شوف شفتنة الشاب دا كيف حنك الشابة الفرنسية دي في مطعم القراصة

01:48 PM November, 04 2019

سودانيز اون لاين
Osman Musa-
مكتبتى
رابط مختصر

شفتنة جد . شركو هبر في مطعم قراصة . وهاك .. 3 ايام من السياحة
والتجوال معاها الحجل بي الرجل بين اهرامات كبوشية والخرطوم
. ثم حدث ما حدث .

Quote: ثم حدث ما حدث .

سجمنا.. نعل ما عوّقها بس !

يا ود موسى عايز اسألك من زمان! انت قاعد وين؟ في أمريكا ولا السودان

اخونا ود البشرى سلامات كان صدقت قاليك بي حبل العنكبوت تنقاد . تعال شوف حظ بلدينا دا . لي قدام بوريك لحظة المقابلة الاولانية كانت كيف . ياخ الفرنسية تحكي للشاب عن عالم الاثار وعن مغامرات عمك السويسري شارلي بوني في مناطق كرمة . وعن عشقها للحضارات النوبية . و زولك واقع في البصل بي الشطة والقراصة العجيبة هرس .

...
يا ود البشرى ياخ بين النفرين ديل ما كان في اي معرفة .
تفتكر الشابة دي حبتو ليه ؟
يجوز عشان طريقتو في قرش البصل ؟
عشان لغتو الانجليزية الزي الدافوري ؟
ولا عشان بعزم بي اصرار ؟

في صور لي قرقشة البصل ولا نمشي الضل ؟؟؟

اخونا ابوعاقلة سلامات .
ياخ زولك قرقش اي حاجة وخلي الصحن املط .
قالتلو : انا حبيت السودان .
قاليها : وانا قاعد اقطع قميصي يوم يكون باريس سان جيرمان لاعب .
قالتلو : وبيت جدي قريب لي الملعب .
زولك يا ابوعاقلة سرح بعيد يحلم بي جكة في داك العالم
الاخضر .
....

عارف يا ود موسى عندنا قصة قريبة من حكايتك دي..
عندي ود عمي شاب وسيم واجتماعي كان بقدم خدمات ومساعدات لتيم الاثري شارليس بونية لما يجي يبدا حفرياته..
وكان من ضمن التيم رجل محب للبحوث الاثرية برافقهم كل سنة ..
في واحدة من المواسم جاب معاه حفيدته شابة زي القمر..
المهم الخواجية اتعلقت بود عمنا دا تعلق شديد..
جدها دا طلع من العائلة الملكية..
والبنية موعودة تكون الملكة..
اخونا شوقي بدري كتب عن الموضوع دا ..
قال البنت بعد عادت عملت مشكلة وعايزة تتنازل عن حقها في العرش بسبب السوداني ..
ابن عمنا دا توفى في حادث حركة غريب ..
نحن الي اليوم بنعتقد الموضوع دا بسبب تعلق البنية به ..
فشنو قول للشفتة دا اعمل حسابك .

الله يرحمه هي نان تكونوا في أرقو ملوك وفي القارة العجوز من آل بوربون ياخ دي عزة ما لقاها الزنديق

عندي إعتقاد انو بعض بنات آر في الغرب وصلن لكمال الانسانية

بقية البشرية لسّ بعيدة شويّة

شوف عليك رب المجرات، كيف كلمات مثل حنكها وشركو هبر
كيف يفسدن الخيال

مرحب حباب ابوبكر عباس

اخونا منتصر سلامات تعال شوف الفرنسية بعد 9 اسابيع من الرجعة رسلت للشاب شنو . وقالت لي اهلها عن الشاب وعن السودان شنو .
الزولة دي يا منتصر رسمت لي اهلها صورة عن السودان خلت اهلها
في قبل فرنسا الاربعة يفكروا في زيارة السودان .
امها قالتلها بعد ما شافت صور لي سودانيات وسودانين والنيل
والارض . قالتلها يا بنتي السودانيين ديل جميلين .
بنتها ردت عليها . يا ماما وانتي ما شفتي جمال السودانيين
من الداخل .

بعد تسعة اسابيع وصل للشاب المظروف المدنكل بي البريد،السريع .
يا سلام .

اخونا استاذ محمد ع ط الملك سلامات
الولد الشفتة ما عمل الا الواجب .
خاف علي سلامة البنية وعاهد نفسو ما يخليها الا تتم المهمة وترجع .
الفرنسية احترمت وقفتو . وارتاحت لي طريقة شرحو لي قدر الشي
العارفو في التاريخ . قبل اليوم الاخير الفرنسية من نص جسر توتي
بقت تحسب في الساعات . وتعاين للنيل وتسال في نفسها .
يا جماعة الحصل لي شنو ؟
دا الجمال الحقيقي . ودي العظمة .
زول يعزمك بي العندو وتحس بي خوخو عليك .
و تعال شوف دموع الفرنسية يوم الرجعة في مطار الخرطوم .

أوسكار يا المستنير
هذا هو الفرق بين ثقافتين في فهم العالم والناس والتعامل التلقائي مع البشر
شوف بالله كيف عقلية العالم التالت بتفسره وتخرب كل الجمال الفيه

مرحب بي صباح طه

الحبيب عثمان .. تحياتي
نحن ناس مختلفين عن العالم
عندنا هناك في كرمة الخواجات بالكوم في بداية الشتاء
لزيارة الاثار ومتحف شارلي بونيه
في احدى إجازاتي لاحظت شي غريب جداً
الجماعة السواح يأكلوا في المطاعم عادي ولكن الغريب أهلنا يدفعوا الحساب
على الاعتبار أن هؤلاء ضيوف .. كانوا هولنديين ..
بالمناسبة شارلي بونيه عاش معانا في حلتنا أكثر من 40 سنة

تحياتي الحبيب عثمان ..

ود موسى وضيوفه الكرام فى هذا البوست الأنيق

تحياتي ,,,

التلقائية هي التى نتميز بها دوناً عن غيرنا من دول المنطقة

وطالما بوستك ده مولود فى تاريخ 4 .. يحدونا الأمل فى ان الصور قادمة لا محال هههههههههه

ارجعليك يا ود البشري
للخبر الزين البقول قالوا البطانة اترشت .
قريبك الليلة عندو احلي coffeeshop في قلب باريس .

اخونا الفاتح شلبي سلامات
لاحدي الان ما وصلتني من الشباب ديل صور .
لكن اقولك حاجة لون الفرنسية اول ما جات كانت في لون ساره نيكلس . بيضاء صر .
بس بعد ما رجعت من الشمالية اخدت لون شاكيرا . لون القمح الجديد .
والقوام سيسبان خالي دهون .
والعيون فيها حاجة من الوان عيون باقي عربيات الاندلس في اسبانيا .
هو قالوا مافي زول بشوف النيل والا يكون عندو بيه رابط قديم .
يعني الفرنساوية لمان شبحت الشبحة الاولي في مطعم القراصة . دي كانت
شبحة فيها ندا . دي عيزومة ليها الاف السنين .
الشغلة يا اخوي في الدم .

اخونا الكريم علي عبدالوهاب سلامات
اكرام اهلك للسياح طلاب المعرفة ما وقع واطة .
صدقني انتو في ذاكرة الامم وين ما كانت . مافي يا حاج علي
حسنة بتروح ساكت .
قلتليك المظروف المنفوخ جاو بي البريد السريع . زولك ما كان
خاتي في بالو في يوم من الايام يقطع
النهر الفاصل بين ضلفتين مطار
باريس . ولدك يا حاج علي كبس باريس دغش وبي نفس الجزمة
الدخل بيها مطعم القراصة الفي شارع 15 العمارات .

قبل 15 سنة من الان هبطت التركش اير لاين مطار باريس .
كان جو رهيب طبعا فرنسا شهر اربعة بتكون رهيبة .
عطاي السوداني دقولو ختم الدخول الحكاية ما اخدت دقايق
وحدف علي سير العفش اخد الشنطة وطلع .
اسرة الشابة كلها كانت في استقبال عطاي .
كانت لابسة تنورة طويلة وبرنيطة خفيفة والشعر نا لي حنتو تحتو
كانوا سعيدين سعادة شديدة سلم عليها بي الاحضان وكل شوية
تاني يحضن . وباكر صباحاتو عسل .

Quote: قبل اليوم الاخير الفرنسية من نص جسر توتي

Quote: قبل 15 سنة من الان هبطت التركش اير لاين مطار باريس

إنت يا عثمان موسى عطاي السوداني دا ياهو زاتو الحنك الفرنسية في مطعم القراصة ولّ دي قصة تانية ولّ إنت بتكتب القصة دي كلها من سنة 2024؟
لأنو كوبري توتي ما كان موجود قبل سنة 2009

يا مولانا الزمزمة دي خليها لي زندقة الجسر المقصود هنا هو تجسير الثقافات حتى توتي أُكلها

ما بخلّيها يا منص! ما بقدر شايل الجبّادة وحايم بيها المنبر طول بعرض

يا ود موسى النبي فينا أكان تخش في غلاط مولانا حافظ, يا داب اندمجنا في القصة

سلامات اخي ود البشري
انا خارج السودان من سنة 1996 وبقيت اجي السودان كتير بعد 2013
اخونا عطاي دا انا مشيت اسلم عليه في القهوة حقتو هي قهوة ومطعم
في باريس وصاحب عطاي بلدياتنا حكي لي حكاية عطاي .
احتمال من نص بنطون توتي .
اذكر يا ود البشرى مقابلة تلفزيونية قديمة للكاتب الامريكي
اليكس هيلي صاحب رواية الجزور . اذكر في الحلقة واحد غالطو
في بعض تواريخ تحرك البواخر من افريقيا للمواني الامريكية في
نورث كارولاينا .
فقام اليكس هيلي قالوا انا نص الرواية دي كتبتها من خشوم الناس
يعني كان بعمل ركن نقاش ويدي الناس راس الخيط ويبقي يجمع
منهم في المعلومات . وطبعا اليكس هيلي في بداية السبعينات معروف
انو عمل ندوة في جامعة الخرطوم وجمع منها نتف من الحكايات .

اخونا الفنان حمزة سلامات
ملاحظة ممتازة
ممكن من نص بنطون توتي . تحت في شوية شرح .

هلا اخونا منتصر
يا مراحب

Quote: اخونا الفاتح شلبي سلامات لاحدي الان ما وصلتني من الشباب ديل صور . لكن اقولك حاجة لون الفرنسية اول ما جات كانت في لون ساره نيكلس . بيضاء صر . بس بعد ما رجعت من الشمالية اخدت لون شاكيرا . لون القمح الجديد . والقوام سيسبان خالي دهون . والعيون فيها حاجة من الوان عيون باقي عربيات الاندلس في اسبانيا . هو قالوا مافي زول بشوف النيل والا يكون عندو بيه رابط قديم . يعني الفرنساوية لمان شبحت الشبحة الاولي في مطعم القراصة . دي كانت شبحة فيها ندا . دي عيزومة ليها الاف السنين . الشغلة يا اخوي في الدم .

ما شاء الله عليك, وصف ينافس الكاميرات .. كفاية مافى أي داعي لصور الكاميرا رحمةً بأناس فى بالي ههههههههههه