فى بطن حوتى

05:45 AM November, 12 2019

سودانيز اون لاين
أبوذر بابكر-
مكتبتى
رابط مختصر

وأنا جاى ليك
مرقت من فرقات زمانى
وقفت فوق تلة اساي
وما شفت غير
حُترُب العمر الدراش
مكتف بى جنازير حزنى الحمانى
اجيك براى
وحداك
رقدت على جنبة شقاي
وما لقيت
غير عفوة الحلم النسانى
عاينت ليك والشوف طشاش
وما وصل
جيهات مقيل شمس العمر
تحت ضل الأمانى
وناديتك
جفل طعم الدعاش
وحس الغنيه فى خشمى
مكتف بى حبال صوتى
وقفت بعيد
اتاوق لى زحيح موتى
و جوه العتمة
ولعّت الصبر فانوس
تايه فى بطن حوتى
وقعدت اكوس
لقيت اسمك بضوى هناك
لقيت اسمى
فى لوح الودار منقوش
لقيت خوفى اللبد جواى
حداى مفروش
فيا جهرة مباهج الكون
منو الختاكى فى بالى ؟
منو الأهداكى لون ؟
وجواى القليب معروش
ملان احزان
وجيب الفرح خالى
اقيفى معاى
خلينى النشِد
صهوة غنايا واجيك
نهوّن قاسية الأيام
نلوّن لوحة الأحلام
نشد حيلا الفتر
ونناغم النجمات يجن
نقعد حداك أنا والقمر
نبارك اللون المقسّم طعمه
بينك والشدر
ونمسك رعشة الطرب الأكيد
البوزع نغمه
بينك و الوتر
وتهجس حرقة الشوق المديد
المدفق دمعه
بينك والأتر
وا ضيعة الولد الكتم
ريدو الشديد
شايفك صباح
حد البصر
راقد يعامت فى وحيح الليل
الفرزع نجيماتو السفر
الضلمة والخوف و السهاد
رفاقة العاشق الفضحو البعاد
صلاكى جهرا
وما انستر
دساكى في دمو المباح
ختاكى فى خاطر النشيد الإنكسر

فى خاطر النشيد الإنكس

خلينا انا اشد صهوة جوادي واجيك في محل مايتواجد حوتك

سلام كبير ابا ذر
ليك وحشة والله
والنص يكاد يقول ( اني كنت من المبدعين )

ازيك يا جلال

كيفك ياخ طيلة كل الشوق
طيلة كل الوحشة

طريتنا والله أيام الوصال والوداد الممطر
هنا فى هذا الايوان السمح العامر

جيتك جابت معاها عبق السمحين
ناس مودتنا و فرحتنا

تطيب أيامك أن شاء الله يا أبا جهينة الفخيم