*** على الكوبانى حبا وكرامة والسخرية من الكيزان***

03:57 PM November, 08 2019

سودانيز اون لاين
احمد حمودى-
مكتبتى
رابط مختصر

*حبا وكرامة*

*علي الكوباني*

ايي يا أحباب .. سألني واحد طاعن من العاملين
شباب وكمان قال لي (يا عمو) انت مقولة(الاختشوا ماتوا)
دي اصلا قصتها شنو..؟
اول حاجة قلت ليهو بركة الما قلت لي يا جدو..لكن اول شي يا زول.
.لمن يكون الشاسيه بتاعك كبير (8شنكل) وتكون طول وعرض.
.وكمان الغلاف بتاعك مش ولا بد ودشن😏..قصة عمو وخالو دي معاك ما بتجي.
. وما لايقة عليك وبتخليك زي (الفيل اللابس مايوه🙊)😅

المهم..قلت ليهو حكاية الاختشوا ماتوا..طلعوها اساسا
(ناس الطب الشرعي🤪) لما حصل انو في حلة من الحلال
كانت قطاطيها كلها مبنية من (القش)..اها في ليلة من الليالي
والناس نيام هبا (اعصار فيه نار )..واشتعل اللهب في القطاطي
بسرعة شديدة يعني ياها قصة سريان النار في الهشيم دييك..
وأي زول عايز ينجو من الموت كان لازم يتخارج جري من القطية بسرعة..
والناس الكانوا نايمين بملابس النوم الخفيفة او الداخلية او (امفكو).
.ما يعرف بمولاي كما خلقتني🙈.. ديل الحصلت عليهم الكارثة ..لأنو
الكانوا منهم (ما بخجلوا وما بختشوا) اتخارجوا جري طوالي
وما هماهم التعري..اما البختشوا والقعدوا يفتشوا في ملابس تسترهم
وبعدين يطلعوا من القطاطي..ديل طبعا ماتوا حرقاً..😰 وقع ليك يا عمو..😜
لكن على مر التاريخ لم تنطبق هذه المقولة بصورة فعلية الا على الكيزان
القاعدين(امفكو) بعد ثورة ديسمبر العظيمة..مثلاً:
- خد عندك..يصرح رئيس حزب الكيزان المكلف بأنه ثبت ان
العقوبات الامريكية ما كانت ضدهم ولا ضد رئيسهم بل كانت
ضد السودان وشعبه.. اجي ياااا ناس الطاغية الامريكان ليكم تدربنا..😏
ما كنتوا مصممين ولابسين الدمورية وعرقكم يخرخر..نسيتو الجعجعة
وقلة الادب القديتوا بيها راس الشعب.. وما خليتوا متطرف وارهابي
من كل العالم ما لميتوا في سودانا المسكين ده..لكن بعدها فهمتوا حاجة.
.وأتضايرتو لما عرفتوا الخواجات بلقطوا وببيدوا الارهابيين
بالدرون (الطيارات المسيرة) صقع بلاي استيشن بس😰 ..
- وخد عندك..نشرت الصحف ان التحقيقات بدت لمن لقوا (فرِت) كوز
وااحد عند 400 قطعة ارض..ياااخ قال ليك كان مفروض
يعمل حلة حقتو عدييل ويسميها (كرواتيا)🙊😅
- وخد عندك..ان يقوم الكيزان العولايق الاصلا البشتنه
حقتهم بس طلِع منهم(ميسي😜) وكمان معاهم واحد
صحفي قال كان كوز وتاب.. واظن الضرس
تاورو😏 يقوموا بالسخرية من لبس د.حمدوك لقميص
نص كوم وقال ايه (بدون بدله) عند تفتيشو لكركون
الشرف.. تقول ما شافوا لمن رئيس وزراء كندا وكل
رؤساء العالم كيغ بلبسوا خفيف(كاجوال) في
الرحلات الداخلية ..واصلا ما مفروض يكون في
استقبال حمدوك كركون شرف (وحركات الجيش دي)..
لانو ده ما ضيف..ده رئيس وزراء وجاي لشغل جوه بلدو
..مفروض توقف مثل هذه الممارسات التي هي في الاساس
(مشاريع لتربية الطغاة).. ياااخ جستن ترودي او اوباما كانوا
لمن يزوروا ولاياتهم..بمشوا بتغدوا في ماكدونالدز مع الشعب.
. وما في تفتيش لحرس شرف وكلام ما عندو معنى(عولايق_نخليها)😡
واصلا البهدله والبدل الكبيرة الزي (البردلوبه) ما شفناها الا عندكم.
.وكمان مرات بتكون(مزررة غلط🙊)
ـ وخد عندك..هسه كمان طالعين لينا بقصة اطلاق القمر الصناعي
السوداني من الصين والذي تم التعاقد عليه منذ 5 سنوات..الله يستر
ما يطلع بالدين😰.. بلد دخلت في العشرين سنة الفاتت 179 مليار دولار
من البترول والذهب والمعادن… .الخ وتجي تلقى
(الرد السد) ذااتو طلع بالقروض والدين.
.حالو وحال شارع الابيض (الاتماص زي حلاوة قطن)
مع اول مطرة وعقاب سيل..بلد اتنهبت نهب السواد والرماد.
.والحرامية قاعديين ومتجدعين ويطاعنوا بالكلام ويفسدوا في
الارض ويعملوا ضد الحكومة المدنية..😡
جدعة اخيرة:
# يا حمدكه يا أصلي والسادة الوزراء الكرام ويا ناس قوى
الحرية والتغيير شايفكم شغالين لكن بمهلة وعلى الراحاات.
.وبعدين الناس معصورة في معيشتها ومزنوقة شديد.
.وصابرين عشان انتوا خيارهم والمدنية حقتهم..لكن
الصبر مع الجوع ما بجي..وكونكم خليتو اعداء الشعب
مفكوكين وكمان بكل الغلة السرقوها حيحاربوكم
اقتصاديا تحت تحت..انكربوا شوية وادوا الني للنار.
.وجاييكم يوم 19 ديسمبر المجيد..يا بقت مليونية احتفالية ببعض
انجازاتكم بمحاربة الفساد والقيام بشي من الاصلاحات
او المصيبة تبقى مليونية تصحيحة..وتاني تكون
راحت سنة شمار في مرقة من عمر الثورة😢
أعجبني



كتب النص هنا