Post: #1
Title: اسقى الشمس شاى الصباح
Author: أبوذر بابكر
Date: 10-28-2019, 04:09 PM
04:09 PM October, 28 2019 سودانيز اون لاين
أبوذر بابكر-
مكتبتى
رابط مختصر
إجترار من أسى قديم متجدد
كانت بداية توسل السقيا
فى أبريل 2014م
وعود على وجع
|
Post: #2
Title: Re: اسقى الشمس شاى الصباح
Author: أبوذر بابكر
Date: 10-28-2019, 04:12 PM
Parent: #1
اسقى الشمس شاى الصباح
ساساق الروح
البين دروب الليل
وفرقان الغياب
ومن تالاهن مرق منك
عليك ديداب
مضارى من عين الضلام
والشوف مقسم
بين عيونك والدليل
وانت المخسّم
بالدرادر والعذاب
وعطشك هناك
ساكن نواحى النيل
ناشف نميمك
وين تقبل ووين تروح
راجيك سيل
اتوكل على خوفك
وليك الويل
دس يقينك فى الزحام
وليك الويل
ارميهو فى بطن الوجع تيراب
حس الوجع غلبو الكلام
والطين موسّم
بالوجوه الخايفه
من قولة تعال
ضلك معسّم
مكتوف على وش النعال
رمش الهنا وكحل الوئام
مالى العيون النازفه
من شح الوصال
وكيف السبيل
والممكن المسكين بعيد
ما باقى ليك غير المحال
المرقة فى دربك سؤال
والرجعة زادك والجواب
ورحلك مستف بالغباين
بالمشاوير الطوال
موية شرابك
قطرة فى نية السراب
من ياتو جيهة بجيك مناك ؟
وعين الشمس مصرورة
مضاريه بى شقل السحاب
وضو الجهات مسروق
جنات عذابك باليمين
ساكنه العروق
ونيران سعادتك بالشمال
لى ياتو جيهة تسوق غناك ؟
وحس البلود مخنوق
خت الوصية قريب حداك
فى ذمة الليل القديم
اسقى الشمس شاى الصباح
قبال يحين وقت المروق
قبال تداهمك
خيل مواجعك والجراح
قبال يفوت باقى الغنا
الفضل معاك
قبال تضلم
وينكسف خاطر البروق
امرق تعال
اختا الدروب الما بتحن
اضارا بى شوك الرياح
امرق تعال
قبال تجن
مسيومه روحك
وانت مافى
مربوطة بى مغس الحبال
لملم جروحك
وفى المنافى
صنقر تحت ضل المنى الممحوق
واخير تجى
امرق تعال
قبال تبور فى السوق
المرقة فى دربك سؤال
والرجعة زادك والجواب
امرق تعال
|
Post: #3
Title: Re: اسقى الشمس شاى الصباح
Author: نعمات عماد
Date: 10-28-2019, 04:27 PM
Parent: #2
سلام عليكم
يا روعة الحزن النبيل
،،،،،،،،
في شئ في القصيدة بذكرني بالمرحوم حرسم
ربنا يجعل مثواه الجنة.
|
Post: #4
Title: Re: اسقى الشمس شاى الصباح
Author: أبوذر بابكر
Date: 10-28-2019, 05:29 PM
Parent: #3
أهلا يا نعمات وكيف حالك
فعلا نضميك فى محله
نشرت النص اول مره هنا فى العام 2014
و تناجينا فيه كتير انا والصديق الجميل
المرحوم حرسم
كان عندنا مداورات كتيرة بخصوص النص ده
ربما تكونى مرتى عليها فى حينها داك
ولسه مخزنه عندك فى ذاكرة القراية
تسلمى أن شاء الله و تطيب أيامك
|
Post: #5
Title: Re: اسقى الشمس شاى الصباح
Author: osama elkhawad
Date: 10-28-2019, 05:39 PM
Parent: #2
Quote: صنقر تحت ضل المنى الممحوق
واخير تجى
امرق تعال
قبال تبور فى السوق
المرقة فى دربك سؤال
والرجعة زادك والجواب
|
وايضا امرقْ تعال الى الدهشة، أيها القارئ ..
وصنقرْ تحت الظل المديد للشعر ...
|
Post: #6
Title: Re: اسقى الشمس شاى الصباح
Author: osama elkhawad
Date: 10-29-2019, 04:45 AM
Parent: #5
| Quote: اسقي الشمس شاى الصباح |
في المستوى الملموس :
الشمس هي التي تصنع الصباح والمساء.
في المستوى الاجتماعي: شاي الصباح " مفتتح اليوم ./
في المستوى المجازي:
تصبح الشمس في علاقة استقبال ما صنعته:
الصباح من خلال الشاي.
هل كانت الشمس "خرمانة" مثلاً؟
هل هي الضيفة؟؟ ..إلخ..
في كل الاحوال والفروض:
تنقلب علاقة الشمس بالصباح..
|
Post: #9
Title: Re: اسقى الشمس شاى الصباح
Author: أبوذر بابكر
Date: 10-30-2019, 09:28 AM
Parent: #6
فى رأيي الشمس و المطر هم أو هما ثنائي خلق الحياة فى مبتداها الأول
الشمس دائما جديرة بطقس احتفائي يومى
وشاى الصباح قربان مننا
زلفى لحضور سيدتنا المشرقة
نحن يا مشاء الخرمانين
للضوء و الدفء و الحياة
وقبل ده كله
للرجوع إلى طيننا الأول
|
Post: #7
Title: Re: اسقى الشمس شاى الصباح
Author: أبوذر بابكر
Date: 10-29-2019, 07:42 AM
Parent: #5
نصنقر ومعانا المشاء
ونمش كلنا قيدومة لى فرح الشمس
والشعر باسط روحه على وصيد الضوء
|
Post: #8
Title: Re: اسقى الشمس شاى الصباح
Author: معتصم عيدروس
Date: 10-29-2019, 04:03 PM
Parent: #7
يا سلام عليك ياسلام
|
Post: #10
Title: Re: اسقى الشمس شاى الصباح
Author: أبوذر بابكر
Date: 10-30-2019, 12:23 PM
Parent: #8
يا معتصماه
كيفنك ياخ و أن شاء طيب و شديد و سعيد
اسمع
طارق عيدروس اخوك ؟
ولا تشابه أسماء ساى
لأنه اسم عيدروس ده ما كتير عندنا
|
Post: #11
Title: Re: اسقى الشمس شاى الصباح
Author: Osman Musa
Date: 10-30-2019, 01:44 PM
Parent: #2
( وجاءت امي تحمل الشاى وفرغ ابي من اوراده فجاء
وجاءت اختي )
بي نفس طريقة عمك الطيب صالح دي حنجيك نشرب
معاك شاى الصباح .
المكانات شايلة نفس الملامح .
وطعم الشاي بي اللبن في تمبول وفي كرمكول واحد .
...
دا الشعر البخلي موج الازرق يضارب .
انت قايل الموج دا بيضارب بلا سبب ؟
تحياتي .
انا في السودان نفس التلفون القديم
|
Post: #12
Title: Re: اسقى الشمس شاى الصباح
Author: أبوذر بابكر
Date: 10-31-2019, 07:49 AM
Parent: #11
عثمان
تجينا
ويجينا معاك فرح
نمتع روحنا بيك
أو كما قال سيدنا عمر الدوش
انت تجى السودان وانا أكون بره السودان
انت بره أكون أنا جوه
عكس عكاس بس
الأيام دى انا فى مغامرة عجيبة فى نواحى الإمارات
لكين بجى قريب كان الله هون
قاعد لمتين فى البلد ؟
|
Post: #13
Title: Re: اسقى الشمس شاى الصباح
Author: Osman Musa
Date: 10-31-2019, 08:17 AM
Parent: #12
سلامات شاعرنا الكبير
هرمنا يا ابوذر ونحن في دروب السفر الطوال
محتفظ بي كل كعوب تذاكر السفر من اول سفرية في سنة 1979
وحتي اخر سفرية .
والله متذكر شكل المضيفة اليمنية في اول رحلة .
وشكل الراكبة الالمانية السمحة في الكرسي المجاور . النزلت في مطار
ميونخ . وانا تابعت الرحلة الي لندن . والكرسي الجمبي فاضي .
دشليون سفرية قابلنا فيها سحنات كلها صباح خير . الحمد لله
لكن يا اخوي شكلنا كدا بقينا ناس مقابر مقابر .
غايتو انا اديت صاحبك الخواض وصيتي يجمع لي شعري كلو
حق امريكا علي حق اليمن علي حق لندن في كتاب واحد .
مع اعادة طباعة الديوان القديم .1981 مطبعة الفجالة القاهرة
داير اخليك في الصورة .
|
Post: #14
Title: Re: اسقى الشمس شاى الصباح
Author: أبوذر بابكر
Date: 10-31-2019, 10:09 AM
Parent: #13
لسه بدرى ياخ
كلنا متشبثين و متشعلقين فى هذه الدنيا البايخه
بس ما بنمرق بى هينه
ههههه
احسن شى فعلا تلملم شغلك كله فى حته واحده
انا حاولت قبل كم سنة و لميت كتير
بس بدون ميز وبدون ترتيب كويس
الشغلانه محتاجه وقت و فضاوه زى ما بقول السعوديين
يلا قو اهيد
|
Post: #15
Title: Re: اسقى الشمس شاى الصباح
Author: Osman Musa
Date: 10-31-2019, 03:24 PM
Parent: #14
صاحبك الخواض شديد في دروب المطابع وعندو روح طويلة في اللملمة .
|
Post: #16
Title: Re: اسقى الشمس شاى الصباح
Author: أبوذر بابكر
Date: 11-01-2019, 12:37 PM
Parent: #15
ازيك يا حاج
فعلا المشاء فى حد ذاته حالة إنسانية ابداعية ثرة جدا و غنية
أمسك فيهو قوى الزول ده
|
Post: #17
Title: Re: اسقى الشمس شاى الصباح
Author: هشام الدرديري
Date: 11-02-2019, 02:15 PM
Parent: #16
ابوذر سلامات عادب بي الذاكرة الي ليالي طرابلس الغرب وكان وقتها يصدح في اماسيها الجميلة الهرم المبدع الاستاذ مصطفى سيد أحمد وتذكرت رائعةالمبدع الجميل عبد العال السيد الدنيا ليل غربه ومطر وطرف حزين وجع تقاسيم الوترشرب الزمن فرح السنين والباقي هداه السفروانت تقولساساق الروحبين دروب الليل وفرقان الغيابوانا اسرج راحتي مابين طرابلس الغرب وشرقت بي في فيافي نجد وخاصرتي في وجع منذ فارق ارض النيل العظيم... والتسائل في خاطر متى نحط الرحال في بلادي اتمنى ان تمهلناالايام ولا نعرف درب للمطارات وصالات الجوازات و المغادره
|
Post: #18
Title: Re: اسقى الشمس شاى الصباح
Author: Biraima M Adam
Date: 11-02-2019, 02:42 PM
Parent: #17
يقول الله تعالى: (والشُّعراءُ يَتَّبِعُهُمُ الغَاوُونَ . ألَمْ تَرَ أَنَّهُمْ فِي كُلِّ وَادٍ يَهِيمُونَ . وأَنَّهُمْ يَقولُونَ مَا لَا يَفْعَلُونَ)
ما بتقدر تسقي الشمس لا شاي ولا مريسة .. دا كلام الله ..
وتاريخياً الشمس ليس لها قيمة كبيرة لشعوب العصر الحجري ..
وأجمل الشعوب وأكثرها زوقاً هى الشعوب البعيدة عن مدار الشمس ..
ليه ما تسقي القمراء شاي الصباح ..
أو تسقي نجمة الصباح Venus شاي الصباح ..
أو تسقي الدب القطبي شاي الصباح ..
ليس لديك أي حس بالطبيعة ..
الشمس أكبر دكتاتور طبيعي .. كل المجرات السماوية تدور حول فلكها .. رغم أنفها لقوة جاذبيتها ..
هذا تمجيد لدكتاتور وليس للحرية .. أو الجمال ..
-------------------------------------------------------
Disclaimer
والله يا أبو ذر .. لا أملك مثقال ذرة من المعرفة بالشعر .. أو النقد
لكن برضو عايز رأيك ورأي أستاذ الخواض في النجر بتاعي الفوق دا ..
بريمة
|
Post: #19
Title: Re: اسقى الشمس شاى الصباح
Author: عمار عبدالله عبدالرحمن
Date: 11-02-2019, 03:24 PM
Parent: #18
و عاد الغفاري من ربذته
ليدهش سودانيزنا،
و يفكك خرمة شمسنا مع المشايخ
|
Post: #23
Title: Re: اسقى الشمس شاى الصباح
Author: أبوذر بابكر
Date: 11-03-2019, 09:08 AM
Parent: #19
ازيك يا عمار
و عساك بخير
ليتنا نعود
قبل أن توارى أحلامنا
و تتوسد تراب ربذة بعيدة
|
Post: #20
Title: Re: اسقى الشمس شاى الصباح
Author: Osman Musa
Date: 11-02-2019, 04:04 PM
Parent: #18
اخونا بريمة سلامات .
والله احب النقد جدا . لكن ما عندي اي معرفة بي النقد .
بس بفتكر يا بريمة لمان اب ذر جاب ليك في القصيدة سيرة الشمس
داير يصور ليك حرارة حب الشاعر للمحبوبة . ودا يا اخ بريمة
اسمو الجن الكلكي .
دا يا بريمة ما هو الغزل المكشوف زي غزل ناس ( فيفتي سنت )
دا غزل فيه عفة وصدق . انت ما سامع بي ( يا قلبي المكتول كمد )
يعني هارت اتاك والمقابر .
اسقي الشمس شاي الصباح يا بريمة شغل فيه خجل . شغل كتامي
دا الحب البخليك تناهد .
تحياتي
|
Post: #24
Title: Re: اسقى الشمس شاى الصباح
Author: أبوذر بابكر
Date: 11-03-2019, 07:50 PM
Parent: #20
يا حاج عثمان
دى إسمها المدرسة الواقعية البريمية
اى زول حر فى مدرستو
مدرسة واقعية مغرقة فى الوقعان
ههههه
|
Post: #27
Title: Re: اسقى الشمس شاى الصباح
Author: أبوذر بابكر
Date: 11-09-2019, 10:47 AM
Parent: #20
تعرف يا عثمان
البقارة ديل من اكتر الناس محبة للفنون و الفرح
طبيعة البيئة و طريقة الحياة عندهم بتخلق عوالم جميلة جدا ليهم
لكين برية ده بقارى تايوانى
ههههه
شاعرهم قال
فى الوسامه
جل رسامه
يا خلى دى الدنيا
معدودة ايامه
حليوه يا بسامه
الفايح نسامه
الريده فى القلوب
الله علامه
|
Post: #22
Title: Re: اسقى الشمس شاى الصباح
Author: أبوذر بابكر
Date: 11-02-2019, 08:05 PM
Parent: #18
ازيك يا بريمه
منو القال ليك انت ما ناقد ؟
يا زول انت ناقد تب والله
انت قايل النقد ده شنو ب الضبط
ما ياهو رأيك البتقولو فى أى شى
و اكيد لما تقول رأيك فى أى شى مهما كان هو شنو بكون عندك اسبابك و دوافعك و محركاتك الخ الخ
ودى ياها التحليلات الانت بتلقاها عند الناس البقولو عليهم نقاد ديل
ياهو نفس ال
Criticism
البقولوهو
الاختلاف بس بكون فى الحتة أو النقطة الانت واقف فيها و بتعاين منها
هسى كلامك ده نقد عديل كان بتتذوق ولا ما بتتذوق الشعر
الغريبة انت بقارى
اول مره يمكن يلاقينى بقارى ما بضوق طعم الشعر
هههههه
ما سمعت
كن قليبكى فراكى
انا بطراكى
يا قمير في سماكى
|
Post: #21
Title: Re: اسقى الشمس شاى الصباح
Author: أبوذر بابكر
Date: 11-02-2019, 07:54 PM
Parent: #17
ازيك يا هشام و كيف الحال
لو كانت الغربة امرأة
كنت خنقتها ههههه
دى على وزن لو كان الفقر رجلا ديك
الغربة ما بعرف عذابها إلا الناس الضاقوها
و الأسوأ كمان الناس الجربوها و رجعو لى أهلهم فرحانين
وتانى اضطروا يفوتو و يغتربو غصبا عنهم
حاجه قاتله و مهلكه بالجد والله
|
Post: #25
Title: Re: اسقى الشمس شاى الصباح
Author: عبيد الطيب
Date: 11-04-2019, 05:22 AM
Parent: #21
| Quote: ورحلك مستف بالغباينبالمشاوير الطوالموية شرابكقطرة فى نية السرابمن ياتو جيهة بجيك مناك ؟وعين الشمس مصرورةمضاريه بى شقل السحابوضو الجهات مسروقجنات عذابك باليمينساكنه العروقونيران سعادتك بالشماللى ياتو جيهة تسوق غناك ؟وحس البلود مخنوقخت الوصية قريب حداكفى ذمة الليل القديماسقى الشمس شاى الصباحقبال يحين وقت المروققبال تداهمكخيل مواجعك والجراحقبال يفوت باقى الغناالفضل معاكقبال تضلموينكسف خاطر البروق |
ماأروعك يادعاش عبقر،شاعرنا الشفيف أباذرتعجبني طرائق صياغتك ومآنستك للبيئة والتضاريس وموالفتك للريف وجغرافيته(نجوع وقري)
رحلك مستّف بالغباين.....وكمان (وعين الشمس مصرورة في طريف شِقل سحاب) ياخ عجيب إنت وحتي سحابنا شوكو محندد،
لكن ربو ورخو...
(في ذمّة الليل القديم) عميق عميق (جنات عذابك باليمين/ونيران سعادتك بالشمال) وهنا تكمن عبقريتك وتكمن مصيبة البلد
غايتو بروقنا بقت خُلّب..إن إنكسف خاطرها الينكسف!!!
أهديك هذه المطايبة ، شيخنا وعمدتنا وشاعرنا المفخرة أحمدالفرجوني قال:
ياعبيد البريق الفي الدّماسات لوَّح
أسهر عيني لاقابْها الصباح البوّح
حال قلبي التبِع شوقو وتركني وروّح
صاحبو القمري وكتو الفي الفريعات نوّح
********************************
ياعبيد من أذي الشوق المِنجّض قَشي
وين ماأدور حلل يابا الحلل مايمشي
أداول في الرّوايات بين دوري وورشي
وأتناوم علي النوم كان يصدق غشي
*******************************
الزّيف البِهِب في الليل علي بلادالله
وين مايجيني ترجف كبدتي وتنقلّا
الهالْكاني ياعبيد بي غناي تتسلّى
أنا ياعبيد معاي ونوين وصبرا قلّا
***************************
وكان ردي من باب المعزة لا المجاراة،شيخنا الفرجوني صعب مجاراته
عبيد الطيب ودالمقدم قال:
بشاشيبي البريق نامت الصباح البوّح
وغناك الرايمو قلبي الفي المشارع ضوّح
بروي محولنا مو الدّوْداو صبيو شلوّح
وقشّط اضاة وِدِي عبقر بعد ماصوّح
***********************
الشوق الفضح سمتي وبشاشة وشّي
طربان ليهو يا الفرجوني بعمِر عِشّي
أتالت ب القران هاظروف حياتنا وتمشي
أكاسع النوم أنقرطلُو وأدودِر رمشي
********************************
الفوق والدعاشات والهلال الهلّا
وين ماتعودلي قلبي المنبدل بنفلّا
غناكا علي أم نفل ياشيخنا هي بتجلّا
وقشّاطة وسَنَد ل المتلي حيلو أنتلّا
معزتي لك ولكل المتداخلين
|
Post: #26
Title: Re: اسقى الشمس شاى الصباح
Author: أبوذر بابكر
Date: 11-04-2019, 06:58 AM
Parent: #25
العبيد ود المقدم
أصبر لى
والله ما بخليك
كان اتا كان الفرجونى
|
|