مشروع القطار المحلى هل يسهم فى الحل ؟

07:53 PM November, 13 2019

سودانيز اون لاين
Asim Ali-
مكتبتى
رابط مختصر

الخميس 21 نوفمبر موعد انطلاق مشروع القطار المحلى

اهم شيء مافى زول يركب ملح ؛ لازم التحصيل يكون مية المية.
السكة حديد اتدمرت لانوا ما فى زول كان بدفع .
انا شخصيا ركبت ملح مقطورة نوم من الخرطوم بورتسودان عشان المدير خال صاحبى

اعتقد نظام التذاكر زى بتاع المترو فى دول العالم حسب الصور المتداوله .
لعتقد حيبدو بالخرطوم لانو محطات بحرى لسه ماشايف فى حركه تشطيب وتجهيز

سعر التذكره 10 جنيه للجمهور عامه و5 جنيه للطلاب
اتمنى لاحقا يرجعو يطبقو حكايه (الابونيه) بتاع زمان

قرات كثيرا من التعليقات السالبة عن فكرة القطار
وناس بيقولو لن يسهم فى حل مشكلة المواصلات

كيق يعنى

عربة القطار الواحدة يمكن ان تحمل اربعة اضعاف حمولة بص كبير
بالتقريب لو القطار 5 عربات ممكن كل عربة تحمل مايزيد عن 150 راكب
لو فى كل نص ساعة فى قطار من بحرى للخرطوم
ومن الخرطوم حتى سوبا والاحتياطى المركزى
يمكن ان ينتقل الالاف
فى القاهرة دخول الركاب اكتر من مليون صباح الى المدينة عن طريق القطار

والمافى شنو زى ما بيقولو
نجرب والموية تكذب الغطاس

القطار طبعاً حيحل مشكلة كبيرة جداً
وأتمنى عودة القطار المر وفيهو مر حبيبي لكل ربوع السودان
لأنو القطار دا بالمناسبة كان أكبر رابط وأكبر وسيلة تواصل بين السودانيين من حلفا لحدي نمولي
ومن الجنينة لحدي بورتسودان
اتمنى بعد المرحلة دي يأسسوا لي قطار دائري بين المدن الثلاث
قطار المحطة الواحدة في كل مدينة، مثلاً يطلع من الخرطوم يمشي بحري يقيف في المحطة الوسطى
ومن بحري يطلع على ام درمان يقيف في البوسطة ولا في المحطة الوسطى ويكون كل عشرة دقائق في قطر
كدا بخفف كتير جداً على الكباري الرابطة بين المدن ويخفف الزحمة بصورة كبيرة جداً
لأنو المواصلات بتكون شغالة داخل كل مدينة ومافي باص ولا حافلة بضطر يقطع البحر
في بلد زي السودان خيار السكة حديد يعتبر استراتيجي وحاسم جداًُ

كل العالم المتحضر يعتمد تقريبا على القطارات فى نقل الركاب للضواحى حول المدن ,بينما يتم النقل الداخلى للمواطنين بواسطة مترو الأنفاق زائدا البصات ذات المواعين الكبيرة للركاب .
القاهرة وأديس ابابا يعمل فيهما مترو الأنفاق بكفاءة عالية , علما بأن عدد السكان لديهم على الأقل ضعف عدد سكان السودان . لكن اين الهمة وأين الأرادة بل قبل هذا وذاك أين الضمير واين الوطنية التى توجه موارد الدولة لمصلحة الشعب بدلا من مصالح التنظيم ومصالح الأفراد ؟
قاتل الله الكيزان حثالة البشر .

Quote: لكن اين الهمة وأين الأرادة بل قبل هذا وذاك أين الضمير واين الوطنية التى توجه موارد الدولة لمصلحة الشعب بدلا من مصالح التنظيم ومصالح الأفراد ؟ قاتل الله الكيزان حثالة البشر .

ومازلت اخاف على المشروع من التردى او التوقف بعد فتره من بدايته .
قطارات صينيه .
هل اتوجد ورش مجهزه لصيانه القطارات بشكل منتظم حتى تعمل القطارات بكفاءه ونظام حسب جدول رحلات ثابت

Quote: اتمنى بعد المرحلة دي يأسسوا لي قطار دائري بين المدن الثلاث

مش كان زمان الترماى موجود ومتصل بالمدن الثلاثه ؟
لكن لخبطه وفوضى المبانى والبنى التحتيه للعاصمه ضاعت حتى معالم قضبان التراماى اللى كان ممكن يرجع مع عمليه تاهيل بسيطه
مع ظروف لخطبه (العاصمه المثلثه) فى الاتساع والتخطيط لو فى المرحله الحاليه لو تمم الاكتفاء بخطوط السكه حديد الحاليه مع تاهيل البنيه الاساسيه للطرق وتنظيم واعاده تخطيط وتنظيم العاصمه يصبح بعدها الغاصمه مهله مش للقطار فوق الارض بل للمترو (صب وى).

Quote: والمافى شنو زى ما بيقولو نجرب والموية تكذب الغطاس

المشكله الممكن تفشل المشروع فشل اداره المشروع بشكل شفاف ومنضبط - والعقليات البتديرو- يعنى اخد عندك دقه جدول سير القطارات.تصور الناس تقطع تذاكر لرحله الساعه 8 مثلا والقطر يتاخر نص ساعه او ساعه يصبح ازمه لاتفرق عن ازمه المواصلات العاديه وربما تذمر من المواطنين لدرجه ناس ممكن يطالبو باستعاده تمن التذكره عشان يشوفو وسيله مواصلات تانيه.

Quote: وزارة البني التحتية والمواصلات هذا الاسبوع سوف يشهد التشغيل التجريبي وتدشين اول رحلات القطار المحلي بالولاية تم اليوم تفقد الوالى لمحطات القطار المحلي بالولاية حيث وقف علي محطة الصافية وشمبات ومحطة الاملاك بالمسار الشمالي للقطار متفقدا اعمال صيانة البني التحتية وتجهيز البيئة التشغلية لها

مشكلتنا انو بنظر كتير وفى الفاضى
لازم الناس تجرب اول وبعد فترة تحاول تقيم الموضوع
اى تجربة جديدة حت صاحبا سلبيات؟وعشان تتغلب على السلبيات لازم تخوض التجربة وتجمع فيد feedback من مستخدمى الخدمة عشان تقدر تتطور الفكرة
القطارات هى انجح وسيلة نقل فى المدن المكتظة .
التذاكر ممكن تكون مفتوحة لمدة 24 ساعة مثلا او 12 ساعة حسب الخط ز

القطر يحتاج كباري طائرة وأنفاق ليكون مجدي
ودا يحتاج وقت وامكانات
الحل الأيسر تكلفة وأسرع وممكن وغير مكلف نسبياً
هو البصات الكبيرة تكون بأرقام وبخطوط ثابتة والبص مرقم
وله خطوط محددة ومحطات محددة
وتكون هذه البصات تابعة لشركة كبيرة باشراف الحكومة
ولهذه الشركة موظفون وتعمل تقريباً
منذ الساعة السادسة صباحا وحتى الساعة الحادية عشر ليلا
.

Quote: القطر يحتاج كباري طائرة وأنفاق ليكون مجدي ودا يحتاج وقت وامكانات

يامنتصر اقطار المحلى مساراتو على السكه حدبدالفوميه داخل العاصمه واعتقد لما يكون فى قطر يتحرك مثلا بين الجيلى وحبرى اسرع وافضل من بهداه المواصلات التانيه لا اشاره مرور ولا وقفه عشان يكمل عدد الركاب فى محطه وياخرك.
.
اليوم شفت تدشين للقطار المحلى وصل لفايه محطه الكدرو ماعارف مشى لى قدام ولا الجماعه رجعو من هناك (الطاهر كان رحله التدشين راكبين مسئولين فى الولايه حسب المجموعه بسيطه حتى المواطنين الا الناس لاحظو من بعيد )

بدء التشغيل التجريبى للقطار المحلى

جدول توقيت حركه القطارت (المرحله الاولى)

خريطه الخط الجنوبى(الخرطوم)

يا سلام
امس شاهدت التشغيل التجريبى على شاشات التلفزيون

حاجة مفرحة
حمولة القطار المقاعد 400 ومع الوقوف تصل 1000 راكب
من الخرطوم للشجرة فى 40 دقيقة
ومن الجيلى للخرطوم 50 دقيقة

اذا ما انتظمت الحركة وتم تشغيل 3 رحلات فى الفترة الصباحية على راس كل ساعة من الخامسة والسادسة والسابعة
والعودة الساعة الثالثة والرابعة والخامسة
اكيد تسهم بشكل كبير فى حل مشكلة المواصلات

بستغرب من الناس البتفتش فى سلبيات قبل بداية المشروع
حديث عن ارتفاع سعر التذكرة
وحديث عن عدم وجود نذاكر الكترونية
وحديث عن لماذا لا تسير قطارات فى ام درمان

يا جماعة العافية درجات

ولو على اتمنى ان يصل الخط بعد الاحتياطى المركزى
الى مدينة الرشيد ودار السلام
وجبل ولياء مئات الالاف يستفيدون

Quote: حديث عن ارتفاع سعر التذكرة

الناس بتتكلم ساى .
انا ساكن بحرى ومشوار البيت - الشغل 40 دقيقه خط واحد (3 جنيه حافله او 5 جنيه هايس) زمان هسى الحافله (5 جنيه والهايس10جنيه) والمشوار بقى قطاعى يعلى 2 او 3 مرات يهنى ما اقل من 10 او 15 فى احسن الاحوالمع بهدله تنزلمن مواصله عشان تركب تانيه تواصل مشوارك.
هسى مشوار القطار 10 جنيه والزول ينزل ملاتاح لاقرب مكان لشغلو من مدافره ووقفه تحت الشمس .
الناس راضخه لاستغلال اصحاب المواصلات وتلاعبهم فى سعر التعريفه البتغير حسب توقيت اليوم وخاصه بليل مشوار 5 جنيه ممكن يبقى 20
الناس لما عملنا ليهم استطلاع فى صفحه عامه عن تركيب عدادات للركشات والامجاد مثلا عشان مايعانو الاستطلاع شاركو فيهو 450 بس يعنى ناس راضيه بالبهدله

الحبيب عاصم .. تحياتي
المهم الصيانة الدورية .. والنظافة داخل القطار
توفير قطع الغيار والفنيين ... إلخ
لكي لا يتعطل بعد فترة قصيرة

إلى الامام إن شاء الله
أذكر مرة قرأت عن إتهام لأصحاب البصات السفرية
بأنهم يعطلون القطار بين مدني والخرطوم
استغربت جداً

مرحب عمنا الحبيب على عبدالوهاب
المسئوليه مشتركه بين الولايه فى ضمان استمراريه كفاءه المشروع بالصيانه والتحديث من جهه والجمهور باستخدام راقى للقطار للمحافظه على نظافتو وسلامتو ن الداخل

Quote: مهند الأرباب SD @ARBAB_SD · ٣٠ د #قطار_الخرطوم ما تكتب اسمك في القطر اسمك في القطر ما تكتب القطر اسمك ماتكتبه فيهو #تحرش لا #تسالي لا #تمباك لا #منقه بالشطه لا #السودان

أخي عاصم
لك الود والتحايا الطيبات
هناك مشكلة تستحق الإلتفات إليها حتى لا يحكم على المشروع
بالفشل .. فلا أرى ذكراً أو إعتباراً للمواصلات التي تشكل الرابط
بين محل السكن ومحطة القطار .. ففي تصوري القديم أنني لو
كنت مثلاً أسكن قصاد محطة القطار في حلفاية الملوك ومنزلي
في أقصى غرب الحلفايا فكيف سأصل إلى القطار؟ هل ستكون
هناك مواصلات داخلية تنقل لمحطة القطار؟ وكم تعريفتها لتضاف
لسعر تكلفة تذكرة القطار؟ يبدو لي أن الموضوع يحتاج لمزيد من
الدراسة قبل إطلاقه. مع الود والتحايا ....

وعليكم اخ بابكر
حاليا خطوط المواصلات المعروفه اصبحت فى حاله سيوله الخط الواحد بقى (قطاعى) يعنى خط الكدرو مثلا بقى مقسم من بحرى لايه كبر ىالحلفايا واتانى تركب عشان تصل الكدرو ول ساكن ام القرى جنوب (جهه المحجر ومعهد ود المقبول ) لازم تركب تانى من لفه جنوب عشان تدخل ام القرى جنوب.
اعتقد اصدار تعريفه مواصلات جديده قد يثبت بعض تقسيمات الخطوط دى .
الركشات يتشتغل سواء مشاوير او بتشيل (طرحه بالنفر) او مشاوير داخل الاحياء.. وحكايه خطوط ركشه طرحه حاصله حاليا (حسب الحاجه وطلب ناس )مع الازمه دى.
واديك مثال بعد افتتاح مجمع خدمات الجمهورفى المزاد قصاد ميدان المولد بقى فى خط ركشات طرحه من موقف الحاج يوسف للمجمع واستمرت وقى فى خط لناس المزاد لغايه اخر محطه برضو طول اليوم
برضو لجان البرارى- للمساعده فى حل مشكله المواصلات- عملو خطين ركشات طرحه من كبرى برى واحد لبرى اللاماب وواحد لامتداد ناصر
.
بالتالى فالحل بالنسبه لاسؤالك حيكون تلقائى فى الركشات اللى اصبحت وسيله المواصلات المرنه (لكن تحتاج تقنين وتنظيم) يعنى فى بحرى اتوقع حتكون فى تجمعات للركشات من المحطات على شارع الانقاذ (شارع الشهيد مطر حاليا)

الحل بيكون ركشات الى المحطات

عندما تم تغيير مكان اصدار تاشيرة الخروج من المغتربيين الى الخرطوم جنوب
وجدت ركشات بتشتغل فى الخط

راكب من الكدرو للخرطوم بعشرة جنية
دى سعر مجزى جدا

القطار لن يحل مشكلة المواصلات جذريا
ولكن بالتاكيد يسهم فى تخيفف المعاناة
اتمنى ان تزداد عدد الرحلات
وتمتد الخطوط
وخاصة من الاحتياطى لجبل اولياء بلدى

زمان الإنقاذ في بداياتها جربت تسيير قطار من الشجرة او الكلاكة، ما متذكر بالضبط
التجربة تزامنت مع تجربة النقل النهري.
التجربتين فشلوا.

ما هو الجديد في هذه التجربة؟
وهل تم تلافي العيوب التي أدت لفشل التجارب السابقة؟

Quote: ما هو الجديد في هذه التجربة؟

البنيه الاساسيه هى البنيه الاساسيه لخطوط القطار القوميه لكن الجديد الظاهر للعيان تاسيس محطات على طول الخط المحلى ووجود مسار خاص داخل المحطه الرئيسه فى نهايه الخط اضافه الى استخدام قطارات لهذا الغرض .
واشاركك السؤال عن الكوادر الفنيه فى تشغيل وصيانه القطار واداره الخط بشكل يضمن الدقه والانضباط والسلامه (ودى الاهم حتى لايحدث خطا بحدوث تصتادم مع رحله قطار قومى بسبب الاهمال وعدم الدقه

Quote: أخطر تقرير عن قطار الخرطوم وأزمة المواصلات نوفمبر 20, 20195٬226 2 دقائق الخرطوم: هنادي النور بتوجيه من رئيس مجلس الوزراء د. عبد الله حمدوك لحل أزمة المواصلات، قامت اللجنة الوزارية المعنية بجولة تفقدية لمقر شركة المواصلات والسكة حديد، وتضم وزير الداخلية، والي الخرطوم، وزيرالحكم المحلي ووزير الاعلام وذلك للوقوف على آخر التطورات لإنطلاق قطار الخرطوم ومدى جاهزيته لحسم أزمة المواصلات بصورة عاجلة. وأعلن والي الخرطوم الفريق أحمد عابدون بدء انطلاقة القطار الخميس بمعدل رحلتين في اليوم صباحية ومسائية، مبيناً أن الرحلة تبدأ من محطة الخرطوم جنوباً حتى الشجرة وشمالاً حتى الكدرو. وافصح عابدون عن اتفاق مبدئي مع شركة لتنفيذ مترو أنفاق يبدأ المرحلة الأولى خلال عامين، وأشار إلى أن هنالك محطة وسيطة تربط المحطة الرئيسية لتسهيل حركة المواطنين. وحذر المواطنين والباعة الجائلين من التواجد في تقاطعات القطار. وقال وزير الاعلام فيصل محمد صالح أن طاقة البصات العاملة بالولاية قليلة جداً، مقارنة بحاجة ولاية الخرطوم. وأضاف: شركة المواصلات في أفضل حالاتها تساهم بـ 10% من حركة النقل و90% تعتمد على القطاع الخاص من الهايسات والحافلات وهؤلاء يعملون بمزاجهم وحسب الخطوط المربحة، الأمر الذي أدى إلى ارتفاع مواصلات الولاية بمساهماتها إلى 50 %. وقال فيصل إن هذا الأمر يحتاج إلى وقفة، موضحاً أن هناك عمليات صيانة لأكثر من 400 باص وتدريجياً يتم استيراد قطع الغيار وهنالك مهندسين يعملون في الصيانة وكل يومين يتم استخراج بص لينضم للبصات العاملة وأن عدد البصات العاملة مابين 250 الى 300 والتي تم استيرادها من السعودية وقطر لكنها تعاني من اشكالات كثيرة وبحالة مزرية. وقال فيصل إن البصات التي تم استيرداها من قطر قيمتها مدفوعة بالكامل وظلت مخزنة بالعراء لأكثر من عامين وبالتالي تحتاج تغيير إطارات، أما التي استوردت من السعودية وتم دفع 50% من المقدم فإن حالتها أسوأ. وأضاف فيصل: (تم التعاقد عليها في فترة سابقة ولذلك لابد من تكملة اجراءاتها وشحنها، حاليا هنالك أكثر من 390 بص ما بين السعودية وقطر سيتم شحنها وخلال أسبوع تصل البلاد). وبالنسبة للوارد من السعودية قال فيصل إن هناك لجنة هندسية تم ابتعاثها لتقوم بصيانتها في منطقة جدة. وفي الأثناء أوضح فيصل أن هناك بعض الاشكالات ولكن يمكن تداركها خاصة وأن القطار أكثر جاهزية وبحالة هندسية جيدة وجاهز للانطلاق فقط البنيات التحتية بحاجة إلى قليل من العمل، معلناً عن انطلاق الخط الشمالي في فترة أقصاها عشرة أيام ويبدأ من بحري مروراً بالكدرو إلى الجيلي وسوف يتم تشغيله وهنالك اشياء بسيطة يتم تكملتها منها عمل غرفة كنترول للتنسيق مع السكة حديد. وبالنسبة للخط الجنوبي سوف ينطلق من الخرطوم إلى الشجرة وسوبا ولكنه يحتاج إلى مساطب للمحطات وبالتوازي مع الخط الشمالي سوف تشرع وزارة البنى التحتية في العمل لتخطيط المساطب وبعد أسبوعين يبدأ الخط الجنوبي للعمل. وقال فيصل إن هذه القطارات لو تم تشغيلها خاصة وأن هنالك عدد 6 جاهزة للعمل في نقل كميات كبيرة من حركة المواطنين فإنها ستسهم في تخفيف الضغط على البصات والحافلات. وقطع فيصل بأنه لن يحدث انفراج نهائي للأزمة إلا بنهاية العام بعد اكتمال وصول البصات. من جانبه أكد مدير شركة نوبلز لتشغيل القطار الطيب مختار أن الحل الجذري للأزمة بتشغيل القطار والذي يتكون من 6 وحدات سعة 500 راكب وستكون قيمة التذكره 15 جنيهاً ويوفر القطار 4 لتر من الوقود مبيناً ان ذلك سيسهم في ترحيل 50 ألف راكب ويخفف الضغط على حركة البصات. وأشار مدير مجموعة نوبلز مهندس عبدالرحيم محمد عبدالرحيم أن المجموعة أكملت المرحلة الأولى بتصنيع وتوريد القطارات وتشييد المحطات في المسار الشمالي وعددها 8 محطات بما فيها محطة الخرطوم الرئيسة، مؤكداً أن المشروع يحقق أهداف خطة الولاية الاستراتيجية في ادخال القطار كوسيلة نقل داخلية باستخدام 6 قطارات سعة القطار الواحد 600 راكب.