نشيد في غاية الروعة والجمال والفاعلية الوجدانية من حيث الكلمات واللحن .. كان يمكنه المنافسة بقوة ليصبح النشيد الوطني القومي الذي يردده الجميع وكذلك التلاميذ في طابور الصباح .. ولكن حرمته الابيات التالية من الفوز بالصفة القومية .. نزحوا لا ليظلموا أحدا لا و لا لإضطهاد من أمنوا و كثيرون في صدورهم تتنزى الأحقاد و الإحن دوحة العرب أصلها كرم و إلى العرب تنسب الفطن أيقظ الدهر بينهم فتنا و لكم أفنت الورى الفتن لو في طريقة لتعديل الأبيات دي أو اهمالها بكون النشيد دا مؤهل تماما لتمثيل القومية السودانية.. رأيكم شنو؟
Quote: الشاعر:- محمد عثمان عبد الرحيم أنا سوداني أنا أنا سوداني أنا كل أجزائه لنا وطن إذ نباهي به و نفتتن نتغنى بحسنه أبدا دونه لا يروقنا حسن حيث كنا حدت بنا ذكر ملؤها الشوق كلنا شجن نتملى جماله لنرى هل لترفيه عيشه ثمن خير هذي الدماء نبذلها كالفدائي حين يمتحن بسخاء بجرأة بقوى لا ينئ جهدها و لا تهن تستهين الخطوب عن جلد تلك تنهال و هي تتزن أيها الناس نحن من نفر عمروا الأرض حيث ما قطنوا يذكر المجد كلما ذكروا و هو يعتز حين يقترن حكموا العدل في الورى زمنا يا ترى هل يعود ذا الزمن ردد الدهر حسن سيرتهم ما بها حطة و لا درن نزحوا لا ليظلموا أحدا لا و لا لإضطهاد من أمنوا و كثيرون في صدورهم تتنزى الأحقاد و الإحن دوحة العرب أصلها كرم و إلى العرب تنسب الفطن أيقظ الدهر بينهم فتنا و لكم أفنت الورى الفتن يا بلادا حوت مآثرنا كالفراديس فيضها منن فجر النيل في اباطحها يكفل العيش وهي تحتضن رقصت تلكم الرياض له و تثنت غصونها اللدن و تغنى هزارها فرحا كعشوق حدا به الشجن حفل الشيب و الشباب معا و بتقديسه القمين عنوا نحن بالروح للسودان فدا فلتدم أنت أيها الوطن
Post: #2 Title: Re: النشيد دا والله قمة ولكن ! Author: أبوبكر عباس Date: 11-14-2019, 01:50 AM Parent: #1
Quote: رأيكم شنو؟
إنّا جعلناكم منّا
Post: #3 Title: Re: النشيد دا والله قمة ولكن ! Author: جلالدونا Date: 11-14-2019, 02:02 AM Parent: #2
ح يجيك اخونا دينق و يتهمك بالعنصرية بالذات بعد المداخلة الكارثة ... جعلناكم ....
Post: #4 Title: Re: النشيد دا والله قمة ولكن ! Author: محمد على طه الملك Date: 11-14-2019, 02:11 AM Parent: #3
Quote: إنّا جعلناكم منّا
يا بكور قالوا كان ذكركم جا في القرآن .. ( وَجَعَلْنَاكُمْ شُعُوبًا وَقَبَائِلَ ).. والله النشيد فيه معاني تمجيدية رائحة للسودان والسوداني لو ما الكم بيت ديل .. شفو طريقة ليهن ياخي .
Post: #6 Title: Re: النشيد دا والله قمة ولكن ! Author: محمد على طه الملك Date: 11-14-2019, 02:12 AM Parent: #4
Quote: ح يجيك اخونا دينق و يتهمك بالعنصرية
لالا يا جلالدونا .. بعد نشطب ليهو الابيات دي ما عندو كلام تاني.
Post: #5 Title: Re: النشيد دا والله قمة ولكن ! Author: جمال ود القوز Date: 11-14-2019, 02:12 AM Parent: #3
نشيد جميل مولانا الملك .. الواحد بيستغرب البعض بيتحسسوا منه ليه .. ؟!.. كل زول عايز يفتخر اليفتخر المانعوا منو ! ..
الكلمات قمة واللحن أكثر من رائع .. من الأناشيد او الأغاني التي تطربني .. تحسس الزول بالوطنية والانتماء لهذا البلد ..
Post: #7 Title: Re: النشيد دا والله قمة ولكن ! Author: محمد على طه الملك Date: 11-14-2019, 02:18 AM Parent: #5
Quote: الكلمات قمة واللحن أكثر من رائع .. من الأناشيد او الأغاني التي تطربني .. تحسس الزول بالوطنية والانتماء لهذا البلد ..
والله أنا ذيك يا قريبنا .. مافي حساسية مفرطة لكن خلينا نفكر ونعطي النشيد فرصة ياخد صبغة قومية تمثل كل السودانيين .. وما ظنيت دي عقبة صعبة خاصة وأن جل أبيات النشيد تتضمن معناني السودانوية.
Post: #8 Title: Re: النشيد دا والله قمة ولكن ! Author: محمد على طه الملك Date: 11-14-2019, 02:28 AM Parent: #7
Post: #9 Title: Re: النشيد دا والله قمة ولكن ! Author: محمد على طه الملك Date: 11-14-2019, 02:35 AM Parent: #8
برضو اسرا بابكر اجادت الأداء ..
Post: #10 Title: Re: النشيد دا والله قمة ولكن ! Author: ترهاقا Date: 11-14-2019, 03:48 AM Parent: #9
مولانا والضيوف الكرام مع تحفظي عن بعض كلمات القصيدة إن صح التعبير أنا عزفت مع الراحل المقيم وأنا طالب في مدرسة عطبرة الحكومية والنشيد ده ما كان بيتغنى بيهو المرحوم في المناسبات الوطنية فقط ، بل مرات الناس كانت بتطلب إنو المرحوم يغنيهو مرة تانية ، والحاجة دي في مناسبات الزواج والذي منو ما في مسرح طلعتو في عطبرة مع الراحل المقيم ما عزفت فيهو أنا سوداني ولكم الود
Post: #11 Title: Re: النشيد دا والله قمة ولكن ! Author: خضر الطيب Date: 11-14-2019, 04:27 AM Parent: #10
انا كنت بسمعا من سيدا محمدعثمان عبد الرحيم
Post: #12 Title: Re: النشيد دا والله قمة ولكن ! Author: خضر الطيب Date: 11-14-2019, 04:28 AM Parent: #11
Post: #13 Title: Re: النشيد دا والله قمة ولكن ! Author: ترهاقا Date: 11-14-2019, 04:33 AM Parent: #12
Quote: انا كنت بسمعا من سيدا محمدعثمان عبد الرحيم
والله الحاجة دي تحفة تاريخية يا استاذ خضر
Post: #14 Title: Re: النشيد دا والله قمة ولكن ! Author: أحمد محمد عمر Date: 11-14-2019, 08:05 AM Parent: #13
طبعاً عنصري بامتياز وما عندو علاقة بالقومية
Quote: أيها الناس نحن من نفر عمروا الأرض حيث ما قطنوا
الشاعر بينسب نفسه صراحة للمهاجرين العرب اللي استقروا في السودان
Quote: نزحوا لا ليظلموا أحدا لا و لا لإضطهاد من أمنوا
يعني بيمجد فئة معينة من الشعب وهي المقتنعة بإنها جات مهاجرة من الجزيرة العربية واستقرت في السودان عشان تنشر الفطنة العربية وبتاع
Post: #15 Title: Re: النشيد دا والله قمة ولكن ! Author: محمد على طه الملك Date: 11-14-2019, 10:38 AM Parent: #14
Quote: مع تحفظي عن بعض كلمات القصيدة إن صح التعبير أنا عزفت مع الراحل المقيم وأنا طالب في مدرسة عطبرة الحكومية والنشيد ده ما كان بيتغنى بيهو المرحوم في المناسبات الوطنية فقط ، بل مرات الناس كانت بتطلب إنو المرحوم يغنيهو مرة تانية ، والحاجة دي في مناسبات الزواج والذي منو ما في مسرح طلعتو في عطبرة مع الراحل المقيم ما عزفت فيهو أنا سوداني
ياسلام يا قريبنا .. بما إنك عزفت مع القمم دي العطبراوي ووردي وكابلي وغيرهم .. مفروض تكون في قيادة اوركسترا السودان .. القصيدة دي كلماتها عجيبة ثورية بمعنى الكلمة ولحنها على بساطو محفز للمشاعر الوطنية .. يا ريت الناس تفكر بجدية لتلافي التحفظات حتى يجد النشيد مكانه في تمثيل كافة القوميات .. مودتي.
Post: #16 Title: Re: النشيد دا والله قمة ولكن ! Author: محمد على طه الملك Date: 11-14-2019, 11:57 AM Parent: #15
Quote: انا كنت بسمعا من سيدا
عارف يا خضر الشاعر دا على الرغم من أنو سيرته تشير بأنه كان من الرعيل الأول لمؤتمر الخريجين .. وعنده ديوان شعري لكن النشيد دا بالذات اتقطع فيه وكان سبب شهرته .. مافي إنسان مكمل وفي أحيان كثيرة الإنسان بعبر عن ذاتيته الفردانية أو ذاتية مجموعته ودي ما فيها حاجة .. بس عشان تسبق على عمل ما الصفة القومية لابد من مراعاة مقيايس معينة .. من هنا انا بقول ما ظنيت النشيد يفقد روعته وقوميتو لو تمت معالجتو.. رحمه الله وأحسن إليه .
Post: #17 Title: Re: النشيد دا والله قمة ولكن ! Author: محمد على طه الملك Date: 11-14-2019, 12:01 PM Parent: #16
Quote: طبعاً عنصري بامتياز وما عندو علاقة بالقومية
هههه غايتو يا أحمد محمد عملتها واااضحة .. ما بنختلف .. كدا فط الأبيات دي وراجع بتلقى النشيد معبر بامتياز عن الكل .. بعدين اصلا شبابنا في ثورتهم الاخيرة دي جونا رافعين شعار تشريح الذاكرة السودانية وأعادة تقويم المسارات .. وجرت العادة بين الملحنيين والمؤدين ما يلتزمو باداء كل ابيات القصيدة التي يعالجونها .. و أحيان كثيرة بعدلون بعض كلماتها.. حقو من المدخل دا نفكر في compromising quality للنشيد عشان ياخد صبغة تمثل الجميع .. في ظني نشيد يستحق أن يجد مكانتو القومية في النفوس.. مودتي.
Post: #18 Title: Re: النشيد دا والله قمة ولكن ! Author: Ahmed Yassin Date: 11-14-2019, 12:01 PM Parent: #15
ودالعمدة وشركاه النشيد بيدي دفعة وطنية لاي سوداني...واللحن واداء العطبراوي بيديك دفعة حنان.. لتراب هذا الوطن.... لمن تسمع صوت العطبراوي ( الباص) وهو يرد بى قرار وجواب ( يا بلاااااااااااااادى ى ي ي ي....يا بلااااااااااااااد ى ى ي ي ى ى ى) يا بلادي..ً وضع في النشيد القيم والاخلاق الحميدة وتاريخ وجغرافيا السودان الراحل محمدعثمان رغم بلوغه المائة عام الا انه مان متقد الذهن وحافظا لاشعاره ...وكان يسمع جيدا. له الرحمة والمغفرة...كان وطنيا و قويا وصلبا ..منذ كان طالبا في كلية غردون وعمره لايتجاوز (١٧) سنة....قال شعري اردت له الحياة فرامها حراً ولم يذعن لها إطلاقاً من شعلة الإلهام يخطر ثائراً برماً يزمجر كالرصاص سباقاً من أجله عجم النكال صلابتي فارتد حيث تعلم الإخفاق قد صغته في الحادثات ملاحماً ولدى السلام نظمته أطواقاً وعليه فهو يسير في أخلاقه يحمي التراث ويحفظ الأخلا
Post: #19 Title: Re: النشيد دا والله قمة ولكن ! Author: عماد الدين الطيب عمر Date: 11-14-2019, 12:45 PM Parent: #1
يا مولانا تحياتي نشيد له كل مقومات الوطنية اذا حذفت منه الابيات المذكورة ح يكون سوداني بحت خالي من اي عنصرية
أنا سوداني أنا أنا سوداني أنا كل أجزائه لنا وطن إذ نباهي به و نفتتن نتغنى بحسنه أبدا دونه لا يروقنا حسن حيث كنا حدت بنا ذكر ملؤها الشوق كلنا شجن نتملى جماله لنرى هل لترفيه عيشه ثمن خير هذي الدماء نبذلها كالفدائي حين يمتحن بسخاء بجرأة بقوى لا ينئ جهدها و لا تهن تستهين الخطوب عن جلد تلك تنهال و هي تتزن
يا بلادا حوت مآثرنا كالفراديس فيضها منن فجر النيل في اباطحها يكفل العيش وهي تحتضن رقصت تلكم الرياض له و تثنت غصونها اللدن و تغنى هزارها فرحا كعشوق حدا به الشجن حفل الشيب و الشباب معا و بتقديسه القمين عنوا نحن بالروح للسودان فدا فلتدم أنت أيها الوطن
قرررررط على كدة و كمان مقطعين بس عشان ما يكون طويل
Post: #20 Title: Re: النشيد دا والله قمة ولكن ! Author: محمد حيدر المشرف Date: 11-14-2019, 12:51 PM Parent: #1
نزحوا لا ليظلموا احدا دي ما فوكها حاجة وان ينسب نفسه للاخوة العرب برضو ما فوقها حاجة ..
الغلط في المطاعنة تتنزى الاحقاد والاحن الح ..
مولانا في عظيم الشوق والله هو النشيد الاروع دونما شك والذي ابكانا كثيرا لاسيما من ديسمبر وانت جاي
لو حذفوا ما تفضلت يكون احسن
Post: #21 Title: Re: النشيد دا والله قمة ولكن ! Author: أحمد محمد عمر Date: 11-14-2019, 01:31 PM Parent: #20
النزوح ما فيه حاجة للشايف روحه جاء السودان نازح لكن الشايف روحه سيد بلد أكيد النشيد ما بعبر عنه يعني بالفهم دة ممكن نصنفه زي أناشيد سكان المخيمات في الأردن
الخلاصة أي نشيد بمجد سلالة معينة لا يمكن اعتباره قومي
Post: #22 Title: Re: النشيد دا والله قمة ولكن ! Author: Osman Awoda Date: 11-14-2019, 04:11 PM Parent: #21
ههههه مولانا قريبي والله انت داير تجيب الهواء لي روحك،،،تتذكر نكتة ست العرقي القالت لي صاحبنا يوم القيامة بشتكيك لي الله؟هسعيتي انت أمرق الكلام شوف لو ما دخلوك السجن بدل صاحبك القشير.وكمان انت قريب للمحكمة لا داير تذاكر سفر ولا حق اللبن
Post: #23 Title: Re: النشيد دا والله قمة ولكن ! Author: جمال ود القوز Date: 11-14-2019, 05:06 PM Parent: #22
تكأكأت عليك الأعراب يامولانا .. ..
Post: #24 Title: Re: النشيد دا والله قمة ولكن ! Author: أحمد محمد عمر Date: 11-14-2019, 06:01 PM Parent: #23
Quote: تكأكأت عليك الأعراب يامولانا
حالتو حاتم لسة ما جاء
Post: #25 Title: Re: النشيد دا والله قمة ولكن ! Author: جمال ود القوز Date: 11-14-2019, 06:17 PM Parent: #24
ياحليلو حاتم يا أبو حميد .. لكن انت فيك الخير والبركة بتعدل المايله .. ( لياقتك ) لسه فل .. شغال ياعمك .. وكان احتجت دعم قول عوووك بنلبس كداراتنا ونجيك ..
مش قال شاعرنا في صدورهم تتنزى الأحقاد والإحن ... وتيب ..
Post: #26 Title: Re: النشيد دا والله قمة ولكن ! Author: محمد على طه الملك Date: 11-14-2019, 06:22 PM Parent: #23
Quote: النشيد بيدي دفعة وطنية لاي سوداني...واللحن واداء العطبراوي بيديك دفعة حنان.. لتراب هذا الوطن.... لمن تسمع صوت العطبراوي ( الباص) وهو يرد بى قرار وجواب ( يا بلاااااااااااااادى ى ي ي ي....يا بلااااااااااااااد ى ى ي ي ى ى ى) يا بلادي..ً وضع في النشيد القيم والاخلاق الحميدة وتاريخ وجغرافيا السودان الراحل محمدعثمان رغم بلوغه المائة عام الا انه مان متقد الذهن وحافظا لاشعاره ...وكان يسمع جيدا. له الرحمة والمغفرة...كان وطنيا و قويا وصلبا ..منذ كان طالبا في كلية غردون وعمره لايتجاوز (١٧) سنة....قال شعري اردت له الحياة فرامها حراً ولم يذعن لها إطلاقاً من شعلة الإلهام يخطر ثائراً برماً يزمجر كالرصاص سباقاً من أجله عجم النكال صلابتي فارتد حيث تعلم الإخفاق قد صغته في الحادثات ملاحماً ولدى السلام نظمته أطواقاً وعليه فهو يسير في أخلاقه يحمي التراث ويحفظ الأخلا
أبو حميد يا فنان .. نعم الرجل كان فارس كلمة والعطبراوي تماها بجملة موسيقية عالية التطريب زي ما بتقولو .. طبعا الاثنين عاصرو مؤتمر الخريجين وساحو فوق منصاتو الأدبية والفنية .. شاركو في الحراك الأدبي السياسي والفني الذي انتظم زمنهم .. عبروا عنه تماما بالطريقة الكانت بتحكم معارف ومزاجات جيلهم . حقيقة في القصيدة دي الاثنين تفوقو على أنفسهم .. ورسمو لوحة فنية مبهرة عن الوطن وإنسانو بكلمات رصينة وقوية و melody آسر .. مودتي. وتحياتي للأسرة الكريمة.
Post: #27 Title: Re: النشيد دا والله قمة ولكن ! Author: محمد على طه الملك Date: 11-14-2019, 06:37 PM Parent: #26
Quote: أنا سوداني أنا أنا سوداني أناكل أجزائه لنا وطن إذ نباهي به و نفتتننتغنى بحسنه أبدا دونه لا يروقنا حسنحيث كنا حدت بنا ذكر ملؤها الشوق كلنا شجننتملى جماله لنرى هل لترفيه عيشه ثمنخير هذي الدماء نبذلها كالفدائي حين يمتحنبسخاء بجرأة بقوى لا ينئ جهدها و لا تهنتستهين الخطوب عن جلد تلك تنهال و هي تتزنيا بلادا حوت مآثرنا كالفراديس فيضها مننفجر النيل في اباطحها يكفل العيش وهي تحتضنرقصت تلكم الرياض له و تثنت غصونها اللدنو تغنى هزارها فرحا كعشوق حدا به الشجنحفل الشيب و الشباب معا و بتقديسه القمين عنوانحن بالروح للسودان فدا فلتدم أنت أيها الوطنقرررررط على كدة
كيفك يا عمدة.. كمان أنت مصرتها شديد ياخي .. كان علي أنا موافق .. بس خلينا نترك حاجة للمستنير ؤ ناس جعلناكم منا
Post: #28 Title: Re: النشيد دا والله قمة ولكن ! Author: محمد على طه الملك Date: 11-14-2019, 07:02 PM Parent: #27
Quote: نزحوا لا ليظلموا احدا دي ما فوكها حاجة وان ينسب نفسه للاخوة العرب برضو ما فوقها حاجة ..
الغلط في المطاعنة تتنزى الاحقاد والاحن الح ..
مولانا في عظيم الشوق والله هو النشيد الاروع دونما شك والذي ابكانا كثيرا لاسيما من ديسمبر وانت جاي
لو حذفوا ما تفضلت يكون احسن
كيفك يا دكتور منك طولة .. والله نحن الأكثر اشتياقا.. صحيح البيتين الذكرتهم تقريريات .. لكن (نزحوا ) دي بالذات مسبوقة بإعلان ربطها بما سبقها من أبيات..
Quote: أيها الناس نحن من نفر عمروا الأرض حيث ما قطنوا يذكر المجد كلما ذكروا و هو يعتز حين يقترن حكموا العدل في الورى زمنا يا ترى هل يعود ذا الزمن ردد الدهر حسن سيرتهم ما بها حطة و لا درن نزحوا لا ليظلموا أحدا لا و لا لإضطهاد من أمنوا
لذلك شملتها مع الأبيات الثلاثة التاليات.. تحياتي للأسرة ومن بطرفكم من الأحباب..
Post: #29 Title: Re: النشيد دا والله قمة ولكن ! Author: محمد على طه الملك Date: 11-14-2019, 07:15 PM Parent: #28
كيفك يا أستاذ عساك بلغت الصحة التامة .. انت لو ما زحيت من شلة ناس أبوحسين وود المدير ما بتشم عافية
Quote: داير تجيب الهواء لي روحك،،،تتذكر نكتة ست العرقي القالت لي صاحبنا يوم القيامة بشتكيك لي الله؟هسعيتي انت أمرق الكلام شوف لو ما دخلوك السجن بدل صاحبك القشير.وكمان انت قريب للمحكمة لا داير تذاكر سفر ولا حق اللبن
هههه .. سجن سجن غرامة غرامة .. لاهاي حقتنا دي زي ما قالن أماتنا ( سجن السرور يا يمة).. الخوف تجيك التعويقة بالغفلة.
Post: #30 Title: Re: النشيد دا والله قمة ولكن ! Author: محمد على طه الملك Date: 11-14-2019, 07:24 PM Parent: #29
Quote: تكأكأت عليك الأعراب يامولانا
ههههه العروب هينين يا ود القوز .. انت بس لو مسكت مني الظرفا الاتنين .. ود محمدعمر وعمه غير الشقيق عاطف عمر من الفيس بعدي بالموضوع.
Post: #31 Title: Re: النشيد دا والله قمة ولكن ! Author: محمد على طه الملك Date: 11-14-2019, 07:39 PM Parent: #30
Quote: حالتو حاتم لسة ما جاء
أبو حميد والله كتر خيرك ذكرتنا بيهو .. الله يطرا بالخير .. ياخي ما تاترو نشوفواغاتس في ياتو web..
Post: #32 Title: Re: النشيد دا والله قمة ولكن ! Author: Kostawi Date: 11-14-2019, 08:17 PM Parent: #30
Post: #33 Title: Re: النشيد دا والله قمة ولكن ! Author: Basamat Alsheikh Date: 11-14-2019, 08:36 PM Parent: #32
نؤيد هذا الاقتراح الرائع بشدة ان يكون نشيد انا سوداني النشيد الرسمي لجمهورية السودان وان يشدو جميع الطلاب في المدارس هذا النشيد الروعة في جميع مدارس السودان عند طابور الصباح .... والله يديك الصحة والعافية ...
Post: #34 Title: Re: النشيد دا والله قمة ولكن ! Author: أبوبكر عباس Date: 11-14-2019, 08:46 PM Parent: #33
Post: #36 Title: Re: النشيد دا والله قمة ولكن ! Author: محمد على طه الملك Date: 11-14-2019, 08:54 PM Parent: #34
يا سلالام يا كوستاوي شباب رائعين والله .. خلاص خلينا نقلبها مسابقة والكل يصوت .. هاك دي كمان خلينا نفتتح احتفالية الذكرى الأولى لثورة الشباب ..
Post: #35 Title: Re: النشيد دا والله قمة ولكن ! Author: أحمد محمد عمر Date: 11-14-2019, 08:52 PM Parent: #33
أوووووو عاطف عمر حبيبي والله
Quote: صاحبك داك الكان بقول على بنات الناس: بتاعات بتاعات بتاعات بتاعات ضهاري ويسخر منهن ويضحك في بوست غباء الأمريكان!! صاحبك خبروا شنوووووو؟؟ ههههههههههههههههههههههههههههههه طبعن عاذرك في عماشك وطشاشك عن جهويته وعنصريته ووصفه لنفسه بود الحلال!!
Quote: تذكر يا مكانيكي الدفرنشات لمن دخلتا في بوست الصادق بتاع السيقان والدخان ونزلتا شكييير ومديح في الجمهوريين وربهم ومحاضرنهم في الجامعات الأمريكية!!
وحاة الله ما متذكر ذكرني بالروابط ياخ أنا عارفك حريف فيها
Post: #37 Title: Re: النشيد دا والله قمة ولكن ! Author: محمد على طه الملك Date: 11-14-2019, 09:38 PM Parent: #35
Quote: هههههههههههههههههههههههههههههه طبعن الرسالة التانية بتبشركم (ببغاء) النسب في مسائل الزواج!! يعني كان بقيت بتاع(إحن) ما من حقك تعرس من (دوحة) العرب!! والله صحي!!
عاطف عمر يا خطيييير .. ياخي ارفع رجلك من الأنبس .. جننت المكانيكية
Post: #38 Title: Re: النشيد دا والله قمة ولكن ! Author: محمد على طه الملك Date: 11-14-2019, 09:56 PM Parent: #37
Quote: نؤيد هذا الاقتراح الرائع بشدة ان يكون نشيد انا سوداني النشيد الرسمي لجمهورية السودان وان يشدو جميع الطلاب في المدارس هذا النشيد الروعة في جميع مدارس السودان عند طابور الصباح ....
مرحب بتنا بت الشيخ .. اتبرة ولاده وجابت وح تجيب .. وهو زي ما شايفا يا بتنا بندودر في الشباب ديل يعالجو الموضوع ويعتمدو قوميتها .. كدا باصري لينا عمك ود عباس دا عشان الموضوع يمشي .
Post: #39 Title: Re: النشيد دا والله قمة ولكن ! Author: محمد على طه الملك Date: 11-14-2019, 10:01 PM Parent: #38
ثم رابعاً، تُعبّر قصيدة الشاعر المرحوم محمد عثمان، من آل-رُفاعة، وليس أتبرا، عن زمن، شجن، وطن، تجربة حياتية زاخرة، بما فيها من عمومي وخصوصي.
لم يدّعِ مــُــدّعٍ بأن هذا النشيد الوطني العبقري، هو " النشيد الرسمي للسودان" ولكن شعبياً، فهو النشيد الأول بتاريخ نشأته وأحاويل زمنه ..
ثم خامساً،
ألا تتوقّع إنْ تمّ مثل هذا التشويه لوُحدة القصيد النشيدي-وطني، هكذا، أن تتعدد صور المردود الناتج في أفئدة من يتعنصرون ضد النشيد لمجرد ورود " تصوّارت شخصانية عند بعضهم!" تقدح في صِحّة وَ متانة النشيد؟
وتعرف أخي الملك، أن التنازل المجّاني، مدعاة للتنازل أكثر فأكثر، ولربما يصل الثمالة ذاتها
هذا النشيد، وبرغم التصوّرات الظالمة/ أو ترى أنها متظلّمه منه، لا يقدح في أفراد أو قبائل أو عشائر، بقدرما تقوده منطقية إلهامه الداخلي لإعلاء القِيَم التي ترعرع عليها ويعمل على التقيد بها منشؤه، وبما يفهمه من لغته العربية..! فكيف يتدخّل مُتدَخِّلٍ ليضع الكلمات تخرُج من فم الشاعر to putting the words in his lips، والأكثر منطقية، أن يُطالَب من يشتكي، أن يستولد نشيده الوطني، وبما يُجيد من لسان..!
يقول الله تعالى: لسان الذي يُلحدون إليه أعجميٌّ، وَ هذا لسانٌ عربيُّ مُبين..
مع وافر التقدير
Post: #44 Title: Re: النشيد دا والله قمة ولكن ! Author: محمد على طه الملك Date: 11-17-2019, 02:34 AM Parent: #43
سلامات أخي محمد أبو جودة .. أحنست الدفاع وقدمت مرافعة قوية بنيت قواعدها على خمس هي :ـ
Quote: فعنوان النشيد، أنا ســـــــــــــــوداني أنا ..
هذا صحيح غير أنه يعود ويقر بأنه من أرومة نازحة جاؤا لا ليظلموا أحدا .. وهؤلاء الآحاد هم أهل البلاد .. بمعنى آخر هو ينفي انتماؤه إليهم وينقض هتافه بسودانيته !!
Quote: ووحدة القصيدة لا تتجزّأ، لاسيما في غير "إذن صاحب عبقرها" .. وإلّا وقع الناس في رِبقة الــ Intelectual Property
هذا صحيح ولو أن الشاعر كان حيا لربما راجع ماكتب .. وما عرضته هنا لايعدو كونه مقترح وللشاعر وراث لهم الحق في قبول أو رفض المقترح .. والدافع إليه دافع وطني يمنح القصيد فرصة تمثيل السودانيين نازحين وغير نازجين ..
Quote: ثم رابعاً، تُعبّر قصيدة الشاعر المرحوم محمد عثمان، من آل-رُفاعة، وليس أتبرا، عن زمن، شجن، وطن، تجربة حياتية زاخرة، بما فيها من عمومي وخصوصي.
صحيح الشاعر كثيرا ما يعبر عن بيئته ووسطه الاجتماعي وله أن يتفاخر بهما .. ولكن دون المساس بحقوق الغير أو اتهامهم بالإحن .. حقيقة لا علم لي بالاتجاه السياسي للشاعر ولكن فيما قرأنا كانت مطالب السودانيين آنذاك تتصارع بين وجهتين .. وجهة عروبية ترى الاتحاد مع مصر ووجهة ترى السودان للسودانيين .
Quote: لم يدّعِ مــُــدّعٍ بأن هذا النشيد الوطني العبقري، هو " النشيد الرسمي للسودان" ولكن شعبياً، فهو النشيد الأول بتاريخ نشأته وأحاويل زمنه ..
الشطر الأول من كلامك صحيح ولم أقل به ولا أي من المتداخلين وإن تمنيناه .. أما الثاني فالإقرار به يناقض الشطر الأول من حديثك.
Quote: ألا تتوقّع إنْ تمّ مثل هذا التشويه لوُحدة القصيد النشيدي-وطني، هكذا، أن تتعدد صور المردود الناتج في أفئدة من يتعنصرون ضد النشيد لمجرد ورود " تصوّارت شخصانية عند بعضهم!" تقدح في صِحّة وَ متانة النشيد؟
لا احد يقدح في صحة ومتانة النشيد غير أنهم يأخذون عليه ما يفقده شمول التعبير عن مكونات الوطن ولا أرى في ذلك عنصرية .
Quote: وتعرف أخي الملك، أن التنازل المجّاني، مدعاة للتنازل أكثر فأكثر، ولربما يصل الثمالة ذاتها
المراد ليس هو التنازل بل الصعود بفضاء النشيد عن طريق الدعوة بالابتعاد عن محور تعبيراته الضيقة .. إلى فضاء يرحب به الجميع فيصبح حاملا لشعارات ثورة السودانيين في حاضرهم .
Quote: هذا النشيد، وبرغم التصوّرات الظالمة/ أو ترى أنها متظلّمه منه، لا يقدح في أفراد أو قبائل أو عشائر، بقدرما تقوده منطقية إلهامه الداخلي لإعلاء القِيَم التي ترعرع عليها ويعمل على التقيد بها منشؤه، وبما يفهمه من لغته العربية..!
لا أتفق معك في الشق الأول من حديثك هذا.. فالقدح مكانه واضح في تمييزه للنازحين الذين ينتمي إليهم على غيرهم .. ولأن النشيد تضمن الكثير جدا من المعاني الممجدة للوطن وإنسانه .. إرتفع سقف الطموح لديّ ليأخذ النشيد مكانته اللائقة بين الأناشيد التي تعبر عن السودانيين .. لولا أبيات قليه حجبت عنه المكانة القومية التي كان يستحقها.. من هنا جاء ندائي مستفهما عن فرص المعالجة دون إلزام .. فإن وجد النداء قبولا عادت الفائدة للنشيد بما سيجنيه من اجماع النفوس ورضاها . مشكور على الرأي الآخر الذي أبديته بوضوح وهو محل إحترامي .. لك مودتي.
Post: #45 Title: Re: النشيد دا والله قمة ولكن ! Author: جلالدونا Date: 11-17-2019, 03:32 AM Parent: #44
Quote: انت يا جلالدونا مسؤول من الخير .. ود المدير دا نعلكم دفرتو للقطب الشمالي في السقط دا ؟ عارف خوتكم لستك.
ود المدير نسى نضاراتو هنا ... صعب عليهو يخش سودانيز قال لى رسلا بى بالبريد و يلح فى ذلك اصرارا و انا عامل نايم عشان الناس ترتاح منّو شوية
Post: #46 Title: Re: النشيد دا والله قمة ولكن ! Author: محمد على طه الملك Date: 11-17-2019, 04:03 PM Parent: #45
Quote: ود المدير نسى نضاراتو هنا ... صعب عليهو يخش سودانيز قال لى رسلا بى بالبريد و يلح فى ذلك اصرارا و انا عامل نايم عشان الناس ترتاح منّو شوية
ههههههه .. اصلو ما ترسلا نحن ناقصين .. لكن لو تعهد يكتب لينا حكايتو مستعدين نرسل ليهو قيمتها.
Post: #47 Title: Re: النشيد دا والله قمة ولكن ! Author: علي عبدالوهاب عثمان Date: 11-17-2019, 04:30 PM Parent: #46
حقيقة لا علم لي بالاتجاه السياسي للشاعر ولكن فيما قرأنا كانت مطالب السودانيين آنذاك تتصارع بين وجهتين .. وجهة عروبية ترى الاتحاد مع مصر ووجهة ترى السودان للسودانيين . ===================== حبيبنا الملك .. أذكر زمان أيام الشباب مع عبدالناصر كنا أكثر المتحمسين للعروبة ومحاربة الاستعمار ( رغم عدم القدرة على التحدث بها) والرجعية .. في تلك الفترة كلنا كنا تحت تأثير الامتداد الناصري والتعاطف مع الحروب ضد الاستعمار في كل العالم من كوريا إلى كوبا إلى فيتنام .. ورغم هزائم عبدالناصر 1956م وكررها 1967م وحرب اليمن ورغم أن أكثر من دمر منطقتنا هو عبدالناصر طبعا غرق حلفا .. وكذلك تدمير شلال كجبار كان شلال طبيعي حاجز المياه ولملء السد العالي أذكر أننا كنا نسمع التفجيرات في كرمة كما بالديناميت .. وبعذر واهن مكر الاخوة المصريين وسذاجتنا وقال من أجل تمرير البواخر ( الثريا وكربكان ) .. إلخ ورغم ذلك من تحدث بكلمة على عبدالناصر أو العروبة كنا نعتبره عدواً لنا ومتعاطف مع الاسرائيليين والامبريالية .. وأخيراً بعد نميري جاء ودمر السودان بإحتوائه لمايو فكان التأميم والمصادرات وتهشيم المؤسسات
وأذكر بعد ذلك بفترة جاء علي محمود حسنين كمرشح .. ولتجنيد الشباب بدأ يردد الرجعية ( لحزب الامة والاتحادي وجبهة الميثاق )
كما ذكرت الحبيب الملك الوضع في ذلك الزمان كان مختلف تماماً
تحياتي ورحم الله الشاعر
Post: #48 Title: Re: النشيد دا والله قمة ولكن ! Author: محمد أبوجودة Date: 11-17-2019, 09:08 PM Parent: #47
تحية مسائية ليك، عزيزي الملك،
ووافر التقدير على تعقيبك الجميل ..
ودمتم بكل خير..
Post: #49 Title: Re: النشيد دا والله قمة ولكن ! Author: AMNA MUKHTAR Date: 11-17-2019, 10:26 PM Parent: #1
مولانا الملك سلام ليك ولزوار بوستك الجميل. ما طالبني حليفة ..أنا من صغيرة أبيات النشيد دا أبت تقع لي..رغم حنجرة العطبرواي الفخيمة وبلاغة الشاعر .
Quote: هذا صحيح غير أنه يعود ويقر بأنه من أرومة نازحة جاؤا لا ليظلموا أحدا .. وهؤلاء الآحاد هم أهل البلاد .. بمعنى آخر هو ينفي انتماؤه إليهم وينقض هتافه بسودانيته !!
أها هسه نشيد بيعبر عن المعاني المتناقضة دي كيف السودانيين يرضوا بيهو كمعبر عنهم 😹 تخيل شباب الثورة عبروا شديد ..حتى نشيد عزة الأنا داعماهو شايفنه دقة قديمة وما بيعبر عن الجيل دا ..وعزة ولادة بالذات في مجال القوافي .
أعتقد نشيد أنا أفريقي أنا سوداني ممكن يكون مقبول أكتر .
Post: #50 Title: Re: النشيد دا والله قمة ولكن ! Author: محمد حيدر المشرف Date: 11-18-2019, 06:08 AM Parent: #1
في الرد التلغرافي على الصديق ابوجودة
عنوان النشيد, أنا سوداني, وبهذا المدخل الذي تفضلت به, هو خصما على طرحك يا عزيزي ...
هذه مخيلة تفترض انها السودان .. وبربط السياق يمكن لاي "مترصد" ان يجد مادة وحجة دامغة لتهمة الاقصاء
اذا انا كنت ادعي بانني "السوداني" وان ارومتي العرب وانني جئت نازحا وغيري ينز احقادا الخ
هذه معطيات كافية لانطلاقي من فكر اقصائي :)
اقتباس عن ابي جودة ..... فعنوان النشيد، أنا ســـــــــــــــوداني أنا .. ووحدة القصيدة لا تتجزّأ
* التعديلات مرهقة جدا في منبر بكري
Post: #51 Title: Re: النشيد دا والله قمة ولكن ! Author: محمد على طه الملك Date: 11-19-2019, 00:15 AM Parent: #50
على نسق تلغرافات المشرف عزيزي محمد أبو جودة لك من كنيتك نصيب .
عزيزي علي عبد الوهاب تلك أيام قد خلت نجترها ونستدرك غفلتها دون تجريم.
عزيزتي آمنه مختار نعم شباب الثورة عبروا عن روحها ومقاصدها.
عزيزي المشرف أثمن مداخلاتك القيمة عسى يتقبل أهل الحق منا فينجو النشيد من المصيدة.
Post: #52 Title: Re: النشيد دا والله قمة ولكن ! Author: محمد أبوجودة Date: 11-19-2019, 05:58 AM Parent: #51
لكم التحيات الزاكيات الطيبات، أخانا و مولانا محمد الملك، وأخانا الدكتور محمد المشرف، ولو كانت "الآراء" الشخصية، تجري على نسق: I like this, I like it more لما احتملتُ رأياً يتعارض وَ رأي كِليكما، ناهيك أن أعلنه وأزجِّيه مُبَشّــِراً به على الملأ، مُطَوطَو مُلولوْ مُفَـــتــّـَــل وبعض مــُــقَـــتــّــِل وإذن لا رفعتْ ســـــوطي إليَّ يـــدي، ولكن؛ يقول أخونا المشرف :
Quote: هذه مخيلة تفترض انها السودان .. وبربط السياق يمكن لاي "مترصد" ان يجد مادة وحجة دامغة لتهمة الاقصاء
نعم يا صديقي، هيَ كذلك مجرّد مُخَيــّلة و "كمان" تفترض..! لا تُقِرّ ولا تُؤكد ولا تُثَبِّت حُجّة أو برهان. فــذاك منطقها وفلسفتها، وأعني "الإلهام الوِجداني" وليس الحِجاج الجدالية ولا الصيغ القانونية مرنة كانت أم جامدة. أما ربط السياق هنا، سيّان إن كان اختيارياً أو اضطراريا فتلك "خطوة أخرى"! حتى لو كان الرابط The Linker زولاً سويّ ليسه بالمترصّد ولا المتربِّص الذي في قلبو حُرقُص! بل ولا المُتحَيِّنِ ولا مُغَبِّي ولا مغروض بِــ "هُلام هُويّات بدء الألفية الثالثة..!" بل ولا مُسَــبِّي تبكِّيه القشّة، وهذه أخرى غير تلك، التي قصمتْ ظهر الوزير البعير، بل بعير الظعينات ال-جَفَلَنْ ذاتِن ياااا حلاتِن، يُؤمَر فيطيع، ويأمُر فلا يُلقَى له بالا. ثم يقول أخونا أبي-حُميد:
Quote: اذا انا كنت ادعي بانني "السوداني"وان ارومتي العربوانني جئت نازحاوغيري ينز احقادا الخهذه معطيات كافية لانطلاقي من فكر اقصائي
وَ أقول: مَنْ ذا الذي يملِك أن يقسر الآخر على ألّا يدّعي..؟! أو يفخر، يقرض نظماً فــَــيشْعُر بالأنا المتضخِّمة ويُثري لسانه، يسمو بنفسه، يُدللللللها يُبشتكها وَ يُــهشكتها، يفردها ويطويها...؟! طالما كان "المنشط" الإنساني لهذا آل-متعـــربن، مستودِن، مستعرب، مُستَغرِب أو حتى مُستشرق في ثياب متجونِب؟ شاااااعرٌ يستنطق الثغر العصيــّا ..؟ مَنْ؟ مييييين يمنعك مَــن؟ أن تغدو وتروح في خانة الادّعاء المسموح به مجتمعياً..؟ لا أحد بالطبع يجسُر، علاوة على ذلك، فمثل هذا الادّعاء، إنما قُصاراه أنه " مرحلة جدلية" في خطّ السير، لا تــُلزِم عمومياً، ولا تنزل قطعيا، وبالتالي فإنها لا تختطُّ نتائجاً لها آثار وقرارات، بقدرما هيَ مرحلة " تداول" وَ شِيْل وُ خَــتّ، لأجل أن يتحرّك المنشط الإنساني المجتمعي العمومي إلى الأمام. وذلك في جانب كلا الطرفين داخل الــ " بوتقة الواحدة " لوطنٍ - مثل أيّ وطنٍ آخر - يزكو جدلاً حَرَكيــّاً ويسعى أن يأتي بعض بَنيه بما يستطيعوه أو بالذي لم تسطعه أوائله حتى.
وبالله عليكم (يا عملات بتاع الزفرات) إن كانت هذه التي ترونها ادعاءات "ظالعة ظالمة"، ثم قَبِلتم أن تنتهكوا حقوق المَلَكية الفكرية لصاحب هذا النظم النشيدي الرّائد، وهو نظمٌ مــُــتــَــخــَــيــَّل بل وادّعائي وااااضحة به "شامات" و "غُرر" مُشتهاه و توقِه، وبالتالي، فهو لا و لن يتنكّر لتوظيفه "إلهامه" المكسوب في لحظة زمان وأوان واجتماع وتاريخ وفلسفات؛ ألقتْ في جوفِه رَشَدا يراه. أقول بالله عليكم (تاني!ههه) إن كانت خُلاصة كل هذه التعدّيات، أن هناك احتمال أن تكون قد طلعتْ مُعطيات " بتِّ-كَــ لبْ" ســـيقتنصها - لا مَحالَة - المتربّصون جَذِلين بكونهم "لقوها سااااهلة!" ماااارقة كِدا بررررة الساحة وعلى قارعة الطريق، فيكون قرارهم اتهامي ومن "قولة تيت" فـــيتهموا الشاعر والعرب والسودانيين المُستعربين، وبعض النوبة الذين اختلطوا بالعرب الجرب! وقليلٍ من الافارقة الذين ناسبوا ثم آخوا الحَلَب! أو أهل البخاتة ال وِصلوا يبقوا أمبرورو وهوسا وفلاتة يفلحون في "الخياتة" و "قطع الرُّحاطة" إلخ,,, إلخ,,,,
فبالله عليكم "ثالثة وأخيرة ههههه" ماذا تركتم للمتربِّصين "أولاد-الذين ديل- حتى يفكروا ويعملوا ويقوموا ويقعدوا ..؟! ياخ تعالوا ابقوا المتربصين، الحالمين، المؤدّبين انتو ياااااااهواقرضوا شِعركم الذي يُكافيء وينافِس وَ يُطاقِش " أنا ســـــــــــــــــوداني أنا" ... وَ .. دعوها لأمرها، فإنها مأمووووورة، أو أقنعوااا تتتتب بأن ما عداها، لا يعدو عن كونه Big مااااااسووووورة..
مع وافر المُنى الطيِّب..
Post: #53 Title: Re: النشيد دا والله قمة ولكن ! Author: أحمد محمد عمر Date: 11-19-2019, 08:35 AM Parent: #52
أحححححح دي تنهيدة الزول الجاي من مشوار بعيد ولا كان شايل ليه برميل وختاهو أخيراً كملت مداخلة لي أبو جودة بي نفس واحد .. هيييع أنا الصعب أي نعم بطقطق في رقبتي المعسمة ولسة نفسي قايم ولساني ملوي بالجمبة ما راضي يرجع كويس لكن برضو متكيف من القريتو ما بعمل فيها فهمتها كلها طبعاً عشان لو جاء واحد زراني في معنى الظعينات وظالعة بقول ليه ديل حلال في طريق جبل اولياء :)
المهم إني موافق الفكرة النهائية بتاعة عدم تفتيت وحدة القصيدة والمساس بفكرة الشاعر الكلية البتمجد النازحين اللي جو عشان السلام وقابلوهم الناس بالضغينة وتركها إلى ما عداها إن حاكت في أنفسكم وكرهتم أن يطلع عليها الناس (ولد دة! عاد ما كنت بقرأ لي أبو جودة)
Post: #62 Title: Re: النشيد دا والله قمة ولكن ! Author: محمد أبوجودة Date: 11-20-2019, 08:26 PM Parent: #53
سلام يا أحمد وشكراً على التعليق،
مع أنك زوّدت فيه عيار التهكّم زوداً ليس بالقليل ..
ولا يسعني من بعد إلّا القول الهميم: ال مُسامح كريم ..
وَ
هنيئاً مريئاً غير داءٍ مسافحٍ ،،، لــ (أحمدَ) من مقالنا ما غزا وَ تهكّككككما
Post: #54 Title: Re: النشيد دا والله قمة ولكن ! Author: Haytham Ghaly Date: 11-19-2019, 08:47 AM Parent: #52
Quote: طبعاً عنصري بامتياز وما عندو علاقة بالقومية
انتو الجنا دا ظهر متين
اقسمبلاي مشتاقين
الزول ساعة يغيب فترة بجي يفتح بوست عودة ؤكدا ما بجي داخل باقرب رقاق يلاقيهو ؤ كمان شايت ضفاري هههههههههه
عموماً عوداً حميداً مستطاب والجابك يجيب عقابك .. عشان خاطر عاطف عمر
==========
مولانا الملك ..الملك
وضيوفه الكرام كلللكم سلام جاكم من القلب او كما قالها فلان
Post: #55 Title: Re: النشيد دا والله قمة ولكن ! Author: الطيب بشير Date: 11-19-2019, 09:21 AM Parent: #54
. ليس هذا النشيد وحده يا ملك..لكولضيوفك التحية هناك واحد فيه كلمات أسوأ (إلى العلا...إلى العلا..و ابعثوا مجدنا الآفلَ).. يقول فيه الشاعر (أمةٌ أصلها للعرب..دينها خير دينٍ يحب).. حسم مسألة العروبة و الدين في بيتي شعر و بشكل فيه تطفيف كبير . بالنسبة لإسراء بابكر...صوت وتطريب و جهل كبير بالنحو (كالفدائيُ)!! .
Post: #56 Title: Re: النشيد دا والله قمة ولكن ! Author: أحمد محمد عمر Date: 11-19-2019, 09:38 AM Parent: #55
هيثم غالي يا قلب :) أنا قاعد لي قريب اسبوعين انت شكلك الدخلاتك قليلة ياخي أنا مالي البورد مغالطة وشابي للناس في حلقهم
Post: #57 Title: Re: النشيد دا والله قمة ولكن ! Author: Haytham Ghaly Date: 11-19-2019, 09:59 AM Parent: #56
Quote: انت شكلك الدخلاتك قليلة ياخي أنا مالي البورد مغالطة وشابي للناس في حلقهم
اي والله الدخلات بقت قليييلة ومتفرقة
نسوي شنو عاد مافي آكشن يقولو عليهو في البورد وحتى قدر الفي مييييت
ما شايف ود البشرى زاتو رايح ليهو ههههههههههه
Post: #58 Title: Re: النشيد دا والله قمة ولكن ! Author: محمد عبدالقادر سبيل Date: 11-19-2019, 12:23 PM Parent: #57
السلام عليكم ورحمة الله يا شباب تعليقي أولا أؤيد أن هذا النشيد الوطني مؤثر جدا وباعث على العواطف الجياشة في حب السودان والشعور بقيمة الانتماء للسودان والسودانيين ، وهو يؤثر في أنا شخصيا اكثر من النشيد الوطني الرسمي وبالفعل تقفز الدموع من عيوني في لحظة تردي العطبراوي لعبارة : يا بلادييييي هييييه يا بلادييييييي يا بلادي أتأثر بشدة يقولها بطريقة موجعة تثير الشجن والعاطفة الوطنية الى درجة أنني تواصلت قبل ثلاثة اشهر بمدير بيت الشعر في الخرطوم الدكتور صديق عمر الصديق واقترحت عليه تنظيم مسابقة شعرية سنوية في مسألة واحدة فقط هي مجاراة قصيدة أنا سوداني وذلك بهدف تكريس قيمها ومعانيها وحماستها الوطنية التي من شأنها توحيد الوجدان القومي وعرضت عليه ان اقوم شخصيا بتمويل الجائزة على يتم تقديم المشاركات على وجهين: * اناشيد متكاملة مغناة. * وقصائد شعرية صرفا
أما موضوع احتفائها بالعروبة ففي هذه الحالة ينبغي ان نكون اكثر موضوعية وان نقرأ النص وفق ما يلي: أولا ماهي الخلفية الفكرية للشاعر ( هل هو قومي عربي أو كان كذلك يوما؟) ثانيا ما هي مناسبة القصيدة ( هل طلبت منه مثلا لنشرها او القائها او انشادها في مناسبة ما لدواع سياسية مثل : انعقاد قمة عربية أو زيارة جمال عبد الناصر أو اي زعيم عربي) أو المشاركة في مؤتمر او فعالية عربية خارج البلاد ، أو حاول نشرها في مجلة العربي؟ واذا كان كل شعر يمتدح خصال عرب السودان يعتبر عنصرية، فهل في المقابل سنرفض نشيد أنا افريقي انا سوداني طبعا لا العنصرية ليست في امتداح مناقب العرب وانما في تكريس استعلائهم على من سواهم.. هذا هو المرفوض
Post: #59 Title: Re: النشيد دا والله قمة ولكن ! Author: محمد عبدالقادر سبيل Date: 11-19-2019, 12:25 PM Parent: #58
اقصد في لحظة ترديد العطبراوي لعبارة : يا بلادييييي هييييه يا بلادييييييي يا بلادي
Post: #60 Title: Re: النشيد دا والله قمة ولكن ! Author: أحمد محمد عمر Date: 11-19-2019, 03:29 PM Parent: #59
Quote: نسوي شنو عاد مافي آكشن يقولو عليهو
فاتتك موقعة ذات الدفرنش
Post: #61 Title: Re: النشيد دا والله قمة ولكن ! Author: muntasir Date: 11-19-2019, 05:21 PM Parent: #60
عليك شوف الجلابة المستهبلين ديل يشيلوا نشيد ويختوا نشيد كأنه العشرة دي احنا ما خاتين فيها ركوز شيلوا علم بابكر ونشيدكم وختوا لينا مرة يا نسيم السحر نشيد وطني ، كمان جابت ليها ضهاري
Post: #63 Title: Re: النشيد دا والله قمة ولكن ! Author: Kostawi Date: 11-23-2019, 03:42 AM Parent: #61
.. 
