخر بسودانيتي ..

يا أخوانا أنا فينى دماء نوبية ..

بريمة

أنا في المنبر دة شفت حملات تبرع كتيرة جداً
ولا واحدة فيهن ما كانت حصرية على سكان منطقة معينة

بعدين الشئ البعرفو العون الذاتي دة بتعمل جوة الحلة وبتصلو بالمغتربين بالإسم .. يعني مافي طريقة نكران .. البدفع بدفع والما عندو أو ما داير مافي زول بجبره
فالحنك بتاع زول ينكر حلته عشان ما يدفع قروش مدرسة دة ما بأكل عيش والله

ما تقول افتخر بجذوري كما افتخر بسودانيتي لأنه انت عندك العالم مقسوم على اتنين اولاد بحر واولاد غرب
بعدين الافتخار دة منطقه شنو؟ يعني فينا واحد اختار قبيلته ولا مسقط رأسه؟ بتفهم زول يفتخر بحاجة جابها بمجهوده الشخصي لكن يفتخر بحاجة جاته كدة من الله ما عندو يد فيها !!
دة غير انه الافتخار في معرض مواقفك دة بتحسب احساس بالتميز عن باقي المكونات السودانية ودي ياها العنصرية الأمها بت عم ابوها

أتمنى من خلال البوست دة تكون فهمت إنك الوحيد المهتم بالجهوية والسودانيين كلهم ما فيهم زول مشغول بأهل الوزير فلاني وحلة عضو المجلس السيادي الفلاني .. الناس ارتقت بفهمها بعيداً عن المناطقية بتاعتك دي يا بريمة وانت لسة شايل رايتها وحايم بيها

يا عنصري وفتّان .... كل الأهل سودان

يا بريمة . دي انتكست فيها وجليت الكورة نفسها ... خليك من إنك تشوتها وتضرب في العارضة. لو كنت مكانك بسحب البوست دا. كلنا عارفين حمدوك وتفاصيلو والما كان عارف عرف من أول يوم. المعلومات مفروشة في الشارع. كلم أب صلعة يسحب البوست واعمل فيها إنك ما كتبتو ولا عندك بيهم علم. وغيّر الموضوع.

هنا خيارات الكتب:
الخيار الأول واحد مؤلفاتي الشخصية
1. Baggara of Sudan: Culture and Environment
2. Baggara of Sudan: Marriage Culture and Traditions
3. Baggara of Sudan:Amazing Tea Culture and Traditions
4. Baggara of Sudan: Humor and Folktales

الخيار الثاني:
1. Fundamentals of Marketing
by Sommers, Barnes and Stanton
2. Social Psychology by Baron and Byrne
3. Contemporary Business and E-Commerce Law by Cheeseman

الخيار الثالث
كتب البرمجة ..
Java
JavaScript
Spring Framework
Struts 2 Framework
Hibrnate Framework
and

Others

في كلمة Others ممكن تعلمني بتخصصك وأنا أبحث في مكتبتي,

اعملوا بحث عن هذه الكتب في الأنترنت ..

أها أنا جادي ولا بهظر ..!

بريمة

شروط المسابقة

أي زول أنتقد هذا البوست .. راسب في كسب الجائزة ..
أول واحد فيهم أبو العزائم وأمثاله ..
ومن حق صاحب الجائزة أن يضيف شروط أخري .. مثلاً أن يقسم أن الأمر من الرأس وليس من الكراس.

شافين كلما تشدد بنو أسرائيل تشدد الله معهم .. من أذبحوا بقرة، إلي لونها صفراء تسر الناظرين ... قَالَ إِنَّهُ يَقُولُ إِنَّهَا بَقَرَةٌ لَّا ذَلُولٌ تُثِيرُ الْأَرْضَ وَلَا تَسْقِي الْحَرْثَ مُسَلَّمَةٌ لَّا شِيَةَ فِيهَا ۚ قَالُوا الْآنَ جِئْتَ بِالْحَقِّ ۚ فَذَبَحُوهَا وَمَا كَادُوا يَفْعَلُونَ.

كلما إزداد النقد تزداد الشروط ..

بريمة

تنتهي المسابقة غداً مثل هذا الوقت ويتم الفرز للفائزين.

بريمة

حبابك بريمة ..

السيد رئيس الوزراء حمدوك من قبيلة كنانة..

ومن ولاية جنوب كردفان ..

أها بستحق الجائزة ولا الإجابة بندق في بحر؟

الأخ عادل

وصلت الأجابة ..

Good luck

بريمة

من شروط المسابقة .. أن ينزل المتسابق مداخلة واحدة فقط .. في حال نزول أكثر من مداخلة تأخذ أول مداخلة.

كما أنوه أن أي تصحيح غير مقبول وتلقي المداخلة.


أها الحشاش يملأ شبكتو ..



بريمة

من شروط المسابقة:

أذا فاز بالجائزة أكثر من شخص .. تجري بينهم القرعة في حضور شهود عدل.

بريمة

Quote: الثروة الحيوانية ثاني أكبر دخل في ميزانية السودان

حتى وصل صادرها "الولايات المنحدة الأمريكية"

انتو دحين لمان جو يقسمو مجلس السيادة مش الناس قالت لازم كل إقليم ينال حظو

ما شايف الناس تكالبت على ق ح ت كما تكالبت على باحثي المفضل بريمة

ما في حاجة لو عرفنا انو حمدوك من ولاية نهر النيل محلية الشريك

بعدين بذمتكم جميعا
الوحد لو في الغربة مثلا لاقاه سوداني وقعد يتونس معاه
ماهو الس}ال الاهم؟
اليس
- من وين في السودان ياخينا في السودان؟
- والله ياخي من حته جنب ام روابة اسمها الزهامير
- ايواااه. تعرف ياخي واحد قرا معانا من ام روابة اسمو خالد سيد احمد؟
- والله ياخ الاسم دا ماغريب علي

طيب ورونا شنو العنصرية في الونسة دي عشان نردم ليكم بريمة ردم السيح والريح

Quote: الس}ال

السؤال

ود االشيخ،

سلام .. يا أخي ما كان تجاوب ممكن تشيل الكتاب .. الناس ديل حرقتهم حكاية راعي غنم .. معلومة صحيحة .. ونحن نفتخر بالرعي.

بريمة

براك جاوبت على روحك يا محمد الشيخ
(من وين ياخينا) غرضها إيجاد معارف مشتركة تفتح ونسات اجتماعية ومن ثم تجمع الناس كلهم في دائرة واحدة
لكن ما عشان أحدد مستواهو الاجتماعي أو الأكاديمي أو أي مؤهلات أخرى
لكن في سياق بريمة ما عندها معنى غير (حمدوك منا آل البيت) ودي بتفرق ما بتجمع

Quote: ما في حاجة لو عرفنا انو حمدوك من ولاية نهر النيل محلية الشريك

عشان كدة قلنا مافي حاجة للمعرفة دي من أساسه

Quote: طيب ورونا شنو العنصرية في الونسة دي

العنصرية في نتيجة بريمة الجاهزة المنتظرة زول يقول ليه السلام عليكم عشان يضعها كنتيجة

Quote: الناس ديل حرقتهم حكاية راعي غنم

عاطف عمر بتاع الفيسبوك
شنو يا حبيب!انت خليت العالم دي كلها وقبلت علي؟
ياخي انت حافظ المنبر صم معقول ما عارف محل سمينة وين!
أها النكلمك عاوز تشتهر في المنبر دة والعالمين تتفرغ للرد علي مداخلاتك لخ المستنير ابوبكر والله صحي :)
داك عنده كمية ضخمة من الأصحاب والمعجبين والمريدين والحواريين بهبوا للدفاع عنه وما بعيد تلقى خمسة بوستات بي اسمك :)
لكن تقع أحمد المسيكين دة وحاة الله أنا ذاتي ما بهب للدفاع عني خلي الباقين




.

Quote: الناس ديل حرقتهم حكاية راعي غنم

سبحان الله .. يا أخي الرسول كان ودوه البادية يرعي الغنم .. وأبناء الصحابة ..
وبعدين شنو حكاية عنصرية دي .. هي بقت موضة ولا شنو؟ .. أول كتاب في لستة الكتب .. تجد فيه خلفية رعوية كاملة عني .. والبقية في كتاب الفكاهة ..


أمنت بالله رباً وبمحمد نبياً ورسولاً ..

بريمة

Quote: حمدوك منا

ما فيها حاجة لو واحد افتخر بان منطقتو وليست قبيلتو انجبت فلان.

ياخي نحن أناس غرب الدامر ديل بنفتخر ببروف عبد الله الطيب ايما افتخار
ولا علاقة هنا للعرق او القبيلة لانو الانساب تداخلت
بل ممكن الواحد كمان يديها كوز ويفتخر بقبيلتو عديل دون التنافس العرقي مع الآخرين وادعاء نوع من ال superioroty

حمدوك من الدبيبات ولاية جنوب كردفان

لكنه أكبر من الدبيبات وجنوب كردفان فهو رجل بمساحة السودان القديم
واظنه حوازمي

دعها يا بريمة فإنها منتنة مشكلة السودان اكبر من ده من وين وداك من وين

وده قبيلته شنو

أها يا بريمة .... في كم واحد شاركوا في المسابقة؟
باقي لي ما بتحتاج فرز .... وزّع ليهم البتاعات وخلاص.

Quote: أي زول أنتقد هذا البوست .. راسب في كسب الجائزة .. أول واحد فيهم أبو العزائم وأمثاله ..

كده أنا اتحرمت بشكل نهائي والا في طريقة استئناف؟
بعدين كدي أشرح لي (راسب في كسب الجائزة) دي كيف؟
ما هو يا راسب في الإجابة .... يا محروم من الجائزة، لكن (راسب في كسب الجائزة) دي أتمنى ما تكون كتبت كتبك بنفس اللغة.

أبو العزائم،
أنا ما عارف أنت متحاوم بهنا ليه؟ .. أنت ما عندك جائزة .. وكتبي لو أختها في صندوق ال (دونيشين) ما بتلقاها.

خلاص يا أخي أطلع شوف ليك محلة تانية تبرطع فيها كما تشاء

بريمة

حسب ما سرد عنه وليس بمعرفة شخصية حمدوك من الدبيبات .. جنوب كردفان

أها الدبيبات دى أنا زرتها .. إنت شفتها؟

سلام يا حبيبنا بريمة وضيوفه الكرام، ما عارف ليه الناس حملت كلام بريمة اكتر ما يحتمل، ما عيب إننا نحدد جايين من أي منطقة في السودان للتعارف، لكن العيب هو عدم إعترفنا بتنوعنا، المهم هو ان نقبل ونتعايش مع بعضنا البعض بتنوعنا، التنوع ثروة.

نجي لسؤالك يا بريمة، شخصيا مازلت لا أعرف السودان بالتقسيم الإداري الجديد، مازلت أعرفه بالأقاليم الستة القديمة.
وأعتقد إنو حمدوك بقاري او بديري دهمشي
وهو من إقليم كردفان
غايتو نحن عيال الجلابة في الخرتوم كل القبائل العربية من بعد سوق ليبيا وإنت ماشي غرباً بنقول عليهم بقارة
ما عارف الفهم دا صحيح أما خاطئ، ياريت تصححو لينا
وبالمناسبة البديرية والمناصير مقسمومين بين الجلابة في الشمال والبقارة في غرب السودان.

حباب بريمة
دكتور حمدوك من ولاية جنوب كردفان قرية الدبيبات لكن ما عندى علم بالمحلية

Quote: أنا ما عارف أنت متحاوم بهنا ليه؟ .. أنت ما عندك جائزة .. وكتبي لو أختها في صندوق ال (دونيشين) ما بتلقاها.

خلاص قنعت ...
بس أعمل فيني معروف واشرح لي (راسب في كسب الجائزة) يعني شنو.

إنتهت المدة ...

ولم يفز أحد ..


هل رأيتم سؤالي لكم .. كيف أشكل علي فطاحلة البورد .. أكتر زول الموضوع محرقة أبو العزائم .. ظهرتم ما عارفين السودان ناهيكم عن رئيس الوزراء.


بريمة

Quote: ظهرتم ما عارفين السودان

ما هذا يا عِكرِمة

جاغو،

مازلت مباري البوست دا .. أنت ما عندك شغلة؟!

بريمة

Quote: مازلت مباري البوست دا .. أنت ما عندك شغلة؟!

بتعلم في اللغة العربية!

المعلومة الصحيحة ..
رئيس الوزراء السيد حمدوك من ولاية جنوب كردفان، محلية القوز .. (رئيس الوزراء حمدوك، القائد عبد العزيز الحلو، والسيادي د. صديق تاور .. جميعهم من نفس الولاية)

هنا المحليات في حنوب كردفان:
رقم المحلية حاضرة المحلية
1 الدلنج الدلنج
2 رشاد رشاد
3 أبو جبيهة أبو جبيهة
4 تلودي تلودي
5 كادقلي كادقلي

أضيفت إليها محليات:

السلام
القوز
كليك
هبيلا
دلامي
برام
هيبان
أم دورين
الريف الشرقي
العباسية

محلية القوز تقع في الأجزاء الشمالية لمحلية الدلنج سابقاً (الرقم 1 في الخرطة المرفقة)



بريمة

بريمة انت ما عنصري.
يلا في المقابل شيلني من قائمة الكرور.

ول أبا عوضة،

Quote: بريمة انت ما عنصري. يلا في المقابل شيلني من قائمة الكرور.

الله يخليك يا عوضة ويكتر من أمثالك .. رسمياً تم رفع أسمك من قائمة الكرور ..
وبدلاً عنك أضيف للستة الكوكلكس كلان عادل أمين .. دا أكتر من كرور ..

بريمة

وقع خطأ في موسوعة ويكيبديا في أسم إحد المحليات في جنوب كردفان ..

Quote: كليك

الصحيح هو محلية "كيـلك".

بريمة