امريكا تعرض مكافأة قدرها 4 مليون دولار لمن يقدم معلومات عن سوداني ارهابي

05:44 PM November, 09 2019

سودانيز اون لاين
Yasir Elsharif-Germany
مكتبتى
رابط مختصر

الراكوبة
ــــــــ

امريكا تعرض مكافأة قدرها 4 مليون دولار لمن يقدم معلومات عن سوداني ارهابي
أخبار السودان
On نوفمبر 9, 2019
0
مشاركة

الخرطوم : وكالات

عرضت وزارة الخارجية الأمريكية مبلغ يصل قدرها 4 مليون دولار مكافأة لمن يقدم معلومات عن مكان السوداني إبراهيم القوصي القيادي في تنظيم القاعدة في شبه الجزيرة العربية في اليمن.

والقوصي هو محاسب بسجلات الشركة التي يملكها مؤسس تنظيم القاعدة أسامة بن لادن في أوائل التسعينيات في الخرطوم قبل طرد السودان لبن لادن ، وسافر القوصي بعد ذلك إلى أفغانستان في عام 1996 واعتقل هناك ورحل إلي معتقل غوانتنامو .

وقالت الخارجية الأمريكية أن القوصي شجع علي شن هجمات ضد الولايات المتحدة .

وأدين القوصي بارتكاب جرائم حرب ، وتم ترحيله إلي السودان في عام 2012 بعد 14 عام من الاعتقال بسجن غوانتانامو ، ويشتبه بأنه قيادي ينشط في تنظيم القاعدة في اليمن.

وأقر القوصي حينها أمام محكمة أمريكية سابقة بأنه قدم الدعم لرئيس تنظيم القاعدة الراحل أسامة بن لادن وساعده على الهرب من تورا بورا في أفغانستان.

Quote: امريكا تعرض مكافأة قدرها 4 مليون دولار لمن يقدم معلومات عن سوداني ارهابي

هل أمريكا فعلا جادة في محاربة الإرهاب!
المبلغ ده اولي بيهو لشعب السوداني لأنو قبض علي عمر البشير رأس النظام الأدخل بن لادن المشغل ابراهيم القوصي في السودان!!
ماذا يعني ابراهيم القوصي بالنسبة للبشير، حسن الترابي، علي عثمان، .. وبباقي عصابة الحركة الإسلامية!!
ياريت امريكا تكافئ الثوار القبضوا علي اعتي نظام إجرامي في العالم بدل ما تلعب بمشاعرهم بهذه الصورة السمجة !!

آسف يا اخ ياسر نسيت اسلم عليك.

فالسلام عليكم ورحمة الله تعالي وبركاته.

كيف حالك يا أخانا ياسر؟
ياخي في ميدان الفعل الإرهابي العالمي الحقيقي ... قل أن يوجد شخص سوداني (وربما لا يوجد إطلاقاً، لأننا حتى في الشيء الكعب دا قاعدين في الكنبة الوراء ... يعني دون الـ accessories). شخصياً لم أسمع بهذا القوصي وسمعت بعشرات من الجنسيات الأخرى. وكما قال مولانا محمد آدم، أمريكا غير جادة في مسألة محاربة الإرهاب، وإلا كانت كافأت من قبضوا على عمر البشير على الأقل برفع العقوبات عن بلادهم أو تخفيفها. وبالبلدي كدي أمريكا شغالة بمزاجها ... تشرّك وتحاحي حسب مصلحتها. انتو أيمن الظواهري حي لسه ولّا كتلوه الأمريكان؟ وبرضو نقول تحيا أمريكا ... إكراماً لآبائها الخواجات.

ابراهيم القوصى صاحبنا و دفعتنا فى معهد الكليات التكنولوجية (كنا حداشر طالب فى الدفعة)

انسان رقيق جدا و عاطفى لأبعد درجة ، استفاد بن لادن و استغل هذه الصفات و قربه إليه ( و كانت النتيحة تحطيم حياته)

لم اقابله منذ التخرج.

خلاص يا عزيزنا النصري ... اجتهد معانا شوية خلينا نقبض الملايين دي ... ما دام صاحبك القوصي حياتو باظت وانتهت. شوية انتهازية وكدا ... نستفيد نحن ما دام هو دمر حياتو ... والميلايين الحنقبضها دي بتبقالوا صدقة لعمرو. استغفر الله العظيم.

هههههه هههه .

والله ابراهيم ما يستاهل الحاجة الحصلت ليه ؛ الغريبة هو زول مسالم جدا لا يقدر على
إيذاء كديسة ..
يا شنتير ؛ اخوك من ضمن عيوبه انه عنده درجة اخلاص ما عادية ؛ تعمل فيه معروف اليوم يتذكره بعد مية سنة .

و الله لو وضعوا خزائن الدنيا فى يدى مقابل اخون صديق او قريب لرفضت .

مرة و نحن غى الفصل ؛ المحاضر اعتذر عن الحضور ؛ اقترحت على الدفعة نعمل كرسى ساخن ، كل واحد يقعد فى كرسى الأستاذ و يفتح قلبه و يحكى اى حاجة تشغل باله.

لمن جاء الدور على ابراهيم ؛ الغرفة صنت صنه شديدة من عمق الحكى لدرجة إحدى الزميلات دموعها جرت .
ابراهيم كان زول كويس ، مسالم لأعلى درجة .
آلله يلعن بن لادن و اليوم الجابه السودان

عشان كلامك دا يا النصري أنا ما مصدق إنه في سوداني بقى إرهابي ميداني ومهاب عالمياً. عندنا شوية هُبُل مستغلنهم السلفية ... وشغلهم تحريض بس ... زي القاعدين نشوفهم في اليوتيوب: ناس تباً لك وتف عليك وفقيري وآداب وناس ما بعرف جوا من وين أصلاً. ديل أورام في جسد السودان. تباً لهم. لكن سوداني إرهابي كدا زي الظواهري وبن لادان وباقي التوانسة والمغاربة والبلاوي العربية والأفريقية دي ... مستحيل تلقى فيها سوداني. ياخي أنا سخرت من الحاجة دي وقلت حتى في العفن دا ما عندنا نصيب ... هههههههووو. نحن متخصصين في العك والعجن والكلام الكتير والألفاظ الكبيرة .... وبس.

القوصي صاحبك دا أنا متأكد إنه زول درويش بريء وقع في حفرة بتاعة إرهابيين ميدانيين جد وما كان عارف حاجة: هو في سوداني عارف حاجة في البلاوي دي أو في أي شيء؟ ترانا بنرغي ونزبد ونتنابز ونتصالح، ولا سودان وصل ولا بابور يدور. يا زول علي الطلاق نحن لا في العير ولا في النفير حتى في إيذاء العالم. أما إيذاء أنفسنا فهو مجال تخصصنا ... وكان الله في العون.

الغريبة طوال فترة الدراسة ما كان شغال بالسياسة ؛ و بعيد من تنظيم الإسلاميين فى المعهد.
بعد التخرج ؛ دخل فى دروشة و انعزال ؛ و عمل ليه دقن تقيلة .

كلامك صاح ، المجتمع السودانى غير صالح لتفربخ إرهابيين تفجيريين من النوع البذبح من الاضان للاضان ؛ نحن مجتمع عاطفى جدا ؛ اعتقد البيئة تلعب دور كبير فى السلوكيات دى .

فعلا ؛ صعب ؛ المجتمع السودانى يطلع افراد زى البغدادي او الظواهرى او سفاح لندن .

ممكن نفرخ psychopath زى اى مجتمع ؛ لكن ناس الظواهرى و البغداد عندهم صفات تانية مكتسبة من المجتمع حولهم لا تتوفر فى مجتمعنا السودانى.

مثلا ؛ ابراهيم ، صاحبى ده ؛ كان اليد اليمنى لابن لادن ، مسؤل من كل أعماله التجارية لكن و لانه سوداني مستحيل يحل محل بن لادن او يخلفه ؛ لماذا؟ لانه سودانى تربى فى مجتمع سودانى ؛ و زامل ناس النصرى امين واخد من طباعهم و عاداتهم و مفاهيمهم .

دكتور ياسر ، معليش احتلينا البوست بتاعك

النصر ي انت جبت لنفسك الهوا بتصريحك الخطير ده لأنه كون انك كنت صديق لواحد ارهابي اسمه القوصي ومطلوب من الإدارة الأمريكية سوف تدخل في متاهات كتيرة مع الأمريكان عندما تزور أمريكا واحتمال يقبضوا عليك وتتعرض للتعذيب عشان تكشف عن مكانه ..
انت ما بتعرف ان أي كلمة بتتكتب هنا في المنبر بتترجم للمخابرات الأمريكية..ههههههههه

هههههه
يا امتثال ؛ الناس امثال ابراهيم ديل حياتهم مبرمجة و طلعوا من شربكة نسيج المجتمع السودانى.
يعنى علاقاتهم الإجتماعية محدودة جدا جدا و تداخلهم مع الناس محدود لأبعد درجة .

حتى بعد رجوعه للسودان تجنب التواصل مع كل الدفعة و لا احد يعرف عنه شء .
غايتو لو السى اى اى لو دفعوا لينا قروش تجاه المعلومات فى البوست ده ، ما عندنا مانع ، اصلو الايام دى فى فلس شديد و بنجهز لزيارة السودان الشغيغ

النصرى سلام
الزمن دا العفوية تركب التونسية.. اسئلة ساكت عن ماضى الرجل و طيبته كانت كيف تنشف الريق

اهلا ابريش
مافى عفوية و الله
لو دايرين معلومات عن قبل 1990 جاهزين موية ونور .

حتى القوانين هنا تسمح المستندات السرية ان تعلن للعامة بعد مرور عدد من السنين لانها تصبح غير ذات جدوى .

ما الفائدة للاستخبارات الأمريكية انه ابراهيم كان زول عاطفى وهو طالب في الجامعة ؟
شنو الفائدة يعرفوا انه قبل 40 سنة كان زول مسالم و طيب جدا ؟

الناس ديل عندهم كل المعلومات عنه حتى الإفراج عنه و إرجاعه للسودان فى 2012 ، اليوم محتاجين لمعلومات جديدة بعد 2012 ولذا صدر الإعلان عن الجائزة.

اذا الواحد ما عنده معلومات بعد 2012 لا فائدة من شهادته او معلوماته.

بعدين الأمريكان لمن اعادوه للسودان ما كانوا متخيلين انه تاااااااانى ممكن يسبب لهم خطورة

Quote: ياخي في ميدان الفعل الإرهابي العالمي الحقيقي ... قل أن يوجد شخص سوداني

لانهم هم جزء من مطبخ التنظيم الدولى (تكنوقراط الارهاب).
.
امريكا وحتى دول اوروبا بيلعبوا بالنار وغير جادين فى موضوع الارهاب والتشدد والارهاب اصبح فى لحمهم الحى واخير يحسمو موضوع الارهاب ومايلعبو بيهو سياسه دوليه
.

Quote: انتو أيمن الظواهري حي لسه ولّا كتلوه الأمريكان؟

الامريكان معاييرهم مزدوجهفى لعبه السياسه واستخدام الارهاب .
خليك من الظواهرى .اسامه بن لادن مش لقوهومدسى فى مجمع سكنى عسكرى باكستانى ؟
عملو شنو لى الباكستان وللجيش الباكستانى بقياداتبقيادات اسلاميه الانتماء- المعروف انو بيدير الدوله والديمقراطيه هناك مجرد ديكور

صحيح يا النصرى المحاكم و النائب العام قد لا يهتمون بماضيه السحيق..
و لكن صدقنى، بالنسبة للإستخبارات، لو واحد قال ليهم قبل خمسين شفت الزول دا قال لى إزيك.. هذه معلومة هامة جدا عندهم.
ما عشان يحاكموه بيه، ولكن لمارب اخرى.. يختوها فى الملف بس.. و القرش الأبيض لليوم الأسود. و قد يسألوه الزول قال ليك إزيك ليه؟ المناسبة شنو؟
و هو كان رقيق وحنين، هل كانت عنده خطيبة و علاقته بالجنس اللطيف شنو.. و عييييك. بعد لا تعتقد انهم يصدقون أى كلمة تقولها.. بالعكس يفترضوا الكذب
ولكن لأنهم لا دليل عليك فيكتفوا بمراقبتك :)

Quote: لانهم هم جزء من مطبخ التنظيم الدولى (تكنوقراط الارهاب).

كيفك يا عاصم؟ دا الكلام الأنا قاصدو تماماً ... تكنوقراط إرهاب ما جايبين خبر عن المعمل الدموي الميداني. المعمل جوة حق ناس تانيين. بالوقائع، تقدر تقول لي كم من السودانيين فجّر نفسه في أي مدينة أو قرية أو شارع أو حديقة أو زريبة حتى؟. السودانيون الموصوفون بالإرهاب لم يتخطوا بعد طور الكومبارس والمتفرِّج. أنتهى.


كيفك يا أبو ريش ... ياخوي باصر لينا النصري دا عشان يطلّع لينا معلومات ونضرب الأربعة ملايين دي ... ونقسمها على تلاثة (أو أربعة عشان امتثال ترضى وتسكت ما تجيب سيرة). القروش دي أولى بيها نحن التلاثة الكبار (النصري وأبو ريش وشخصي الضعيف، وشوية مصاريف لامتثال) بدل تروح ساي في حق إبليس. شد حيلك يا النصري. جيب لينا كل شيء عن الدرويش دا. وحكاية الـ إف بي آي ... وإم آي سِكْس ... وون مان شو دي خليها علي أنا وأرقد قفا.

عبد الحي يوسف و محمد الجزولي و المعتوه محمد المصطفى
دي 12 مليون دولار
اخد الاتنين يا النصري و رسل لي العشرة

يا شنتير
اريت لو عندى معلومة عنه ،
اخر مرة قابلته نهاية 90، مشيت المعهد استخرج شهادة بالاسم الجديد جامعة السودان للعلوم والتكنولوجيا ، كان قاعد فى بنش من بنشات المعهد ، ما عرفته لكثافة الذقن ، لكن شعرت الزول ده بعاين لى شديد ، اصلو ما عرفته ، انتهيت من اغراضى و اتخارجت وفى الطريق قعدت افكر الزول اللببحلق فينى ده منو ؟

شيت ....ده إبراهيم القوصى .
زعلت فى الاول لانه عرفنى و لم اعرفه و الواجب حينها ان يسعى هو لللقاء لكنه لم يفعل.

بعدها باسابيع طلعت من السودان ولم اسمع به الا و هو سجن كوبا ؛ عند السؤال عرفت انه اشتغل مع بن لادن عند حضوره للسودان.
يعنى ما عندى اى معلومة تجيب الأربعة مليون .

يا خضر
ثلاثى المرح ديل (عبدالحى و الجزولى و المجنون) لا يساوو بصلة عند الأمريكان.
بالعكس هم يقدموا خدمات مجانية

يا شنتير لو أخونا النصرى اصر حأقول ليهم أعرف الزول البيعرفو.. دى بتيجب 100 ألف

يا ابريش

الخرطوم دى كلها عملاء ل CIA خاصة ايام الانقاذ.
عملاء رخيصين زى التراب .

المعلومات التى يعرفونها عن القوصى ؛ اهل القوصى المقربين لا يعرفونها .

اعتقد الحصل انه ابراهيم اتى بحركة ابليس ما فكر فيها و فاجأت الامريكان و عملاءهم ..
سافر اليمن ؛ دى خطوة لم يتوقعها احد على الإطلاق .
عشان كده مستعدين يدفعوا اى مبلغ عشان الزول ده دقش بيهم .

بصراحة ؛ أبراهيم كان ذكى جدا فى الدراسة يغيب معظم المحاضرات و عند وقت الإمتحانات يجلس للمواد بالتقسيط ..يعنى بدل اسبوع واحد لكل الإمتحانات ، إبراهيم يخلص الامتحانات فى شهرين ... بعملها كيف ؟ والله لحسى متحيرين

سلام يا حلوين،
ودوهو قروپ منبرشات بجيبوا زيتو في لحظات

شانتير
اذا قسمتو الأربعة ملايين على أربعة يكون احسن ،،،لأن الأربعة ذاتها ما بتتقسم على ثلاثة ....

Quote: يا خضر ثلاثى المرح ديل (عبدالحى و الجزولى و المجنون) لا يساوو بصلة عند الأمريكان. بالعكس هم يقدموا خدمات مجانية

يعني طلعتني ملوص يا كركساوي ؟
قلت ليك شيل الطاقية الفوق و رسل العشرة

فى زمن الإنقاذ يا النصرى عملاء السى اى أيه أتصلوا بضابط يديهم معلومات معينة.. الضابط قال ليهم داير عجلة..
و الجماعة فيوزهم ضرب.. ما عرفوا يقصد شنو.. أتصلوا بالرئاسة فى أروبا.. طلبوا منهم يتحروا لأنو جايز كلمة عجلة دى شفرة
أو جايز دير عجلة من ذهب أو بنفس القيمة.. المهم بعد أسئلة كتيرة تأكدوا انه فعلا يقصد عجلة اللا دى.. و فعلا جابو ليه أحسن عجلة رالى (دبل)


رخاص فعلا زى ما قلت. الله يرحم الهمباتى ود ضحوية.. و القصة حكاها الفنان الكابلى.. قال ود ضحوية فى السجن معاه واحد متهم.. سأله انت ممسوك فى شنو.. قال ليه
سرق من الدكان صفيحة زيت.. ودا كان اخر كلام معاه.. بعد رده دا ما عبرو كلو كلو.. يوم المحكمة ود ضحوية قال للقاضى يا مولانا جريمة الزول دا ختوها على و أمرقوه..
بعدين أنشد:
نحن ناسا بتسوى و مابتقول سويت
إن بردن نقود، مال البخيل كشيت
وإن حرن بكار، ما هن صفايح زيت

ياسر وشركاه
المسكين سامي الحاج بعد اطلاق سراحه من غوانتنامو ورجوعه للسودان
كانت حالته الصحية والنفسية تبكي الحجر..خاصة عندما يحاول ان يتحدث
سىء طبيعي لانه عاد من جهنم

Quote: الغرفة صنت صنه شديدة من عمق الحكى لدرجة إحدى الزميلات دموعها جرت

النصري....يا خوي انت كنت مقبل على الفصل ؟ بى وين شوفتا دموع البنية؟
طالما انت ذاكرتك قوية كدة ما تحكي لينا حكي القوصي العميق دا..عشان نقعد نجعر

والله يا احمد يسن ما بتذكر قصة القوصى كانت شنو لكن بتذكر انها عاطفية ، نظام شاكوش و كده .


بصراحة انا ايام المعهد كنت راس هوس احتمال بسبب عامل السن لانى دخلت المعهد و انا عمرى 25.
المشكلة انه فى طلبة كتار جدا بتذكرونى و انا لا اتذكرهم مما سبب لى احراج شديد

حكاية النصري هنا تعزز عندي فرضية ان القوات الفاعلة في تنظيم الدولة و داعش والقاعدة
ماهي جماعات إرهابية ولا مجرمين يجب قتلهم،
بل هم حالات خاصة من المرضى النفسيين يجب معالجتهم..
أو على الأقل توفير الجو المناسب لهم من تثقيف وتوعية ورد مظالمهم ليعودوا افرادا منتجين نافعين.

سلام وصباح الخير
٣٠ سنة مبغددين ومبن لدين والان عيالنا في اليمن ما مقصرين السبعة وذمتها
وبعد دا السودان ما ممكن يطلع ارهابي! فضضان الاعتصام والاعتصامات من اكبر
عمليات الارهاب في التاريخ ولسع ما بتطلع ارهابين خطيرين يعني فضل يتعمل شنو و عشان
السوداني يكون ذيو و ذي الناس الاخرين الراسو بتلخبط بيعمل اي شي وتكون
ما دايرا ليها جنسية وكمونية

(الجنوب ودارفور والنيل الازرق ونفايات الشمال وتجويع الشرق وجريمة حلفا ووو الخ)

🎃👹👿🤖🙌🏿👺

سلام عليكم

برافو يا أخ حامد عبدالله، عبرت عني وعن آخرين.

لو صادفت القوصي فسأسلمه لأمريكا بشرط واحد :

ياخدو معاه عبد الحي، عبد الكريم، عبد القادر، الجزولي،

أبوبكر، فقيري و عدد مقدر من الكيزان و المتشددين.

البشير ما عنده كاريزما بن لادن او البغدادى او الظواهرى .
البشير خدمته الظروف فقط ؛ ولولا الترابى اختاره كان فى المعاش يجابد حق اللبن مثله مثل الاف المعاشيين .
تشبيه البشير بهؤلاء الرجال ظلم لهم .

المجتمع السوداني بعد تأثره بالاحتلال الانجليزي كان في طريقة للتحرر من سطوة الدين، والدولة الدينية، ثم جاءت أمريكا والسعودية وقامت بإحياء الدين الجهادي.

الذين إنضموا للقاعدة وداعش هم المسلمين الأكثر اتساقاً وصدقاً.
أعتقد أن القوصي مقارنة بزميله النصري هو أكثر صدقاً مع الدين

الذي قام باستغلال القوصي هم الأمريكان وليس بن لادن

بالظبط يا ابوبكر بن لادن preys على اصحاب النوايا الطيبة مثل القوصى و يجعل منهم جنود مطيعين ..
بن لادن نفسه عميل للأمريكان فى بداية نشاطه ثم انشق عنهم.

اما الجملة دى صحيحة مية مية يا ابوبكر

Quote: أعتقد أن القوصي مقارنة بزميله النصري هو أكثر صدقاً مع الدين

والدليل الحادثة التى ذكرتها و كيف كان القوصى صادقا مع نفسه ومع زملاؤه و فتح قلبه
و حكى تفاصيل نزلت الدموع بسببها ؛ اما النصرى فقد مخادعا فى تلك الجلسة و اخفى ما يدور فى خاطره من معاناة .


النصرى ما ينفع مع بن لادن حتى ولو كان متدينا ؛ بن لادن يحتاح لامثال ابراهيم القوصى؛ و هذا بالضبط ما حصل ؛ القوصى اصبح امين خزائن بن لادن.

الذين انضموا إلى تنظيم القاعدة ، التنظيم الإرهابي، لم يفهموا الدين الإسلامي بصورة صحيحة ولم يكونوا صادقين مع أنفسهم ولم يكونوا صادقين مع دينهم، ولكنهم كانوا سذج واستغلهم أسامة بن لادن أسوأ استغلال ليقتل الابرياء مثل داعش ،،فالداعشيين ليسوا مسلمين اصلا ولكنهم ارهابيين يتلذذون بتعذيب وقتل الابرياء ويحرقون الابرياء وهم احياء يقطعون رؤوسهم بالسيف...واستغلوا الدين لإشباع رغباتهم المريضة واغتصبوا النساء ...وأشاعوا الفوضى في سوريا وليبيا واليمن....وزعزعوا الأمن والاستقرار في تلك الدول ...فتبا لهم ...

ما تقولوا ياهو الزول دا ...

بريمة

سلام عليكم يا أخ عاطف عمر من الفيس بوك

تعليقاتك دائماً فيها سخرية محببة.

Quote: س (موضة) إلإرهاب عالية حبة ومطقمة مع بلاد الهجرة واللجوء!!

ياخي أهاجر ليه؟
خلي الإرهابيين يهاجروا و يلجأوا، ان شاءالله

لي غوانتانمو، خاصة القابلين للإستغلال بواسطة امثال

بن لادن و البغدادي. أذا الواحد أختار ان يكون مساعد

و شاهد على قتل الأبرياء، فليتحمل العواقب.

ألفي الڤيديو ممكن يكون سامي الحاج لأنه المعاه ده السفير السابق للسودان في قطر

صور سامي الحاج ..





بريمة

الفيديو الأول ياهو صاحبى ابراهيم

سلام يا أبوبكر والنصري، القاتل برضو بقتل بصدق واللص يسرق بصدق، الفرق هو أن القوصي وكل المتشددين أقل إنسانية من بقية الناس، الإنسانية تجعلك فوق أي تعاليم دينية خربة، وتجعلك تعيد التفكير فيها.
حاشية: الحيوانات جميعها صادقة ولكنها أقل ذكاءً وإنسانية

بالعكس يا النذير ؛ ابراهيم القوصى انسان افضل منى ؛ وأخلاقه احسن من اخلاقى و طبعه أفضل من طبعى .
الفرق بيننا فى القناعات او believes التى وصل اليها كل منا ؛
ابراهيم وصل لقناعة (احتمال تحت ظروف استثنائية)ان افكار و مبادئ و حجج بن لادن سليمة مية المية و التزم بها و اخلص لها و ضحى من اجلها.

انا، على الصعيد الاخر ؛ لم اصل مرحلة التضحية من أجل فكرة اؤمن بها .

ا

سلام يا حبيبنا النصري، إنسانية شنو اللي بتخلي إنسان يذبح إنسان؟! هذا لايمت للإنسانية بصلة

برضو يا النصري النفس البشرية دي من الصعب تحليلها، وحتى معارفنا القدام كنا بنشوفهم ناس كويسين، لكن بعد ما كبرنا إكتشفنا إنهم سيئون جدا، لأننا إكتسبنا تجارب في هجرتنا خلتنا نقرأ الناس كويس، وبعد دا بنخطئ في فهم بعض الناس. مستحيل يتلم زول إنساني ويكون إرهابي في نفس الوقت، زي ما واحد يقول دا كوز لكن كويس

يا النصري الحاجة اللي وصلت ليها، الزول دا نفسو غريقة، وحتى الأمريكان بوسائلهم المتطورة إتخدعوا فيه، وطلعوهو من المعتقل، وتاني رجعت حليمة لقديمها.

يا النذير ، والله بحاول جاهد انى ما اظهر بمظهر المدافع عن القوصى لأن مختلف معه 180 درجة .
لا اظن القوصى يذبح الناس بنفسه ؛ واذا افترضنا انه يفعل ؛ معناه حصل تغيير كامل شامل فى شخصيته ؛ و ده يرجعنا تانى لنقطة what exactly happened to him


اوكى كدى نفترض انه يذبح الناس ؛ هل تظن انه يقوم بذبح اى انسان يقف فى طريقه؟ او يختلف معه ؟ بذبح من طرف ؟
اكيد عملية الذبح هذه لها مبرراتها فى النصوص التى يتبعها و يتقيد بها ؛ هو لا يذبح لانه يحب الذبح .هو يذيح لان هناك (ادلة شرعية فى نظره) تجد له العذر فى الذبح مثل الدفاع عن النفس و محاربة الغزاة و غيرها من الأسباب.

اعيد و اكرر لولا وجود بن لادن فى السودان تلك الايام لكان حال ابراهيم مختلف تماما.
Just for the fun of it
اتخيل بدل بن لادن ؛ كان هناك عبدالحى يوسف الذى طلب من إبراهيم ان يعمل معه مديرا للحسابات؛ اشتغل ابراهيم مع عبدالحى ؛ وتأثر بالبيئة التى يعمل فيها عبدالحى، ثم تذوج مثنى و ثلاث و رباع و أمتلك البيوت و السيارات ؛ هل تظن ينتهى به الحال فى غوانتنامو؟
هو فقط ضحية للظروف حوله

القوصي من أبناء مدينة عطبرة حي الحصايا
واعتقد انه استقر فيها بعد الافراج عنه من
معتقل غوانتناموا

هوي يا جماعة الخير، بسمات بت عطبرة بتقول ليكم ما دام القوصي طلع من اولاد عطبرة فهو على حق ، وتقول ليكم شوفو براكم وصف صاحب البوست النصري بأخلاقه وصفاته ....
..بالله شوفو المحن ،، وشوفو التعصب بيادي لشنو ..!! تاييد الإرهاب....
أظنها كمان ما عندها مانع تكون إرهابية....ههههههه محمد معانا ما تخشانا ..

طبعا الجاب الكلام ده بصراحة انو نحن غظناها وقلنا ليها تعالي شوفي مدينتكم البتغني ليها ليل نهار سكانها طلعوا ارهابيين ...فقالت ما قالت....يمكن نعذرها ولا شنو!!لانها من كثرة الزعل قربت تبكي ....