غايتو اذا صح ما سمعناه فإن الشعب سيثور مرة أخرى مطالبا بعودة نظام اللصوص والحرامية

03:46 PM October, 25 2019

سودانيز اون لاين
امتثال عبدالله-NYC - USA
مكتبتى
رابط مختصر

سمعنا وقرانا أشياء عجيبة تحصل في ثلاث وزارات سيادية ومنها وزارة الخارجية ووزارة الداخلية...واذا صح ما سمعناه وقراناه فإن نفس الشعب الذي ثار على نظام اللصوص والحرامية سوف يثور مرة أخرى وبشكل أعنف للمطالبة بعودة نظام اللصوص والحرامية وقبل انتهاء الفترة الانتقالية، ،،حافظوا على ثورتكم يا ناس قوى الحرية والتغيير والا سوف يعود نظام اللصوص والحرامية مرة أخرى وهذا هو الامر الذي تخشاه ونخاف منه ...
واذا ما سمعتم ماذا يدور..قولوا لي نحكي ليكم ....واتمنى تكون اشاعات ومن بنات افكار الجماعة اياهم ...ولكن يبدو أنها الحقيقة المرة ...

سلام يا إمتثال
يعميتا ويطرشنا ما سمعنا بشي خاص بوزارة الداخلية والخارجية
لكن أداء الحكومة عموماً ما قدر التحديات ودون مستوى طموحات الناس
رشي الخبر العندك والمصدر وربنا يستر

أنا شخصياً من البداية ما خاتي أحلام وآمال كبيرة على الحكومة وبفتكر ضرورة إستمرار الثورة والتغيير ولكن بأدوات وأهداف مختلفة من الثورة غي الفترة من ديسمبر ليوليو.

حافظ
خليك قريب ....واديني وقت بسيط عشان اجيك منجضة الموضوع وبالمصدر وحابدا ليك بوزارة الخارجية...

بتنا امتثال سلامات
ما تصدقي اشاعات ناس عبدالحي وفتن الطيب مصطفي .
الثورة العظيمة صاحية ومفتحة وفي امان الله .
ومافي زول تاني بدي فرصة لي كوز . معرض الكتاب زي الحلاوة
والفول بي الزيت يشهيك تاكلي الصحن القديم المطرقع زاتو .
معليش الفول بدون بصل نسبة لي ارتفاع اسعار حلاوة بصل
لكن برضو بدون بصل بنتمو شطة .

سلام امتثال

واذا ما سمعتم ماذا يدور..قولوا لي نحكي ليكم ....واتمنى تكون اشاعات ومن بنات افكار الجماعة اياهم ...ولكن يبدو أنها الحقيقة المرة ...
....
الموضوع شنو ؟

مافي حقيقة مرة ولا حلوة

كل ما يحدث استراتيجية واضحة للتشكيك في حكومة الثورة
وسمعناها عشرات المرات منهم

امتثال
رشي الموضوع
الله يكضب الشينة

الاخت امتثال

تحية طيبة

أي شئ متوقع طالما وزارتي الداخلية والدفاع وفق نص الوثيقة الدستورية تتبع لنظام الانقاذ عبر لجنتهم الامنية مليشيات النظام وكتائبه وامن شعبي يعني بصريح العبارة كل القوة التى شاركت في فض الاعتصام وارتكابها للجريمة البشعة المجزرة والاغتصاب موجودين الان فى وزارتي الدفاع والداخلية وبنص الوثيقة .
وزارة الخارجية قبل اقل من أسبوع تم تعيين مبارك محجوب متحدث بأسم الخارجية وباعتباري احد خريجي الهند اعرف مبارك محجوب وكل خريجي الهند يعلمون ان مبارك محجوب من مؤسسي شباب الانقاذ بالهند وعمل في كذا سفارة في ظل نظام الانقاذ لكن وحدة خريجي الهند بتعريته ورفع مذكرة تم تنحيته وعين شخص أخر بس ما عارف منو الرشح مبارك محجوب طالما الوزارة وزارة قحت ومبارك لونه السياسي معروف .
مفترض نكون صادقين في المفاهيم لا نغش أنفسنا ذكر ان الحكومة حكومة الثورة ودا مفهوم خاطئ صحيح مجلس الوزراء مجلس الثورة عدا وزارتي الدفاع والداخلية والقرارات التنفيذية تصاغ وتصدر مابين السيادي والوزراء ، التعريف السليم للحكومة شراكة او تسوية بين قحت واللجنة الامنية لنظام الانقاذ اللهم الا اعتبرنا المجلس العسكري ومليشيات الجنجويد قوات وطنية وتبع الثورة ، وحدة الجماهير والضغط عبر الشارع هي الوسيلة الوحيدة لتحقيق وتنفيذ شعارات ومطالب الثورة

سلام امتثال
مافي خطر زي تمسك المدعو حميدتي وتلصقه بالثورة
السودانية، دي تشبه تلهف و رغبة مراهق دون السن القانونية
لقيادة سيارة دون رخصة وسط المدينة وهو لا يملك اي مهارة سوى السيارة
و التهور عايز يبقي يبقي رئيس بأي طريقة..
دا الخطر المواجهنا.
عايز يحل مشكلة المواصلات بالدعم السريع
عايز يحل مشكلة العلاج و التعليم بحلول فطيرة و بالدعم السريع
يستخدم كل الطرق لاسترضاء الناس ودا عشان شنو؟
لأنو المتهم الرئيسي هو و قواته في فض الاعتصام.
*ما تصدقي شخص شريف ح يتورط في اي شئ
ضد الثورة و الثوار مثل الخارجية و الداخلية
حميدتي شغال مع الثورة المضادة بكل ما يملك لاجهاض
الثورة و التشكيك فيها.
لجان المقاومة يجب أن تكون صاحية و المهنيبن و النقابات وشرفاء
القوات المسلحة.

ياايها الجمع الكريم
ما تفتكروا ان الموضوع هين وساهل وخلاص في شهرين تلاتة البلد تتعدل والدولار ينزل
وننزل من قائمة الحظر والكيزان يموتوا وحميدتي يتحاكم في قفص واحد مع جنجويده ولو وزع كل السكر الموجود في كوبا وجاب ليهم الترماي من اول وجديد .. ومعاه بقية المجرمين
وبعدهم يسلموا المخلوع المطير عيونو وجضومو للجنائية ونرتاح
.... الناس دي بتحارب اشباح .. لا يمكن يكون في بلد ما خونة وماجورين ومارقين مثل الموجودين في السودان
دا مخاض عسير ... وولادة دولة ليست بالشىء الهين
ولا تنسوا ان إاعلام الكيزان حلقو واسع ...وشغل حقد وغل وكراهية

Quote: سلام امتثال مافي خطر زي تمسك المدعو حميدتي وتلصقه بالثورة السودانية، دي تشبه تلهف و رغبة مراهق دون السن القانونية لقيادة سيارة دون رخصة وسط المدينة وهو لا يملك اي مهارة سوى السيارة و التهور عايز يبقي يبقي رئيس بأي طريقة.. دا الخطر المواجهنا. عايز يحل مشكلة المواصلات بالدعم السريع عايز يحل مشكلة العلاج و التعليم بحلول فطيرة و بالدعم السريع يستخدم كل الطرق لاسترضاء الناس ودا عشان شنو؟ لأنو المتهم الرئيسي هو و قواته في فض الاعتصام. *ما تصدقي شخص شريف ح يتورط في اي شئ ضد الثورة و الثوار مثل الخارجية و الداخلية حميدتي شغال مع الثورة المضادة بكل ما يملك لاجهاض الثورة و التشكيك فيها. لجان المقاومة يجب أن تكون صاحية و المهنيبن و النقابات وشرفاء القوات المسلحة.

ده هو الحاصل بالضبط، حميدتي بيصطاد في الموية العكرة وأهدافه واضحة وضوح الشمس

سلام للجميع يا جماعة ختوا الرحمن في قلوبكم . يمين دي ثورة قوية اكتر من ما يتصور الحرامية . شهداء المتاريس لما ماتوا كانوا عارفين اخوانهم راكزين .
مافي زول بينخدع بعد غسيل ومكوة وسرقة دشيليون سنة وشهرين
تلاتين سنة والامة كلها شغالة عبيد لي البشير و جماعتو .
تلاتين سنة والشعب يدفع لي كضب الجريح والشهيد والنفايات
والبطاطس .
تاني ما حنصدق الا الشوارع التي لا تخون .
ما حنصدق الحناكيش الممسحين بي كريمات بوكو حرام .
تف علي الكذابين .

الكنداكة الصامدة إمتثال

تحياتي ,,,

جماعة الهوس الديني وهم كثر, ليست لهم مهام سوى التشكيك فى الثورة وحكومتها .. لذلك بديهي أن تسمعي وتقرأي ما يشيب .. هذا ما تبقى لهم من مهام .. ثلاثون سنة وما عايزينهم حتى ما يشككوا ولا يزرعوا فتنة ؟ ليه الظلم ده ؟ أتركوهم واستمتعوا بعمليات القلع الموعودين بيها منذ عقود

ما فهمنا شي والبوست راح شمار في مرقة
ما عارف الناس الإتداخلت دي إتداخلت عن معرفة بالكلام الكانت حتقولو الأخت إمتثال ولّ الردود دي ردود شاملة وعامة لكل الكتابات والإشاعات التي نُشرت والتي سوف تُنشر عن ما يدور داخل قحت وحكومتها.

الزميلة إمتثال, أطمئنى ,فليحدث ما يحدث فى وزارة الخارجية او فى وزارة الداخلية او حتى فى مجلس الوزراء ذات نفسه فلاالبشير ولا كيزان السؤ سيعودون لحكم هذا البلد , فالشعب والثوار مع دكتور حمدوك وحكومته للنهاية حتى يخرجوا بهذا البلد إلى بر الأمان .