سـؤآل موجه للقسم القنصلى بالسفارة البريطانية بالخرطوم .

10:45 AM October, 30 2019

سودانيز اون لاين
قلقو-الخرطوم,السودان
مكتبتى
رابط مختصر

لـقد تقدمت كريمتى للقسم القنصلى بالسفارة البريطانية بالخرطوم بطلب تأشيرة سياحية لزيارة المملكة المتحدة ,وقامت بدفع مبلغ 5500 ج رسوم تأشيرة. إلا أن طلبها رفض لأسباب وضحوها فى خطاب الرد الذى أرفق مع جواز سفرها الذى اعادوه إليها .
بغض النظر عن الأسباب التى ذكروها فى خطاب الرفض وهذا طبعا من حقهم بلا جدال, لكن هل يمكنهم أن يبرروا لي عدم رد مبلغ ال 5500 ج طالما لم تحصل على التأشيرة ؟
انا اعتبر هذا التصرف عبارة عن (شغل كيزان) وأكل اموال الناس بالباطل .

يا قلقو سلام االقروش مقابل طلب تاشيرة ما ترجع فى جميع السفارات

اوكى ياحمودى , لكن بغض النظر عن هو معمول به فى جميع السفارات أم لا , السؤآل هو : هل هناك مايبرر ذلك ؟
طالما لم تعطنى تأشيرة دخول فما هو إذن مبرر المبلغ الذى دفعته ’ ؟ علما بأن هذا المبلغ ليس بالمبلغ اليسير حتى يمكن التجاوز عنه .

حبيبنا قلقو
تحياتي
زي ما قال ليك اخونا حمودي
رسوم التاشيرة لا تسترد
انا قبل كدة حصل معاي في السفارة الفرنسية الرياض
و ما ح يدوك اي مبرر

حقيقة مافى مبرر

يا اخي قلقو
انا تقدمت بطلب تاشيرة دراسة لابنائي الثلاث من المرحومة سماح وامهم معهم
وتأشيرة الدراسة اغلى بكثير من التاشيرة السياحية
والام كمرافقة
رفضوا الطلب وقبضوا مبلغ مهول كان ذلك قبل اربعة سنوات من الان

الأخوة المتاخلين عماد , اميرة , ود الكنزى
شكرا للمداخلات القيمة , لكن لابد لنا من العثور على إجابة من أحد زملاء المنبر العاملين بوزارة الخارجية او من يعرف احد العاملين بالوزارة .
فعلا هى مسألة تغيظ , لأنه عدم رد القروش بالجد مزعلنى ومحرقنى اكتر من رفضهم لأعطاء التأشيرة .

سلام يا هندسة
ربنا يعوضك

Quote: فما هو إذن مبرر المبلغ الذى دفعته ’ ؟

نعم هناك مبرر
وهو تفريغ موظف في السفارة لمراجعة الاوراق المطلوبة و الابلكيشن فورم
وهذا الامر يستغرق بعض الوقت
مع العلم ان اعداد المتقدمين مهولة

حبيبنا خضر ,
اليس فى السفارة أو القنصلية موظف معين براتب شهرى لأنجاز هذه المعاملات ؟
احيانا بيجينى خاطر بأن مثل هذا الأجراء الغير مبرر هو من مبدأ المعاملة بالمثل ( The principle of reciprocity) لأنه احتمال سفاراتنا فى الخارج تطبق هذا النهج الكيزانى على مواطنى تلك الدول التى فيها سفاراتنا وبالتالى ردت لنا تلك الدول بتحية احسن منها .

نتيجة لهذا التصرف بتحدث مواقف طريفة جدا ، شاهدت سيدة فى السفارة الأمريكية بعد ان رفضوا منحها الفيزا وطبعا شالو الرسوم شاهدتها تسب وأبت تمرق الا يرجعوا ليها قروشا ......لمن جابوا ليها ناس الأمن مرقوها

الكلام ما قال خضر
ثم العملية اساسا مقصودة لأنها جزء من اختبار الراغب في السفر لاستعداده المادي بغض النظر أنه سيقبل هذه المرة أو ربما مرة لاحقة والمبلغ اذا قورن بالخليج فإنه ضئيل لأن التأشيرات لبريطانيا يترواح رسوم التأشيرة ستة أشهر إلى عشرة سنوات متعددة من ٤٠٠ دولارد إلى ١١٠٠ دولار تقريبا هذا خلال الشهر الماضي، بالإضافة للوكيل والذي لا يوجد في الخرطوم حيث انك تكون مباشر مع السفارة بينما يقوم مكتب VFS مقام الوكيل بينك وبين السفارة ويأخذ أتعاب إجراء المقابلات الأولية المتعلقة باستلام مستندات العميل وتتراوح أجرته من ١٥٠دولار للمقابلة العادية إلى ٥٠٠ دولار لل VIP Appointmentوان شاء الله المرة الجاية تحصل على التاشيرة

الاخ قلقو وسلام ليس هنالك مبرر لاخذ كامل المبلغ
فمثلا ,المجلس الطبي البريطاني وهى مؤسسة تنتمي لنفس الدولة تأخذ فلوس للتسجيل و اذا لم تستطع استكمال الاوراق لاى سبب انهم يخصمون مبلغا معينا اقل من ؤبع المبللغ المدفوع مقابل الاتعاب الذكرا اخونا خضر فوق
لو كانت هذه القنصلية تعمل من فلب لندن ,ما كان عملت كدة , لانو شى غير دستورى .اما هناك فتفصلها الاف الكيلومترت عن محكمة اولد بيلى واظن هذه سبب اللهف الغير مبرر
تحياتى

QUOTE : بينما يقوم مكتب VFS مقام الوكيل بينك وبين السفارة ويأخذ أتعاب إجراء المقابلات الأولية المتعلقة باستلام مستندات العميل

مكتب ال VFS ده شنو يا احمد عمر ؟ هل هو تابع للسفارة ولا هو مكتب يعمل كسمسار بين السفارة وطالبى التأشيرة ؟
إن كان يتبع للسفارة فهذا يعنى أن السفارة أو دولته هى من تدفع له راتبه مقابل هذا العمل . أما كان يعمل كمكتب فنى وسيط بين القنصلية وطالبى التأشيرة , فأذن على الدنيا السلام لأن هذا هو عين السمسرة ( شغل الكيزان) الذى ذكرته فى اول البوست بتاعى .
اجد وجاهة فى كلام الأخ مرتضى عبدالجليل وذلك بأن تقوم القنصلية برد المبلغ لمقدم التأشيرة حال رفض القنصلية لمنحها بعد خصم نسبة مئوية بسيطة . أما أن تلهف القنصلية كامل المبلغ فهذا والله ظلم وأبو الظلم ذاتو , يعنى لا طلنا بلح الشام ولا عنب اليمن .

QUOTE : لمن جابوا ليها ناس الأمن مرقوها
باقى لي يا أميرة لو ده كنتى إنت إلا كانوا يخارجوكى بالمارينز .

Quote: باقى لي يا أميرة لو ده كنتى إنت إلا كانوا يخارجوكى بالمارينز .

اناذاتى ما ببشتن روحى مع السفارات ، لكن رأيك شنو انا هسه جاية من رحلة لندن /نيويورك بى جوازه السوداني ده

ال

Quote: كتب ال VFS ده شنو يا احمد عمر

GLOBAL VISA SERVICES

وهو بالفعل مكتب سمسرة بس بيجمع عدد من القنصليات في مكان واحد للتقديم للتأشيرات
وعمل المقابلات.
اما ال FEES بيكون مكتوب لك في الطلب بتاعك انها غير مستردة في أي مكان في العالم
وانت بتوقيعك عليه توافق على ما كتب فيه .

المبلغ ما هو شوية اذ ان الرسوم هنا في السعودية للدول الأوروبية حوالي 100 دولار

QUOTE :
GLOBAL VISA SERVICES
شـكرا يا ود الشـيخ على المداخلة المفيدة .
يعنى بعد ده نفهم إنه مسألة ال.. Nonrefundable Fees ده إجراء معمول به فى جميع سفارات العالم .
لكن مهما يكن من أمر فهو ظلم غير مبرر .

QUOTE : اناذاتى ما ببشتن روحى مع السفارات ، لكن رأيك شنو انا هسه جاية من رحلة لندن /نيويورك بى جوازه السوداني ده ن..
الأستاذة اميرة حسين ’
تمنى لك سلامة الوصول . لمن توصلى لندن تانى حاولى مقابلة صاحبة الجلالة الملكة اليزابيث وقولى ليها قلقو زعلان منكم عشان أكلتو قروشو .
مع التحايا ,

مرحب يا هندسة

Quote: حبيبنا خضر , اليس فى السفارة أو القنصلية موظف معين براتب شهرى لأنجاز هذه المعاملات ؟ احيانا بيجينى خاطر بأن مثل هذا الأجراء الغير مبرر هو من مبدأ المعاملة بالمثل ( The principle of reciprocity) لأنه احتمال سفاراتنا فى الخارج تطبق هذا النهج الكيزانى على مواطنى تلك الدول التى فيها سفاراتنا وبالتالى ردت لنا تلك الدول بتحية احسن منها .

موظفي السفارة بياخدو الراتب عشان خدمة مواطنيهم في الخارج
بالنسبة للرسوم مفروضة على كل الجنسيات و بلا استثناء
اديك هنت للتاشيرات الاوروبية
طبعاّ بريطانيا ما من دول الشينغن و الدخول ليها صعب جداّ بالذات في السنوات الأخيرة
بالنسبة لبريطانيا مستحيل يوافقو ليك على تأشيرة سياحية الا تكون شخصية مرموقة في بلدك
في حالة انك قررتا تزور بريطانيا عشان تكسر ركبة تقوم تسجل في كورس في اي كلية او جامعة
هنا الموافقة بتجي سريع جداّ , نعم هي مكلفة لكن مضمونة لانها بتطلع عن طريق الجامعة او الكلية
و بعدها صرخة لاجئ و تورق و امورك باسطة :)

شكرا حبيبنا خضر على المعلومات القيمة وقد وضح لنا زميل المنبر محمد الشيخ جزْء من الصورة .
عموما الحمدلله وربنا يقدرنى ابلع مسألة قروشى الطارت وبتى الما قدرت تسافر .
مع التحايا .

القروش دي كانت مبررة زمان لانو لازم يعملو ليك سيرش ومراسلات طويلة عشان يتاكدو من المعلومات واثبات الشخصية بتاعك ..هسي الحاجات دي بقت ساهلة بكبسة زر ومافي مبرر للقروش دي كولها ..
تذكرو زمان كان تمشي توثق شاهاداتك عند سفارة يشيلو دم قلبك ..هسي مافي حاجة اسمها توثيق في البرنامج بتاع البارمترك دا تخت الشهادة فيو وانتهي الموضوع ..